1995–Ի «Ուրախ Փառաբանողներ» Նահանգային Համաժողով

¹ Քանի՞ պատճառ ունինք ուրախ ըլլալու։ Հաւանաբար մեզմէ քիչեր փորձած են բոլոր պատճառները ցուցակագրել։ Թէեւ կ’ապրինք խռովութեան ու անորոշութեան աշխարհի մը մէջ, շատ պատճառներ ունինք ուրախ ըլլալու։ Ինչպէս որ ծանուցուեցաւ Յունուար 1995 Մեր Թագաւորութեան Ծառայութիւնը թերթիկին մէջ, «Ուրախ Փառաբանողներ»՝ 1995–ի նահանգային համաժողովներու քաջալերական բնաբանն է։

² Մենք Եհովան կը փառաբանենք որովհետեւ մեզի ճշմարտութիւնը սորվեցուց։ (Եսայ. 54։13. Յովհ. 8։32) Մեր կարգին, ուրախութեամբ ճշմարտութիւնը կը բաժնենք այն ամենուն հետ որոնք ապահովութիւն եւ երջանկութիւն կը փնտռեն։ (Եզեկ. 9։4. Գործք 20։35) Մեր Քրիստոնէական եղբայրակցութիւնն ալ մեզի ուրախութիւն կը բերէ։ Սիրալիր հոգեւոր ընտանիք մը գոհունակութիւն եւ ուրախութիւն կը բերէ։ Ասոնք մեր ունեցած ուրախութեան պատճառներէն միայն մի քանի հատն են որոնք մեզ կը մղեն Եհովան փառաբանելու։ Համաժողովի դասախօսութիւնները եւ ցուցադրութիւնները մեր ուշադրութեան պիտի յանձնեն սուրբ գրային յաւելեալ պատճառներ ուրախ ըլլալու այս նեղիչ վերջին օրերուն մէջ։

³ Երեք Օրուայ Համաժողով մը. Ձեր գործատիրոջ հետ կարգադրութիւններ ըրա՞ծ էք արձակուրդ առնելու, որպէսզի համաժողովի երեք օրերուն ալ ներկայ ըլլաք։ Դպրոց յաճախող երախաներու ծնողները, որոնք ներկայ պիտի ըլլան համաժողովներէն մէկուն մինչ դպրոցական դասընթացքները կը շարունակուին, պէտք է յարգալից կերպով տեղեակ պահեն ուսուցիչներուն թէ իրենց զաւակները Ուրբաթ օր պիտի բացակային, իրենց կրօնական պաշտամունքին այս կարեւոր մէկ մասին համար։ Ձեզի ամենամօտ համաժողովը ո՞ւր է։ Դիտարան Փետրուար 15, 1995–ի Անգլերէն թիւը ցուցակագրեց 181 համաժողովներուն թուականներն ու վայրերը, որոնք Միացեալ Նահանգներու մասնաճիւղի թաղամասին մէջ տեղի պիտի ունենան։ Այժմ ձեր ժողովքի քարտուղարը ձեզի տեղեկացուցած է ձեր ժողովքին վերաբերեալ եղած մանրամասնութիւնները։ Անգլերէն լեզուէ զատ, համաժողովներ պիտի ըլլան հետեւեալ լեզուներով. Թակալոկ, Իտալերէն, Ճաբոներէն, Յունարէն, Չինարէն, Սպաներէն, Վիեթնամերէն, Փորթիւկալերէն, Քուրեայերէն, Ֆրանսերէն եւ Խուլերու Լեզուով։

⁴ Յայտագիրը պիտի սկսի Ուրբաթ առաւօտ ժամը 9.40–ին, եւ պիտի փակուի Կիրակի կէսօրէ ետք մօտաւորապէս ժամը 3.50–ին։ Շաբաթ եւ Կիրակի օրերը, յայտագիրը պիտի սկսի ժամը 9.30–ին։ Դռները պիտի բացուին ժամը 8.00–ին։ Միայն անոնք որոնք մասնայատուկ գործի նշանակումներ ունին պիտի արտօնուին աւելի կանուխ ներս մտնել։

⁵ Ներկայ Պիտի Ըլլա՞ք. Մեզի քաջալերութիւն տրուած է որ համաժողովի երեք օրերուն ալ ներկայ ըլլանք։ Ինչո՞ւ։ Եհովան կ’ուզէ որ հոն ըլլանք։ Այսօր մեր հաւատքը ու հոգեւոր առողջութիւնը սաստիկ յարձակումի ենթարկուած են։ Պօղոս երբ խրատեց որ ‘մէկտեղ հաւաքուիլը չթողուլ’, Քրիստոնեաները Յուդայի մէջ մեծ ճնշումի տակ էին։ (Եբր. 3։12, 13. 10։25) Փիլիպպեցիները կ’ապրէին «կամակոր ու խոտորեալ ազգին մէջ»։ Այսուհանդերձ, անոնք «լուսաւորներու պէս կը [փայլէին] աշխարհի մէջ»։ (Փիլ. 2։15) Այս առաջին դարու Քրիստոնեաները ինչո՞ւ տարբեր էին։ Որովհետեւ անոնք հնազանդութեամբ հետեւեցան սուրբ հոգիին առաջնորդութեան որ զիրենք ուղղեց որ իրարու հետ հաւաքուին ‘սիրոյ եւ բարեգործութեան մղելու’։—Եբր. 10։24

⁶ Աշխարհը կ’ազդէ մեզի հակառակ ուղղութեամբ, տկարացնելով մեր փափաքը որ ժողվուինք մեր եղբայրներուն հետ ու Եհովան փառաբանենք։ Այս ամառ հրաւիրուած ենք Եհովայի հոգիին հպատակելու եւ համաժողովի երեք օրերն ալ վայելելու։ Որոշա՞ծ ենք ներկայ գտնուիլ մեր ամբողջ ընտանիքին հետ։ Մենք կարիքը ունինք մեր սէրն ու հաւատքը կանոնաւորաբար զօրացնելու։ Ասոր առնչութեամբ մեզի օգնելու համար Եհովա հայթայթած է տարեկան համաժողովներ։

⁷ Տուն Տարէք Գանձ մը. Ինչպէ՞ս կրնաք լաւագոյնս օգտուիլ համաժողովէն։ Պատասխանը մէկ բառով է՝ «կեդրոնանալ»։ Ասիկա դիւրին չէ ներկայ վառվռուն, հապճեպ ընկերութեան մէջ։ Աշխոյժ պատանիներ կրնան կեդրնացումը դժուար գտնել, բայց ատիկա մարտահրաւէր մըն է զոր բոլորս կը դիմագրաւենք երբ նահանգային համաժողովի մը ներկայ կ’ըլլանք։ Կեդրոնանալը աւելի դիւրին պիտի գտնենք եթէ նախապէս ծրագրենք։ Դուն քեզի հարց տուր. ‘Ի՞նչ է համաժողովին բնաբանը’։ Անոր մասին խորապէս մտածէ։ ‘Ինչո՞ւ համար կ’երթամ եւ ի՞նչ պիտի ընեմ երեք օրուան ընթացքին։ Երեկոներս զբօսանքո՞վ պիտի լեցուին, թէ ոչ բաւարար ժամանակ յատկացուցած եմ հանգիստի եւ համաժողովի աչքառու կէտերը վերաքաղ ընելու’։

⁸ Դիտարան Սեպտեմբեր 1, 1984–ի թիւին յօդուածը՝ «Կը Խոկա՞ք թէ Պարզապէս Արթուն կ’Երազէք», ներկայացուց մի քանի թելադրութիւններ թէ ինչպէ՛ս լաւագոյնս օգտուինք ժողովէ մը եւ յետոյ հետեւեալը եզրակացուց. «Մտային դաստիարակութիւնը թերեւս ամենէն կարեւոր ազդակն է»։ Երբ դասախօս մը կը սկսի, սովորաբար ուշադիր ենք, բայց թերեւս մաս մը մտիկ ընելէ ետք, թոյլ կու տանք որ մեր միտքը «թափառի»։ Ինչպէ՞ս կրնանք ասոր արգելք հանդիսանալ։

⁹ Անցեալին տրուած թելադրութիւնները կրկնուելու արժանի են, որովհետեւ ազդեցիկ են։ Եթէ կարելի է, փորձեցէք բաւարար հանգստանալ իւրաքանչիւր գիշեր։ Ասիկա միշտ դիւրին չէ, որովհետեւ թերեւս ճամբորդութիւն կ’ընէք, եւ եթէ պանդոկ իջած էք, թերեւս չկարենաք կանուխ քնանալ կամ հանգստանալ ինչպէս որ տունը կ’ընէիք։ Լաւ ծրագրելը սովորաբար թոյլ պիտի տայ ձեզի որ պէտք եղած հանգստութիւնը ձեռք ձգէք։

¹⁰ Պարզ նոթագրելը կ’օգնէ կեդրոնանալու։ Եթէ փորձէք շատ տեղեկութիւններ գրի առնել, կարգ մը կենսական կէտեր կրնան ամբողջովին վրիպիլ։ Որպէս թելադրութիւն, նոթագրեցէք այն նպատակով որ յայտագրին ամփոփում մը պիտի ներկայացնէք Աստուածաշունչի աշակերտի մը կամ անկողին ծառայողի մը։ Նոյնիսկ եթէ չունենաք որոշ անհատ մը ձեր մտքին մէջ, նոթագրելու համար նպատակ մը պիտի ունենաք, եւ համաժողովէն ետք առիթներ պիտի գտնէք յայտագրին աչքառու կէտերը ներկայացնելու մինչ անպաշտօն կերպով կը վկայէք ընտանիքի անհաւատ անդամներուն։ Նոթագրելով եւ ձեր լսածը բաժնելով, տեղեկութիւնները շուտով պիտի չմոռնաք։ Արտայայտուիլը կը զօրացնէ յիշելը։

¹¹ Թէեւ այլեւս ուտելիք պիտի չհայթայթուի, տակաւին մեծ ծախսի կը նայի համաժողովի դիւրութիւնները վարձելը, որ յաճախ յաւելեալ ծախք կը պարփակէ ձայնափոխադրութեան գործիքներու, գրականութիւններու եւ այլ բաներու համար։ Այս ծախսերը ինչպէ՞ս կը ծածկուին։ Մեր կամաւոր նուիրատուութիւններուն միջոցաւ, կա՛մ կանխիկ եւ կամ վճարագիրով որ վճարելի է «Եհովայի Վկաներուն»։ Ասիկա ներդաշնակ է Սաղմոս 96։8–ին եւ Բ. Մնացորդաց 31։12–ին հետ։

¹² Ուրախ Փառաբանողներ Եհովան կը Պատուեն Բարեպաշտ Վարքով. Անցեալ տարի պանդոկներու անձնակազմերէն եւ համաժողովի դիւրութիւններու պաշտօնեաներէն ստացանք դրական եւ քաջալերական մեկնաբանութիւններ մեր վարքին նկատմամբ։ Պանդոկի մը տնօրէնը ըսաւ. «Միշտ հաճոյք մըն է ընդունիլ Վկաները, որովհետեւ անոնք համբերող ու համագործակցող են եւ ուշադրութեամբ կը հսկեն իրենց զաւակները»։ Ուրիշ պանդոկի տնօրէն մը ըսաւ թէ Վկաները կը թուին աւելի ուրախ ու աւելի կազմակերպուած ըլլալ քան ուրիշ խումբերը։ Թէեւ մեր համաժողովը շրջանին մէջ տեղի ունեցած ամենամեծ համաժողովն էր, ան ըսաւ. «Շատ աւելի պզտիկ խումբերու հետ բաղդատելով, մենք աւելի քիչ դժգոհութիւններ ու դժուարութիւններ ունեցանք»։

¹³ Ուրիշ պանդոկի պաշտօնեայ մը նշեց որ վերջերս մեր համաժողովէն առաջ տեղի ունեցած համաժողով մը շատ վնասներ պատճառեց, ինչպէս նաեւ՝ գողութիւններ, հակառակ որ պանդոկին բոլոր պաշտօնեաները ներկայ էին։ Բայց մեր համաժողովին նկատմամբ, ան ըսաւ. «Վկաներուն պարագային, ասոր նկատմամբ մտահոգուելու պատճառ չունինք։ . . . Երբ անոնք հոս են, միայն մէկ կամ երկու պահպանողներ կը ձգենք որպէսզի հոգ տանին մեքենաներու պատահական խնդիրներուն»։

¹⁴ Կը փափաքէինք որ բոլոր ստացուած տեղեկագիրները նոյնանման ըլլային, բայց դժբախտաբար, այդ չէ պարագան։ Համաժողովի մը ատենապետը դիտել տուաւ. «Նիստերէն ետք, շատ մը պատանիներ մեծ թիւով կը հաւաքուին պանդոկի նախասրահին մէջ գիշերը ուշ ատեն, բարձրաձայն խնդալով ու պոռալով։ Ասիկա ուրիշ հիւրերը կը խանգարէ . . . , որոնք բարկացած կ’երեւին։ Կարգ մը պզտիկներ նրբանցքներուն մէջ կը վազեն, դռները ուժգին կերպով կը զարնեն կամ կը գոցեն մինչ իրարու սենեակները կ’այցելեն եւ շատ բարձրաձայն կը խօսակցին սենեակներէն ներս»։

¹⁵ Նիստերուն ընթացքին մեծ թիւով եղբայրներու հաւաքուիլը նրբանցքներու մէջ եւ լսարանէն դուրս, ուրիշ խնդիր մըն է որ տարիներէ ի վեր կը շարունակուի։ Անցեալ տարի համաժողովի մը մէջ, Աստուածաշունչի աշակերտ մը նոթ մը ձգեց նուիրատուութեան տուփին մէջ։ Կը կարդանք. «Երբեք այսքան չեմ ցնցուած նկատելով դասախօսութիւններուն ընթացքին նրբանցքներուն մէջ եղած աղմուկը, գործունէութիւնը, խօսակցութիւնը եւ անպատշաճ վարմունքը։ . . . Տակաւին Վկայ մը չեմ, միայն մէկը որ կ’ուսումնասիրէ ու կը սորվի աստուածավախութիւն եւ յարգանք»։ Վստահաբար, մեզմէ ոչ մէկը պիտի ուզէ այն տպաւորութիւնը ձգել թէ մենք Եհովայի հայթայթումներուն հանդէպ գնահատանքի պակաս ունինք։

¹⁶ Ամէն ատեն պէտք է մենք մեզի հարց տանք. ‘Ո՞վ կը ներկայացնեմ, եւ ինչո՞ւ այս համաժողովին ներկայ եմ’։ Մեր հոգեւորականութիւնը եւ աստուածպաշտութիւնը կ’արտացոլացուին մեր խօսակցութեամբ, վարքով եւ հոգեւոր հայթայթումներուն հանդէպ մեր ունեցած գնահատանքով։ (Յակ. 3։13. Ա. Պետ. 2։2, 3, 12) Այն եղբայրները որոնք երկար տարիներ տոկացեր են արգելքներու եւ բանադրանքի ներքեւ, յաճախ կը նկատուին որ համաժողովներուն շատ աւելի ուշադիր ու յարգալից են, մնալով նստած, գրաւուած դասախօսութիւններով եւ ցուցադրութիւններով։

¹⁷ Ձեր Հագուելակերպը եւ Յարդարանքը Պատգամ մը կը Հաղորդեն. Ա. Թագաւորաց 16։7–ն մեզի կը յիշեցնէ թէ «մարդը երեւցածին կը նայի, բայց Տէրը սրտին կը նայի»։ Ուստի, մարդիկ յաճախ մեզ կը դատեն մեր արտաքին երեւոյթին հիման վրայ։ Մեր հագուելակերպն ու յարդարանքը սերտօրէն կը զննուին, մանաւանդ երբ ներկայ կ’ըլլանք համաժողովի մը, պաշտամունքի ու Քրիստոնէական ապրելակերպի նկատմամբ հրահանգ ստանալու համար։ Եթէ դպրոցական պատանի մըն ես կամ եթէ աշխարհային գործիդ բերումով սերտ հաղորդակցութիւն ունիս աշխարհային ոճեր որդեգրող մարդոց հետ, թերեւս պատշաճ յարդարանքի վերաբերեալ Քրիստոնէական չափանիշներուն յարիլը մարտահրաւէր մըն է։

¹⁸ Հագուելակերպի ու յարդարանքի չափանիշները կը տարբերին համայն աշխարհի մէջ։ Քրիստոնեաներէն կ’ակնկալուի որ պատշաճ, վայելուչ հագուստներ հագնին։ Ասիկա ո՞վ պէտք է որոշէ։ Ծնողները պէտք է վստահ ըլլան թէ իրենց պատանի զաւակները դպրոցական աշխարհային պատանիներուն նման չեն հագուիր։ Շինիչ ուղեգծեր հայթայթուած են մեզի օգնելու որ առողջ որոշումներ առնենք այս հարցին մէջ։ Կը քաջալերենք վերաքաղ ընել Զարթի՛ր Փետրուար 8, 1987–ի թիւի յօդուածը՝ «Հագուստները Ի՞նչ կը Նշանակեն Ձեզի»։ Ի՞նչ նկատուեցաւ անցեալ տարի մեր կարգ մը համաժողովներուն մէջ։

¹⁹ «Աստուածավախութիւն» Նահանգային Համաժողովէ մը ետք, այս դիտողութիւնը ստացանք. «Այս տարի համաժողովին մէջ եղբայրները եւ քոյրերը նկատելիօրէն բարեփոխուած էին իրենց հագուելակերպին, յարդարանքին ու վարքին նկատմամբ։ . . . Սակայն, տակաւին որոշ վիճակներ ու սովորութիւններ կան որոնք պէտք է յաւելեալ փոփոխութեան ենթարկուին»։ Ուրիշ համաժողովէ մը ետք, տեղեկագրուեցաւ թէ անպատշաճ հագուելակերպը շատ աչքառու էր։ Տեղեկագիրը յիշեց թէ ոմանց հագուստը ուրիշներու նեղութիւն պատճառեց։ Ներկայ եղող կարգ մը դրսեցիներ նաեւ նկատեցին անպատշաճ հագուելակերպը։ Ոմանց հագուստը թէ՛ չափէ աւելի մարմինը կը յայտնէր եւ թէ շատ սեղմ էր։

²⁰ Եղբայրներուն եւ քոյրերուն մեծամասնութիւնը պատշաճ, յարգելի հագուստներ կը հագնին երբ համաժողովի վայրն են։ Սակայն, աւելի ետքը, պանդոկներու կամ ճաշարաններու մէջ, կարգ մը եղբայրներ ու քոյրեր, դեռ իրենց պատճերը դրած, հագած են «tank top, հինցած denim, շատ կարճ տափատ եւ . . . քմայքոտ հագուստներ որոնք չեն վայելեր Աստուծոյ ժողովուրդին»։ Եթէ երէցներ նկատեն որ ոմանք հակում ունին այս կերպով հագուելու անզբաղ ժամանակներուն, համաժողովէն առաջ յարմար պիտի ըլլայ որ ազնիւ բայց հաստատ խրատ տրուի թէ այսպիսի հագուելակերպ պատշաճ չէ, մանաւանդ որպէս Քրիստոնէական համաժողովի մը յաճախող պատուիրակներ։ Հաճեցէք վերաքաղ ընել ձեր Աստուածաշունչի աշակերտներուն հետ՝ որոնք համաժողովին ներկայ պիտի ըլլան՝ վերոյիշեալ ուղեգծերը վարքի ու հագուելակերպի նկատմամբ։

²¹ Պանդոկներ. Իւրաքանչիւր տարի մեծ ջանք կը թափուի նուազ գնով իջեւաններ ապահովելու, որպէսզի նիւթական բեռ չդրուի ոեւէ անհատի վրայ։ Հաճեցէք յիշել համբերող ու ազնիւ ըլլալ երբ գործառնութիւն կ’ունենաք պանդոկի պաշտօնեաներուն հետ։ Թերեւս ճամբորդութենէն յոգնած ենք եւ շարքի կեցողները շատ են, սակայն ձեր համբերութիւնը աննկատ պիտի չմնայ։ Շատ օգտակար է որ հրատարակիչները վերաքաղ ընեն իրենց Աստուածաշունչի աշակերտներուն հետ Յունուար 1995 Մեր Թագաւորութեան Ծառայութիւնը թերթիկին յաւելուածականը պանդոկի դիւրութիւններու նկատմամբ։ Նաեւ պէտք է յիշենք կարիքը պարգեւ մը տալու ըստ սովորութեան։—Զարթի՛ր Յունիս 22, 1986։

²² Լուսանկարչական Մեքենաներ եւ Երիզագրող Մեքենաներ. Յարմար է ազնուօրէն վերյիշեցումներ ներկայացնել լուսանկարչական մեքենաներու եւ երիզագրող մեքենաներու նկատմամբ։ Հաճեցէք յիշել որ եթէ կը ծրագրէք գործածել լուսանկարչական մեքենայ, camcorder կամ որեւէ երիզագրող մեքենայ, նկատառութիւն ցոյց տաք ձեր շուրջ եղողներուն հանդէպ։ Նիստերուն ընթացքին երթալ–գալը կամ նոյնիսկ ձեր նստած տեղէն արձանագրելը կրնայ ուրիշները խանգարել։ Ոչ մէկ երիզագրող մեքենայ պէտք է կապուի ելեկտրական կամ ձայնի դրութեան, ոչ ալ գոցէ աթոռներու շարքերուն միջեւ եղած անցքերը։ Նկարելը եւ camcorder–ով կամ երիզագրող մեքենայով յայտագրին մէկ մասը արձանագրելը անձնական որոշում է։ Նկարները եւ արձանագրութիւնները կրնան սիրելի յիշատակներ մեր միտքը բերել երբ հետագային կը դիտուին։ Այսպիսի գործիքներ պէտք է չափաւոր կերպով գործածուին, այնպէս որ ուրիշները չխանգարուին եւ կարենաք յայտագրէն լաւագոյնս օգտուիլ։ Տուն վերադառնալէ ետք, ժամանակ պիտի ունենա՞ք արձանագրութիւնները վերաքաղ ընելու։ Թերեւս նկատէք որ նոթագրելը բաւարար պիտի ըլլայ։

²³ Աթոռներու Գործածութիւնը. 1994–ի «Աստուածավախութիւն» Նահանգային Համաժողովին, բարեփոխութիւն մը նկատեցի՞ք աթոռներ ապահովելու հարցին նկատմամբ։ Որոշ յառաջդիմութիւն եղած է, բայց տակաւին կարիքը ունինք ուշադիր ըլլալու այս վերյիշեցումին. ԿԱՐԵԼԻ Է ԱԹՈՌՆԵՐ ԱՊԱՀՈՎԵԼ ՄԻԱՅՆ ՁԵՐ ԸՆՏԱՆԻՔԻՆ ԱՆՄԻՋԱԿԱՆ ԱՆԴԱՄՆԵՐՈՒՆ ԵՒ ՁԵՐ ՀԵՏ ՁԵՐ ԻՆՔՆԱՇԱՐԺՈՎ ՃԱՄԲՈՐԴՈՂՆԵՐՈՒՆ։ Մենք համաժողովի վայրը ներկայ ենք որպէս Ընկերութեան հիւրերը։ Լսարանի վարձքը վճարուած է կամաւոր նուիրատուութիւններու միջոցաւ։ Սէր ու նկատառութիւն յայտնած կ’ըլլա՞նք եթէ աթոռ մը ապահովենք որ վստահ չենք թէ պիտի գործածուի։ Կը ներէք որ կարելի պիտի չըլլայ անջատ բաժիններ կամ սենեակներ հայթայթել անոնց որոնք միջավայրի առնչութեամբ խնդիրներ ունին, ինչպէս՝ դիւրազգացութիւն։

²⁴ Իւրաքանչիւր համաժողով հայթայթում կ’ընէ մասնաւոր կարիքներ ունեցողներու, ինչպէս՝ տարիքոտներու եւ ֆիզիքապէս տկարներու։ Հաճեցէք վստահ ըլլալ որ այս բաժիններէն մէկուն աթոռները չգործածէք եթէ որակելի չէք։ Նաեւ, ուշադիր եղէք օգնելու մասնաւոր կարիքներ ունեցողներուն որ աթոռ մը գտնեն, եթէ անոնց հետ իրենց հոգ տանելու պատասխանատու մը չկայ։

²⁵ Համաժողովին Համար Ձեր Ճաշը Ապահովել. Ինչպէս որ գիտէք, Դեկտեմբեր 1994 Մեր Թագաւորութեան Ծառայութիւնը թերթիկը ծանուցանեց. «1995–ի նահանգային համաժողովներէն եւ Սեպտեմբեր 1995–ի շրջանային համաժողովներէն ու միօրեայ մասնաւոր համաժողովներէն սկսեալ, ճաշի սպասարկութիւն պիտի չըլլայ։ Իւրաքանչիւր անհատ իր հետ պիտի բերէ իր ուտելիքն ու խմելիքը»։ Յետոյ Փետրուար 1995 Մեր Թագաւորութեան Ծառայութիւնը թերթիկին յաւելուածականը բացատրեց թէ ինչո՛ւ այս բարեճշդումը եղաւ եւ ընտիր թելադրութիւններ տուաւ թէ համաժողովին ինչպէ՛ս ամէն անհատ կրնայ հոգ տանիլ իր ուտելիքին ու խմելիքին։ Լաւ է որ բոլորն ալ ոչ միայն իրենց համար վերաքաղ ընեն այդ յաւելուածականը, այլ նաեւ՝ զանիկա նկատի առնեն իրենց Աստուածաշունչի աշակերտներուն հետ մինչ կը պատրաստուին համաժողովին ներկայ ըլլալու։ Կարեւոր է որ Աստուածաշունչի աշակերտները տեղեակ ըլլան թէ բոլոր ներկայ եղողները պէտք է իրենց հետ իրենց ուտելիքն ու խմելիքը բերեն։

²⁶ Պարզապէս շեշտելու համար կարգ մը կէտեր, հաճեցէք յիշել այս թելադրուած բաները բերել կէսօրուայ դադարին համար. թեթեւ, պարզ եւ սննդարար ուտելիք, որ կը նմանի այն ճաշին զոր մարդիկ յաճախ իրենց հետ գործատեղ կը տանին, ինչպէս՝ սանտուիչ, չորցուած պտուղ, կաղին, խմորեղէն եւ թարմ պտուղ։ Հեղուկները կրնան պարփակել սուրճ, զովացուցիչներ, օշարակ կամ խմելիք ջուր, չկոտրուելիք անօթի մը կամ ջերմապահի մը մէջ։ Եթէ անհրաժեշտ է բերել կերակուրը պաղ պահելու ծառայող պզտիկ պահեստաման մը, ընդունելի է եթէ պիտի դրուի ձեր աթոռին տակ։ Սակայն, կերակուրները պաղ պահելու ծառայող մեծ պահեստամաններ, ոգելից ըմպելիներ կամ ապակեայ անօթներ պէտք չէ բերուին համաժողովի վայրը։ Պէտք է խուսափիլ ուտելէ նիստերուն ընթացքին։ Ասիկա անպատկառութիւն ցոյց կու տայ հրամցուած հոգեւոր ճաշին հանդէպ։

²⁷ Յաւելեալ վերյիշեցում մը թէ պանդոկի սենեակներու մէջ ճաշ չեփել, բացի եթէ այդ նպատակին համար պզտիկ խոհանոց մը ունին։ Լաւ է որ խոկանք այն իրողութեան վրայ թէ կէսօրուայ դադարին ժամանակը ծրագրուած է որպէսզի կարենանք թեթեւ ճաշ մը առնել եւ աստուածպետական ընկերակցութիւն վայելել մեր եղբայրներուն ու քոյրերուն հետ։ Որպէս Եհովայի ժողովուրդը, կը գիտակցինք որ համաժողովներուն մէջ հոգեւոր սնունդը գլխաւոր կարեւորութիւնը ունի նիւթական բաներուն հետ բաղդատած, եւ պէտք է ըստ այնմ ծրագրենք։

²⁸ Յունիս 2, 1995–ին, «Ուրախ Փառաբանողներ» Նահանգային Համաժողովներուն առաջինը պիտի սկսի։ Ձեր պատրաստութիւնները ամբողջացուցած էք եւ հիմա պատրա՞ստ էք վայելելու ուրախ ընկերակցութեան ու հոգեւոր լաւ բաներու երեք օրերը։ Մեր անկեղծ աղօթքն է որ Եհովան օրհնէ ձեր ջանքերը որ ձեր եղբայրներուն ու քոյրերուն հետ ներկայ ըլլաք այս ամառուայ համաժողովին, մինչ մտիկ կ’ընենք թէ ինչպէ՛ս կրնանք Եհովայի ուրախ փառաբանողներ ըլլալ։

[Նկարին խորագիրը՝ էջ 6]

[Շրջանակ՝ էջ 6]

Վերյիշեցումներ՝ Նահանգային Համաժողովի Վերաբերեալ

Մկրտութիւն. Մկրտութեան թեկնածուները պէտք է իրենց աթոռները գրաւեն որոշուած բաժինին մէջ Շաբաթ առաւօտ յայտագիրը չսկսած։ Նկատուած է որ ոմանք անվայելուչ եւ առիթին արժէքը նսեմացնող զգեստներ հագած են։ Իւրաքանչիւր անհատ որ կը ծրագրէ մկրտուիլ պէտք է իր հետ բերէ լոգանքի Պատշաճ զգեստ մը եւ անձեռոց մը։ Մկրտութեան դասախօսութենէն ու դասախօսին կողմէ ներկայացուած աղօթքէն ետք, նիստին ատենապետը հակիրճ հրահանգներ պիտի տայ թեկնածուներուն եւ ապա պիտի հրաւիրէ երգեցողութեան մը։ Վերջին տունէն ետք, հիւրընկալները պիտի առաջնորդեն թեկնածուները դէպի մկրտութեան վայրը։ Քանի որ մկրտութիւնը, որ անհատին նուիրումին խորհրդանիշն է, մտերիմ ու անձնական հարց մըն է անհատին եւ Եհովային միջեւ, կարգադրութիւն չկայ այնպէս կոչուած ընկերակիցներու մկրտութեան, ուր մկրտութեան երկու կամ աւելի թեկնածուներ իրարու ձեռքերը բռնած կը մկրտուին։

Պատճեր. Հաճեցէք 1995–ի պատճերը կրել համաժողովին ատեն եւ մինչ կը ճամբորդէք դէպի համաժողովի վայրը ու անկէ կը վերադառնաք։ Ասիկա յաճախ կարելի կը դարձնէ որ լաւ վկայութիւն մը տանք մինչ կը ճամբորդենք։ Պատճերը պէտք է ստանաք ձեր ժողովքին միջոցաւ, քանի որ մատչելի պիտի չըլլան համաժողովին մէջ։ Յիշեցէք ձեր հետ կրել ձեր ընթացիկ Advance Medical Directive/Release քարտը։ Պէթէլի ընտանիքի անդամները եւ ռահվիրաները պէտք է իրենց հետ ունենան իրենց ինքնութիւնը բնորոշող քարտերը։

Իջեւանիլ. Կը խնդրենք որ ամէն անհատ համագործակցի, գործածելով ՄԻԱՅՆ համաժողովի կողմէ հայթայթուած իջեւաններու ցանկը։ Եթէ անտեսենք Ընկերութեան կարգադրութիւնը եւ ապահովենք պանդոկ մը որ ընդունուած ցանկին մէջ չէ կամ համաձայնուած գինէն աւելի վճարենք պանդոկի մը որ ցանկին մէջ է, կը քանդենք մեր եղբայրներուն ծանր աշախտանքը, որոնք կը բանակցին պանդոկներու հետ աւելի նպաստաւոր գիներու համար։ ԵԹԷ ԽՆԴԻՐ ՄԸ ՈՒՆԵՆԱՔ ՊԱՆԴՈԿԻ ՄԸ ՀԵՏ, հաճեցէք չվարանիլ զանիկա Իջեւանելու Բաժինի տեսուչին ուշադրութեան յանձնել համաժողովին մէջ, որպէսզի ան կարենայ ձեզի օգնել խնդիրը շուտով լուծելու։ Ժողովքներու քարտուղարները պէտք է վստահ ըլլան որ Special Needs Room Request form–երը շուտով ղրկուած են յարմար համաժողովի հասցէին։ Եթէ հարկ ըլլայ որ ջնջէք համաձայնութիւն մը որ կատարուեցաւ մասնայատուկ կարիքներու կարգադրութեամբ, պէտք է անմիջապէս տեղեկացնէք թէ՛ տանտիրոջ կամ պանդոկին եւ թէ համաժողովի Իջեւանելու Բաժինին, որպէսզի կարելի ըլլայ սենեակը ուրիշի մը նշանակել։

Մանուկներու Կառքեր. Շատ մը վայրերու մէջ մանուկներու կառքերը կարելի չէ գործածել հանրային համաժողովներու մէջ։ Հրդեհի վերաբերեալ եղած օրէնքները կ’արգիլեն զանոնք կեցնել նրբանցքներուն եւ աթոռներու շարքերուն միջեւ։ Քանի որ մեծ ամբոխները կրնան խճողումի վիճակներ պատճառել, մանուկներու կառքերը վտանգաւոր են ոչ միայն մանուկին համար, այլ նաեւ՝ ոեւէ անհատի որ անոնց վրայ կրնայ իյնալ։ Հետեւաբար, հաճեցէք զանոնք չբերել համաժողովի վայրը։ Սակայն, մանուկներու աթոռները որոնք ինքնաշարժի մէջ կը գործածուին թոյլատրելի են, քանի որ կրնան ապահովուիլ ծնողներուն քովի աթոռներուն վրայ։ Կը գնահատենք ձեր համագործակցութիւնը այս հարցին մէջ։

Կամաւորներու Սպասարկութիւն. Կրնա՞ք համաժողովին ընթացքին ժամանակ յատկացնել օգնելու համար բաժիններուն մէկուն մէջ։ Մեր եղբայրներուն ծառայելը, նոյնիսկ մի քանի ժամ, կրնայ շատ օգտակար ըլլալ ու մեծ գոհունակութիւն պատճառել։ Եթէ կրնաք օժանդակել, հաճեցէք տեղեկացնել Կամաւորներու Սպասարկութեան Բաժինին համաժողովին մէջ։ 16 տարեկանէն վար եղող պզտիկները կրնան նաեւ լաւ մասնակցութիւն մը բերել, գործելով ծնողի մը կամ ուրիշ պատասխանատու չափահասի մը հսկողութեան ներքեւ։

Ազդարարութեան Խօսքեր. Ուշադիր մնալով այն խնդիրներուն որոնք կրնան ծագիլ, մենք մեզ հեռու կը պահենք անտեղի դժուարութիւններէ։ Գողերը եւ ուրիշ անխիղճ անհատներ յաճախ կը յարձակին այն մարդոց վրայ որոնք իրենց տան շրջանէն հեռու են։ Վստահ եղէք որ ձեր ինքնաշարժը ամէն ատեն կղպուած է եւ երբեք տեսանելի բան մը մի ձգէք որ կրնայ մէկը հրապուրել ինքնաշարժը բանալու։ Գողերն ու քսակահատները իրենց լաւագոյն շորթումը կը գտնեն համագումարներուն մէջ։ Իմաստութիւն պիտի չըլլայ ձգել որեւէ արժէքաւոր բան ձեր աթոռին վրայ։ Չէք կրնար վստահ ըլլալ որ ձեր շուրջը եղողները բոլորն ալ Քրիստոնեաներ են։ Ինչո՞ւ առիթ տաք փորձութեան։ Տեղեկագրուած է որ օտարներ փորձած են զաւակներ խաբելով հեռացնել։ ՁԵՐ ԶԱՒԱԿՆԵՐԸ ՁԵՐ ՏԵՍՈՂՈՒԹԵԱՆ ՏԱԿ ՊԱՀԵՑԷՔ ԱՄԷՆ ԱՏԵՆ։

Cable television որ մատչելի է շատ մը պանդոկներու մէջ, յաճախ կը ցուցադրէ լկտի, պոռնկագրական շարժանկարներ։ Ուշադիր եղէք այս որոգայթին եւ թոյլ մի տաք զաւակներուն որ առանց հսկողութեան հեռատեսիլը դիտեն սենեակին մէջ։

Հաճեցէք չհեռաձայնել համաժողովի լսարանին վարչութեան, փնտռելով տեղեկութիւններ համաժողովի որեւէ հարցի շուրջ։ Եթէ պէտք եղած տեղեկութիւնը մատչելի չէ երէցներու կողմէ, հաճեցէք գրել համաժողովի հասցէին որ կը գտնուի իւրաքանչիւր ժողովքի քարտուղարին հետ եղած Special Needs Room Request form–ին ետեւը։