1997–Ի «Աստուծոյ Խօսքին Հաւատք Ընծայենք» Բնաբանով Նահանգային Համաժողով

¹ Պօղոս առաքեալ Տիմոթէոսի յիշեցուց թէ «բոլոր գիրքը Աստուծոյ շունչն է»։ (Բ. Տիմ. 3։16) Քանի որ Աստուծոյ Խօսքը ներշնչուած է, ամէն պատճառ ունինք անոր հաւատք ընծայելու։ Այս տարուան նահանգային համաժողովի բնաբանն է՝ «Աստուծոյ Խօսքին Հաւատք Ընծայենք»։ Յայտագիրը Աստուածաշունչին հանդէպ մեր հաւատքը պիտի զօրացնէ, ըլլանք անհատներ որոնք ճշմարտութիւնը տարիներէ ի վեր գիտենք, կամ՝ Եհովայի կազմակերպութեան դեռ վերջերս ծանօթացած ենք։ Բոլորս ալ կարգադրութիւններ պէտք է ընենք, որպէսզի լման յայտագրին ներկայ գտնուինք։ Որքա՜ն շինիչ պիտի ըլլայ, եթէ նոր հետաքրքրուած անհատներ, յատկապէս՝ մեր Աստուածաշունչի աշակերտները, մեզի հետ ներկայ ըլլան։

² Եռօրեայ Համաժողով. Այս տարի եռօրեայ նահանգային համաժողով մը յայտագրուած է մեր օգտին համար։ Դիտարան 15 Փետրուար 1997–ի համարը (Անգլերէն), Միացեալ Նահանգներու մէջ տեղի ունենալիք 193 համաժողովներու ցանկը կու տայ։ Արդէն իսկ տեղեկացած պէտք է ըլլաք ձեր ժողովքին նշանակուած համաժողովին նկատմամբ եւ հաստատ յայտագիրներ ըրած՝ եռօրեայ ամբողջ յայտագրին ներկայ գտնուելու համար։ Ձեր գործատիրոջմէն պէտք եղած արձակուրդը խնդրա՞ծ էք։ Եթէ դպրոց յաճախող զաւակներ ունիք եւ ձեր համաժողովը կը զուգադիպի դպրոցական շրջանին, ազնիւ կերպով անոնց ուսուցիչները տեղեակ պահա՞ծ էք որ Ուրբաթ օրը դպրոցէն պիտի բացակային, իրենց կրօնական մարզումին այս կարեւոր երեսակին պատճառով։—Բ. Օր. 31։12

³ Համաժողովները, Անգլերէն լեզուէն զատ, հետեւեալ լեզուներով ալ պիտի ըլլան. Ամերիկեան Համրերու Լեզու, Թակալոկ, Իտալերէն, Ճափոներէն, Յունարէն, Չինարէն, Սպաներէն, Վիեթնամերէն, Փորթուկալերէն, Քորէայերէն եւ Ֆրանսերէն։

⁴ Երեք օրերուն ալ, յայտագիրը պիտի սկսի առաւօտուն ժամը 9։30–ին։ Դռները առաւօտուն ժամը 8։00–ին պիտի բացուին։ Մի՛միայն գործի նշանակումներ ունեցողները կրնան վայրը մտնել այդ ժամանակէն առաջ, սակայն անոնք չեն կրնար աթոռներ ապահովել մինչեւ որ սրահին դռները բոլորին համար բացուին։—Փիլ. 2։4

⁵ Աղէկ կ’Ընենք՝ Եթէ Ուշադրութիւն Ընենք. Պօղոս առաքեալ առաջին դարու Քրիստոնեաներուն յիշեցուց թէ աղէկ կ’ընէին եթէ մարգարէական խօսքին ուշադրութիւն ընէին, որպէս թէ մութ տեղը լոյս տուող ճրագի մը։ (Բ. Պետ. 1։19) Միեւնոյնը շիտակ է մեր պարագային։ Սատանայի իշխանութեան ներքեւ եղող այս հին աշխարհին մէջ ապրիլը, խաւար տեղ մը ըլլալու նման է։ Երախտապարտ ենք որ հոգեւոր խաւարէն դուրս կանչուած ենք։ (Կող. 1։13. Ա. Պետ. 2։9. Ա. Յովհ. 5։19) Լոյսի մէջ մնալու համար, պէտք ունինք մեր հաւատքը զօրաւոր պահելու, Եհովայի ներշնչուած Խօսքին ուշադրութիւն ընծայելով։ Ամառուան մեր նահանգային համաժողովը պիտի քաջալերէ մեզ որ ճի՛շդ ասիկա ընենք։

⁶ Մեր կողմէ ջանք կը պահանջուի, եթէ կ’ուզենք յայտագրին վրայ կեդրոնանալ, բայց ասիկա ընելով, վստահաբար պիտի օրհնուինք։ Պէտք է ջանանք համաժողովի վայրը գալ բաւարարաչափ հանգստանալէ ետք, որպէսզի արթուն ըլլանք բաժիններու ընթացքին։ Իւրաքանչիւր օր համաժողովի վայրը հասնելու, բաւարար ժամանակ տրամադրեցէք, որպէսզի յայտագիրը չսկսած ձեր աթոռը գրաւէք։ Իւրաքանչիւր օրուան յայտագրին սկիզբը՝ բացման երգեցողութեան ու աղօթքին մասնակցեցէք։ Չափահասները օրինակ պէտք է հանդիսանան ու ծնողներ պէտք է իրենց զաւակները մարզեն։—Եփ. 6։4

⁷ Եթէ օրուան յայտագիրը չսկսած բաժիններուն խորագիրները աչքէ անցընենք, կրնանք ակնկալել թէ այդ բաժնի ընթացքին ի՛նչ կէտեր կրնան ներկայացուիլ։ Ասիկա ընելը նիւթին հանդէպ մեր հետաքրքրութիւնը պիտի աւելցնէ, երբ անիկա ներկայացուի։ Կրնանք ուշադրութիւն ընել կարգ մը կէտերու, որոնք պիտի օգնեն մեզի ուրիշներուն բացատրելու, թէ՝ ինչո՛ւ Աստուծոյ եւ զինք փնտռողներուն վարձահատոյց ըլլալու իր վստահելի խոստումին կը հաւատանք։ (Եբր. 11։1, 6) Յանձնարարուած է հակիրճ նոթեր առնել, որպէսզի յայտագրին գլխաւոր կէտերը յիշենք։ Եթէ շատ նոթեր առնենք, կրնանք բանալի կէտեր կորսնցնել, քանի որ նոթագրելով շատ զբաղած կ’ըլլանք։

⁸ Անցեալ տարի, դարձեալ նկատուեցաւ որ չափահասներէն ու պատանիներէն շատեր յայտագրի ընթացքին, կը թափառէին նրբանցքներուն մէջ, կը դեգերէին դուրսերը ուրիշներու քով երթալով, փոխանակ մեր օգտին համար ‘հաւատարիմ ու իմաստուն ծառային’ հայթայթած նիւթերը մտիկ ընելու։ Յիսուս խոստացաւ ժամանակայարմար հոգեւոր կերակուր տալ։ (Մատթ. 24։45-47) Ուստի, այդ կերակուրէն օգտուելու համար, պէտք է ներկայ ըլլանք ու գնահատութեան պակաս չցուցաբերենք։ (Բ. Կորն. 6։1) Այնպէս կը թուի, թէ երբ կարգ մը մանուկներ անհանդարտ դառնան, յաճախ արտաքնոց երթալ կ’ուզեն, իրենց տեղէն ելլելով պտըտելու համար։ Տան մէջ տրուած պատշաճ մարզումը, սովորաբար պիտի պակսեցնէ անհրաժեշտ չեղող պատճառներով անդադար արտաքնոց երթալը։ Երբեմն, աւելի մեծ պատանիներ միասնաբար կը նստին մեկուսի վայրերու մէջ, խօսելով, փսփսալով եւ թուղթերու վրայ իրարու նոթեր գրելով։ Մեր պատանիները, որոնք ներկայիս բազմաթիւ ճնշումներ կը դիմագրաւեն, ներկայացուած նիւթերուն ուշադրութիւն ընծայելու կարիքը ունին, եւ պէտք չէ յայտագրի ընթացքին ուրիշ բաներ ընելով զբաղին։ Աստուածաշունչի սկզբունքներուն հետ ներդաշնակ չեղող երիտասարդական ցանկութիւններէն պէտք է խուսափին։ (Բ. Տիմ. 2։22) Երբ բոլորը՝ մէջը ըլլալով չափահասները եւ պատանիները՝ ուշադրութիւն ընծայեն յայտագրին, ասիկա Եհովան պիտի պատուէ ու զինք պիտի ուրախացնէ։

⁹ Եթէ անհրաժեշտ ըլլայ որ հիւրընկալներէն մէկը այս հարցերուն նկատմամբ մէկու մը խրատէ, ան ասիկա պէտք է ընդունի որպէս Եհովայի կողմէ սիրալիր հայթայթում մը։ (Գաղ. 6։1) Բոլորս ալ պէտք է յիշենք որ համաժողովի յաճախելու համար մեր թափած ջանքերուն պատճառը ‘լսելու եւ սորվելու’ համար է։ (Բ. Օր. 31։12) Նաեւ, ‘իմաստունը կը լսէ ու իր իմաստութիւնը կ’աւելցնէ’։ (Առ. 1։5) Համաժողովը սկսելու ժամանակը չհասած, որպէս ընտանիք նկատի առէք՝ համաժողովին իրարու քով նստելու, յայտագրի ընթացքին նստած մնալու եւ ուշադրութեամբ յայտագրին հետեւելու կարիքը, որպէսզի յայտագրէն լիովին օգտուիք։

¹⁰ Եհովան Հաճեցնող Արդուզարդ. Եհովայի ժողովուրդը, ամբողջ աշխարհին տեսարան եղած է։ (Ա. Կորն. 4։9) Ընդհանրապէս, հագուստի եւ արդուզարդի նկատմամբ մեր ընտիր չափանիշներուն համար աչքի կը զարնենք։ Ա. Տիմոթէոս 2։9, 10 եւ Ա. Պետրոս 3։3, 4–ի մէջ գտնուած սուրբ գրային սկզբունքները կիրարկելով, շատեր իրենց երեւոյթին նկատմամբ մեծ փոփոխութիւններ ըրած են, քրիստոնէական ժողովքին հետ ընկերակցելէ ետք։ Ասիկա մեծապէս կը տարբերի աշխարհի մէջ մեր տեսած հագուստի եւ արդուզարդի վերաբերեալ հետզհետէ վատթարացող չափանիշներէն։ Պէտք է զգուշանանք, որ մեր երեւոյթով աշխարհին չնմանինք—արտառոց հագուստներ հագնելով, մազի յարդարանքներու աշխարհային նորաձեւութիւններ քաջալերելով, կամ՝ անպատկառ կերպով հագուելով։ Մեր օրինակելի հագուելակերպը ու յարդարանքը, համաժողովներու յաճախող նորեկներուն պէտք է օգնէ տեսնելու, թէ Քրիստոնեաները ի՛նչպէս իրենք զիրենք պէտք է զարդարեն։

¹¹ Թէեւ անցեալ տարուան համաժողովին ձգուած ընդհանուր տպաւորութիւնը շատ նպաստաւոր էր, սակայն կարգ մը եղբայրներու եւ քոյրերու համար աշխարհային հագուստն ու արդուզարդը կը շարունակեն խնդիր մը ըլլալ, մասնաւորաբար՝ համաժողովի յայտագրէն ետք։ Երբ համաժողովի յաճախելու մեր ծրագիրները կ’ընենք, մեր հագուելակերպին ու արդուզարդին նկատմամբ մենք մեր անձերը պէտք է վերլուծենք։ Ո՛վ ծնողներ, իմաստութեամբ հսկեցէք թէ ձեր փոքրերը եւ պատանիները ի՛նչ պիտի հագնին։ Ուշադիր ըլլանք, որ աշխարհային ոճեր ու նորաձեւութիւններ քրիստոնէական մեր երեւոյթին վրայ բացասական ազդեցութիւն մը չձգեն։

¹² Մեր Վարքը Բարի Պահենք. Բարի վարքը ճշմարիտ Քրիստոնեաները բնորոշող նշաններէն մէկն է։ (Ա. Պետ. 2։12) Ուր որ ալ գտնուինք—համաժողովին, ճաշարաններու եւ պանդոկներու մէջ, ինչպէս նաեւ երբ կը ճամբորդենք—մեր վարուելակերպը կրնայ հոյակապ վկայութիւն մը տալ, ուրիշներուն օգնելով, որ տեսնեն, թէ Աստուծոյ եւ իր Խօսքին հաւատք ընծայելը ի՛նչ կրնայ ընել մարդոց։ Ասիկա ոմանց կրնայ մղել որ Եհովան ճանչնան։ (Բաղդատել՝ Ա. Պետրոս 3։1, 2։) Մեր վարմունքով Աստուած փառաբանելու առանձնաշնորհումը ունինք։ Ալապամայի պանդոկներէն մէկուն վարչութիւնը ըսաւ թէ մեր պատուիրակները «իրենց հիւրընկալած ամենէն ազնիւ ու լաւագոյն վարքը ունեցող խումբն էին»։ Աւելցուց ըսելով. «Առանձնաշնորհում մը պիտի ըլլայ, ձեզ դարձեալ հիւրընկալել ապագային»։ Միացեալ Նահանգներու հիւսիս–արեւմտեան շրջանին մէջ, համագումարի ու այցելուներու գրասենեակ մը, գրեց. «Ամէն տարի, մեր ամբողջ համայնքը Դիտարանի Ընկերութեան համաժողովը անձկալից կը սպասէ։ Ձեր անդամները իսկապէս հաճելի են. չափազանց քաղաքավար ու յարգալից։ Մեր առեւտրական հաստատութիւնները կը գիտակցին ասոր եւ ամէն տարի մեծապէս կ’արժեւորեն հիւրերու այս ‘ընտանիք’ին վերադարձը»։ Այսպիսի տեղեկագրութիւններ կարդալը հաճելի չէ՞։ Սակայն, պէտք է հսկենք, որպէսզի Եհովայի ժողովուրդին վայելած բարի համբաւը կարենանք պահպանել։

¹³ Բազմաթիւ վերյիշեցումներ տրուած են, մեր զաւակները զսպելու մասին, չարտօնելով անոնց, որ պանդոկներու շուրջ առանց հսկողութեան վազվռտեն, ուրիշ հիւրեր խանգարելով։ Ամէն տարի, Ընկերութիւնը տեղեկագրութիւններ կը ստանայ, որ մեր զաւակներէն ոմանք, առանց հսկողութեան լողարանին մէջ եւ շուրջ կը գտնուին, կամ պանդոկին նրբանցքներուն եւ հանրային վայրերու մէջ կը վազվռտեն։ Տնօրէն մը որ իր պանդոկին մէջ գիշերեց, գիշերուան ժամը 11–էն յետոյ երկու անգամ արթնցաւ, քանի որ մեր զաւակներէն ոմանք, իւրաքանչիւր սենեակին դուռը կը զարնէին, ուրիշ Վկաներ փնտռելու համար։ Թէեւ համաժողովները մեր եղբայրներուն այցելելու եւ անոնց հետ ընկերակցելու պատեհութիւնը կը հայթայթեն, ծնողներ՝ տակաւին ի մտի պէտք է ունենան, որ միշտ իրենց զաւակներուն վրայ հսկելու պարտականութիւնը ունին։ Ասիկա պատասխանատուութիւն մըն է, զոր Եհովա կը դնէ իւրաքանչիւր ծնողի վրայ։ (Առ. 1։8. Եփ. 6։4) Պզտիկներու անսանձ արարքները կրնան կործանել այն բարի համբաւը, զոր ուրիշ Եհովայի Վկաներ ժրաջան աշխատելով կերտած են։—Առ. 29։15

¹⁴ Եթէ պանդոկ մը ձեր կեցութեան ընթացքին նախաճաշ հրամցնէ, ասիկա կէսօրուան ճաշը ապահովելու պատեհութիւն մը պէտք չէ նկատէք։ Կարգ մը պանդոկներ տեղեկագրեցին թէ մեր եղբայրներէն ու քոյրերէն ոմանք, իրենց հետ բլասթիկէ տոպրակներ բերելով, զանոնք լեցուցած են պտուղներով, կարկանդակներով եւ հացերով, հետագային ուտելու համար, միւս հիւրերուն շատ քիչ բան ձգելով։ Պանդոկի այս հիւրասիրութիւնները, պանդոկի հիւրերուն հանդէպ ազնիւ նկատառութիւն մըն է եւ պէտք չէ չարաչար գործածուին։ Նախաճաշի ընթացքին, ձեզի պէտք եղածէն աւելին առնելը, իրապէս ագահ հոգի մը կը ցոլացնէ, ինչպէս նաեւ՝ անպարկեշտութիւն։ Եթէ նկատուի որ մեր հաւատակիցներէն ոմանք անպատշաճ կեցուածք մը կը ցուցաբերեն, ազնուութիւն պիտի ըլլայ իրենց յիշեցնել թէ ի՛նչպէս պէտք է վարուին։ Յիշեցէք նաեւ, որ եթէ պանդոկի սենեակները խոհանոցով մը օժտուած չեն, չենք կրնար հոն որեւէ բան եփել։ Եթէ ձեր սենեակին մէջ սառնարան մը բերէք, հաճեցէք վստահ ըլլալ որ անկէ ջուր չի կաթկթիր եւ գորգին, կահկարասիին կամ սենեակին պատերուն վնաս չի հասցներ։

¹⁵ Ի մտի ունեցէք որ ձեռաձիր տալը պատշաճ է երբ անհատապէս ծառայութիւն մը կը մատուցուի ձեզի, յատկապէս քանի որ հանրութեան ծառայողներէն շատեր՝ ինչպէս սպասեակներ եւ դարպասապահներ՝ իրենց ապրուստը մեծաւ մասամբ ձեռաձիրներով կ’ապահովեն։ Որպէս Եհովայի Վկաներ, այս առնչութեամբ կ’ուզենք բարեկիրթ ըլլալ։—Տես՝ Զարթի՛ր 22 Յունիս 1986, էջ 24-27։

¹⁶ Համաժողովի Ծախսերը Հոգանք. Բոլորս ալ համաժողովներու յաճախելու համար ծախսեր պիտի ունենանք։ Կայ նաեւ ուրիշ ծախս մը, որ լաւ կ’ըլլայ եթէ նկատի ունենանք։ Համաժողովներու համար գործածուած վայրերը սուղ են։ Ուրիշ ծախսեր ալ կան, որոնք պէտք է հոգացուին։ Համաժողովներուն, մեր կամաւոր ու առատաձեռն նուիրատուութիւնները մեծապէս գնահատելի են։—Գործք 20։35. Բ. Կորն. 9։7, 11, 13

¹⁷ Նստարաններ Ապահովել. Քանի մը տարիներէ ի վեր տրուած ուղղութիւնները պիտի շարունակուին կիրարկուիլ. ԿԱՐԵԼԻ Է ԱԹՈՌՆԵՐ ԱՊԱՀՈՎԵԼ ՄԻ՛ՄԻԱՅՆ ՁԵՐ ԸՆՏԱՆԻՔԻ ԱՆՄԻՋԱԿԱՆ ԱՆԴԱՄՆԵՐՈՒՆ ԵՒ ՁԵՐ ՀԵՏ ԻՆՔՆԱՇԱՐԺՈՎ ՃԱՄԲՈՐԴՈՂՆԵՐՈՒՆ։ Հաճելի է տեսնել, որ վերջին տարիներուն երթալով աւելի շատ անհատներ կ’ենթարկուին այս ուղղութիւններուն եւ ասիկա համաժողովներուն ցուցաբերուած սիրալիր մթնոլորտը կ’աւելցնէ։ Վայրերու մեծամասնութեանց մէջ, կարգ մը նստարաններ ուրիշներէն աւելի դիւրամատչելի են։ Հաճեցէք նկատառութիւն ցուցաբերել ու աւելի հանգստաւէտ նստարանները մասնայատուկ պարագաներ ունեցողներուն համար ձգել։

¹⁸ Լուսանկարչական Մեքենաներ, Պատկերագրող եւ Ձայնագրող Մեքենաներ. Լուսանկարչական մեքենաներ եւ երիզագրող գործիքներ գործածելը թոյլատրելի է։ Սակայն, զանոնք գործածելու ատեն, ներկաները պէտք չէ խանգարենք։ Յայտագրի ընթացքին պէտք չէ հոս–հոն երթանք նկարելու համար, քանի որ ասիկա յայտագրին հետեւողները կրնայ խանգարել։ Երիզագրող որեւէ գործիք, ելեկտրական կամ ձայնային դրութեան պէտք չէ կապուի, ո՛չ ալ արգելք հանդիսանայ անցքերուն, նրբանցքներուն, կամ ուրիշներու տեսողութեան։

¹⁹ Նախնական Դարմանում. Նախնական Դարմանումի Բաժինը ի վիճակի չէ երկարատեւ հիւանդութիւններ ունեցողներուն հոգ տանելու. անիկա միայն շտապ օգնութեան համար է։ Անոր համար է որ ձեր եւ ձեր ընտանիքին առողջապահական կարիքները, նախապէս նկատի պէտք է առնէք։ Հաճեցէք ձեր անձնական գործածութեան համար ձեր հետ բերել ասփիրին, մարսողական դեղեր, վիրակապեր, ապահով ասեղներ եւ նոյնանման պիտոյքներ. այսպիսի բաներ համաժողովին մատչելի պիտի չըլլան։ Անոնք որոնք լուսնոտութեան եւ շաքարախտի տագնապներէ, սրտի խնդիրներէ եւ այլ պարագաներէ կը տառապին, կարելի եղածին չափ պատրաստ պէտք է գտնուին որեւէ բարդութեան պարագայ նախատեսելու։ Անոնք անհրաժեշտ եղող դեղորայքը պէտք է ունենան եւ ընտանիքի կամ ժողովքի անդամներէն մէկը, որ անոնց վիճակէն տեղեակ է, միշտ անոնց քով պէտք է ըլլայ, անհրաժեշտ օգնութիւնը հայթայթելու համար։ Համաժողովներուն՝ դժուարութիւններ յարուցուած են, երբ երկարատեւ հիւանդութիւններ ունեցող անհատներ առանձին ձգուած եւ հիւանդացած են։ Համաժողովի վարչութիւնը ստիպուած, բժշկական շտապ օգնութեան դիմած է, զանոնք հիւանդանոց փոխադրելու համար։ Եթէ առողջապահական մասնաւոր կարիքներ ունեցող անհատներ, իրենց աջակցող ընտանիքի անդամներ չունին, ժողովքի երէցները անոնց պարագայէն տեղեակ պէտք է ըլլան եւ օգնելու համար անհրաժեշտ կարգադրութիւններ ընեն։ Համաժողովներուն մէջ, գերզգայնութեան (ալէրժի) խնդիրներ ունեցողներու համար մասնաւոր սենեակներու կարգադրութիւններ պիտի չըլլան։

²⁰ Համաժողովի Համար Ուտելիք. Համաժողովներուն ուտելիքի սպասարկութիւն չըլլալը պատճառ եղած է, որ շատեր ամբողջ յայտագրի ընթացքին ազատ ըլլան, կեդրոնանալով հոգեւոր ուտելիքին վրայ։ Այս կարգադրութիւնը հաստատուելէն ի վեր, անոր պարզացումին նկատմամբ, գնահատական կարգ մը արտայայտութիւններ ստացանք։ Բոլորն ալ կէսօրուան դադարին համար, իրենց անձնական, գործնական, սնուցիչ ուտելիքները պէտք է բերեն, ինչպէս որ թելադրուած է Մայիս 1995–ի Մեր Թագաւորութեան Ծառայութիւնը թերթիկին յաւելուածականի 26–րդ պարբերութեան մէջ։ Համաժողովի վայրերէն ներս, ապակեայ անօթներ եւ ոգելից ըմպելիներ պէտք չէ բերուին։ Ուտելիքի սառնարանները պէտք է պզտիկ ըլլան, որպէսզի ձեր աթոռին տակ դրուին։ Նկատուած է, որ ներկաներէն ոմանք յայտագրի ընթացքին կ’ուտեն ու կը խմեն։ Ասիկա անյարգալից բան մըն է։ Նաեւ նկատուած է, որ համաժողովի կարգ մը վայրերու մէջ, կամ՝ անկէ դուրս, ուր ուտելիք վաճառողներ կան, եղբայրներէն ոմանք յայտագրի ընթացքին գնում կ’ընեն։ Այսպիսի սովորութիւն մը անպատշաճ է։

²¹ Իրապէս կը գնահատենք մեր հոգեւոր խնճոյքը եւ կէսօրուան կարճ դադարներու ընթացքին ստեղծուած ընկերակցութեան հանդարտ, խաղաղ մթնոլորտը։ Այս կարգադրութեան նպատակին համաձայն գործելով, փոխանակ կէսօրուան դադարին ուտելիք գնելու համար համաժողովի վայրը ձգելու, հաճեցէք ձեր հետ բան մը բերել։ Հետեւաբար, աւելի ժամանակ պիտի ունենաք, ձեր եղբայրներուն եւ քոյրերուն ընկերակցութիւնը վայելելու։

²² Որքա՜ն ուրախ ենք որ «Աստուծոյ Խօսքին Հաւատք Ընծայենք» բնաբանով Նահանգային Համաժողովը շուտով պիտի սկսի։ Բոլորս ալ կ’ուզենք վստահ ըլլալ որ մեր պատրաստութիւնները ըրած ենք լման յայտագրին ներկայ ըլլալու համար, որպէսզի իր կազմակերպութեան միջոցաւ, մեզի համար պատրաստած Եհովայի ընտիր հոգեւոր կոչունքը լիովին կարենանք վայելել։ Այս կերպով, գալիք օրերուն, «ամէն բարի գործերու պատրաստուած» պիտի ըլլանք։—Բ. Տիմ. 3։17

[Շրջանակ՝ էջ 6]

ՆԱՀԱՆԳԱՅԻՆ ՀԱՄԱԺՈՂՈՎԻ ՎԵՐՅԻՇԵՑՈՒՄՆԵՐ

Մկրտութիւն. Մկրտութեան թեկնածուները, Շաբաթ առաւօտուն յայտագիրը չսկսած, իրենց համար նշանակուած բաժնին մէջ նստած պէտք է ըլլան։ Մկրտութեան պատրաստուած իւրաքանչիւր անհատ իր հետ պատշաճ լողազգեստ եւ անձեռոց պէտք է բերէ։ Անցեալին, ոմանք անպատշաճ եւ առիթին արժէքը նսեմացնող լողազգեստներ հագած էին։ Մկրտութեան թեկնածուներուն հետ Մեր Ծառայութիւնը գրքէն մկրտութեան հարցումները նկատի առնող երէցները, վստահ պէտք է ըլլան որ իւրաքանչիւր անհատ այս կէտերը հասկցած է։ Մկրտութեան դասախօսութենէն եւ դասախօսին կողմէ ներկայացուած աղօթքէն ետք, յայտագրին ատենապետը ներկաները երգեցողութեան պիտի հրաւիրէ։ Վերջին տունը երգեցուելէ ետք, հիւրընկալները՝ թեկնածուները պիտի առաջնորդեն մկրտութեան վայրը։ Անհատի մը նուիրումը խորհրդանշող մկրտութիւնը՝ այդ անհատին եւ Եհովայի միջեւ եղած մտերիմ, անձնական հարց մըն է։ Հետեւաբար, անպատշաճ է որ թեկնածուներ զիրար ողջագուրելով կամ իրարու ձեռք բռնելով մկրտուին։

Լանջանշաններ. Հաճեցէք 1997–ի լանջանշանները ձեր վրայ կրել ամէն ժամանակ՝ համաժողովի քաղաքին մէջ եւ մինչ դէպի հոն կը ճամբորդէք ու անկէ կը վերադառնաք։ Ասիկա յաճախ մեզի պատեհութիւններ կը ստեղծէ, հոյակապ վկայութիւն մը տալու։ Լանջանշանները եւ անոնց պատեանները ձեր ժողովքին միջոցաւ պէտք է ստանաք, քանի որ համաժողովին մէջ մատչելի պիտի չըլլան։ Համաժողովէն բաւական առաջ, ձեր եւ ձեր ընտանիքին համար լանջանշաններ ապահովեցէք։ Մի՛ մոռնաք ձեր հետ կրել ձեր ընթացիկ Բժշկական Կանխայայտ Ցուցմունք/Անպարտագիր քարտը։

Իջեւան. Կը խնդրենք որ ամէն ոք համագործակցի, գործածելով ՄԻՄԻԱՅՆ համաժողովին կողմէ հայթայթուած՝ իջեւաններու ցանկը։ Եթէ Ընկերութեան կարգադրութիւնը զանց ընենք եւ վերապահութիւններ ընենք պանդոկի մը մէջ, որ յանձնարարուած ցանկին մէջ չէ, կամ ցանկին վրայ յիշուած պանդոկի մը, համաձայնուած սակէն աւելի վճարենք, աւելի նպաստաւոր գիներու համար բանակցող մեր եղբայրներուն տարած ծանր աշխատանքը նսեմացուցած կ’ըլլանք։ Ի մտի ունեցէք որ համաժողովի սենեակներուն սակերը, նաեւ կ’ընդգրկեն Հինգշաբթի եւ Շաբաթ գիշերները։ ԵԹԷ ՊԱՆԴՈԿԻ ՄԸ ՀԵՏ ԽՆԴԻՐ ՄԸ ՈՒՆԵՆԱՔ, հաճեցէք առանց վարանելու Իջեւանելու Բաժինը տեղեակ պահել, մինչ տակաւին համաժողովի վայրը կը գտնուինք, որպէսզի կարենան ձեզի օգնել, հարցը անմիջապէս լուծելու։ Հաճեցէք նկատի առնել, որ թերեւս բոլորին կարելի չըլլայ պանդոկի չծխողներու բաժնին մէջ սենեակ մը ձեռք ձգել, նոյնիսկ եթէ այս բանը խնդրուած էր վերապահութիւնը եղած ատեն։ Միեւնոյնը կիրարկելի է մեծ չափով կամ երկու հոգինոց անկողին մը խնդրելու պարագային։ Ժողովքի քարտուղարները վստահ պէտք է ըլլան որ Special Needs Room Request թղթիկները շուտով ղրկուին, յարմար համաժողովի հասցէին։ Եթէ մասնաւոր կարիքներու կարգադրութեամբ եղած իջեւանելու համաձայնութիւն մը պիտի ջնջէք, պէտք է անմիջապէս տեղեակ պահէք թէ՛ տանտէրը կամ պանդոկը, եւ թէ համաժողովի Իջեւանելու Բաժինը, որպէսզի կարելի ըլլայ սենեակը ուրիշ անհատի մը նշանակել։

Մանուկներու Կառքեր եւ Ետեւ Թեքուող Աթոռներ. Շատ մը վայրերու մէջ մանուկներու կառքերը կարելի չէ գործածել հանրային համաժողովներու ընթացքին։ Հրդեհի վերաբերեալ եղած օրէնքները կ’արգիլեն զանոնք դնել նրբանցքներու եւ աթոռներու շարքերուն միջեւ։ Քանի որ մեծ ամբոխները կրնան խճողում պատճառել, մանուկներու կառքերը վտանգաւոր են ո՛չ միայն մանուկին, այլ նաեւ՝ ոեւէ անհատի որ անոնց պատճառաւ կրնայ իյնալ։ Հետեւաբար, հաճեցէք զանոնք չբերել համաժողովի վայրը։ Ինքնաշարժի մէջ գործածուող՝ նորածիններու կամ մանուկներու աթոռներ թոյլատրելի են, քանի որ կրնան ամրացուիլ ծնողներուն քովի աթոռներուն վրայ։ Հաճեցէք ետեւ թեքուող աթոռներ չբերել։ Ասոնք վտանգաւոր են եւ հանրային ընդարձակ վայրերու մէջ արտօնուած չեն։ Ձեր համագործակցութիւնը կարեւոր է ու՝ գնահատելի։

Կամաւորներու Սպասարկութիւն. Կրնա՞ք համաժողովի ընթացքին, ժամանակ յատկացնել օգնելու համար սպասարկման բաժիններէն մէկուն։ Մեր եղբայրներուն ծառայելը, նոյնիսկ մի քանի ժամուան համար, կրնայ շատ օգտակար ըլլալ ու անհատական մեծ գոհունակութիւն պատճառել։ Եթէ կրնաք օժանդակել, հաճեցէք տեղեկացնել համաժողովի Կամաւորներու Սպասարկութեան Բաժինը։ 16 տարեկանէն վար եղող պատանիներն ալ կրնան լաւ մասնակցութիւն մը բերել, գործելով ծնողի մը կամ ուրիշ պատասխանատու չափահասի մը հսկողութեան ներքեւ։ Զգուշացումներ. Հաւանական խնդիրներու ուշադիր ըլլալով, անտեղի դժուարութիւններէ կը խուսափինք։ Գողեր եւ ուրիշ անբարեխիղճ անհատներ յաճախ կ’որսան այցելուները։ Վստահ եղէք որ ձեր ինքնաշարժը ամէն ատեն կղպուած է եւ բնաւ տեսանելի բան մը մի ձգէք, որ կրնայ ինքնաշարժը բանալու հրաւէր տալ։ Գողերն ու քսակահատները իրենց ուշադրութիւնը կը կեդրոնացնեն համագումարներու վրայ։ Իմաստութիւն պիտի չըլլայ որեւէ արժէքաւոր բան ձեր աթոռին վրայ ձգել։ Չէք կրնար վստահ ըլլալ որ բոլոր ձեր շուրջը եղողները Քրիստոնեաներ են։ Ինչո՞ւ առիթ տաք փորձութեան։ Տեղեկագրուած է որ օտարներ փորձած են երախաներ հրապուրելով զանոնք հեռացնել։ ՁԵՐ ԶԱՒԱԿՆԵՐԸ ԱՄԷՆ ԱՏԵՆ ՁԵՐ ՏԵՍՈՂՈՒԹԵԱՆ ՏԱԿ ՊԱՀԵՑԷՔ։

Շատ մը պանդոկներու մէջ մատչելի եղած հեռատեսիլի ու պատկերիզի սպասարկութիւնները յաճախ լկտի, պոռընկագրական յայտագիրներ կը ցուցադրեն։ Ուշադիր եղէք այս որոգայթին եւ թոյլ մի՛ տաք պզտիկներուն, որ առանց հսկողութեան հեռատեսիլ դիտեն սենեակին մէջ։ Թերեւս ծնողներ յօժարին որ իրենց զաւակները «վճարովի հեռատեսիլ»ը չգործածեն իրենց պանդոկի սենեակներուն մէջ, պանդոկէն խնդրելով որ իրենց կեցութեան ընթացքին ասիկա փակ պահուի։

Հաճեցէք նամակ չգրել կամ չհեռաձայնել համաժողովի վայրի վարչութեան, տեղեկութիւններ խնդրելով համաժողովի որեւէ հարցի շուրջ։ Եթէ պէտք եղած տեղեկութիւնը երէցներու կողմէ մատչելի չէ, կրնաք համաժողովի հասցէին գրել, ինչպէս կը գտնուի Special Needs Room Request form–ին ետեւը, որու մէկ օրինակը ժողովքի ծանուցման տախտակին վրայ կախուած է։