Պատշաճ Հագուելակերպ ու Յարդարանք
1 «Բոլոր տղամարդիկը, նոյնիսկ դեռատիները, փողկապ կապած են։ Բոլոր կիներն ու աղջիկները, թէ՛ պատանուհիները եւ թէ փոքրիկները, զգեստ կամ փէշ հագած են։ Ճինզ հագնող չկայ, ո՛չ ալ շապիկին օձիկը բաց ձգած անհատ մը կը տեսնուի։ Հոս գտնուող բոլոր անհատները փայլուն երեւոյթ մը ունին»։ Այսպէս ըսաւ լուրերու տեղեկագրութիւն մը։ Անիկա ի՞նչպիսի ամբոխ մը կը նկարագրէր։ Քաղաքական հաւա՞ք մը։ Մարզական դէ՞պք մը։ Ռոք նուագահանդէ՞ս մը։ Բնա՛ւ երբեք։ Անիկա կը նկարագրէր եղբայրներու ու քոյրերու խումբ մը, անցեալ ամրան տեղի ունեցած նահանգային մեծ համաժողովի մը մէջ։
2 Համաժողովի ուրիշ քաղաքի մը մէջ, լրագրի մը թղթակիցը հետեւեալ կերպով նկարագրեց Վկաներու բազմութիւն մը. «Բոլոր տղամարդիկը մաքուր են, զգեստ հագած ու փողկապ կապած են։ Կիները համեստ, սակայն, վայելուչ կերպով հագուած են»։ Ուրիշ դիտող մը՝ պահակ մը, ըսաւ. «Դուք լաւ վարք ունեցող, յարգալից, մաքուր ու կոկիկ անհատներ էք։ Ինչ որ կը տեսնեմ գրաւիչ է։ Այս աղտոտ աշխարհին մէջ, յաջողած էք աղտէն ձերբազատուիլ»։ Մեզի ի նպաստ եղած ի՜նչ հոյակապ վկայութիւններ։ Երախտապարտ չե՞նք որ մեր եղբայրակցութեան մասին ա՛յսքան լաւ կը խօսուի։ Անշուշտ, իրենց օրինակելի երեւոյթով բոլոր Վկաներն ալ նպաստեցին այս լաւ տեղեկագրութիւններուն։
3 Համայն աշխարհի մէջ ճանչցուած ենք որ մեր արտաքին երեւոյթը յատկանշականօրէն տարբեր է։ (Մաղ. 3։18) Ինչո՞ւ։ Քանի որ կը հետեւինք սուրբ գրային խրատին՝ որ ‘վայելուչ հագուստով, ամօթխածութեամբ եւ պարկեշտութեամբ մենք մեզ զարդարենք, . . . ինչպէս կը վայլէ աստուածպաշտութիւնը յանձն առած’ անհատներու։—Ա. Տիմ. 2։9, 10
4 Ձեր Հագուելակերպով ու Յարդարանքով Ի՞նչ Ցոյց կու Տաք. Մեր հագած հագուստը եւ զայն հագնելու կերպը մեր մասին կը վկայեն. մեր հաւատալիքներուն, կեցուածքին, եւ միտումներուն մասին։ Մեր ընտրած ոճերը կ’ըսեն թէ մենք ո՛վ ենք եւ ի՛նչ կը ներկայացնենք։ Երբեք պէտք չէ որդեգրենք այս աշխարհի մէջ ժողովրդական դարձած՝ նուաստացած մտածելակերպն ու վարուելակերպը։ Մեր մտահոգութիւնը որոշ ոճի մը չափազանց նորոյթ ըլլալը կամ չըլլալը չէ, այլ՝ թէ անիկա Աստուծոյ ծառայ մը ըլլալ դաւանողին կը պատշաճի՞ թէ ոչ։ (Հռովմ. 12։2) Փոխանակ ընտրելու ոճ մը որ ինքնագլուխ հոգի կը ցուցաբերէ կամ անբարոյ կենցաղ մը կը թելադրէ, կ’ուզենք ցոյց տալ թէ իրապէս ‘Աստուած կը փառաւորենք’։—Ա. Պետ. 2։12
5 Երբեմն՝ նորեկ, անփորձ կամ հոգեւորապէս տկար անհատ մը կրնայ ընդունիլ հագուելակերպի ու յարդարանքի վերաբերեալ աշխարհի ծանուցանած մէկ ոճը, առանց նկատի առնելու թէ անիկա ի՛նչ անդրադարձ պիտի ունենայ Եհովայի ու իր կազմակերպութեան վրայ։ Բոլորս ալ կրնանք ինքնաքննութիւն մը կատարել տեսնելու համար թէ աշխարհի մտածելակերպով ազդուա՞ծ ենք։ Կրնանք յարգուած, հոգեւորապէս հասուն եղբօր կամ քրոջ մը մօտենալ եւ իրմէ խնդրել որ պարկեշտ դիտողութիւն մը ընէ մեր հագուելակերպին ու յարդարանքին մասին, ապա տրուած թելադրութիւնները լրջօրէն արժեւորենք։
6 Ոմանք շուտով կը համաձայնին թէ պէ՛տք է իրենց հագուելակերպին նկատմամբ զգոյշ ըլլան, երբ համաժողովի մէջ են։ Սակայն, իրենց չափանիշը կը ցածցնեն համաժողովի յայտագրէն ետք՝ ժամանցի պահերուն։ Քրիստոնեայ ծառաներու պատշաճող բարձր չափանիշը պահպանեցէք։ (Բ. Կորն. 6։3, 4) Երբ հանրային վայրերու մէջ կը գտնուինք, մեր համաժողովի լանջանշանները, մեր պատշաճ հագուելակերպին ու յարդարանքին կողքին, մեզ կը բնորոշեն որպէս Եհովայի Վկաներ։ Ուստի, մեր հագուելակերպը պէտք է միշտ կոկիկ ու պատշաճ ըլլայ, ցոյց տալով թէ ‘աշխարհէն չենք’։—Յովհ. 15։19
7 Թող որ «Թագաւորութեան Նախանձախնդիր Ծանուցանողներ» բնաբանով այս տարուան Նահանգային Համաժողովին մեր կարելին ընենք, ապացուցանելու համար թէ ‘սուրբ ժողովուրդ մըն ենք մեր Տէր Աստուծոյն’։ Ասկէ առթած լաւ տպաւորութիւնները Եհովայի ‘գովութիւնը, համբաւը ու փառքը’ պիտի աւելցնեն։—Բ. Օր. 26։19
[Շրջանակ՝ էջ 6]
Ի՛նչպէս Փառաբանել Եհովան.
■ Աստուծոյ ծառային պատշաճող հագուելակերպ մը ունեցէք։
■ Աշխարհի հոգիին հետեւող ոճերէ խուսափեցէք։
■ Զգաստութիւն եւ պարկեշտութիւն ցուցաբերեցէք։