Ընտանիքներ՝ Աստուած կը փառաբանեն որպէս իր ժողովքին մէկ մասը
«Ժողովներուն մէջ Տէրը պիտի օրհնեմ»։—ՍԱՂՄՈՍ 26։12
1. Տան մէջ ուսումնասիրութիւն ու աղօթք ընելէ զատ, ճշմարիտ պաշտամունքին կարեւոր մէկ մասը նաեւ ի՞նչ է։
ԵՀՈՎԱՅԻ պաշտամունքը ոչ միայն աղօթք եւ տան մէջ Աստուածաշունչի ուսումնասիրութիւն կը ներփակէ, այլ նաեւ գործունէութիւն՝ որպէս Աստուծոյ ժողովքին մէկ մասը։ Երբեմնի Իսրայէլի պատուէր տրուած էր որ ‘հաւաքեն ժողովուրդը՝ այրերը, կիներն ու տղաքները’, որպէսզի Աստուծոյ օրէնքը լսեն ու անոր ճամբուն մէջ քալեն։ (Բ. Օրինաց 31։12. Յեսուայ 8։35) Քաջալերութիւն տրուած էր որ տարեցներ, «երիտասարդներ եւ կոյս աղջիկներ» Եհովայի անունը փառաբանեն։ (Սաղմոս 148։12, 13) Նոյնանման կարգադրութիւններ կ’ըլլան քրիստոնէական ժողովքէն ներս։ Համայն երկրի Թագաւորութեան Սրահներուն մէջ այրեր, կիներ եւ երախաներ սիրայօժար կերպով բաժին կը բերեն ունկնդիրներուն մասնակցութեամբ եղած նիստերու ընթացքին, եւ շատեր մեծ հաճոյք կ’առնեն ասկէ։—Եբրայեցիս 10։23-25
2. (ա) Նախապատրաստութիւնը ինչո՞ւ բանալի ազդակ մըն է անչափահասներուն օգնելու որ ժողովներէն հաճոյք առնեն։ (բ) Որո՞նց օրինակը կարեւոր է։
2 Ճիշդ է որ դիւրին չէ անչափահասներուն օգնել որ ժողովքային սովորական գործունէութեան մէջ լիարժէք մասնակցութիւն մը բերեն։ Եթէ իրենց ծնողներուն հետ ժողովներու յաճախող երախաներէն ոմանք, ըստ երեւոյթին անոնցմէ հաճոյք չեն առներ, ի՞նչ կրնայ ըլլալ խնդիրը։ Ճիշդ է որ երախաներէն շատեր չեն կրնար երկար ժամանակ կեդրոնացած մնալ, եւ շատ դիւրութեամբ կը ձանձրանան։ Նախապատրաստութիւնը այս խնդրին առաջքը առնելու կրնայ նպաստել։ Առանց նախապատրաստութեան, երախաները իմաստալից կերպով չեն կրնար մասնակցիլ ժողովներուն։ (Առակաց 15։23) Առանց պատրաստութեան, անոնց համար դժուար պիտի ըլլայ գոհունակութիւն տուող հոգեւոր յառաջդիմութիւն արձանագրել։ (Ա. Տիմոթէոս 4։12, 15) Ի՞նչ կարելի է ընել։ Նախ՝ ծնողները պէտք է իրենք իրենց հարց տան թէ ժողովներու համար կը պատրաստուի՞ն։ Իրենց օրինակը զօրաւոր ազդեցութիւն ունի։ (Ղուկաս 6։40) Ընտանեկան ուսումնասիրութիւնը ուշադիր կերպով ծրագրելն ալ կրնայ կարեւոր ազդակ մը ըլլալ։
Սիրտը Կերտել
3. Ընտանեկան ուսումնասիրութեան ընթացքին, ինչո՞ւ մասնայատուկ ջանք պէտք է թափուի սրտերը կերտելու համար, եւ ասիկա ի՞նչ կը պահանջէ։
3 Ընտանեկան ուսումնասիրութիւնը ոչ միայն գլուխը գիտութեամբ լեցնելու ժամանակ մը պէտք է ըլլայ, այլ նաեւ՝ սիրտը կերտելու։ Ասիկա կը պահանջէ ո՛չ միայն ընտանիքի անդամներուն դիմագրաւած խնդիրներէն տեղեակ ըլլալ, այլ նաեւ՝ իւրաքանչիւրին հանդէպ սիրալիր հետաքրքրութիւն ունենալ։ Եհովա ‘սրտերը կը քննէ’։—Ա. Մնացորդաց 29։17, ՆԱ։
4. (ա) Ի՞նչ կը նշանակէ «պարզամիտ ըլլալ»։ (բ) ‘Խելք վաստկիլը’ ի՞նչ կը ներփակէ։
4 Եհովա ի՞նչ կը գտնէ, երբ մեր զաւակներուն սիրտը կը քննէ։ Անոնց մեծամասնութիւնը պիտի ըսեն որ Աստուած կը սիրեն, եւ ասիկա գովելի է։ Բայց, մէկը որ անչափահաս է, կամ Եհովայի մասին նոր կը սորվի, Եհովայի ճամբաներուն մէջ անփորձ է։ Քանի որ անփորձ է, ան «պարզամիտ է», ինչպէս կ’ըսէ Աստուածաշունչը։ Թերեւս անոր բոլոր շարժառիթները վատ չեն, բայց ժամանակ կը պահանջէ որ անհատ մը իր սիրտը այն վիճակին հասցնէ որ իրապէս հաճելի է Աստուծոյ։ Ասիկա կը ներփակէ անհատին խորհուրդները, ցանկութիւնները, խանդաղատանքները, զգացումներն ու կեանքի նպատակակէտերը Աստուծոյ հաւնած բաներուն հետ ներդաշնակութեան մէջ բերել, անկատար մարդոց համար կարելի եղած տարողութեամբ։ Երբ անհատ մը իր ներքին մարդը աստուածային կերպով այսպէս յղկէ, այն ատեն ‘խելք վաստկած’ կ’ըլլայ։—Առակաց 9։4. 19։8
5, 6. Ծնողներ ի՞նչպէս կրնան իրենց զաւակներուն օգնել որ ‘խելք վաստկին’։
5 Ծնողներ կրնա՞ն իրենց զաւակներուն օգնել որ ‘խելք վաստկին’։ Ճիշդ է որ ոեւէ մէկը ուրիշ անհատի մը մէջ սրտի լաւ վիճակ մը չի կրնար դնել։ Ամէն մէկս ազատ կամքով օժտուած ենք եւ շատ բան կախեալ է թէ ի՛նչ բանի վրայ կը կեդրոնացնենք մեր միտքը։ Բայց, ծնողներ ներատեսութիւն գործածելով, կրնան իրենց զաւկին խօսեցնել տալ, գիտնալով թէ ի՛նչ կայ անոր սրտին մէջ եւ ինչ բանի մէջ օգնութեան կարիքը ունի։ Հետեւեալին նման հարցումներ հարցուցէք. ‘Ի՞նչ կը խորհիս ասոր մասին’. եւ՝ ‘Իրապէս ի՞նչ կ’ուզէիր ընել’։ Ապա համբերութեամբ մտիկ ըրէք։ Ծայրայեղ կերպով մի՛ հակազդէք։ (Առակաց 20։5) Եթէ կը փափաքիք սրտին հասնիլ, անհրաժեշտ է ազնիւ, հասկացող եւ սիրալիր մթնոլորտ մը ստեղծել։
6 Օգտակար հակումներու ոյժ տալու համար, յաճախ խօսեցէք հոգիին մէկ պտուղին մասին, առնելով անոր բոլոր երեսակները, եւ ընտանեօք աշխատեցէք զայն մշակել։ (Գաղատացիս 5։22, 23) Եհովայի եւ Յիսուս Քրիստոսի հանդէպ սէր կերտեցէք, ոչ թէ պարզապէս ըսելով թէ պէտք է սիրենք զիրենք, այլ, ի՛նչ պատճառներով կը սիրենք զիրենք եւ թէ ի՛նչպէս կրնանք արտայայտել այդ սէրը։ (Բ. Կորնթացիս 5։14, 15) Շիտակը ընելու ցանկութիւնը զօրացուցէք, անկէ առթած օգուտներուն մասին տրամաբանելով։ Անոնց մէջ կերտեցէք սխալ խորհուրդներ, խօսակցութիւն եւ վարք մերժելու ցանկութիւն մը, այդպիսի բաներու գէշ ազդեցութիւններուն մասին խօսելով։ (Ամովսեայ 5։15. Գ. Յովհաննու 11) Ցոյց տուէք թէ ի՛նչպէս խորհուրդները, խօսակցութիւնը եւ վարքը՝ ըլլան լաւ թէ գէշ՝ կրնան ազդել Եհովայի հետ մէկու մը ունեցած յարաբերութեան։
7. Ի՞նչ կարելի է ընել որպէսզի երախաները խնդիրներ ձեռք առնել սորվին եւ այնպիսի որոշումներ տան, որ զիրենք Եհովայի մօտիկ պիտի պահեն։
7 Երբ երախայ մը խնդիր մը ունի, կամ կարեւոր որոշումի մը առջեւ կը գտնուի, կրնանք իրեն հարցնել. ‘Ըստ քեզի, Եհովա ի՞նչպէս կը նկատէ ասիկա։ Եհովայի մասին գիտցածներէդ ի՞նչ բանի հիման վրայ այսպէս կ’ըսես։ Այս մասին աղօթեցի՞ր’։ Կարելի եղածին չափ կանուխ սկսելով, ձեր զաւակներուն օգնեցէք որ այնպիսի ընթացք մը որդեգրեն, որ ամէն բանի մէջ փորձեն գիտնալ թէ ի՛նչ է Աստուծոյ կամքը, ու ապա ընեն զայն։ Երբ անոնք Եհովայի հետ մտերիմ, անձնական յարաբերութիւն մը զարգացնեն, իր ճամբաներուն մէջ քալելէն հաճոյք պիտի առնեն։ (Սաղմոս 119։34, 35) Ասիկա իրենց մէջ գնահատութիւն պիտի կերտէ, ճշմարիտ Աստուծոյ ժողովքին հետ ընկերակցելու առանձնաշնորհումին հանդէպ։
Ժողովքային Հանդիպումներուն Համար Պատրաստութիւն
8. (ա) Ի՞նչ բան կրնայ օգնել մեզի որ մեր ընտանեկան ուսումնասիրութեան մէջ պարփակենք ամէն բան որ ուշադրութեան կը կարօտի։ (բ) Այս ուսումնասիրութիւնը ո՞րքան կարեւոր է։
8 Ընտանեկան ուսումնասիրութեան նիստերու ընթացքին շատ բաներ կան որոնք ուշադրութեան կը կարօտին։ Ի՞նչպէս կրնաք բոլորին ալ հոգ տանիլ։ Անկարելի է ամէն բան միաժամանակ ընել։ Բայց ցանկ մը պատրաստելը կրնայ օգտակար ըլլալ։ (Առակաց 21։5) Ժամանակ առ ժամանակ աչքէ անցուցէք զայն եւ նայեցէք թէ ի՛նչ բան մասնայատուկ ուշադրութեան կարիքը ունի։ Ընտանիքի իւրաքանչիւր անդամի յառաջդիմութեամբ անկեղծօրէն հետաքրքրուեցէք։ Ընտանեկան ուսումնասիրութեան այս կարգադրութիւնը քրիստոնէական դաստիարակութեան կարեւոր մէկ մասն է, որ մեզ հիմա կը զինէ կեանքի մէջ, իսկ գալիք յաւիտենական կեանքին համար ալ կը պատրաստէ։—Ա. Տիմոթէոս 4։8
9. Ժողովներու պատրաստութեան նկատմամբ ի՞նչ նպատակակէտերու վրայ աստիճանաբար կրնանք աշխատիլ մեր ընտանեկան ուսումնասիրութեան ընթացքին։
9 Ձեր ընտանեկան ուսումնասիրութիւնը ժողովներու համար պատրաստութիւն ալ կը պարփակէ՞։ Մինչ միասնաբար կ’ուսումնասիրէք, բազմաթիւ ծրագիրներ կան որոնց վրայ կրնաք աստիճանաբար աշխատիլ։ Անոնցմէ ոմանք իրագործելու համար շաբաթներ, ամիսներ կամ նոյնիսկ տարիներ կը պահանջուին։ Հետեւեալ նպատակակէտերը նկատի առէք. (1) ժողովներուն պատասխան տալու համար ընտանիքի իւրաքանչիւր անդամի պատրաստութիւնը. (2) ամէն մէկը ինքն իր բառերով պատասխանելու պատրաստ ըլլալը. (3) պատասխաններուն մէջ համարներ մտցնելը, եւ (4) անձնական կիրարկում ընելու մտքով նիւթը վերլուծելը։ Այս բոլորը կրնան օգնել որ անհատ մը ճշմարտութիւնը իւրացնէ։—Սաղմոս 25։4, 5
10. (ա) Ժողովքային տարբեր հանդիպումներուն ի՞նչպէս կրնանք ուշադրութիւն ընծայել։ (բ) Ինչո՞ւ կ’արժէ ասիկա ընել։
10 Եթէ նոյնիսկ ձեր ընտանեկան ուսումնասիրութիւնը սովորաբար այդ շաբթուան Դիտարան–ի դասին վրայ հիմնուած ըլլայ, անհատապէս եւ որպէս ընտանիք, Ժողովքի Գրքի Ուսումնասիրութեան, Աստուածպետական Ծառայութեան Դպրոցին եւ Ծառայութեան Ժողովի պատրաստութիւնը մի՛ անտեսէք։ Ասոնք ալ Եհովայի ճամբուն մէջ քալելու համար տրուած ուսուցումի յայտագրին կարեւոր մասերն են։ Թերեւս երբեմն կարենաք ընտանեօք ժողովները պատրաստել։ Միասնաբար աշխատելով, ուսումնասիրելու ձեր հմտութիւնները պիտի բարելաւուին։ Որպէս հետեւանք, ժողովներէն աւելի օգուտ պիտի քաղուի։ Ի միջի այլոց, այս ժողովներուն համար պատրաստուելու օգուտներուն եւ անոր համար մասնաւոր ժամանակ տրամադրելու մասին զրուցեցէք։—Եփեսացիս 5։15-17
11, 12. Ժողովքի երգեցողութիւններուն համար պատրաստուիլը ի՞նչպէս կրնայ օգտակար ըլլալ մեզի, եւ ասիկա ի՞նչպէս կարելի է ընել։
11 «Աստուծոյ Ընդունելի Ապրելակերպը» համաժողովներուն, մեզի քաջալերութիւն տրուեցաւ որ մեր ժողովներուն ուրիշ մէկ երեսակին համար ալ պատրաստուինք, որ է երգեցողութիւնը։ Ասոր հետեւեցա՞ք։ Այսպէս ընելը Աստուածաշունչի ճշմարտութիւնները ձեր մտքին ու սրտին վրայ փորագրելու եւ միաժամանակ ժողովքային հանդիպումներէն աւելի հաճոյք առնելու կը նպաստէ։
12 Որպէս պատրաստութիւն, յայտագրին վրայ եղող կարգ մը երգերուն բառերը կարդալը եւ անոնց իմաստին մասին խօսակցիլը մեզի կ’օգնեն որ սրտանց երգենք։ Վաղեմի Իսրայէլի պաշտամունքին մէջ, նուագարաններու գործածութիւնը կարեւոր տեղ մը կը գրաւէր։ (Ա. Մնացորդաց 25։1. Սաղմոս 28։7) Ձեր տան մէջ, նուագարան մը նուագող կա՞յ։ Ինչո՞ւ այդ նուագարանով այդ շաբթուան Թագաւորութեան երգերը նուագելու ու ապա ընտանեօք զանոնք երգելու փորձ չընէք։ Ուրիշ կարելիութիւն մըն է երգերուն արձանագրութիւնը գործածել։ Կարգ մը երկիրներու մէջ մեր եղբայրները առանց երաժշտութեան ընկերակցութեան, գեղեցիկ կերպով կ’երգեն։ Մինչ ճամբան կը քալեն, կամ դաշտին մէջ կ’աշխատին, անոնք յաճախ այդ շաբթուան ժողովներուն համար յայտագրուած երգերը կ’երգեն։—Եփեսացիս 5։19
Դաշտի Ծառայութեան Համար Ընտանեկան Պատրաստութիւն
13, 14. Մեր սիրտը դաշտի ծառայութեան համար պատրաստող ընտանեկան զրոյցները ինչո՞ւ արժէքաւոր են։
13 Եհովայի եւ իր նպատակներուն մասին ուրիշներուն վկայելը մեր կեանքին մէջ կարեւոր տեղ մը կը գրաւէ։ (Եսայեայ 43։10-12. Մատթէոս 24։14) Ըլլանք երիտասարդ թէ տարեց, այս գործունէութենէն աւելի հաճոյք կ’առնենք եւ աւելի կ’օգտուինք՝ եթէ անոր համար պատրաստուինք։ Ասիկա ի՞նչպէս կրնանք ընել մեր ընտանիքէն ներս։
14 Մեր պաշտամունքին հետ կապ ունեցող բոլոր հարցերուն նման, կարեւոր է մեր սիրտը պատրաստել։ Պէտք է խօսինք ո՛չ թէ միայն ինչ որ պիտի ընենք, այլ, թէ ինչո՛ւ պիտի ընենք։ Յովսափատ Թագաւորի օրերուն, ժողովուրդին աստուածային օրէնքը կը սորվեցնէին, բայց Աստուածաշունչը կ’ըսէ թէ ժողովուրդը ‘տակաւին չէր պատրաստեր իր սիրտը’։ Ասիկա զիրենք ճշմարիտ պաշտամունքէն հեռացնելու հրապոյրներուն դէմ անպաշտպան դարձուց։ (Բ. Մնացորդաց 20։33, Արարատ. 21։11) Մեր նպատակակէտը ո՛չ դաշտի ծառայութեան մէջ մեր անցուցած ժամերը, ոչ ալ մեր տեղաւորած գրականութիւնները տեղեկագրել է։ Մեր ծառայութիւնը Եհովայի, եւ կեանքը ընտրելու պատեհութեան կարիք ունեցող մարդոց հանդէպ մեր սէրը արտայայտելու կերպ մը պէտք է ըլլայ։ (Եբրայեցիս 13։15) Անիկա գործունէութիւն մըն է որ մեզ «Աստուծոյ գործակից»ներ կը դարձնէ։ (Ա. Կորնթացիս 3։9) Ի՜նչ առանձնաշնորհում։ Երբ ծառայութեան կը մասնակցինք, սուրբ հրեշտակներուն հետ կը համագործակցինք։ (Յայտնութիւն 14։6, 7) Այս մասին գնահատութիւն կերտելու լաւագոյն ժամանակը ընտանեկան զրոյցներու ընթացքին է, ըլլայ շաբաթական ուսումնասիրութեան, թէ Աստուածաշունչը Քննենք Ամէն Օր գրքոյկէն օրուան համարը նկատի առնելու ժամանակ։
15. Որպէս ընտանիք, ե՞րբ կրնանք դաշտի ծառայութեան համար պատրաստուիլ։
15 Ձեր ընտանեկան ուսումնասիրութեան ընթացքին երբեմն ժամանակ կը յատկացնէ՞ք ձեր տան անդամներուն օգնելու, որ այդ շաբթուան դաշտի ծառայութեան համար պատրաստուին։ Ասիկա շա՛տ օգտաշատ կրնայ ըլլալ։ (Բ. Տիմոթէոս 2։15) Անիկա կրնայ օգնել որ իրենց ծառայութիւնը իմաստալից եւ արդիւնաբեր ըլլայ։ Պարբերաբար, կրնաք ամբողջ ուսումնասիրութեան պահ մը յատկացնել այսպիսի պատրաստութեան համար։ Շատ յաճախ, կրնաք դաշտի ծառայութեան կարգ մը երեսակներուն մասին հակիրճ կերպով խօսիլ ընտանեկան ուսումնասիրութեան վերջաւորութեան, կամ շաբթուան մէջ ուրիշ ժամանակ մը։
16. Պարբերութեան մէջ յիշուած իւրաքանչիւր քայլին արժէքներուն մասին խօսեցէք։
16 Ընտանեկան նիստերը կրնան հետեւեալին նման կարգ մը քայլերու վրայ ուշադրութիւն կեդրոնացնել. (1) Լաւ փորձ եղած ներկայացում մը պատրաստել, համար մըն ալ կարդալով, եթէ առիթը թոյլատրէ։ (2) Հոգ տանիլ որ ամէն մէկը՝ եթէ կարելի է, իր ծառայութեան պայուսակը, Աստուածաշունչ մը, նոթի տետր մը, գրիչ մը կամ մատիտ մը, թղթիկներ եւ ուրիշ գրականութիւններ ունենայ, լաւ վիճակի մէջ։ Հարկ չէ սուղնոց ծառայութեան պայուսակ մը ունենալ, բայց անիկա պէտք է կոկիկ ըլլայ։ (3) Խօսիլ թէ ո՛ւր եւ ե՛րբ անպաշտօն վկայութիւն կարելի է ընել։ Այս խրատներուն քայլ առ քայլ հետեւեցէք, երբ միասնաբար կ’աշխատիք դաշտի ծառայութեան մէջ։ Օգտակար թելադրութիւններ տուէք, բայց ձեր խրատները շատ կէտերով մի՛ ծանրաբեռնէք։
17, 18. (ա) Ընտանեօք կատարուած ի՞նչպիսի պատրաստութիւն կրնայ մեր դաշտի ծառայութիւնը աւելի արդիւնաբեր դարձնել։ (բ) Այս պատրաստութեան ո՞ր մարզերը կարելի է կիրարկել ամէն շաբաթ։
17 Իր հետեւորդներուն Յիսուս Քրիստոսի նշանակած գործին գլխաւոր մասը կը կազմէ աշակերտելը։ (Մատթէոս 28։19, 20) Անիկա քարոզելէն աւելին կը ներփակէ։ Աշակերտելը՝ ուսուցանել կը պահանջէ։ Ձեր ընտանեկան ուսումնասիրութիւնը ի՞նչպէս կրնայ օգնել ձեզի որ ասոր մէջ ազդեցիկ ըլլաք։
18 Ընտանեօք խօսեցէք թէ որո՛նց պէտք է վերայցելէք։ Անոնցմէ ոմանք թերեւս գրականութիւն ընդունեցին, իսկ ուրիշներ պարզապէս մտիկ ըրին։ Թերեւս ուրիշներ անոնց հանդիպած են տունէ–տուն ծառայութեան ընթացքին. կրնայ ըլլալ որ շուկան կամ դպրոցը անպաշտօն վկայութիւն ստացած են։ Թոյլ տուէք որ Աստուծոյ Խօսքը ձեզ առաջնորդէ։ (Սաղմոս 25։9. Եզեկիէլ 9։4) Որոշեցէք թէ իւրաքանչիւրդ այդ շաբաթ որո՛նց պիտի այցելէք։ Ի՞նչ բանի մասին պիտի խօսիք։ Ընտանեկան զրոյցը կրնայ իւրաքանչիւր անդամի օգնել որ պատրաստութիւն տեսնէ։ Հետաքրքրուած անհատներուն ցոյց տալու համար քանի մը մասնայատուկ համարներ, կամ Աստուած Ի՛նչ կը Պահանջէ Մեզմէ գրքոյկէն եւ կամ՝ Գիտութիւնը որ Յաւիտենական Կեանքի կ’Առաջնորդէ գիրքէն յարմար կէտեր ընտրեցէք։ Մի՛ փորձէք մէկ այցելութեան շատ նիւթեր շօշափել։ Տանտիրոջ հարցում մը հարցուցէք ու զայն առկախ ձգեցէք, որպէսզի յաջորդ այցելութեան պատասխանէք։ Լաւ է ընտանիքի շաբաթական վարժութեան մէկ մասը դարձնել ծրագրել թէ ամէն մէկը ո՛ր վերայցելութիւնները պիտի ընէ, ե՛րբ պիտի ընէ եւ ի՛նչ մտադրած է ընել։ Ասիկա ամբողջ ընտանիքին դաշտի ծառայութիւնը կրնայ աւելի արդիւնաբեր դարձնել։
Շարունակեցէք Սորվեցնել Եհովայի Ճամբան
19. Եթէ ընտանիքի անդամները Եհովայի ճամբուն մէջ պիտի շարունակեն քալել, ի՞նչ պէտք է զգան, եւ ի՞նչ բան կը նպաստէ ասոր։
19 Այս ամբարիշտ աշխարհին մէջ ընտանիքի գլուխ ըլլալը շա՛տ դժուար է։ Սատանան եւ իր դեւերը կը ջանան Եհովայի ծառաներուն հոգեւորականութիւնը քանդել։ (Ա. Պետրոս 5։8) Ասկէ զատ, ներկայիս շատ մեծ ճնշում կայ ձեր վրայ, ո՛վ ծնողներ, մանաւանդ՝ առանձին ծնողներու վրայ։ Դժուար է ժամանակ գտնել այն բոլոր բաներուն համար զորս կ’ուզէք ընել։ Բայց ասոր համար կ’արժէ ջանք թափել, նոյնիսկ երբ միայն մէ՛կ թելադրութիւն կարենաք կիրարկել ամէն անգամ, հետզհետէ բարելաւելով ձեր ընտանեկան ուսումնասիրութեան յայտագիրը։ Սրտապնդիչ վարձատրութիւն է տեսնել թէ ձեզի շատ սիրելի եղողները հաւատարմօրէն կը քալեն Եհովայի ճամբուն մէջ։ Եհովայի ճամբուն մէջ յաջող կերպով քալելու համար, ընտանիքի անդամները պէտք է ուրախութիւն գտնեն ժողովներու եւ դաշտի ծառայութեան մասնակցելու մէջ։ Ասիկա իրագործուելու համար, նախապատրաստութիւն կը պահանջուի. անիկա է որ սիրտը կը կերտէ եւ իւրաքանչիւրս կը զինէ որ իմաստալից մասնակցութիւն մը բերենք։
20. Ի՞նչ բան կրնայ օգնել որ աւելի շատ ծնողներ զգան Գ. Յովհաննու 4–ի մէջ արտայայտուած ուրախութիւնը։
20 Հոգեւոր գետնի վրայ իր օգնած անհատներուն մասին Յովհաննէս առաքեալ գրեց. «Ասկէ աւելի մեծ ուրախութիւն չունիմ, երբ կը լսեմ թէ իմ որդիներս ճշմարտութեան մէջ կը քալեն»։ (Գ. Յովհաննու 4) Որոշ նպատակակէտեր հետապնդող ընտանեկան ուսումնասիրութիւններ եւ ընտանիքի անդամներուն կարիքներուն հետ ազնիւ եւ օգտակար կերպով վարուող ընտանիքի գլուխներ, մեծապէս կը նպաստեն որ ընտանիքը այսպիսի ուրախութիւն մը վայելէ։ Աստուծոյ կեանքի ճամբուն հանդէպ այսպիսի գնահատութիւն մը մշակելով, ծնողներ իրենց ընտանիքին կ’օգնեն որ կեանքի լաւագոյն ճամբայէն հաճոյք առնեն։—Սաղմոս 19։7-11
Կրնա՞ք Բացատրել
◻ Ժողովներու պատրաստութիւնը ինչո՞ւ շատ կարեւոր է մեր զաւակներուն համար։
◻ Ծնողներ ի՞նչպէս կրնան օգնել իրենց զաւակներուն որ ‘խելք վաստկին’։
◻ Մեր ընտանեկան ուսումնասիրութիւնը ի՞նչպէս կրնայ օգնել որ բոլոր ժողովներուն համար պատրաստուինք։
◻ Ընտանեօք դաշտի ծառայութեան համար պատրաստուիլը ի՞նչպէս կրնայ օգնել որ աւելի ազդու ըլլանք։
[Նկար՝ էջ 30]
Ձեր ընտանեկան ուսումնասիրութիւնը կրնայ պարփակել ժողովներու պատրաստութիւն
[Նկար՝ էջ 31]
Ժողովներու երգերը փորձելը կրնայ օգտաշատ ըլլալ