Անհաւասարութեան պատուհասը նուազեցնել

Ստեղծիչը շուտով պիտի հաստատէ այն հաւասարութիւնը, որու կարօտը կը քաշեն մարդիկ։ Մինչ այդ, առնուազն կրնանք կարգ մը քայլեր առնել, մեզի ու մեր ընտանիքներուն ազդող անհաւասարութեան պատուհասը նուազեցնելու համար։ Ինչպէս որ Հարաւային Ափրիկէի նախկին նախագահը Նէլսըն Մանտէլան նշեց, «մեզի ի՛նչ տրուած ըլլալը չէ որ կը բաժնէ մէկ անհատը միւսէն, այլ՝ ի՛նչ որ կ’ընենք մեր ունեցածով»։

ՊԱՏՄՈՒԹԻՒՆԸ կը ստուգէ իր խօսքերը։ Շատ է թիւը այրերու ու կիներու, որոնք ծնունդով շատ քիչ բան ստացած էին, բայց իրենց ունեցածը գործածելով, յաջողութիւն ձեռք ձգեցին եւ ասիկա զիրենք աւելի աչքառու դարձուց թերեւս աւելիով պարգեւատրուած իրենց նմաններէն։ Ասոր հակառակը, ուրիշներ, որոնք իրենց ծնունդին շատ առաւելութիւններ ունէին, իրենց ունեցածը վատնեցին եւ իրենց բոլոր հնարաւորութիւնները գործածելու մէջ թերացան։

Ձեր Ունեցածէն Լաւագոյնս Օգտուեցէք

Եհովայի Վկաները իրապէս հետաքրքրուած են որ մարդիկ Աստուածաշունչը ուսումնասիրելով, կարենան Աստուծոյ նպատակներուն մասին գիտութիւն ստանալ։ Սակայն, անոնք կը գիտակցին որ Աստուածաշունչի տեղեկութենէն լիովին օգտուելու համար, մարդիկ պէտք է գրագէտ ըլլան։ Այդ պատճառով, Եհովայի Վկաները տասնեակ հազարաւորներու կարդալ գրել սորվեցուցած են, մէջը ըլլալով միայն Արեւմտեան Ափրիկէի մէջ 23,000 հոգիներու (1990–ական թուականներու կիսուն)։ Եհովայի Վկաներուն մատուցանած ուշագրաւ ընկերային ծառայութեան ակնարկելով, Սան Ֆրանսիսգօ Էկզէմայնըր–ը նշեց. «Զանոնք որպէս տիպար քաղաքացիներ կրնաք նկատել։ Անոնք իրենց տուրքերը ջանադրութեամբ կը վճարեն, հիւանդին կը հոգան, անգրագիտութեան դէմ կը պայքարին»։

Ասկէ զատ, հանրութեան դիմաց խօսելու յառաջդիմական դասնըթացքի շնորհիւ, Եհովայի Վկաները հարիւր հազարաւոր անհատներ մարզած են, որպէսզի որակելի դասախօսներ ըլլան, հանրութեան դիմաց սահուն կերպով արտայայտուելու կարող ըլլալով։ Այդ հազարաւորներուն մաս կը կազմեն կարգ մը անհատներ, որոնք անցեալին խօսելու լուրջ խնդիրներ ունէին։ Նկատի առէք Հարաւային Ափրիկէէն մարդու մը պարագան, որ կը գրէ. «Այնքան գէշ կը կակազէի, որ ներամփոփ մէկը դարձած էի, սովորաբար ուրիշներուն վստահելով որ իմ տեղս խօսին։ . . . Երբ Աստուածպետական Ծառայութեան Դպրոցին արձանագրուեցայ եւ պզտիկ խումբի մը դիմաց Աստուածաշունչէն ընթերցանութիւն մը պէտք էր ընէի . . . , այնքան կակազեցի որ չկրցայ որոշուած ժամանակին մէջ վերջացնել նշանակումս։ Ժողովէն ետք, [խրատատուն] ազնիւ կերպով գործնական խրատներ տուաւ ինծի։ Ան թելադրեց որ առանձին բարձրաձայն կարդամ։ Ինչ որ ըրի, ամէն օր ժամանակ յատկացնելով եւ Աստուածաշունչէն ու Դիտարան–էն բարձրաձայն կարդալով»։ Այս մարդը այնքան լաւ յառաջդիմեց որ հիմա հարիւրաւոր եւ նոյնիսկ հազարաւոր անհատներու դիմաց հանրային դասախօսութիւններ կը ներկայացնէ։

Եղբայրներուն Մէջ Հաւասարութիւն Վայելել

Կրթութեան, առողջապահական հոգատարութեան, տնտեսական ու ընկերային դիրքի նկատմամբ, Եհովայի Վկաներու պարագաները մեծապէս կը տարբերին իրարմէ։ Այս տարբերութիւնները պարզապէս կը ցոլացնեն մեր ապրած աշխարհին անկատար վիճակները։ Բայց կրօնական ուրիշ խմբաւորումներուն հակառակը, անոնք իրենց շարքերէն իրապէս արմատախիլ ըրած են ցեղային, ընկերային եւ տնտեսական կանխադատողութիւնները։

Ասիկա իրագործած են, Աստուածաշունչէն իրենց սորված բաները գործադրելու մէջ իրենց լաւագոյնը ընելով։ Անոնք սրտանց կ’ընդունին Աստուածաշունչի այսպիսի սկզբունքներ. «Աստուած մարդուն նման չի նայիր. քանզի մարդը երեւցածին կը նայի, բայց Տէրը սրտին կը նայի»։ (Ա. Թագաւորաց 16։7) «Աստուծոյ քով աչառութիւն չկայ։ Ոեւէ ազգէ, ոեւէ մարդ որ անկէ կը վախնայ ու արդարութիւն կը գործէ, իրեն ընդունելի է»։ (Գործք 10։34, 35) «Չարութեան փոխարէն մէկո՛ւն չարութիւն մի՛ հատուցանէք. բոլոր մարդոց առջեւ բարի բաներ ընելու հոգ տարէ՛ք։ Որչափ կարելի է ձեզի՝ ամէն մարդու հետ խաղաղութիւն ունեցէ՛ք»։—Հռովմայեցիս 12։17, 18. տես նաեւ՝ Ա. Տիմոթէոս 6։17-19. Յակոբու 2։5, 9

Միութիւն յառաջացնող Աստուածաշունչի այս սկզբունքներուն սերտօրէն կառչելով, Եհովայի Վկաները կը մերժեն իրենց շարքերուն մէջ ունենալ ոեւէ մէկը որ ցեղային, ընկերային կամ տնտեսական տարբերութիւններու հիման վրայ անհաւասարութեամբ կը վարուի։ Այս ազդակները որեւէ դեր չեն խաղար, զոր օրինակ, քրիստոնէական ժողովքին մէջ առանձնաշնորհումներ տրուելու մէջ։ Պատասխանատու դիրքերը՝ ինչպէս սորվեցնելն ու վերատեսչութիւնը՝ միմիայն հոգեւոր որակումներու հիման վրայ կը շնորհուին։—Ա. Տիմոթէոս 3։1-13. Տիտոս 1։5-9

Խոտորած աշխարհի մը անհաւասարութիւններէն տառապած անհատներու համար որքա՜ն մխիթարական է որ ուրիշներ իրենց հետ վարուին որպէս Ստեղծիչին առջեւ նոյն դիրքը ունեցող եղբայրներ ու քոյրեր։ Մարթինան այս մասին կրնայ վկայել։ Իր հայրը ընտանիքը լքելէն ետք, ան մեծցած էր աղքատ, մէկ ծնողով տան մը մէջ։ Յաճախ անոր հետ կը վարուէին որպէս ընկերային գետնի վրայ մերժուած մէկը. ան շատ քիչ ինքնավստահութիւն ունէր եւ ուրիշներուն հետ ապրուիլը դժուար կը գտնէր։ Ան ոչ մէկ հետաքրքրութիւն ունէր։ Սակայն, ամէն բան փոխուեցաւ, երբ սկսաւ Աստուածաշունչը ուսումնասիրել եւ Եհովայի Վկաներէն մէկը եղաւ։ Ան կ’ըսէ. «Տակաւին պէտք է բացասական մտքերու դէմ պայքարիմ, բայց հիմա խնդիրները աւելի լաւ կերպով ձեռք կ’առնեմ։ Արժանապատուութիւնս գտայ եւ հիմա աւելի ինքնավստահ կը խօսիմ։ Ճշմարտութիւնը պատասխանատուութեան զգացում մը տուաւ ինծի։ Հիմա գիտեմ որ Եհովան կը սիրէ զիս եւ կեանքը ապրուելու արժանի է»։

Որպէս Քրիստոնեաներու միջազգային խմբաւորութիւն մը, Եհովայի Վկաները աւելի քան 230 երկիրներու մէջ այնպիսի հաւասարութիւն մը կը վայելեն, որ ներկայ աշխարհին մէջ անզուգական է։ Կրօնական ուրիշ որեւէ կազմակերպութիւն նման բան մը կրնա՞յ դաւանիլ եւ իրողութիւններով ապացուցանել զայն։

Անշուշտ, Եհովայի Վկաները իրապաշտ են։ Անոնք կ’ընդունին որ անկատար միջավայրի մէջ գտնուելով, չեն կրնար մարդկային անհաւասարութիւնը ջնջել աշխարհէն, ինչպէս որ դարեր շարունակ ուրիշներ փորձած, բայց՝ ձախողած են։ Սակայն, անոնք կ’ուրախանան որ իրենց շարքերուն մէջէն կրցած են նուազեցնել այս մահացու ազդեցութիւնը։ Իսկ Աստուծոյ խոստումին վրայ զօրաւոր հաւատք ունենալով, անձկագին կը սպասեն արդար նոր աշխարհի մը, ուր անհաւասարութիւնը յաւիտեան չքացած պիտի ըլլայ։

Այո, բոլոր հնազանդ մարդիկ շուտով «արժանապատուութիւնով եւ իրաւունքներով» հաւասար պիտի ըլլան, ճիշդ ինչպէս որ սկիզբը իրենց Ստեղծիչը մտադրած էր իրենց համար։ Ի՜նչ հաճելի է այս միտքը։ Բայց այս անգամ, անիկա իրականութիւն մը պիտի ըլլայ։

[Նկար՝ էջ 7]

Եհովայի Վկաները անգրագիտութեան դէմ կը պայքարին, տասնեակ հազարաւոր մարդոց կարդալ գրել սորվեցնելով

[Նկար՝ էջ 8]

Աստուածաշունչի ճշմարտութիւնը ցեղային, ընկերային եւ տնտեսական կանխադատողութիւնները արմատախիլ ընելու կ’օգնէ