Ինչպե՞ս խաղաղություն գտնել՝ չնայած պատերազմներին
«Նախքան Աստվածաշունչ ուսումնասիրելը չէի հասկանում՝ ինչու այսքան շատ դաժանություն, անարդարություն ու խնդիրներ կան աշխարհում,– ասում է Գարին, ով նախկինում զինվորական է եղել,– բայց հիմա ներքին խաղաղություն ունեմ, քանի որ գիտեմ, որ Եհովա Աստված երկիրը ապահով վայր է դարձնելու»։
Միայն Գարին չէ, որ այսպիսի զգացումներ ունի։ Տեսնենք, թե Աստվածաշունչը ինչպես է օգնել նաև այլ մարդկանց։
ԱՍՏՎԱԾԱՇՆՉՈՒՄ ԱՍՎՈՒՄ Է. «Ո՛վ Եհովա, դու բարի ես ու ներողամիտ» (Սաղմոս 86։5)։
ԻՆՉՊԵՍ Է ԱՅՍ ՄԻՏՔՆ ՕԳՆԵԼ։ «Այս խոսքերն ինձ հավաստիացնում են, որ Եհովան ներողամիտ է։ Գիտեմ, որ նա սրտանց ներում է ինձ նախկինում՝ պատերազմի ժամանակ, իմ բոլոր արածների համար» (Ուիլմար, Կոլումբիա)։
ԱՍՏՎԱԾԱՇՆՉՈՒՄ ԱՍՎՈՒՄ Է. «Ես նոր երկինք ու նոր երկիր եմ ստեղծում։ Նախկին բաներն այլևս մտքում չեն լինի, ոչ էլ սիրտը կճնշեն» (Եսայիա 65։17)։
ԻՆՉՊԵՍ Է ԱՅՍ ՄԻՏՔՆ ՕԳՆԵԼ։ «Զինվորական տարիներին ունեցած ծանր ապրումներիս հետևանքով ես տառապում եմ հետտրավմատիկ սթրեսային խանգարումով և դեպրեսիայով։ Աստվածաշնչյան այս խոսքերը ինձ վստահեցնում են, որ շուտով Եհովան կազատի ինձ տագնապահույզ մտքերից ու մղձավանջներից։ Դրանց հետքն անգամ չի մնա ո՛չ իմ մտքում, ո՛չ սրտում։ Սա իսկապես թանկ նվեր է» (Զաֆիյռա, Միացյալ Նահանգներ)։
ԱՍՏՎԱԾԱՇՆՉՈՒՄ ԱՍՎՈՒՄ Է. «Նրա օրերում արդարը կծաղկի, և քանի դեռ լուսինը երկնքում փայլի, երկրի վրա ամենուր խաղաղություն կտիրի» (Սաղմոս 72։7)։
ԻՆՉՊԵՍ Է ԱՅՍ ՄԻՏՔՆ ՕԳՆԵԼ։ «Հաճախ եմ մտածում այս խոսքերի շուրջ։ Շուտով պատերազմի սարսափները անցյալում կմնան, ու մենք այլևս չենք անհանգստանա մեր մտերիմների ապահովության համար» (Օլեկսանդրա, Ուկրաինա)։
ԱՍՏՎԱԾԱՇՆՉՈՒՄ ԱՍՎՈՒՄ Է. «Ձեր միջի մահացածները կապրեն.... Արթնացեք և ուրախ բացականչեք, ո՛վ հողի մեջ պառկածներ» (Եսայիա 26։19)։
ԻՆՉՊԵՍ Է ԱՅՍ ՄԻՏՔՆ ՕԳՆԵԼ։ «Ընտանիքիս գրեթե բոլոր անդամները սպանվել են տուտսիների ցեղասպանության ժամանակ։ Բայց աստվածաշնչյան այս խոսքերը ինձ ամուր հույս են տալիս, որ նորից կտեսնեմ նրանց։ Կարոտով սպասում եմ այն օրվան, երբ նրանք հարություն կառնեն, ու ես դարձյալ կլսեմ նրանց ուրախ ձայները» (Մարի, Ռուանդա)։
ԱՍՏՎԱԾԱՇՆՉՈՒՄ ԱՍՎՈՒՄ Է. «Եվս մի փոքր ժամանակ, և անօրեններն այլևս չեն լինի.... Իսկ հեզերը կժառանգեն երկիրը և ապրելով լիակատար խաղաղության մեջ՝ անսահման ուրախություն կվայելեն» (Սաղմոս 37։10, 11)։
ԻՆՉՊԵՍ Է ԱՅՍ ՄԻՏՔՆ ՕԳՆԵԼ։ «Թեև պատերազմն ավարտվել է, բայց անարդարությունն ու չար մարդիկ դեռ կան։ Աստվածաշնչյան այս խոսքերը շատ մխիթարական են ինձ համար։ Եհովան տեսնում է ամեն ինչ ու հասկանում է՝ ինչերի միջով եմ անցնում։ Նա խոստանում է, որ շուտով ամեն տառապանք կվերանա և ընդմիշտ կմոռացվի» (Դալեր, Տաջիկստան)։
Այս մարդիկ, ում խոսքերը մեջբերված են, այն միլիոնավոր Եհովայի վկաների թվում են, ովքեր Աստվածաշնչի շնորհիվ խաղաղություն են գտել։ Այն օգնել է նրանց ձերբազատվել ռասայական, ազգային, էթնիկական և միջանձնային թշնամանքից (Եփեսացիներ 4։31, 32)։ Եհովայի վկաները չեզոք են քաղաքական հարցերում և չեն ուզում ներգրավվել որևէ հակամարտության ու բռնության որևիցե դրսևորման մեջ (Հովհաննես 18։36)։
Եհովայի վկաները նաև մեծ մխիթարություն ու սիրառատ աջակցություն են գտնում իրենց համաշխարհային եղբայրության մեջ (Հովհաննես 13։35)։ Օրինակ՝ Օլեկսանդրան, ում խոսքերը մեջբերվեցին, պատերազմի պատճառով ստիպված է եղել իր քրոջ հետ փախչել այլ երկիր։ Նա պատմում է. «Հենց սահմանն անցանք, տեսանք, որ տեղի Վկաները եկել են մեզ դիմավորելու։ Նրանց աջակցության շնորհիվ կարողացանք հարմարվել նոր երկրում փախստականի կարգավիճակով ապրելուն»։
Սրտանց հրավիրում ենք ձեզ ներկա լինել մեր հանդիպումներին, որտեղ կարող եք ավելին իմանալ խաղաղ աշխարհի վերաբերյալ Աստվածաշնչի խոստման մասին և սովորել, թե ինչպես է հնարավոր այսօր իսկ խաղաղություն ունենալ։ Այցելեք jw.org կայք, որ գտնեք հանդիպումների անցկացման ձեզ ամենամոտ վայրը կամ հայտ լրացնեք Աստվածաշնչի ինտերակտիվ դասընթացի համար, որն անցկացվում է Եհովայի վկաներից մեկի օգնությամբ «Վայելիր կյանքը հավիտյան» հրատարակության միջոցով։