Համարձակորեն քարոզիր գործարար տարածքում

1. Ինչո՞ւ չպետք է վհատվենք, եթե վախենում ենք քարոզել գործարար տարածքում։

¹ Վախենո՞ւմ ես քարոզել գործարար տարածքում։ Եթե այո, ապա մի վհատվիր, որովհետև նույնիսկ Պողոս առաքյալը, թեև քաջ էր, բայց «համարձակությամբ լցվելու» կարիք ուներ, որպեսզի քարոզի բարի լուրը (1 Թեսաղ. 2։2)։ Գործարար տարածքում քարոզելու վերաբերյալ քննարկենք մի քանի հարցեր և առաջարկներ։

2. Ինչո՞ւ չպետք է անհանգստանանք, որ գուցե խանգարենք աշխատողին։

² Եթե ընդհատեմ աշխատողին, նա չի՞ դժգոհի։ Գործարար շատ վայրերում լինում են աշխատողներ, որոնց պարտականությունների մեջ մտնում է այցելուներին դիմավորելը։ Այլ խոսքով՝ նրանք սպասում են, որ ցանկացած պահի իրենց կարող են ընդհատել։ Նրանք հաճախ քաղաքավարի են լինում, որովհետև մեզ կարող են ընդունել որպես հավանական հաճախորդի։ Հագնվելով վայելուչ և լինելով ջերմ ու բարյացակամ՝ դիմացինին կմղես հարգանքով վերաբերվելու քեզ։

3. Ինչպե՞ս կարող ենք խուսափել հաճախորդներին անհանգստություն պատճառելուց։

³ Պե՞տք է մատուցումս ներկայացնեմ բազմաթիվ հաճախորդների ներկայությամբ։ Եթե հնարավոր է, ընտրիր այնպիսի ժամանակ, երբ խանութում շատ մարդ չկա, օրինակ՝ երբ նոր են բացում խանութը։ Երբ մենեջերը կամ աշխատողը մենակ լինի, այդ ժամանակ մոտեցիր նրան։ Մատուցումդ շատ կարճ ներկայացրու։

4. Ի՞նչ կարող ենք ասել գործարար տարածքում։

⁴ Ի՞նչ կարող եմ ասել։ Եթե կան մի քանի աշխատողներ, դիմիր նրանցից գլխավորին։ Կարող ես ասել. «Գործարար մարդկանց դժվար է գտնել տանը, ուստի մենք այցելում ենք ձեզ աշխատանքի վայրում։ Գիտեմ, որ հիմա աշխատանքի ժամ է, ուստի շատ ժամանակ չեմ խլի ձեզնից»։ Որպեսզի մեզ առևտրականի տեղ չդնեն, սովորաբար լավ կլինի չհիշատակել նվիրաբերության մասին, եթե, իհարկե, մեզ չեն հարցնում, թե մեր գործն ինչպես է ֆինանսավորվում։ Կարող ես մենեջերից թույլտվություն ստանալ կարճ խոսելու աշխատողների հետ, եթե, բիզնեսի բնույթը թույլ է տալիս։ Հիշյալ մատուցումը ներկայացրու նրանց։ Եթե աշխատողը զբաղված է, կարճացրու մատուցումդ և նրան թերթիկ տուր։ Եթե հնարավոր չէ աշխատողների հետ խոսել, գուցե քեզ թույլ տան գրականություն թողնելու այնտեղ, որտեղ աշխատողները կարճ ժամանակով հանգստանում են։

5. Ինչո՞ւ կարող ենք համարձակորեն քարոզել գործարար տարածքում։

⁵ Հիսուսը և Պողոսը համարձակորեն քարոզել են գործարար տարածքում։ Դու նույնպես կարող ես (Մատթ. 4։18–21; 9։9; Գործ. 17։17)։ Խնդրիր Եհովային, որ օգնի քեզ չհուզվելու և համարձակ լինելու (Գործ. 4։29)։ Գործարար տարածքում գրեթե չեն լինում «տանը մարդ չկա» հասցեներ, ուստի այստեղ ծառայությունը կարող է արդյունավետ լինել։ Փորձիր ուժերդ։