Մոնտիալը իրապէս կրնա՞յ մարդիկը միացնել. Աստուածաշունչը ի՞նչ կ’ըսէ

Կ’ակնկալուի որ մօտ հինգ միլիառ մարդ դիտեն ՖԻՖԱ–ի ֆութպոլի աշխարհի ախոյեանութիւնը, կամ Մոնտիալը, որ տեղի կ’ունենայ նոյեմբեր 2–էն մինչեւ դեկտեմբեր 18 (2022)։ Շատեր կը կարծեն որ այս տեսակ մարզական առիթներ շա՛տ աւելին կրնան ընել, քան՝ միայն դիտողներուն այն զգացումը տան թէ ուրիշներուն հետ միութեան մէջ են։

• «Մարզանքը կրնայ աշխարհը փոխել։ Անիկա կրնայ մարդիկը խանդավառել եւ յատուկ կերպով միացնել» (Նելսըն Մանտելա, Հարաւային Ափրիկէի նախկին նախագահ)։

• «Ֆութպոլը մարդիկը կը միացնէ, քանի որ անոնց յոյս, ուրախութիւն ու եռանդ կու տայ։ Անոնց զգացնել կու տայ, որ իրենք կը սիրեն ուրիշները եւ անոնց սիրած բաները» (Ճիաննի Ինֆանթինօ, ՖԻՖԱ–ի նախագահ)a։

Մոնտիալը կամ ուրիշ որեւէ մարզական առիթ մը կրնա՞յ այսպիսի նպատակակէտեր իրագործել։ Յոյս կա՞յ որ օրին մէկը խաղաղութիւն եւ միութիւն ըլլայ։

Մոնտիալը մարդիկը կը միացնէ՞

Այս տարուան Մոնտիալը ձգեց որ մարդիկ ատիկա խաղէ մը աւելի սեպեն։ Ատիկա պատճառ դարձաւ, որ ոմանք մարդկային իրաւունքներու, ցեղապաշտութեան եւ տնտեսական անհաւասարութեան նման ընկերային ու քաղաքական հարցերու շուրջ վիճաբանին։

Հակառակ ասոր, շատեր դեռ կը սիրեն Մոնտիալին պէս միջազգային խաղեր դիտել։ Բայց որքան ալ անոնք ուզեն որ այս խաղերը մարդիկը միացնեն, շատ անգամ ատոնց ընթացքին կը տեսնենք մարդիկը իրարմէ բաժնող կեցուածքներ եւ վարքեր։ Եւ Աստուածաշունչը ըսա՛ծ էր որ «վերջին օրեր»ուն մարդիկ այդպէս պիտի ըլլային (Բ. Տիմոթէոս 3։1-5)։

Յոյս կայ որ համաշխարհային միութիւն ըլլայ

Աստուածաշունչը յոյս կու տայ, որ համաշխարհային միութիւն պիտի ըլլա՛յ։ Անիկա կը խոստանայ որ «Աստուծոյ թագաւորութիւն» կոչուած երկնային կառավարութիւն մը երկրի վրայ եղող բոլոր մարդիկը պիտի միացնէ (Ղուկաս 4։44. Մատթէոս 6։10)։

Այդ Թագաւորութեան Թագաւորը՝ Յիսուս Քրիստոս՝ վստահ պիտի ըլլայ որ ամբողջ աշխարհի մէջ խաղաղութիւն ըլլայ։ Աստուածաշունչը կ’ըսէ.

• «Արդարը պիտի ծաղկի ու շատ խաղաղութիւն պիտի ըլլայ» (Սաղմոս 72։7)։

• «Աղքատը պիտի փրկէ աղաղակելու ատենը։... Հարստահարութենէ ու բռնութենէ պիտի փրկէ անոնց անձը» (Սաղմոս 72։12, 14)։

Նոյնիսկ այսօր, Յիսուսին սորվեցուցած բաները միլիոնաւոր մարդիկ արդէն միացուցած են՝ 239 երկիրներու մէջ։ Անոնք սորված են ուրիշները չատել։ Եթէ կ’ուզես աւելի՛ն գիտնալ, կարդա՛ «Ինչպէ՞ս կրնանք ատելութեան շղթան կոտրել» վերնագիրով յօդուածաշարքը (արաբ.)։