Հինգ կերպեր, Աստուածաշունչի ուսումնասիրութիւն գտնելու համար

1. Եթէ մեր թաղամասին մէջ Աստուածաշունչի ուսումնասիրութիւն գտնելը մարտահրաւէր մըն է, ի՞նչ պէտք է ընենք եւ ինչո՞ւ։

¹ Աստուածաշունչը ուսումնասիրելու նպատակով անհատ մը գտնելը մարտահրաւէր նկատա՞ծ ես։ Շարունակէ՛ ջանք թափել։ Եհովան կ’օրհնէ զանոնք, որոնք իր կամքը կատարելու առնչութեամբ ձեռնթափ չեն ըլլար (Գաղ. 6։9)։ Ստորեւ կան հինգ թելադրութիւններ, քեզի օգնելու համար։

2. Ինչպէ՞ս կրնանք ուղղակի մօտեցում գործածել, ուսումնասիրութիւն մը սկսելու համար։

² Ուղղակի մօտեցում։ Շատեր գիտեն թէ մենք Դիտարան եւ Զարթի՛ր կ’առաջարկենք, բայց թերեւս տեղեակ չեն թէ Աստուածաշունչի ուսումնասիրութիւններ ալ կ’առաջարկենք։ Ինչո՞ւ ուղղակի մօտեցումը չգործածես, երբ տունէ տուն կը ծառայես։ Նաեւ կրնաս հետաքրքրուած վերայցելութիւններուդ հարցնել, եթէ կը փափաքին Աստուածաշունչը ուսումնասիրել։ Եթէ մերժեն, մի՛ դադրիր իրենց հրատարակութիւններ տալէ եւ հետաքրքրութիւնը մշակելէ։ Եղբայր մը, տարիներէ ի վեր կ’այցելէր ամուսնացած զոյգի մը՝ պարբերաթերթ տալու համար։ Պարբերաթերթերուն վերջին թիւերը անոնց տալէ ետք, հազիւ կը պատրաստուէր մեկնելու, միտքէն անցաւ որ սա հարցումը ուղղէ իրենց. «Աստուածաշունչի ուսումնասիրութիւն մը կը փափաքի՞ք»։ Ի զարմանք իրեն, պատասխանը այո՛ էր։ Այժմ այդ զոյգը մկրտուած է։

3. Պէ՞տք է ենթադրենք, որ ժողովներուն ներկայ գտնուողները մէկու մը հետ Աստուածաշունչը կ’ուսումնասիրեն. բացատրէ՛։

³ Ժողովներուն ներկայ գտնուողները։ Մի՛ ենթադրեր, թէ ժողովներուն ներկայ գտնուող հետաքրքրուած անհատները արդէն Աստուածաշունչը կ’ուսումնասիրեն։ Եղբայր մը կը տեղեկագրէ. «Իմ ունեցած ուսումնասիրութիւններուս աւելի քան կէսը, ժողովներուն ներկայ գտնուողներուն հետ խօսելուս պատճառով հաստատուեցան»։ Քոյր մը որոշեց ամչկոտ կնոջ մը մօտենալ, որուն մկրտուած աղջիկները ժողովքին մէջ էին։ Կինը մօտ 15 տարի ժողովներուն ներկայ կը գտնուէր։ Ան միշտ ժողովը սկսելուն պէս Թագաւորութեան սրահ կը մտնէր եւ վերջանալուն պէս ալ անկէ կը մեկնէր։ Կինը ընդունեց ուսումնասիրել եւ ի վերջոյ ճշմարտութեան եկաւ։ Քոյրը կը գրէ. «Պարզապէս կը ցաւիմ որ 15 տարի սպասեցի՝ իրեն ուսումնասիրութիւն մը առաջարկելու համար»։

4. Ինչպէ՞ս կրնանք հարցնելով եւ տեղեկացնելով ուսումնասիրութիւն մը գտնել։

⁴ Հարցնել եւ տեղեկացնել։ Քոյր մը կը ջանայ ուրիշներու Աստուածաշունչի ուսումնասիրութիւններուն մասնակցիլ։ Վարողին արտօնութեամբ, դասին վերջաւորութեան, ան աշակերտուհիին կը հարցնէ եթէ գիտէ ոեւէ մէկը, որ թերեւս փափաքի իր անձնական ուսումնասիրութիւնը ունենալ։ Աստուածաշունչը կը սորվեցնէ գիրքը վերայցելութեանդ առաջարկելու ատեն, կրնաս հարցնել. «Գիտե՞ս մէկը, որ այս գիրքէն օրինակ մը կ’ուզէ»։ Երբեմն, պարագաները չեն ներեր որ հրատարակիչներն ու ռահվիրաները ուսումնասիրութիւն մը վարեն՝ թաղամասին մէջ իրենց գտած անհատին հետ։ Ուստի տեղեկացո՛ւր ուրիշները, թէ մատչելի ես Աստուածաշունչի ուսումնասիրութիւն մը վարելու համար։

5. Ինչո՞ւ կարելի է հրատարակիչներու անհաւատ կողակիցներուն ուսումնասիրութիւն մը առաջարկել։

⁵ Անհաւատ կողակիցներ։ Ժողովքիդ մէջ կա՞ն հրատարակիչներ, որոնց կողակիցները անհաւատ են։ Կարգ մը անհաւատներ չեն ուզեր որ իրենց կողակիցը Աստուածաշունչին մասին խօսի, բայց եւ այնպէս, անոնք ուսումնասիրութեան առաջարկ մը կ’ընդունին, եթէ առաջարկողը ընտանիքի անդամ մը չըլլայ։ Յաճախ, լաւագոյն մօտեցումը որոշելու համար, նախընտրելի է նախապէս հաւատացեալ կնոջ կամ ամուսինին կարծիքը առնել։

6. Ուսումնասիրութիւն մը գտնել ջանալու առնչութեամբ, աղօթքը որքա՞ն արժէքաւոր է։

⁶ Աղօթք։ Աղօթքին զօրութիւնը թեթեւի մի՛ առներ (Յակ. 5։16)։ Եհովան կը խոստանայ որ մտիկ պիտի ընէ մեր խնդրանքները, եթէ իր կամքին համաձայն ըլլան (Ա. Յովհ. 5։14)։ Եղբայր մը որ շատ խճողուած յայտագիր մը ունէր, սկսաւ աղօթքով Աստուածաշունչի ուսումնասիրութիւն մը խնդրել։ Իր կինը կը մտածէր որ արդեօք ան ժամանակ պիտի գտնէ՞ աշակերտին հոգ տանելու համար, մա՛նաւանդ եթէ աշակերտը շատ մը խնդիրներ ունենար։ Ուստի, երբ կինը կ’աղօթէր այս նիւթին շուրջ, այս մտահոգութիւնները Եհովային յայտնեց։ Գրեթէ երկու շաբաթ անց, իրենց աղօթքները պատասխանուեցան, երբ ժողովքին մէկ ռահվիրան հանդիպեցաւ մարդու մը որ ուզեց ուսումնասիրել. ուստի ռահվիրան ուսումնասիրութիւնը այդ եղբօրը յանձնեց։ Կինը կը գրէ. «Բոլոր անոնց, որոնք թերեւս կը զգան թէ Աստուածաշունչի ուսումնասիրութիւն մը վարելը իրենց կարողութենէն վեր է, կ’ըսեմ. ‘Այս մասին մասնայատուկ կերպով եւ անդադար աղօթեցէք։ Մենք աւելի ուրախացանք, քան ինչ որ կ’երեւակայէի’»։ Յարատեւելով, դուն ալ թերեւս կարենաս Աստուածաշունչի ուսումնասիրութիւն մը գտնել եւ վայելել այն ուրախութիւնը որ յառաջ կու գայ անհատի մը օգնելէն, որ ‘դէպի կեանք տանող ճամբուն’ հետեւի (Մատ. 7։13, 14)։