Դիտարան եւ Զարթի՛ր—Ճշմարտութեան ժամանակայարմար պարբերաթերթեր

«Ո՜վ Եհովա՝ Աստուա՛ծ ճշմարտութեան՝ դուն զիս փրկեցիր»։—ՍԱՂՄՈՍ 31։5

1, 2. (ա) Քոյր մը ինչպէ՞ս զգաց, երբ Դիտարանէն բան մը կարդաց։ (բ) Մեր պարբերաթերթերուն մասին ի՞նչ հարցումներ եղած են։

ՔՐԻՍՏՈՆԵԱՅ քոյր մը գրեց. «Շա՜տ շնորհակալ եմ՝ ‘Նեղութեան Ժամանակ Կրնաք Մխիթարութիւն Գտնել’, Դիտարանի յօդուածին հոյակապ տեղեկութիւններուն համար։a Ձեր ներկայացուցած կէտերէն շատերը ճիշդ այդ զգացումներն էին, որոնց հետ գլուխ պէտք էր ելլէի։ Այս յօդուածը կարծէք ուղղակի ինծի համար գրուած էր։ Երբ առաջին անգամ կարդացի, աչքերս արցունքոտեցան։ Ի՜նչ սքանչելի է գիտնալ որ ուրիշ մը գիտէ իմ զգացումներս։ Շատ երախտապարտ եմ որ Եհովայի Վկայ մըն եմ։ Ուրիշ ո՛ւր, մօտ ապագային Դրախտին մէջ յաւիտեան ապրելու խոստումը, իսկ հիմա՝ մեր հոգիներուն բալասան կրնանք գտնել։ Շնորհակալ եմ ձեզի։ Հազար անգամ շնորհակալ եմ»։

² Դուք ալ այս զգացումը ունեցա՞ծ էք։ Այն տպաւորութիւնը ունեցա՞ծ էք որ Դիտարանի կամ Զարթի՛րի մէջ բան մը մասնաւորաբար ձեզի համար գրուած է։ Մեր պարբերաթերթերուն մէջ ի՞նչ կայ որ մարդոց սրտին կը դպչի։ Ինչպէ՞ս կրնանք ուրիշներուն օգնել որ անոնց բովանդակած կեանք փրկող պատգամէն օգտուին։—Ա. Տիմոթէոս 4։16

Ճշմարտութիւնը Ջատագովող Պարբերաթերթեր

3. Ի՞նչ լաւ պատճառով, մեր Դիտարան ու Զարթի՛ր պարբերաթերթերը շատ մը ընթերցողներուն սրտին դպած են։

³ Եհովան ‘ճշմարտութեան Աստուած’ է։ (Սաղմոս 31։5) Իր Խօսքը՝ Աստուածաշունչը՝ ճշմարտութեան գիրք մըն է։ (Յովհաննու 17։17) Պարկեշտ սիրտ ունեցող անհատներ կ’ընդառաջեն ճշմարտութեան։ (Բաղդատել Յովհաննու 4։23, 24։) Դիտարանը եւ Զարթի՛րը ուղղամտութիւնն ու ճշմարտութիւնը ջատագովող պարբերաթերթեր են. ահաւասիկ պատճառներէն մէկը թէ անոնք ի՛նչու միլիոնաւոր մարդոց սրտերուն դպած են։ Իրապէս, Աստուծաշունչի ճշմարտութեան հանդէպ հաւատարմութեան հարցով սկսաւ հրատարակուիլ Դիտարանը։

4, 5. (ա) Ի՞նչ պարագաներ մղեցին Ռասըլի որ Դիտարանը հրատարակէ։ (բ) Դիտարանը ինչպէ՞ս գործածուած է «հաւատարիմ ու իմաստուն ծառայ»ին կողմէ։

⁴ 1876–ին, Չարլզ Թ. Ռասըլը, Նիւ Եորքի Ռոչէսթըր քաղաքէն Նէլսըն Հ. Պարպըրին ընկերակցեցաւ։ Ռասըլ դրամ հայթայթեց, որպէսզի Պարպըրի կրօնական պարբերաթերթը՝ Առաւօտեան Մունետիկ–ը՝ շարունակուի լոյս տեսնել, Պարպըր ունենալով որպէս խմբագրապետ, իսկ Ռասըլ՝ որպէս խմբագիր։ Մօտ մէկուկէս տարի ետք սակայն, Մունետիկ–ին Օգոստոս 1878–ի թիւին մէջ, Պարպըր յօդուած մը գրեց, որ Քրիստոսի մահուան քաւիչ արժէքը կ’ուրանար։ Ռասըլ, որ Պարպըրէն գրեթէ 30 տարի աւելի երիտասարդ էր, ճիշդ յաջորդ թիւին մէջ յօդուած մը գրեց փրկանքը ջատագովելով, որու ակնարկեց որպէս «Աստուծոյ Խօսքին ամենէն կարեւոր ուսուցումներէն մէկը»։ (Մատթէոս 20։28) Սուրբ գրային գետնի վրայ Պարպըրի տրամաբանել տալու բազմաթիւ ջանքերէն ետք, Ռասըլ վերջապէս որոշեց ամէն կապ խզել Մունետիկ պարբերաթերթին հետ։ Այդ թերթին Յունիս 1879–ի թիւէն սկսեալ, Ռասըլի անունը անոր մէջ այլեւս չերեւցաւ որպէս խմբագիր։ Ամիս մը ետք, 27 տարեկան Ռասըլ սկսաւ հրատարակել Սիօնի Դիտարանը եւ Քրիստոսի Ներկայութեան Մունետիկը խորագրով պարբերաթերթը (հիմա ճանչցուած որպէս՝ Դիտարանը կը Ծանուցանէ Եհովայի Թագաւորութիւնը), որ սկիզբէն իսկ սուրբ գրային ճշմարտութիւնները ջատագովեց, ինչպէս՝ փրկանքը։

⁵ Անցեալ 114 տարիներու ընթացքին, Դիտարանը, ճարտար փաստաբանի մը նման, ինքզինք պարտադրած է որպէս Աստուածաշունչի ճշմարտութեան եւ վարդապետութեան պաշտպանը։ Այս միջոցին, անիկա միլիոնաւոր գնահատող ընթերցողներու վստահութիւնը շահած է։ Անիկա տակաւին ուժգին կերպով կը պաշտպանէ փրկանքը։ (Տես, օրինակի համար, 15 Փետրուսր 1991–ի թիւը։) Իսկ Եհովայի հաստատուած Թագաւորութիւնը ծանուցանելու եւ «ատենին» հոգեւոր կերակուր մատակարարելու համար, անիկա կը շարունակէ գլխաւոր գործիքը ըլլալ «հաւատարիմ ու իմաստուն ծառայ»ին եւ անոր Կառավարիչ Մարմնին։—Մատթէոս 24։14, 45

6, 7. Ոսկեդարին նպատակը ի՞նչ էր, եւ ի՞նչ բան ցոյց կու տայ որ խորհող անհատներ անոր պատգամին ընդառաջեցին։

⁶ Ի՞նչ կրնանք ըսել Զարթի՛ր պարբերաթերթին մասին։ Զարթի՛րն ալ սկիզբէն իսկ ճշմարտութիւնը ջատագոված է։ Այս պարբերաթերթը, որ սկիզբը կը կոչուէր Ոսկեդար, հանրութեան ցրուելու համար մտադրուած էր։ Անոր նպատակին մասին 1 Հոկտեմբեր 1919–ի առաջին թիւին մէջ ըսուած էր. «Անոր նպատակն է Աստուածային իմաստութեան լոյսին ներքեւ ներկայ մեծ պատահարներուն իրական իմաստը բացատրել եւ խորհող միտքերուն անժխտելի ու համոզիչ ապացոյցներով փաստել որ մարդկութեան համար մեծագոյն օրհնութեան ժամանակը մօտեցած է»։ Խորհող անհատներ ընդառաջեցին Ոսկեդարի պատգամին։ Անոր ցրուումը տարիներ Դիտարանէն աւելի մեծ էր։b

⁷ Դիտարանի ու Զարթի՛րի գրաւչութիւնը, սակայն, միայն վարդապետական ճշմարտութիւններու հրատարակչութեան եւ աշխարհի վիճակներուն մարգարէական իմաստին բացատրութեան մէջ չի կայանար։ Մանաւանդ անցեալ մէկ կամ երկու տասնամեակներուն, մեր պարբերաթերթերը ուրիշ պատճառով մըն ալ մարդոց սրտերը գրաւած են։

Մարդոց Կեանքին Ազդող Ժամանակայարմար Յօդուածներ

8. Յուդա իր գրութեան մէջ ի՞նչ բարեփոխութիւն ըրաւ, իր ընթերցողները յորդորելով որ ժողովքին մէջ ինչպի՞սի ազդեցութիւններու դէմ դնեն։

⁸ Յիսուս Քրիստոսի մահուընէ ու յարութենէն շուրջ 30 տարիներ ետք, Աստուածաշունչի գրութեան մասնակցող Յուդա դժուար վիճակ մը դիմագրաւեց։ Քրիստոնեաներուն մէջ անբարոյ, անասնական մարդիկ սպրդած էին։ Յուդա մտադրած էր վարդապետական նիւթ մը գրել իր Քրիստոնեայ հաւատակիցներուն, օծեալ Քրիստոնեաներուն, հասարակաց փրկութեան մասին։ Սակայն, սուրբ հոգիէն առաջնորդուած, ան անհրաժեշտ տեսաւ իր ընթերցողները յորդորել, որ ժողովքին մէջ գտնուող ապականիչ ազդեցութիւններուն դիմադրեն։ (Յուդա 3, 4, 19–23) Յուդա պարագային համաձայն բարեփոխութիւն ըրաւ եւ իր Քրիստոնեայ եղբայրներուն կարիքը նկատի ունենալով ժամանակայարմար խրատներ տուաւ։

9. Մեր պարբերաթերթերուն մէջ ժամանակայարմար յօդուածներ հայթայթելու համար ի՞նչ բան նկատի կ’առնուի։

⁹ Նմանապէս, մեր պարբերաթերթերուն մէջ ժամանակայարմար յօդուածներ պատրաստելը դիւրին հարց չէ։ Ժամանակները կը փոխուին, ինչպէս նաեւ մարդիկ. անոնց կարիքներն ու հետաքրքրութիւնները տասը կամ քսան տարի առաջուանները չեն։ Ճամբորդող տեսուչ մը վերջերս ըսաւ. «Երբ ես 1950–ական թուականներուն Վկայ եղայ, մարդոց հետ Աստուածաշունչը սերտելու համար, անոնց կը մօտենայինք գլխաւորաբար վարդապետական գետնի վրայ. Երրորդութեան, դժոխքի, հոգիի եւ ասոնց նման բաներու մասին ճշմարտութիւններ կը սորվեցնէինք անոնց։ Բայց հիմա, մարդոց կեանքին մէջ ա՛յդքան խնդիրներ ու դժուարութիւններ կան որ անոնց պէտք է սորվեցնենք ինչպէս ապրիլ»։ Ինչո՞ւ արդեօք։

10. Ինչո՞ւ մեզ պէտք չէ զարմացնէ որ 1914–էն ի վեր մարդկային գործառնութիւններուն մէջ այլասեռում եղած է։

¹⁰ «Վերջին օրեր»ու առնչութեամբ, Աստուածաշունչը նախատեսեց. «Չար ու խաբեբայ մարդիկ չարութեան մէջ պիտի յառաջանան՝ մոլորեցնելով ու մոլորելով»։ (Բ. Տիմոթէոս 3։1, 13) Հետեւաբար, մեզ պէտք չէ զարմացնէ որ 1914–ին վերջին ժամանակը սկսելէն ի վեր, մարդոց գործառնութիւնները երթալով այլասեռուած են։ Գիտնալով որ իր ժամանակը երթալով կը կարճնայ, Սատանան որեւէ ժամանակէ աւելի իր բարկութիւնը կը թափէ մարդոց վրայ։ (Յայտնութիւն 12։9, 12) Որպէս հետեւանք, բարոյականն ու ընտանեկան արժէքները շա՜տ տարբեր են քան ինչ որ էին 30 կամ 40 տարի առաջ։ Անցեալ տասնամեակներու նման, մարդիկ կրօնական տրամադրութիւններ չունին։ Ոճիրը այնպիսի վերելք մը կ’արձանագրէ որ մարդիկ կարգ մը նախազգուշութիւններ ձեռք կ’առնեն, որոնց մասին լսուած իսկ չէր 20 կամ 30 տարի առաջ։—Մատթէոս 24։12

11. (ա) Մարդոց մտքերուն մէջ ինչպի՞սի նիւթեր կան, եւ հաւատարիմ ու իմաստուն ծառայ դասակարգը ինչպէ՞ս այս կարիքը լեցուցած է։ (բ) Դիտարանէն կամ Զարթի՛րէն օրինակ մը տուէք որ ձեր անձնական կեանքին ազդած է։

¹¹ Զարմանալի չէ ուրեմն, որ շատեր մտազբաղ են զգացական, ընկերային եւ ընտանեկան հարցերով։ Հաւատարիմ եւ իմաստուն ծառայ դասակարգը այդ հարցերուն խիզախօրէն պատասխանած է Դիտարանին եւ Զարթի՛րին մէջ, ժամանակայարմար յօդուածներ հրատարակելով, որոնք մարդոց իրական կարիքներուն հետ կապ ունին եւ որոնք իրապէս իրենց կեանքին ազդած են։ Կարգ մը օրինակներ նկատի առնենք։

12. (ա) 1980–ին, Դիտարանին մէջ ինչո՞ւ մէկ–ծնողով ընտանիքներու յօդուածներ պատրաստուեցան։ (բ) Քոյր մը ինչպէ՞ս իր գնահատութիւնը յայտնեց մէկ–ծնողով ընտանիքներու մասին եղած յօդուածներուն համար։

¹² Ընտանեկան հարցեր։ Երբ համայն աշխարհէն եկած տեղեկագրութիւնները ցոյց տուին որ մէկ–ծնողով ընտանիքներու արագ յաւելում մը կայ, անմիջապէս Դիտարան 15 Սեպտեմբեր 1980–ի թիւին համար յօդուածներ պատրաստուեցան, հետեւեալ բնաբանով. «Մէկ–Ծնողով Ընտանիքներ—Խնդիրներուն Հետ Գլուխ Ելլել»։ Այս յօդուաները երկու նպատակ ունէին. (1) օգնել առանձին ծնողներու որ իրենց իւրայատուկ խնդիրներուն հետ գլուխ ելլեն եւ (2) օգնել ուրիշներուն որ աւելի լաւ տեղեակ ըլլան, որպէսզի «կարեկից» ըլլան ու ‘այցելեն’ այս ընտանիքները։ (Ա. Պետրոս 3։8. Յակոբու 1։27) Բազմաթիւ ընթերցողներ իրենց գնահատութիւնը յայտնեցին այս յօդուածներուն համար։ «Երբ կողքը տեսայ, արդէն աչքերս արցունքոտեցան», գրեց առանձին ընտանիք մեծցնող կին մը «եւ երբ պարբերաթերթը բացի եւ տեղեկութիւնը կարդացի, սիրտս Եհովայի հանդէպ երախտագիտութենէ յորդեցաւ, ժամանակին այսպիսի տեղեկութիւն հայթայթելուն համար»։

13. 1981–ին, Զարթի՛րին մէջ ընկճուածութեան մասին ի՞նչ խորունկ նիւթ մը հրատարակուեցաւ, եւ ընթերցող մը ի՞նչ ըսաւ այդ մասին։

¹³ Զգացական հարցեր։ 1960–էն ի վեր, ընկճուածութեան մասին Դիտարան եւ Զարթի՛ր պարթերաթերթերը խօսած են։ (Ա. Թեսաղոնիկեցիս 5։14) Բայց այս նիւթը նոր եւ դրական կերպով ձեռք առնուեցաւ 8 Սեպտեմբեր 1981–ի Զարթի՛րին կողքին հետ գացող «Կրնաք Ընկճուածութեան Դէմ Պայքարիլ» նիւթերու շարքով մը։ Շուտով, Դիտարանի Ընկերութիւնը ողողուեցաւ համայն աշխարհէն եկած գնահատական նամակներով։ «Թուղթին վրայ ինչպէ՞ս արտայայտեմ զգացումներս», գրեց քոյր մը։ «24 տարեկան եմ եւ անցեալ տասը տարիներու ընթացքին ընկճուածութեան բազմաթիւ շրջաններ ունեցայ։ Բայց հիմա Եհովայի աւելի մօտ կը զգամ եւ երախտապարտ եմ որ ընկճուած անհատներուն կարիքներուն ընդառաջեց այս սիրալիր յօդուածներով եւ ես ուզեցի ասիկա յայտնել ձեզի»։

14, 15. (ա) Երախաներու եղծանման նիւթը ինչպէ՞ս նկատի առնուեցաւ մեր պարբերաթերթերուն մէջ։ (բ) Պարբերաթերթին ո՞ր յօդուածները մեծ տպաւորութիւն ձգեցին Աւստրալիայէն ձիավարժի մը։

¹⁴ Ընկերային հարցեր։ Աստուածաշունչը նախագուշակեց որ «վերջին օրեր»ուն, մարդիկ պիտի ըլլան «անձնասէր, ... անգութ ... անժուժկալ, դաժանաբարոյ, բարին չսիրող»։ (Բ. Տիմոթէոս 3։1–3) Հետեւաբար, մեզ պէտք չէ զարմացնէ որ այսօր համատարած է երախաներու եղծանումը։ Այս նիւթին մասին, անկեղծօրէն խօսուեցաւ՝ «Ազգապղծութեան Զոհերուն Օգնութիւն» յօդուածին մէջ, Դիտարան 1 Հոկտեմբեր 1983–ի թիւին մէջ։ Ութ տարի ետք, 8 Հոկտեմբեր 1991–ի Զարթի՛րի կողքի հետ գացող յօդուածները զգուշութեամբ պատրաստուած էին, այդ զոհերուն հանդէպ հասկացողութիւն ցոյց տալու եւ անոնց յոյս տալու մտքով, ինչպէս նաեւ՝ ուրիշները լուսաբանելու, որպէսզի կարենան անոնց օգնութիւն մատուցանել։ Այս յօդուածներու շարքը մեր պարբերաթերթերուն պատմութեան մէջ ընթերցողներու կողմէ մեծագոյն ընդառաջումին արժանացան։ Ընթերցող մը գրեց. «Իմ ապաքինմանս նպաստող մեծագոյն բանը այդ յօդուածներուն մէջի ամոքիչ գաղափարները եւ սուրբ գրային համարները եղան։ Գիտնալ թէ Եհովա ինծի ցած աչքով չի նայիր, անսահմանօրէն ամոքեց զիս։ Նաեւ մխիթարիչ էր գիտնալ որ ես առանձին չէի»։

¹⁵ Աւստրալիոյ Մելպուրն քաղաքէն ձիավարժ մը մինչեւ Սիտնի Դիտարանի Ընկերութեան մասնաճիւղը հեռաձայնեց, ձիարշաւարանի մթնոլորտին շուրջ իր զզուանքը արտայայտելու համար։ Ան ըսաւ որ տակաւին նոր ձեռքը անցած էր բռնաբարումի մասին Զարթի՛ր պարբերաթերթը եւ աչքերուն չէր հաւատար որ այսպիսի թանկարժէք պարբերաթերթ մը գոյութիւն ունի։ Շուրջ 30 վայրկեան, ան հարցումներ ըրաւ եւ տրուած պատասխանները հաճոյքով լսեց։

16. Մեր պարբերաթերթերուն հանդէպ մեր գնահատութիւնը ի՞նչ կերպով կրնանք ցոյց տալ։

¹⁶ Ի՞նչ կրնաք ըսել ձեր մասին։ Դիտարանի կամ Զարթի՛րի մէջ հրատարակուած մասնայատուկ յօդուած մը ձեր կեանքին ազդա՞ծ է։ Եթէ այո, անկասկած երախտագիտութեան խոր զգացում մը ունիք մեր պարբերաթերթերուն հանդէպ։ Ինչպէ՞ս կ’արտայայտէք ձեր երախտագիտութիւնը։ Անկասկած նախ դուք անձամբ կարդալով։ Նաեւ, կրնաք այս թանկարժէք պարբերաթերթերուն կարելի եղածին չափ լայն տարածման մասնակցիլ։ Ասիկա ինչպէ՞ս կրնայ կատարուիլ։

Ուրիշներու Հետ Բաժնեցէ՛ք Զանոնք

17. Պարբերաթերթերուն ցրուումը աւելցնելու համար, ժողովքները ի՞նչ կրնան ընել։

¹⁷ Նախ բան մը կայ որ իւրաքանչիւր ժողովք կրնայ ընել։ 1952 Հոկտեմբերի Տեղեկատուն (հիմա Մեր Թագաւորութեան Ծառայութիւնը) կ’ըսէր. «Պարբերաթերթերը ցրուելու ամենէն ազդեցիկ կերպն է տունէ տուն եւ խանութէ խանութ երթալ։ Հետեւաբար, Ընկերութիւնը կը յանձնարարէ որ պարբերաթերթի ցրուումի այս կերպը Պարբերաթերթի Օրուան գործունէութեան կանոնաւոր մէկ մասը կազմէ»։ Այդ խրատը այսօր ալ վաւերական է։ Ժողովքները կրնան կանոնաւորաբար կազմակերպել Պարբերաթերթի Օր մը, օր մը որ գլխաւորաբար յատկացուած ըլլայ պարբերաթերթով վկայելու։ Շատ մը ժողովքներու համար, որոշ Շաբաթ օրեր կրնան անկասկած յարմար ըլլալ։ Այո, իւրաքանչիւր ժողովք թող մասնաւոր օրեր կամ երեկոներ յատկացնէ պարբերաթերթի վկայութեան համար. ըլլայ՝ տունէ տուն, խանութէ խանութ, փողոցի մէջ, կամ երբ անհատներու կանոնաւորաբար պարբերաթերթ կը տարուի։ Ասկէ զատ, որպէս Թագաւորութեան հրատարակիչ, դուք ի՞նչ կրնաք ընել պարբերաթերթի ցրուումը աւելցնելու համար։

18, 19. (ա) Դիտարանին եւ Զարթի՛րին քաջածանօթ ըլլալը մեզի ինչպէ՞ս կ’օգնէ զանոնք տեղաւորելու։ (բ) Երբ պարբերաթերթ կը մատուցանենք, հակիրճ, ուղղակի կէտը շօշափող ներկայացման մը առաւելութիւնը ի՞նչ է։ (գ) Ի՞նչ բան ցոյց կու տայ պարբերաթերթերը մարդոց տուները հասցնելուն արժէքը։

¹⁸ «Դիտարան»ին եւ Զարթի՛ր»ին քաջածանօթ ըլլալը առաջին քայլն է։ Պարբերաթերթերը կարդացէք նախապէս։ Մինչ իւրաքանչիւր յօդուած կը կարդաք, դուք ձեզի հարց տուէք. ‘Այս յօդուածը որո՞ւ կրնայ հետաքրքրել’։ Խորհեցէք թէ քանի մը խօսքով ինչպէս կրնաք յօդուածին հանդէպ հետաքրքրութիւն արթնցնել։ Պարբերաթերթի Օրուան թիկունք կանգնելէ զատ, ինչու քանի մը օրինակներ ձեզի հետ չունենաք, որպէսզի ամէն պատեհ առիթի զանոնք բաժնէք ուրիշներու հետ. երբ կը ճամբորդէք կամ գնում կ’ընէք, կամ երբ կը խօսակցիք ձեր գործակիցներուն, դրացիներուն, դասընկերներուն, կամ ուսուցիչներուն հետ։

¹⁹ Երկրորդ թելադրութիւնն է՝ պարզօրէն ներկայացուցէք։ 1 Դեկտեմբեր 1956–ի Դիտարանը կը նշէր. «Հակիրճ, ուղղակի կէտը շօշափող ներկայացում մը լաւագոյնն է, երբ պարբերաթերթերը կը մատուցանէք։ Նպատակն է շատ օրինակներ ձգել։ Անոնք ինքնին պիտի ‘խօսին’»։ Կարգ մը հրատարակիչներ շատ գործնական գտած են յօդուածէ մը գաղափար մը առնել, անոր վրայ քանի մը բառ աւելցնել եւ պարբերաթերթերը ներկայացնել։ Անգամ մը որ տունէն ներս մտնէ, պարբերաթերթը ի՛նք կը «խօսի», ոչ միայն զայն ընդունող անհատին, այլ ուրիշներուն ալ։ Իրլանտայի մէջ, համալսարանական մը Դիտարանի 1 Սեպտեմբեր 1991–ի թիւը կարդաց, զոր իր հայրը ընդունած էր Վկայէ մը։ Հաղորդակցութեան մասին յօդուածը եւ ուրիշ նիւթեր իր հետաքրքրութիւնը արթնցուցին։ Պարբերաթերթը կարդալով, ան շուտով հեռաձայնեց Վկաներուն, հեռաձայնի գրքէն թիւը առնելէ ետք։ Անմիջապէս Աստուածաշունչի ուսումնասիրութիւն մը սկսուեցաւ եւ այս երիտասարդուհին մկրտուեցաւ Յուլիս 1993–ի «Աստուածային Ուսուցում» Նահանգային համաժողովին։ Ամէն գնով, պարբերաթերթերը հասցնենք մարդոց տուները, ուր անոնք կրնան «խօսիլ» անոնց։ Ճամբորդող տեսուչ մը ուրիշ պարզ թելադրութիւն մը ըրաւ. «Պարբերաթերթերը ձեր պայուսակէն դուրս հանեցէք»։ Արդարեւ, եթէ ձեր ըսածը տանտիրոջ հետաքրքրութիւնը չարթնցնէ, թերեւս անոնց կողքի գրաւիչ պատկերը ձեր տեղ պարբերաթերթերը պիտի տեղաւորէ։

20, 21. (ա) Երբ պարբերաթերթի ցրուումին կը մասնակցիք, ինչպէ՞ս կրնաք դիւրաթեք ըլլալ։ (բ) Ի՞նչ կրնաք ընել ամէն ամիս աւելի շատ պարբերաթերթ ցրուելու համար։

²⁰ Երրորդ թելադրութիւնն է՝ դիւրաթեք եղէք։ (Բաղդատել Ա. Կորնթացիս 9։19–23։) Քանի մը հակիրճ ներկայացումներ պատրաստեցէք։ Ի մտի ունեցէք յօդուած մը, որ կրնայ այր մարդիկը հետաքրքրել, իսկ ուրիշ մը՝ կիներու համար։ Երիտասարդներուն համար կրնաք ընտրել «Երիտասարդները կը Հարցնեն ...» յօդուածը։ Դիւրաթեք եղէք նաեւ երբ պարբերաթերթի գործունէութեան կը մասնակցիք։ Պարբերաթերթի Օրուընէ զատ, երեկոյեան վկայելն ալ հոյակապ պատեհութիւն կ’ընծայէ որ պարբերաթերթերը տունէ տուն ներկայացնենք։

²¹ Չորրորդ թելադրութիւնն է՝ անձնական նպատակակէտեր դրէք։ Մարտ 1984–ի Մեր Թագաւորութեան Ծառայութիւնը թերթիկին մէջ լոյս տեսած՝ «Պարբերաթերթերը Կեանքի Ճամբան կը Մատնանշեն» յաւելուածականին մէջ կը նշէր. «Որպէս թելադրութիւն, հրատարակիչները կրնան, թերեւս իրենց պարագաներուն համաձայն, ամիսը 10 պարբերաթերթերու նպատակակէտ մը դնել, իսկ ռահվիրաները կրնան ջանալ 90–ի հասնիլ։ Անշուշտ, կարգ մը հրատարակիչներ թերեւս կարենան ամէն ամիս աւելի շատ տեղաւորել, հետեւաբար անձնական աւելի բարձր նպատակակէտ մը կրնան դնել։ Սակայն, վատառողջութեան, թաղամասի տեսակին, կամ ուրիշ պատճառներով, թերեւս ուրիշներուն նպատակակէտը աւելի ցած ըլլայ։ Բայց Եհովայի մատուցած անոնց ծառայութիւնը նոյնքան արժէքաւոր է։ (Մատթէոս 13։23. Ղուկաս 21։3, 4) Կարեւոր բանն է անձնական նպատակակէտ ունենալ»։

22. Ի՞նչ կերպով կրնանք ցոյց տալ որ Եհովայի երախտապարտ ենք մեր ժամանակայարմար պարբերաթերթերուն համար։

²² Որքա՜ն երախտապարտ ենք որ Եհովա՝ ‘ճշմարտութեան Աստուածը’՝ հաւատարիմ ու իմաստուն ծառան եւ անոր Կառավարիչ Մարմինը գործածած է, որպէսզի մեզի այս ժամանակայարմար պարբերաթերթերը հայթայթեն։ (Սաղմոս 31։5) Ա՛յնքան ատեն որ Եհովայի կամքն է, այս պարբերաթերթերը պիտի շարունակեն մարդոց իրական պէտքերը գոհացնել։ Անոնք պիտի շարունակեն Եհովայի բարոյական բարձր չափանիշները ջատագովել։ Անոնք ետ պիտի չկենան շիտակ վարդապետութիւնները պաշտպանելէ։ Պիտի յարատեւեն ուշադրութիւն հրաւիրել այն մարգարէութիւններու կատարման վրայ, որ մեր օրերը կը նշէ որպէս ա՛յն ժամանակը, երբ Աստուծոյ Թագաւորութիւնը կ’իշխէ եւ Աստուծոյ կամքը աննախընթաց կերպով կը կատարուի երկրի վրայ, Եհովայի երկրպագուներու երթալով աւելցող թիւով։ (Մատթէոս 6։10. Յայտնութիւն 11։15) Ի՜նչ անգին գանձ մըն են Դիտարանը եւ Զարթի՛րը։ Թող որ ամէն առիթ օգտագործենք, հեզ անհատներու հետ բաժնելու այս կարեւոր պարբերաթերթերը որոնք մարդոց կեանքին կ’ազդեն եւ Թագաւորութեան ճշմարտութիւնները կը պաշտպանեն։

[Ստորանիշ էջ 27]

[Ստորանիշ էջ 28]

Ձեր Պատասխանները Ի՞նչ Են

◻ Ի՞նչ բան ցոյց կու տայ որ Դիտարանը եւ Զարթի՛րը ճշմարտութեան պարբերաթերթեր են։

◻ Դիտարանը եւ Զարթի՛րը ինչպէ՞ս ազդած են մարդոց կեանքերուն։

◻ Ժողովքները ի՞նչ կրնան ընել պարբերաթերթի ցրուումը աւելցնելու համար։

◻ Ո՞ր թելադրութիւնները կրնան ձեզի օգնել աւելի շատ պարբերաթերթեր ցրուելու։