Մենք պետք է պահպանենք մեր եռանդը ծառայության հանդեպ
1 Ամեն տարի, 1992 թվականից սկսած, Եհովայի վկաները եռանդորեն տրամադրել են ավելի քան մեկ միլիարդ ժամ ամբողջ աշխարհում Թագավորության քարոզչության և աշակերտներ պատրաստելու գործին։ Մենք անչափ երջանիկ ենք, որ այդ հրաշալի թվի մեջ կա նաև մեր համեստ լուման (Մատթ. 28։19, 20)։
2 Իհարկե, ամբողջ փառքը մենք պետք է տանք Եհովային և շնորհակալ լինենք նրանից, քանի որ նա է նեցուկ կանգնել մեզ մեր ծառայության մեջ այս «չափազանց դժվար ժամանակներում» (2 Տիմոթ. 3։1)։ Ի՞նչ պետք է անենք, որպեսզի շարունակենք եռանդորեն մասնակցել այս կարևոր գործին։
3 Եռանդուն լինելու հիմքերը։ Քարոզչության գործին մասնակցել մեզ մղում է Աստծու և մերձավորի հանդեպ սերը, ինչպես նաև մեր նվիրման համաձայն ապրելու անկեղծ ցանկությունը (Մատթ. 22։37–39; 1 Հովհ. 5։3)։ Սերը մղում է մեզ զոհողություններ անելու, որպեսզի կարողանանք լիարժեքորեն մասնակցել քարոզչական ծառայությանը (Ղուկ. 9։23)։
4 Ջանանք պահպանել մեր եռանդը։ Մեր հակառակորդը՝ Սատանան, ջանք չի խնայում, որ թուլացնի ծառայության հանդեպ մեր եռանդը։ Մեր տարածքում ապրող մարդկանց անտարբերությունը, այս աշխարհի շեղումները, առօրյա հոգսերի ճնշումը և մեր առողջության մասին մտահոգվելը ընդամենը մի քանիսն են այն բաներից, որոնց միջոցով նա փորձում է վհատեցնել մեզ։
5 Ուստի մենք պետք է մեծ ջանքեր գործադրենք, որպեսզի պահպանենք մեր եռանդը։ Մեզ համար շատ կարևոր է բորբոքել «այն սերը, որը սկզբից ունեինք»։ Դա կարող ենք անել՝ կանոնավորաբար կարդալով Աստծու Խոսքը՝ Աստվածաշունչը և խորհելով դրա շուրջ, ինչպես նաև օգտվելով այն հոգևոր միջոցներից, որ Եհովան տալիս է մեզ «հավատարիմ և իմաստուն ծառայի» միջոցով (Հայտն. 2։4; Մատթ. 24։45; Սաղ. 119։97)։
6 Աստվածաշնչի մարգարեությունների համաձայն՝ արագորեն մոտենում է Եհովայի օրը, երբ նա կկործանի ամբարիշտ մարդկանց (2 Պետ. 2։3; 3։10)։ Մեր մտքում դա հստակորեն պահելով՝ եկե՛ք ջանք չխնայենք ծառայության հանդեպ մեր եռանդը պահպանելու համար՝ լիարժեքորեն մասնակցելով Թագավորության քարոզչության և աշակերտներ պատրաստելու համաշխարհային գործին։