Պարզում 1995–Ի Նահանգային Համաժողովին Առնչութեամբ

¹ Ի՜նչ խայտալի է ներկայ ըլլալ հոգեւոր խնճոյքներուն, ըլլան ժողովքային հանդիպումները, շրջանային համաժողովները, մէկ օրուայ մասնաւոր համաժողովները կամ նահանգային համաժողովները։ Ինչո՞ւ։ Աստուածավախ անհատներու հետ ընկերակցիլը սփոփիչ է եւ այդ առիթներուն ներկայացուած հոգեւոր նիւթերը մեզի կը վերյիշեցնեն աւելի մեծ կարեւորութիւն ունեցող բաները։

² Վերջին տարիներուն երթալով աւելի հազարաւոր անհատներ ներկայ եղած են այսպիսի հոգեւոր հաւաքոյթներուն։ 1985–էն մինչեւ 1994, ժողովքներուն թիւը համայն աշխարհի մէջ աւելցած է 50 առ հարիւրէ աւելի, 49,716–էն մինչեւ 75,573։ Մինչ Եհովա հունձքի գործը կ’արագացնէ, նահանգային եւ շրջանային համաժողովներուն թիւը կ’աւելնայ։ (Եսայ. 60։22) Նոյնիսկ Միացեալ Նահանգներու մասնաճիւղին թաղամասին մէջ տեղի ունեցած համաժողովներուն յաւելումը, 1985–ին 113 համաժողովներ իսկ 1994–ին՝ 168, կը ցոլացնէ այս հսկայ աճումը ժողովքներուն թիւին մէջ։ Այս համաժողովները կարգադրելը ու վարելը երթալով աւելի ընդարձակ գործ պահանջած է։ Քանի որ կը հաւաքուինք պատրաստուած հոգեւոր յայտագրէն օգտուելու համար, իմաստութիւն է պարզել ֆիզիքական կարգադրութիւններուն հոգ տանիլը, գործնական եղածին չափ։

³ Առնուելիք Յաւելեալ Քայլեր. Մենք Եհովայի կը նայինք իր օրհնութեան համար մինչ աստիճանաբար կը յառաջդիմենք։ Մենք ուրախ ենք տեսնելով որ ան իր ժողովուրդին շնորհած է պէտք եղած իմաստութեան ու հասկացողութեան հոգին։ Մենք կը մղուինք համաձայնելու որ հաւատարիմ ծառայ դասակարգին միջոցաւ, Յիսուս Քրիստոս ազդուօրէն իրերը առաջնորդած է այնպէս որ Եհովայի նպատակը սքանչելի կերպով մը իրագործուի։ (Մատթ. 24։45-47. Կող. 1։9, 10) Մեր Թագաւորութեան Ծառայութեան թերթիկին Դեկտեմբեր թիւին մէջ ծանուցում մը նշեց. «1995–ի նահանգային համաժողովներէն եւ Սեպտեմբեր 1995–ի շրջանային համաժողովներէն ու մէկ օրուայ մասնաւոր համաժողովներէն սկսեալ, ճաշի սպասարկութիւն պիտի չըլլայ։ Իւրաքանչիւր անհատ իր հետ պիտի բերէ իր ուտելիքն ու խմելիքը»։ Շրջանային համաժողովները եւ մէկ օրուայ մասնաւոր համաժողովները պիտի շարունակեն իրենց ներկայ ճաշի սպասարկութեան կարգադրութիւնները մինչեւ Օգոստոս 1995։ Այս ծանուցումին հանդէպ դրական ընդառաջում եղած է։ Թերեւս կը հետաքրքրուիք գիտնալ թէ այս փոփոխութիւնը ինչպէ՛ս օգտակար պիտի ըլլայ։ Հաւանաբար հետեւեալ վերաքաղը այն վերաճշդումներուն որոնք վերջին տարիներուն եղան, լաւ վերյիշեցում մը պիտի ըլլայ այն օգուտներուն զորս արդէն քաղած ենք պարզելով համաժողովներուն մէջ կատարուելիք գործը։

⁴ Նախկին Վերաճշդումները. Նահանգային համաժողովներու պարզուած կարգադրութիւնները կատարելէ առաջ, ինչպէս՝ ճաշի սպասարկութիւնը, կամաւորներու սպասարկութիւնը եւ իջեւանելու սպասարկութիւնը, շատ գործ կը պահանջուէր տեղական հազարաւոր եղբայրներէն ու քոյրերէն համաժողովէն առաջ։ Նկատի առնելով մեր եղբայրներուն դիմագրաւած առօրեայ կեանքի ճնշումները եւ կազմակերպութեան յարատեւ աճումը, արդարեւ անհրաժեշտ էր վերաճշդում ընելը գործը պարզելու համար։ Ասկէ զատ, 1978–ին Միացեալ Նահանգներուն մէջ, մեր ճաշի սպասարկութիւնը պարզելուն որպէս արդիւնք, աւելի քան 70,000 եղբայրներ ու քոյրեր որոնք սովորաբար ծանր կ’աշխատէին նիստերուն ընթացքին որպէսզի մեզի ճաշ պատրաստեն, կրցան յայտագրին մտիկ ընել։ 1987–ին յաւելեալ պարզում կատարուեցաւ ճաշի սպասարկութեան առնչութեամբ համաժողովներուն մէջ եւ յաջորդ ծառայութեան տարուան ընթացքին՝ Համաժողովի Սրահներուն մէջ։ Աւելի ետքը, նահանգային ու շրջանային համաժողովներուն ուտելիքները ձրիաբար մատչելի եղան ներկայ եղողներուն։ Ասոնք ի՜նչ լաւ վերաճշդումներ էին, գործը աւելի թեթեւ դարձնելով եւ թոյլ տալով որ աւելի ուշադրութիւն ընծայուի համաժողովին հոգեւոր երեսակներուն եւ աշխատողները կարենան աւելի լսել ու վայելել յայտագիրը։ (Բ. Օր. 31։12) Մեր մէջ եղող ուղղամիտները որոնք հաւատարիմ ծառայութեան երկար տարիներ ունին, լաւ կը յիշեն այս յառաջդիմութիւնները եւ երախտապարտութիւն արտայայտած են ստացուած առաջնորդութեան համար։ Բայց ի՞նչ գործ նաեւ կարելի է ջնջել որպէսզի ա՛լ աւելի անհատներ հոգեւոր յայտագրէն լման կերպով օգտուին։

⁵ Ակնկալուած Փոփոխութիւններ. Այն տարիներուն ընթացքին երբ պարզուած ճաշացուցակ մը պատրաստուած էր ու կը ներկայացուէր, նկատուած էր որ յարաբերաբար ‘քիչ բաներ’ իրապէս ‘պէտք էին’։ (Բաղդատել Ղուկաս 10։38-42։) Սակայն, այսպիսի քիչ բաներ բազմապատկելով ներկայ եղողներուն թիւին հետ տակաւին ներկայացուցին հսկայ մթերք ու աշխատանք, ինչպէս նաեւ յաւելեալ սուղ գործիքներ։ Նաեւ, շատ կամաւորներու կարիքը կար կարգադրութիւնները կազմակերպելու ու անոնց թիկունք կանգնելու։ Կերակուրները մթերելու ու բաշխելու կեդրոններ պէտք էր հայթայթուէին։ Ասկէ զատ, կարգ մը քաղաքապետական առողջապահութեան կեդրոններ ծայրայեղ էին իրենց պահանջներուն մէջ ճաշի սպասարկութեան նկատմամբ, եւ ասիկա բեռ մըն էր պատասխանատու եղբայրներուն համար։ Ընկերութեան յետակառքի ձեւով սառնարանները պէտք էր բեռցուէին ղրկուած կերակուրներով, շատ մը մղոններ փոխադրուէին եւ պարպուէին։ Այս բոլորին նկատմամբ Ընկերութիւնը մեծ պատասխանատուութիւն կը վերցնէր։ Յետակառքերը նաեւ կը պահանջէին նորոգութիւն, պահպանում եւ ընտրուած ճամբաներով ղրկուիլ, ինչ որ պարփակեց գործ, ժամանակ ու ծախս։ Յաւելեալ պարզումով, այլեւս համաժողովին գործածութեան համար պէտք պիտի չըլլայ յետակառքի ձեւով սառնարաններու, ոչ ալ զիրենք տեղափոխող քարշակներու։ Ասկէ զատ, շատ մը եղբայրներ այս գործիքներուն հոգ տանելու մեծ աշխատանքէն պիտի հանգստանան։

⁶ Այս մարզերուն մէջ գործող կամաւորներուն յօժար ծառայութիւնը անգին էր եւ շատ գնահատուած էր։ Սակայն, այս յաւելեալ պարզումով, այն հազարաւոր անհատները որոնք նորոգութիւն կ’ընէին եւ բեռնակառքեր կը վարէին ինչպէս նաեւ կերակուրները ծախու կ’առնէին, կը պատրաստէին, կը ղրկէին ու կը հրամցնէին, պիտի կարենան իրենց ժամանակը գործածել Թագաւորութեան ուրիշ անհրաժեշտ հետապնդումներու համար, մէջը ըլլալով աւելի լման կերպով ընկերակցութիւնը վայելել համաժողովներուն մէջ։ Այն կամաւորները որոնք սովորաբար կը ծառայէին Ճաշի Սպասարկութեան մէջ, այժմ պիտի կարենան օգնել ուրիշ բաժիններու մէջ, ինչպէս՝ Հիւրընկալներ եւ Մաքրութիւն։ Ասիկա բեռը պիտի թեթեւցնէ ամէն անհատի համար եւ պիտի չպահանջէ աշխատիլ ուշ ատեն գիշերը, առտու կանուխ, կամ նիստերուն ընթացքին, ինչպէս որ էր պարագան կարգ մը անհատներու հետ Ճաշի Սպասարկութեան մէջ։

⁷ Կարգադրութիւններուն Թիկունք Կանգնիլ. Ընկերութիւնը շատ կը գնահատէ, ո՛վ եղբայրներ ու քոյրեր, ձեր «բոլոր սրտով» աջակցիլը համաժողովի կարգադրութիւններուն՝ մէջը ըլլալով ճաշի սպասարկութիւնը՝ տարիներու ընթացքին։ (Ա. Մնաց. 29։9) Ասիկա շատ մը կերպերով օգնած է։ Անիկա կարելի դարձուց որ լաւ շէնքեր վարձուին եւ համաժողովի ծախսերուն հոգ տարուի։ Անիկա նաեւ օգնած է ներկայ եղողներուն որ համաժողովի վայրին մէջ մնան կէսօրուայ կարճ դադարին ընթացքին, կարենալով դիւրաւ ճաշ ձեռք ձգել, սփոփուիլ եւ ապա ներկայ ըլլալ հոգեւոր յայտագրին։ Իսկ եղբայրներուն ու քոյրերուն առատաձեռն նուիրատուութիւնները այս հայթայթումներուն համար անկասկած պիտի շարունակուին։ Նուիրատուութիւնները գործնական կերպով իրենց գնահատութեան մէկ արտայայտութիւնն էին։—Առ. 11։25. Ղուկ. 16։9

⁸ Ձեր Կերակուրի Կարիքներուն Հոգ Տանիլ. Այս յաւելեալ վերաճշդումներով, սակայն, անհրաժեշտ պիտի ըլլայ անհատներուն եւ ընտանիքներուն որ իրենց համար հայթայթեն պէտք եղած կերակուրը կէսօրուայ դադարին ընթացքին։ Մենք մեծապէս կ’արժեւորենք հոգեւոր յայտագրին ընտիր օգուտները։ Իմաստութիւն չէ թոյլ տալ որ ֆիզիքական սնունդը անտեղի կարեւորութիւն ստանայ։ Կենսական է որ ամէն անհատ ‘զանազանէ աւելի կարեւոր բաները’ այս մարզին մէջ։ (Փիլ. 1։9, 10ա) Եհովայի ժողովուրդին վերջին մեծ համաժողովները Լեհաստանի, Ուգրանիոյ եւ Ռուսիոյ մէջ, ինչպէս նաեւ ուրիշ վայրերու մէջ, լաւ յաջողութեամբ վարուեցան առանց ճաշի սպասարկութեան կարգադրութիւններուն։ Ասկէ զատ, կարգ մը շրջաններ Միացեալ Նահանգներուն մէջ իրենց շրջանային համաժողովները եւ մէկ օրուայ մասնաւոր համաժողովները վարեցին առանց ճաշի սպասարկութեան, տեղական պարագաներու պատճառաւ։ Իւրաքանչիւր պարագային պատուիրակները իրենց կերակուրը իրենց հետ բերին։ Պիտի նկատենք որ եթէ կէսօրուայ համար թեթեւ ճաշ մը բերենք, անիկա պիտի նպաստէ որ արթուն մտավիճակ մը ունենանք, մեզ կարող դարձնելով որ լման օգուտ քաղենք կէսօրէ ետք եղած յայտագրէն։ Ասոր հետ ներդաշնակ ըլլալով, ամէն անհատ պէտք է իր հետ պարզ ու սննդարար կերակուր բերէ։ Օրինակի համար, երբ Յիսուս ժողովուրդը կերակրեց, միայն երկու նիւթեր հայթայթեց՝ հաց եւ ձուկ։ (Մատթ. 14։16-20. տես նաեւ Ղուկաս 10։42ա։) Ուստի, ուրախ ենք կարգ մը թելադրութիւններ ներկայացնելով յարմար ու գործնական եղած բաներուն նկատմամբ, նկատի առնելով կէսօրուայ դադարին աւելի կարճ ըլլալը եւ մեր գործածած դիւրութիւններուն տեսակը։

⁹ Քանի որ այլեւս համաժողովին ճաշի սպասարկութեան կարգադրութիւններ պիտի չըլլան, լաւ ծրագրելով անոնք որոնք ներկայ պիտի ըլլան, կրնան իրենց ընտանիքին հետ նախաճաշ վայելել, ըլլայ տան մէջ կամ տեղական ճաշարանի մը մէջ։ Բաւարար կերպով հանգստանալով գիշերը, կրնաք կանուխ արթննալ որպէսզի նախաճաշ ընէք ու համաժողովին հասնիք բաւարար ժամանակ ունենալով միւս պատուիրակներու հետ ընկերակցութիւն վայելելու։ Նոր կարգադրութեան ուրիշ մէկ օգուտն է որ պէտք պիտի չըլլայ որ դիւրութիւններու դռները շատ կանուխ ժամանակ բացուին ինչպէս որ էր պարագան երբ ճաշի սպասարկութեան կամաւորները ներս կը մտնէին իրենց ընտանիքներուն հետ։ Շէնքերուն դռները պիտի բացուին առաւօտուն ժամը 8–ին բոլոր պատուիրակներուն համար, բացի անոնց համար որոնք մասնայատուկ գործի նշանակումներ ունին, որոնց համար անհրաժեշտ է որ աւելի կանուխ ներս մտնեն։ Առաջուան պէս, պէտք չկայ որ մէկը աճապարանօք համաժողովի վայրը մտնէ աթոռներ ապահովելու համար, քանի որ ներկայ եղողներուն համար ծրագրուած է բաւարար աթոռներ հայթայթել։

¹⁰ Կէսօրուայ դադարը աւելի կարճ պիտի ըլլայ։ Սակայն, անիկա տակաւին պատեհութիւն պիտի տայ թեթեւ ճաշ մը առնելու եւ ուրիշներու հետ ընկերակցելու։ Այն եղբայրներն ու քոյրերը որոնք կը բնակին համաժողովի քաղաքին մէջ կամ մօտը եւ որոնք օրական տուն կը վերադառնան իրիկունը, դիւրաւ կրնան թեթեւ ճաշ մը պատրաստել ընտանիքի իւրաքանչիւր անդամին համար, իրենց հետ բերելու կէսօրուայ դադարին համար։ Ասիկա շատ պիտի նմանի այն ճաշին զոր երախաները իրենց հետ դպրոց կը տանին, թերեւս սանտուիչ մը եւ պտուղ մը, կարկանդակ մը եւ խմելիք մը։ Շատ մը մարդիկ նոյնանման ճաշեր իրենց հետ կ’առնեն երբ իրենց աշխարհային գործերուն կ’երթան։

¹¹ Ասիկա անկասկած աւելի մարտահրաւէր մը պիտի ներկայացնէ անոնց որոնք համաժողովի քաղաքէն դուրս եղող շրջաններէն պիտի գան, քանի որ անհրաժեշտ պիտի ըլլայ որ առաջուընէ ծրագրեն իրենց կէսօրուայ ճաշը։ Թերեւս կարելի է կարգ մը առարկաներ, ինչպէս անձեռոցներ եւ թուղթէ գաւաթներ, տունէն բերել ձեր հետ ճամբորդողներուն համար։ Ոմանց համար թերեւս որոշ թարմ պտուղ կամ կանանչեղէն բաւարար ըլլան, զորս կարելի է նաեւ տունէն բերել։ Ուրիշ կերակուրներ իւրաքանչիւր օրուան համար կարելի է ձեռք ձգել նպարատունէ մը համաժողովի քաղաքին մէջ։ Անշուշտ, կը գիտակցինք որ պանդոկներ գործածողներուն համար կարելի պիտի չըլլայ որ մեծ քանակով կերակուրներ սառնարաններու մէջ պահեն։

¹² Որպէս վերյիշուցում մը, հաճեցէք ՊԱՆԴՈԿԻ ՍԵՆԵԱԿՆԵՐՈՒՆ ՄԷՋ ՉԵՓԵԼ, բացի եթէ այդ նպատակին համար պզտիկ խոհանոց մը ունին։ Այդպէս ընելը վտանգաւոր ու ապօրէն է եւ կրնայ բիծերով ու իւղոտ հետքերով սենեակի կահկարասիին վնաս հասցնել։ Անիկա այդպիսի հոտեր կը պատճառէ որոնք օրեր սենեակին մէջ կը մնան։ Այս բոլորը դժուար կը դարձնեն որ պանդոկը կրկին սենեակը վարձու տայ առանց զայն մաքրելու ու գարշահոտութիւնը վանելու ծախքը վճարելու։ Այս պատճառով իմաստութիւն է գնել շուտ աւրուելու ենթակայ չեղող նիւթեր, ինչպէս կաղին, չորցուած պտուղ եւ պիսքուիթ, կամ կրնաք բերել հաց, գլանահաց կամ քաքար, եւ այլն։ Իսկ եթէ տեղական ճաշարանէ մը պատրաստ սանտուիչներ առնուին, այն ատեն հարկ չմնար ճաշ պատրաստելու պանդոկին մէջ կամ այլուր։

¹³ Որովհետեւ համաժողովին վայրը իրապէս մեծ Թագաւորութեան Սրահ մը կ’ըլլայ համաժողովին ընթացքին, նաեւ իմաստութիւն է խուսափիլ դաշտագնացութեան մթնոլորտ մը զարգացնելէ կէսօրուայ դադարին ընթացքին։ Իսկ ճիշդ ինչպէս որ Թագաւորութեան Սրահին մէջ ժողովներուն ընթացքին չենք ուտեր, նմանապէս համաժողովի նիստերուն ընթացքին պիտի չուտենք ու չխմենք։ Այն դիւրութեան մէջ ուր համաժողովը կը վարուի, թոյլատրուած չէ գործածել կերակուրները պաղ պահելու ծառայող մեծ պահեստամաններ։ Անոնք կրնան արկածներ պատճառել եւ կարելի չէ որ անցքերուն մէջ կամ աթոռներուն վրայ դրուին։ Հաւանաբար ձեռքի մեծ պայուսակներ կամ թուղթէ տոպրակներ աւելի յարմար ըլլան կէսօրուայ դադարին առնուելիք թեթեւ ճաշին։ Եթէ անհրաժեշտ է, կարելի է գործածել կերակուրը պաղ պահելու ծառայող պզտիկ պահեստաման մը որ կրնայ դրուիլ աթոռի մը տակը, ոչ թէ՝ վրան։

¹⁴ Նաեւ ուշադիր պէտք է ըլլանք թէ խմելիք պարունակող ի՛նչ տեսակ անօթներ համաժողովի վայրը կը բերենք։ Տաք խմելիքները կարելի է ջերմապահով բերել։ Որեւէ տեսակ շիշ կրնայ վտանգաւոր ըլլալ։ Շատ մը դիւրութիւններու մէջ անոնց գործածութիւնը նոյնիսկ արգիլուած է։ Հետեւաբար, կը խնդրենք որ ՈՉ ՄԷԿ ԱՊԱԿԵԱՅ ԱՆՕԹ բերուի համաժողովի վայրը։ Եթէ ձեր ընտրած պաղ խմելիքը կարելի չէ ծախու առնել այնպիսի անօթներով որոնք բլասթիքէ կամ ալիւմինիումէ շինուած են, կրնաք զայն լեցնել չկոտրուելիք ուրիշ տեսակ պզտիկ անօթի մը մէջ որ կրնայ դրուիլ ձեր աթոռին տակ։

¹⁵ Յաւելեալ Օգուտներ. Այսպիսի վերաճշդուած կարգադրութիւններու իմաստութիւնը կրնանք իրապէս նկատել։ Բոլորն ալ պիտի կարենան լման ուշադրութիւն ընծայել հոգեւոր օգուտներ ստանալուն, որ է մեր հաւաքուելուն իրական նպատակը։ Այս օգուտները կը քաղենք մեր վայելած ընկերակցութենէն ինչպէս նաեւ յայտագրէն։ Ուստի, կէսօրուայ դադարին փոխանակ դիւրութիւնը ձգելու ճաշ ապահովելու համար, որքա՜ն օգտակար պիտի ըլլայ մեր հետ բան մը բերելը։ Ասիկա կարելի պիտի դարձնէ որ մեր եղբայրներուն ու քոյրերուն ընկերակցութիւնը վայելենք եւ կէսօրէ ետք եղած յայտագրէն որեւէ բան չփախցնենք։

¹⁶ Կէսօրէ ետք յայտագրէն վերջ հոգեւորապէս կազդուրուած ըլլալով, ոմանք թերեւս կը շարունակեն Քրիստոնէական ընկերակցութիւնը վայելել եւ ներկայացուած լաւ բաներուն մասին խօսակցիլ մինչ յաւելեալ ճաշ կ’առնեն ընտանիքին ու բարեկամներուն հետ տեղական ճաշարանի մը մէջ։ Ուրիշներ թերեւս կերակուր ծախու կ’առնեն նպարատունէ մը կամ ճաշարանէ մը։ Անոնք որոնք կրնան իրենց տունը վերադառնալ, թերեւս կ’ուզեն հոն ընթրել, ինչպէս որ կ’ընեն երբ օրը կ’անցընեն աշխարհային գործին մէջ կամ դաշտի ծառայութեան մէջ։

¹⁷ Մենք իրապէս կը վայելենք հոգեւոր խնճոյքը այս շրջանային ու նահանգային համաժողովներուն մէջ, ուր կը ստանանք նոր գրականութիւններ, ընտիր ուսուցում եւ գործնական խրատներ։ Այս օրհնութիւններն են ինչ որ ամէն անհատ կը յիշէ, ինչպէս նաեւ՝ Աստուծոյ հաւաքուած ժողովուրդին հետ ըլլալու ուրախութիւնը։ Առակաց 10։22–ը կ’ըսէ. «Տէրոջ օրհնութիւնն է, որ հարստութիւն կու տայ ու անոր հետ տրտմութիւն չի խառներ»։ Պարագան այս է քանի որ որպէս Եհովայի ժողովուրդը, համաժողովներուն ներկայ չենք գտնուիր նիւթական պէտքեր հետապնդելով։ Մենք կը հաւաքուինք այն դրական փափաքով որ հոգեւոր գետնի վրայ կարելի եղած մեծագոյն օգուտը քաղենք, իսկ Եհովա մեզ առատապէս կը վարձատրէ մեր ցուցաբերած հոգիին համար։—Ա. Տիմ. 6։6-8. Եբր. 11։6

¹⁸ Քաջալերութեան այս առիթները նաեւ մեզի կը վերյիշեցնեն հոգեւոր հունձքին յառաջդիմութիւնը։ (Յովհ. 4։35, 36) Եսայեայ 54–րդ գլուխի բացման խօսքերը հրաւէր կու տան Եհովայի կնոջանման կազմակերպութեան որ պատրաստուի բերկրալի յաւելումներու համար։ Յաւելեալ աճում, ընդլայնում եւ վերանորոգուած զօրութիւն ակնկալուած են ինչպէս որ Եսայի մարգարէացաւ. «Վրանիդ տեղը լայնցուր, քու բնակարանիդ վարագոյրները թող տարածուին. մի՛ խնայեր, չուաններդ երկնցուր ու ցիցերդ ամրացո՛ւր։ Քանզի աջ ու ձախ կողմը պիտի տարածուիս»։ Այս հոյակապ մարգարէութեան կատարումը յառաջ բերած է ճշմարիտ պաշտամունքին եզական ընդլայնումը զոր այժմ կը նկատենք։—Եսայ. 54։1-4

¹⁹ Իրապէս լաւ դատողութիւն է կատարել այս համաժողովի յաւելեալ պարզուած կարգադրութիւնը, այնպէս որ նուազ զբաղումով բոլորն ալ պիտի կարենան պատրաստուած հոգեւոր յայտագիրը վայելել։ Վստահ ենք որ Եհովա նաեւ պիտի օրհնէ այս կարգադրութիւնը, քանի որ ան թոյլ պիտի տայ որ աւելի ազդեցիկ կերպով ձեռք առնուի յաւելեալ աճումը։ Պէտք եղածին վրայ կեդրոնանալով, պիտի վայելենք ուրախ ընկերակցութեան ու հոգեւոր լաւ բաներուն համար ծրագրուած օրերը։ Մեր ջերմ աղօթքն է որ Եհովա օրհնէ մեր բոլոր ջանքերը մինչ կը շարունակենք հաւաքուիլ ու իր սեղանէն կերակրուիլ։—Բաղդատել Բ. Օրինաց 16։14, 15։

[Շրջանակ՝ էջ 6]

Ճաշի Սպասարկութեան Կարգադրութիւններ Չըլլալուն Օգուտները

◼ Նուազ աշխատանք յայտագրէն առաջ, ընթացքին եւ ետք, թոյլատրելով աւելի ընկերակցութիւն

◼ Ճաշի սպասարկութեան պահպանուելիք որեւէ կազմած չկայ

◼ Աւելի անհատներ կրնան հոգեւոր յայտագրին լման ուշադրութիւն ընծայել

◼ Աւելի կամաւորներ մատչելի են ուրիշ բաժիններու օգնելու

◼ Աւելի ժամանակ մատչելի է ուրիշ աստուածպետական հետապնդումներու տրամադրելու

Կէսօրուայ Դադարին Համար Թելադրուած Բերուելիք Նիւթեր

◼ Թեթեւ, պարզ ու սննդարար ճաշի նիւթեր

◼ Չորցուած պտուղներ, կաղին, խմորեղէն, թարմ պտուղ

◼ Եթէ անհրաժեշտ է, կերակուրը պաղ պահելու ծառայող պզտիկ պահեստաման

◼ Չկոտրուելիք անօթներով անալքօլ խմիչք, օշարակ, կամ խմելիք ջուր

Համաժողովի Դիւրութեան Մի՛ Բերէք

◼ Ոգելից ըմպելիներ

◼ Ապակեայ անօթներ

◼ Կերակուրները պաղ պահելու ծառայող մեծ պահեստամաններ