Կրնա՞ս ուրիշները զգուշացնելու մէջ աւելի՛ն ընել

Պտոյտ մը Շուկայ թաղին մէջ խորագրով անձայն ֆիլմը կը հրապուրէ հանդիսատեսները, մինչ կը ցուցնէ թէ մարդիկ ինչպէ՛ս կ’ապրէին 20–րդ դարուն սկիզբը, ԱՄՆ–ի Սան Ֆրանսիսգօ քաղաքին մէջ։ Ֆիլմը յօրինողները լուսանկարչական մեքենան տեղաւորած էին հանրակառքի մը առջեւ, որ խճողուած պողոտային մէջէն անցաւ։ Ֆիլմին տեսարանները կը պարփակեն՝ ձիակառքեր եւ հին–տիպի ինքնաշարժներ, ինչպէս նաեւ՝ օրաթերթեր բաշխող տղաք եւ գնորդներ, իրենց առօրեայ աշխատանքներուն ընթացքին։

18 ապրիլ 1906–ին, հաւանաբար ֆիլմը նկարահանուելէ քանի մը օր ետք, քաղաքը հարուածեց մահաբեր երկրաշարժ մը ու հրդեհ մը, որ հազարաւորներու կեանքը խլեց եւ գրեթէ քաղաքին այդ մասը կործանեց,– դէպք մը՝ որ ֆիլմը աւելի ողբերգական կը դարձնէ։ Հաւանաբար, ֆիլմին մէջ երեւցած անհատները ապրելիք միայն քանի մը օր ունէին։ Սքոթ Մայլզ, ֆիլմը յօրինողներէն մէկուն զարմը, կ’ըսէ. «Կը տեսնեմ մարդիկը այդ վայրին մէջ, բոլորովին անտեղեակ թէ շուտով ի՛նչ պիտի պատահի իրենց։ Եւ չես կրնար անոնց չկարեկցիլ»։

Պարագան նոյնն է ներկայիս։ Մենք եւս մեր ընկեր արարածին հանդէպ կարեկցութիւն ունինք։ Անոնք իրենց առօրեայ աշխատանքներուն կ’երթան, առանց գիտնալու որ հորիզոնին վրայ աղէտ մը կայ,– այս չար աշխարհի կործանումը։ Սակայն աննախատեսելի երկրաշարժին հակառակը, կարճատեւ պատեհութիւն ունինք մեր ընկեր արարածները զգուշացնելու, որ Եհովայի դատաստանի օրը մօտ է։ Շատ հաւանաբար, իւրաքանչիւր շաբաթ ժամանակ կը տրամադրես դռնէ դուռի ծառայութեան։ Բայց արդեօք կրնա՞ս ուրիշները զգուշացնելու մէջ աւելի՛ն ընել։

ՅԻՍՈՒՍ ԱՄԷՆ ԱՏԵՆ ԿԸ ՔԱՐՈԶԷՐ

Յիսուսի օրինակը ուշադրութեան արժանի է, քանի որ ան ամէն պատեհութիւն կ’օգտագործէր բոլորի՛ն քարոզելու։ Օրինակ, ան խօսեցաւ մաքսապետի մը հետ, որուն հանդիպեցաւ ճամբուն վրայ, եւ խօսեցաւ կնոջ մը հետ, երբ կը հանգչէր ջրհորի մը քով (Ղուկ. 19։1-5. Յովհ. 4։5-10, 21-24)։ Նոյնիսկ երբ հանգստանալու ժամանակ ունէր, Յիսուս կամովին իր ծրագիրները փոխեց, որպէսզի կարենայ ուրիշներուն սորվեցնել։ Մարդոց հանդէպ իր կարեկցութիւնը զինք մղեց, որ լաւագոյն կերպով ուսուցանէ (Մար. 6։30-34)։ Յիսուսի հրատապութեան զգացումը ներկայիս ինչպէ՞ս կ’ընդօրինակուի։

ԱՆՈՆՔ ԱՄԷՆ ՊԱՏԵՀՈՒԹԻՒՆ Կ’ՕԳՏԱԳՈՐԾԵՆ

Մելիքան յատուկ հսկողութեան տակ գտնուող շէնքի մը մէջ կ’ապրի։ Իր դրացիներէն շատեր օտար աշակերտներ են, որոնց հեռախօսիկներուն թիւերը անծանօթ կը պահուին եւ անոնց անունները շէնքին նախասրահին հասցէագրքին մէջ չեն գրուիր։ Ան ուրախ է որ ամէն պատեհութիւն կ’օգտագործէ, որ Աստուածաշունչի վրայ հիմնուած խօսակցութիւններ սկսի նախասրահին կամ վերելակին մէջ հանդիպած մարդոց հետ։ Ան կ’ըսէ. «Ձեւով մը, այս տեղը իմ թաղամասս կը համարեմ»։ Ան միշտ ձեռքի տակ ունի տարբեր լեզուներով հրատարակութիւններ, եւ իր դրացիներէն շատեր կ’ընդունին թերթիկներ եւ պարբերաթերթեր։ Ասկէ զատ, Մելիքան անոնց ուշադրութեան կը յանձնէ մեր կայքէջը՝ www.pr418.com։ Այսպիսով, ան Աստուածաշունչի քանի մը ուսումնասիրութիւններ սկսած է։

Սոնիան եւս վկայելու մէջ զգաստ է։ Ան կ’աշխատի դարմանատան մը մէջ եւ նպատակակէտ դրաւ իւրաքանչիւր գործակիցի լիովին վկայել։ Նախ, ժամանակ տրամադրեց իւրաքանչիւր անհատին կարիքներն ու հետաքրքրութիւնները գիտնալու։ Ապա, ճաշի դադարները օգտագործեց իւրաքանչիւրին հետ հոգեւոր խօսակցութիւն սկսելու։ Առ ի արդիւնք, Սոնիան կրցաւ Աստուածաշունչի երկու ուսումնասիրութիւն սկսիլ։ Ան նաեւ կը ծրագրէ իր ճաշի դադարներուն ընթացքին դարմանատան մուտքի սենեակին մէջ ըլլալ, որպէսզի քարոզէ անոնց՝ որոնք իրենց ժամադրութիւններուն կը սպասեն։

ՊԱՏԵՀՈՒԹԻՒՆՆԵՐԴ ՕԳՏԱԳՈՐԾԷ

1906–ի երկրաշարժէն վերապրող մը զայն կը կոչէ՝ «ցարդ ամէնէն սարսափելի աղէտը, որ նահանգ մը կամ քաղաք մը հարուածած է»։ Բայց բոլոր աղէտները ոչինչ են եթէ համեմատենք Աստուծոյ վրէժխնդրութեան օրուան հետ, որ ‘Աստուած չճանչցողներուն’ վրայ պիտի հասնի (Բ. Թես. 1։8)։ Եհովան խորապէս կը փափաքի որ մարդիկ իրենց մտքի ու սրտի վիճակը փոխեն եւ իր Վկաներուն հաղորդած ազդարարական պատգամին ընդառաջեն (Բ. Պետ. 3։9. Յայտ. 14։6, 7)։

Պատիւ ունիս մարդոց օգնելու որ հասկնան, թէ դաժան ժամանակներու մէջ կ’ապրինք, եւ անհատական հետաքրքրութիւններ հետապնդելու փոխարէն Եհովան փնտռեն (Սոփ. 2։2, 3)։ Կրնա՞ս իւրաքանչիւր պատեհութիւն օգտագործել վկայելու համար գործակիցներուդ, դրացիներուդ եւ օրուան ընթացքին հանդիպած անհատներուդ։ Ուրիշները զգուշացնելու մէջ աւելի՛ն պիտի ընե՞ս։