Հետաքրքիր փոփոխություններ «Դիտարան» պարբերագրի համար

¹ Որոշ ժամանակ առաջ ժողովները ուրախալի հայտարարություն ստացան, որում ասվում էր, որ 2008 թ. հունվար ամսից սկսած՝ «Դիտարան» պարբերագիրը երկու տարբեր թողարկումներ է ունենալու՝ մեկը հասարակության լայն շրջանների համար, մյուսը՝ մեր քրիստոնեական եղբայրության։ Թերևս քեզ հետաքրքրեն հետևյալ հարցերը. ինչո՞վ են տարբերվելու այդ երկու թողարկումները, ո՞րն է երկու տարբեր թողարկումներ ունենալու առավելությունը, և արդյոք նոր առանձնահատկություններ ունենալո՞ւ են դրանք։

² Տարբերությունները։ Ամսի մեկով թվագրված թողարկումը նախատեսված կլինի հասարակության լայն շրջանների համար։ Այս թողարկման բոլոր հոդվածները կպատրաստվեն՝ հաշվի առնելով այն, թե ինչ թեմաներ են հետաքրքրում մարդկանց։ Իսկ ամսի 15–ով թվագրված թողարկումը նախատեսված կլինի ժողովի համար, և այդ թողարկումը չպետք է առաջարկվի քարոզչական ծառայության ժամանակ։ Այս թողարկման մեջ կտպագրվեն մեկ ամսվա ուսումնասիրության բոլոր հոդվածները, ինչպես նաև լրացուցիչ հոդվածներ, որոնք հատկապես կհետաքրքրեն մկրտված քրիստոնյաներին։ Իսկ հասարակության լայն շրջանների համար նախատեսված թողարկումը կհետաքրքրի ոչ միայն Վկաներին, այլ նաև ոչ Վկաներին, որոնք գուցե հավատում են Աստվածաշնչին։ «Արթնացե՛ք» պարբերագիրը շարունակելու է թողարկվել ընթերցողների լայն շրջանի համար, այդ թվում նաև սկեպտիկների ու այն անհատների համար, ովքեր ոչ քրիստոնեական կրոն են դավանում։

³ Առավելությունները։ Ուսումնասիրության համար նախատեսված թողարկման մեջ այլևս հարկ չի լինի բացատրել տերմինները, ինչպես օրինակ՝ «ռահվիրա» բառը, որոնք գուցե անհասկանալի լինեին ոչ Վկա ընթերցողների համար։ Այս թողարկումը կարող է նաև պարունակել տեղեկություններ հատկապես Եհովայի վկաների համար, ինչպես նաև այն ուսումնասիրողների, որոնք հոգևորապես առաջադիմում են։ Իսկ ի՞նչ կարելի է ասել հասարակության լայն շրջանների համար նախատեսված թողարկման մասին։ Քանի որ այս թողարկման մեջ ընդգրկվող թեմաները ուղղված են լինելու հասարակության լայն շրջաններին և գրվելու են նրանց համար գրավիչ ոճով, ուստի նրանք հաճույքով կընթերցեն պարբերագրի այդ թողարկումն ամբողջությամբ։ Անշուշտ, բոլոր Եհովայի վկաները օգուտներ կքաղեն պարբերագրի յուրաքանչյուր թողարկման ընթերցանությունից։ Քանի որ ամեն ամիս քարոզչական ծառայության ժամանակ մենք առաջարկելու ենք «Դիտարանի» միայն մեկ թողարկում «Արթնացե՛ք» պարբերագրի հետ միասին, ուստի կունենանք մեկ ամիս ժամանակ՝ մեր մատուցումները արդյունավետ դարձնելու համար։

⁴ Նոր առանձնահատկություններ։ Հասարակության լայն շրջանների համար նախատեսված թողարկումը մի քանի նոր առանձնահատկություններ կունենա։ Դրանցից մեկն այն է, որ այդ թողարկման մեջ շատ պարզ ձևով կքննարկվեն Աստվածաշնչի հիմնական ուսմունքները։ Մեկ այլ առանձնահատկությունն էլ այն է, որ այնտեղ ցույց կտրվի, թե ինչպես կարող է Աստվածաշունչը օգնել ընտանիքներին։ Կլինեն նաև ուսումնասիրության թեմաներ երիտասարդների համար։ Յուրաքանչյուր համարում կտպագրվի մի հոդված Աստվածաշնչի պատմությունների վերաբերյալ, որը կսովորեցնի մեզ Եհովայի հատկությունների մասին։

⁵ Մենք աղոթում ենք, որ Եհովան օրհնի այս նոր միջոցառումը՝ «Դիտարան» պարբերագրի հետ կապված։ Թող որ այս պարբերագրի, ինչպես նաև «Արթնացե՛ք»–ի օգնությամբ բարի լուրը հասնի ավելի շատ մարդկանց, որոնք արժանի են այդ լուրը լսելու (Մատթ. 10։11)։