Լիովին պատրաստուած՝ որպէս Աստուծոյ խօսքը ուսուցանողներ
‘Աստուած մեզ բաւականապէս որակելի դարձուց քարոզիչներ ըլլալու’։—Բ. ԿՈՐՆԹԱՑԻՍ 3։5, 6, ՆԱ
1, 2. Քարոզելու համար երբեմն ի՞նչ ջանքեր կը թափուին, սակայն անոնք ինչո՞ւ սովորաբար կը ձախողին։
ԵԹԷ ձեզի գործ մը յանձնուի, որու համար որակելի չէք, ի՞նչ պիտի ըլլայ ձեր զգացումը։ Պահ մը երեւակայեցէք. Ձեզի հարկ եղած նիւթերը ձեր դիմացն են եւ գործիքներ ալ մատչելի են։ Բայց այդ գործը կատարելու մասին գաղափա՛ր իսկ չունիք։ Իսկ վատը այն է, որ այս մասնայատուկ գործը շուտափոյթ կատարուելիք գործ մըն է։ Ուրիշներ ձեզմէ կախեալ են։ Որքա՜ն ընդվզեցուցիչ է։
2 Այսպիսի անել կացութիւն մը զուտ երեւակայութիւն չէ։ Երբեմն, օրինակի համար, Քրիստոնեայ Աշխարհի եկեղեցիները կը փորձեն տունէ տուն քարոզչութիւն կազմակերպել ու կատարել։ Բայց այս ջանքերը միշտ կը ձախողին, քանի մը շաբաթ կամ ամիս ետք վերջ գտնելով։ Ինչո՞ւ։ Քրիստոնեայ Աշխարհը իր հետեւորդներուն չէ օգնած որ այս գործին համար որակելի ըլլան։ Նոյնիսկ կրօնաւորները քարոզչական այդ գործին համար որակելի չեն, հակառակ տարիներ դպրոցներու եւ դպրեվանքերու մէջ իրենց ստացած կրթութեան։ Ինչո՞ւ կրնանք այսպիսի բան մը ըսել։
3. Բ. Կորնթացիս 3։5, 6–ի մէջ, ո՞ր արտայայտութիւնը երեք անգամ գործածուած է, եւ անիկա ի՞նչ կը նշանակէ։
3 Աստուծոյ Խօսքը կը բացատրէ թէ ի՛նչ բան անհատ մը որակելի կը դարձնէ քրիստոնէական բարի լուրի իսկական քարոզիչ մը ըլլալու։ Պօղոս առաքեալ ներշնչման ներքեւ գրեց. «Ոչ թէ մենք ինքնիրեննիս բաւական [«բաւականապէս որակելի», ՆԱ] ենք բան մը խորհելու՝ որպէս թէ մեզմէ, հապա մեր կարողութիւնը [«բաւականապէս որակելի ըլլալը», ՆԱ] Աստուծմէ է. որ մեզ յարմարցուց [«բաւականապէս որակելի դարձուց», ՆԱ] նոր կտակարանին պաշտօնեաներ ըլլալու»։ (Բ. Կորնթացիս 3։5, 6) Նկատի առէք հոս երեք անգամ գործածուած արտայայտութիւնը՝ «բաւականապէս որակելի»։ Ասիկա ի՞նչ կը նշանակէ։ Սուրբ Գրային Բառերու Վայնի Բացատրական Բառարան–ը կ’ըսէ. «Երբ իրերու համար կը գործածուի, [Յունարէն այս բառը] կը նշանակէ ‘բաւական’ . . . , երբ մարդոց համար ըսուած է, անիկա կը նշանակէ ‘ատակ’, ‘արժանի’»։ Անոր համար «բաւականապէս որակելի» անհատ մը, ատակ եւ իրեն տրուած գործ մը գլուխ հանելու արժանի է։ Այո, բարի լուրին իսկական քարոզիչները՝ այս գործը կատարելու համար որակելի են։ Անոնք քարոզելու համար ատակ, յարմար կամ արժանի են։
4. (ա) Պօղոսի օրինակը ի՞նչպէս ցոյց կու տայ թէ քրիստոնէական ծառայութեան համար որակելի ըլլալը քանի մը ընտրանիներու սահմանուած չէ։ (բ) Ի՞նչ են այն երեք միջոցները, որոնցմով Եհովա մեզ որակելի կը դարձնէ որպէս քարոզիչներ։
4 Բայց այդ ատակութիւնը ի՞նչպէս ձեռք կը ձգուի։ Անձնական տաղանդներո՞վ։ Գերիմացականութեա՞մբ։ Անուանի վարժարաններու մէջ ձեռք ձգուած մասնագիտութեա՞մբ։ Ակներեւաբար, Պօղոս առաքեալ այս բոլորը ունէր։ (Գործք 22։3. Փիլիպպեցիս 3։4, 5) Սակայն, ան հեզաբար ընդունեց թէ որպէս քարոզիչ իր որակումները Եհովա Աստուծմէ են, ու ո՛չ թէ բարձրագոյն վարժարաններէ։ Այս որակումները քանի մը ընտրանիներո՞ւ սահմանուած են։ Պօղոս Կորնթոսի ժողովքին գրեց «մեր բաւականապէս որակելի ըլլալ»ուն մասին։ Վստահաբար, ասիկա կը թելադրէ թէ Եհովա հոգ կը տանի որ իր բոլոր հաւատարիմ ծառաները ատակ՝ իրենց նշանակուած գործը կատարելու կարող՝ ըլլան։ Ներկայիս Եհովա ի՞նչպէս որակելի կը դարձնէ ճշմարիտ Քրիստոնեաները։ Քննարկենք իր գործածած երեք միջոցները. (1) իր Խօսքը, (2) իր սուրբ հոգին եւ (3) իր երկրային կազմակերպութիւնը։
Եհովայի Խօսքը Մեզ Որակելի կը Դարձնէ
5, 6. Սուրբ Գրութիւնները ճշմարիտ Քրիստոնեաներուն վրայ ի՞նչ ազդեցութիւն ունին։
5 Նախ՝ Աստուծոյ Խօսքը ի՞նչպէս մեզ որակելի կը դարձնէ որպէս քարոզիչներ։ Պօղոս գրեց. «Բոլոր գիրքը Աստուծոյ շունչն է եւ օգտակար է սորվեցնելու, յանդիմանելու, շտկելու եւ արդարութեան մէջ խրատելու համար, որպէս զի Աստուծոյ մարդը կատարեալ [«լիովին ատակ», ՆԱ] ըլլայ՝ ամէն բարի գործերու [«ամբողջովին», ՆԱ] պատրաստուած»։ (Բ. Տիմոթէոս 3։16, 17) Ուստի, Աստուծոյ Խօսքը մարդոց ուսուցանելու «բարի գործ»ը կատարելու համար, Սուրբ Գրութիւնները կրնան մեզ «լիովին ատակ» դարձնել ու ‘ամբողջովին պատրաստել’։ Սակայն ի՞նչ կրնանք ըսել Քրիստոնեայ Աշխարհի եկեղեցիներու բոլոր հետեւորդներուն մասին։ Անոնք Աստուածաշունչ ունին։ Ի՞նչպէս կրնայ ըլլալ որ նոյն գիրքը ոմանց կ’օգնէ որ ատակ քարոզիչներ ըլլան, իսկ ուրիշներու՝ ոչ։ Պատասխանը՝ Աստուածաշունչի հանդէպ մեր կեցուածքին մէջ կը կայանայ։
6 Դժբախտաբար, եկեղեցի յաճախողներէն շատեր Աստուածաշունչին պատգամը չեն ընդունիր «որպէս Աստուծոյ խօսք»։ (Ա. Թեսաղոնիկեցիս 2։13) Քրիստոնեայ Աշխարհը այս ուղղութեամբ ամօթալի արձանագրութիւն մը շինած է։ Աստուածաբանական հաստատութիւններու մէջ երկար տարիներ ուսումնասիրելէ ետք, կրօնաւորները պատրա՞ստ են Աստուծոյ Խօսքին ուսուցիչները ըլլալու։ Բնա՛ւ երբեք։ Կարգ մը աշակերտներ դպրեվանքի իրենց ուսումը կը սկսին որպէս Աստուածաշունչի հաւատացեալներ, բայց շրջանաւարտ կ’ըլլան՝ որպէս սկեպտիկներ։ Անկէ ետք, փոխանակ Աստուծոյ Խօսքը քարոզելու՝ որուն այլեւս անոնցմէ շատեր չեն հաւատար, անոնք իրենց ծառայութիւնը ուրիշ կողմ կ’ուղղեն, քաղաքական պայքարներուն մէջ դիրք բռնելով, ընկերային աւետարան մը քաջալերելով, կամ իրենց քարոզներուն մէջ մարդկային փիլիսոփայութիւնները ջատագովելով։ (Բ. Տիմոթէոս 4։3) Ասոնց հակառակը, ճշմարիտ Քրիստոնեաները Յիսուս Քրիստոսի օրինակին կը հետեւին։
7, 8. Աստուծոյ Խօսքին հանդէպ Յիսուսի կեցուածքը ի՞նչպէս տարբեր էր իր օրուան կրօնական առաջնորդներու կեցուածքէն։
7 Յիսուս թոյլ չտուաւ որ իր օրուան կրօնական առաջնորդները իր մտածելակերպը կաղապարէին։ Ան միշտ Սուրբ Գրութիւնները կը գործածէր, երբ կը խօսէր պզտիկ խումբի մը՝ ինչպէս իր առաքեալներուն՝ կամ հսկայ բազմութիւններու։ (Մատթէոս 13։10-17. 15։1-11) Այս սովորութիւնը զինք զատորոշեց իր օրուան կրօնական առաջնորդներէն։ Անոնք հասարակ ժողովուրդը բուռն կերպով ետ կը պահէին Աստուծոյ խորունկ բաները զննելէ։ Արդարեւ, սովորական էր որ այդ օրերուն ուսուցիչ մը խորհէր թէ Սուրբ Գրութիւններուն կարգ մը մասերը ա՛յնքան խորունկ էին, որ միայն քանի մը նախասիրուած աշակերտներու հետ պէտք էր քննարկուէին, եւ նո՛յնիսկ այդ պարագային, միայն ցած ձայնով եւ գլուխը ծածկուած։ Այդ կրօնական առաջնորդները Աստուածաշունչի կարգ մը հատուածներու քննարկման նոյնքան նախապաշարումով կը մօտենային, որքան կ’ընէին՝ Աստուծոյ անունը արտասանելու պարագային։
8 Քրիստոս այդպէս չէր։ Ան կը հաւատար որ ո՛չ թէ միայն քանի մը ընտրանիներ պէտք էր նկատի առնէին ‘Աստուծոյ բերնէն ելած բոլոր խօսքերը’, հապա՝ ընդհանուր ժողովուրդը։ Յիսուս հետաքրքրուած չէր գիտութեան բանալին տալու ուսումնականներու ընտրանի խումբի մը։ Ան իր աշակերտներուն ըսաւ. «Ինչ որ ձեզի մութի մէջ կ’ըսեմ, զանիկա լոյսի մէջ խօսեցէք եւ ինչ որ ականջն ի վար կը լսէք, տանիքներուն վրայ քարոզեցէք»։ (Մատթէոս 4։4. 10։27) Յիսուսի սրտի փափաքն էր Աստուծոյ գիտութիւնը բաժնել կարելի եղածին չափ շատ մարդոց հետ։
9. Ճշմարիտ Քրիստոնեաները Աստուածաշունչը ի՞նչպէս կը գործածեն։
9 Աստուծոյ Խօսքը մեր ուսուցումին առանցքը պէտք է կազմէ։ Երբ Եհովայի Վկաներու Թագաւորութեան Սրահին մէջ դասախօսութիւն մը կու տանք, զոր օրինակ, չի բաւեր Աստուածաշունչէն քանի մը ընտրուած համարներ կարդալ։ Այդ համարները բացատրելու, օրինակներ տալու եւ կիրարկելու ժամանակ պէտք է յատկացնենք։ Մեր նպատակակէտն է Աստուածաշունչի պատգամը տպագրուած էջերէն հանել եւ զայն մեր ունկնդիրներուն սրտին հասցնել։ (Նէեմեայ 8։8, 12) Դարձեալ Աստուածաշունչը պէտք է գործածուի, երբ խրատելու կամ սրբագրիչ յորդոր տալու հարկը տեսնուի։ Թէեւ Եհովայի ծառաները տարբեր լեզուներ կը խօսին եւ այլազան ենթահողերէ կու գան, բայց բոլորն ալ կը յարգեն գրքերուն գիրքը՝ Աստուածաշունչը։
10. Աստուածաշունչի ներշնչեալ պատգամը մեր վրայ ի՞նչ ազդեցութիւն կրնայ ունենալ։
10 Աստուածաշունչին պատգամը զօրութիւն կ’ունենայ, երբ այսպիսի յարգանքով գործածուի։ (Եբրայեցիս 4։12) Անիկա մարդիկը կը մղէ որ կարեւոր փոփոխութիւններ մտցնեն իրենց կեանքին մէջ. անոնք պոռնկութեան, շնութեան, կռապաշտութեան, գինովութեան եւ գողութեան նման հակա–սուրբ գրային սովորութիւններէ հեռու կը կենան։ Ան շատ շատերու օգնած է որ իրենց հին անձնաւորութիւնը հանեն եւ նորը հագնին։ (Եփեսացիս 4։20-24) Այո, եթէ զայն մարդկային որեւէ կարծիքէ կամ աւանդութենէ բարձր դասենք եւ հաւատարմօրէն զայն գործածենք, Աստուածաշունչը իրապէս մեզ ատակ կը դարձնէ, մեզ ամբողջովին պատրաստելով որպէս Աստուծոյ Խօսքը ուսուցանողներ։
Եհովայի Հոգին Մեզ Որակելի կը Դարձնէ
11. Տեղին ըլլալով ինչո՞ւ Եհովայի սուրբ հոգիին ակնարկուած է որպէս «օգնական»։
11 Երկրորդ՝ մեզ ամբողջովին պատրաստելու մէջ Եհովայի սուրբ հոգիին կամ գործօն ուժին դերին մասին խօսինք։ Բնա՛ւ պէտք չէ մոռնանք որ Եհովայի հոգին ամենէն զօրաւոր ուժն է որ գոյութիւն ունի։ Եհովա իր սիրեցեալ Որդւոյն լիազօրութիւն տուաւ որ այդ ահաւոր ուժը տայ բոլոր ճշմարիտ Քրիստոնեաներուն։ Ուստի, տեղին ըլլալով Յիսուս սուրբ հոգիին ակնարկեց որպէս «օգնական»։ (Յովհաննու 16։7, ՆԱ) Ան յորդորեց իր աշակերտները որ Եհովայէ խնդրեն այդ հոգին, վստահեցնելով որ Եհովա առատօրէն պիտի տայ զայն։—Ղուկաս 11։10-13. Յակոբու 1։17
12, 13. (ա) Ինչո՞ւ կարեւոր է որ աղօթքով խնդրենք սուրբ հոգին, մեր ծառայութեան մէջ մեզի օգնելու համար։ (բ) Փարիսեցիները ի՞նչպէս ցոյց տուին թէ սուրբ հոգին չէր ներգործեր իրենց մէջ։
12 Ամէն օր պէտք է խնդրենք սուրբ հոգին, մանաւանդ մեր ծառայութեան մէջ մեզի օգնելու համար։ Այդ գործօն ուժը ի՞նչ ազդեցութիւն կրնայ ունենալ մեր վրայ։ Ան կը ներգործէ մեր մտքին ու սրտին մէջ, մեզի օգնելով որ փոխուինք, հոգեւորապէս հասակ նետենք, հին անձնաւորութիւնը հանենք ու նորը հագնինք։ (Կողոսացիս 3։9, 10) Անիկա մեզի կ’օգնէ որ թանկարժէք քրիստոսանման յատկութիւններ մշակենք։ Շատերս անգիր գիտենք Գաղատացիս 5։22, 23–ը։ Այս համարները հոգիին պտուղները կը թուեն։ Առաջինը՝ սէրն է։ Այդ յատկութիւնը անհրաժեշտ է մեր ծառայութեան համար։ Ինչո՞ւ։
13 Սէրը խթանող մեծ ոյժ մըն է։ Եհովայի ու ընկեր արարածներուն հանդէպ սէրը ճշմարիտ Քրիստոնեաները կը մղէ որ բարի լուրը բաժնեն։ (Մարկոս 12։28-31) Եթէ այսպիսի սէր չունենանք, չենք կրնար Աստուծոյ Խօսքը ուսուցանելու համար իրապէս որակելի ըլլալ։ Յիսուսի եւ Փարիսեցիներուն տարբերութիւնը տեսէք։ Մատթէոս 9։36–ը Յիսուսի մասին կ’ըսէ. «Ժողովուրդները տեսնելով, անոնց վրայ խղճաց, վասն զի յոգնած ու ցիրուցան եղած էին հովիւ չունեցող ոչխարներու պէս»։ Փարիսեցիները ի՞նչ կեցուածք ունէին հասարակ ժողովուրդին հանդէպ։ Անոնք ըսին. «Այս ռամիկ ժողովուրդը՝ որ օրէնքը չեն գիտեր, նզովուած են»։ (Յովհաննու 7։49) Այդ Փարիսեցիները սէր չունէին ժողովուրդին հանդէպ, այլ՝ արհամարհանք։ Բացայայտօրէն, Եհովայի հոգին չէր ներգործեր անոնց մէջ։
14. Իր ծառայութեան մէջ սէր ցոյց տալու Յիսուսի օրինակը ի՞նչպէս պէտք է մղէ մեզ։
14 Յիսուս ժողովուրդին կը կարեկցէր։ Ան կը զգար անոնց վիշտը։ Ան գիտէր որ անոնք չարաշահուած, յոգնած ու ցիրուցան եղած էին, հովիւ չունեցող ոչխարներու պէս։ Յովհաննու 2։25–ը մեզի կ’ըսէ որ Յիսուս «գիտէր թէ ի՛նչ կայ մարդուն ներսիդին»։ Քանի որ ստեղծագործութեան ընթացքին Եհովայի Ճարտարապետը եղած էր, Յիսուս խորապէս կը հասկնար մարդկային բնոյթը։ (Առակաց 8։30, 31) Այդ հասկացողութիւնը իր սէրը խորացուցած էր։ Թող որ մեր քարոզչութեան ետին եղող մղիչ ուժը միշտ այս տեսակ սէր մը ըլլայ։ Եթէ կը զգանք որ այս մարզին մէջ կրնանք բարելաւումներ ընել, Եհովայէն սուրբ հոգին խնդրենք, ապա մեր աղօթքներուն համաձայն գործենք։ Եհովան պիտի պատասխանէ մեզի։ Ան այս անդիմադրելի ուժը պիտի ղրկէ, մեզի օգնելու համար որ աւելի նմանինք Քրիստոսի, որ բարի լուրը քարոզելու համար գերազանցօրէն որակելի էր։
15. Եսայեայ 61։1-3–ի խօսքերը ի՞նչպէս կը կիրարկուէին Յիսուսի եւ միեւնոյն ժամանակ կը դատապարտէին դպիրներն ու Փարիսեցիները։
15 Յիսուսի որակումները ուրկէ՞ եկան։ «Տէրոջը Հոգին իմ վրաս է»՝ ըսաւ ան։ (Ղուկաս 4։17-21) Այո, Եհովա ի՛նքն էր որ սուրբ հոգիով նշանակած էր Յիսուսը։ Յիսուս յաւելեալ որակումներու կարիքը չունէր։ Այն ատենուան կրօնական առաջնորդները սուրբ հոգիո՞վ նշանակուած էին։ Ո՛չ։ Անոնք պատրաստ ալ չէին Եսայեայ 61։1-3–ի մարգարէութիւնը կատարելու, զոր Յիսուս կարդաց եւ ինքն իր վրայ կիրարկեց։ Հաճեցէք կարդալ այս համարները եւ անձամբ տեսնել թէ կեղծաւոր դպիրներն ու Փարիսեցիները որակելի չէին։ Անոնք աղքատներուն ծանուցանելիք բարի լուր մը չունէին։ Իսկ ի՞նչպէս կրնային գերիներուն ազատութիւն եւ կոյրերուն տեսողութիւն քարոզել։ Հոգեւոր առումով, իրե՛նք անձամբ կոյր եւ մարդակերտ աւանդութիւններու գերի էին։ Այդ մարդոց հակառակը, իրապէս որակելի՞ ենք մարդոց սորվեցնելու։
16. Ներկայիս Եհովայի ժողովուրդը ի՞նչպէս կրնան վստահ ըլլալ որ որակելի քարոզիչներ են։
16 Ճիշդ է որ մենք Քրիստոնեայ Աշխարհի բարձրագոյն վարժարաններուն մէջ ուսանած չենք։ Աստուածաբանական դպրեվանքէ մը ուսուցիչի նշանակում չենք ստացած։ Ուրեմն, որակումներ չունի՞նք։ Երբե՛ք այն չէ պարագան։ Որպէս Վկաներ մեր նշանակումը Եհովա Աստուծմէ կու գայ։ (Եսայեայ 43։10-12) Եթէ իր հոգիին համար աղօթենք եւ անոր համաձայն գործենք, բարձրագոյն որակումները կ’ունենանք։ Անշուշտ, անկատար ենք եւ Մեծ Ուսուցիչին՝ Յիսուս Քրիստոսի՝ ձգած օրինակին չենք կրնար հասնիլ։ Այսուհանդերձ, երախտապարտ չե՞նք որ Եհովա իր հոգին կը գործածէ, մեզ որակելի դարձնելու ու պատրաստելու համար, որպէս իր Խօսքը ուսուցանողներ։
Եհովայի Կազմակերպութիւնը Մեզ Որակելի կը Դարձնէ
17-19. Եհովայի կազմակերպութեան կողմէ հայթայթուած շաբաթական հինգ ժողովները ի՞նչպէս կ’օգնեն մեզի որակելի ըլլալու որպէս քարոզիչներ։
17 Հիմա խօսինք իր Խօսքը ուսուցանելու համար մեզ պատրաստելու Եհովայի երրորդ միջոցին՝ իր երկրային ժողովքին, կամ կազմակերպութեան մասին, որ կը մարզէ մեզ քարոզիչներ ըլլալու։ Ի՞նչպէս։ Պահ մը խորհեցէք մեր վայելած ուսուցումի յայտագրին մասին։ Սովորաբար ամէն շաբաթ քրիստոնէական հինգ ժողովներու կը յաճախենք։ (Եբրայեցիս 10։24, 25) Պզտիկ խումբերով կը հաւաքուինք Ժողովքի Գրքի Ուսումնասիրութեան համար, Եհովայի կազմակերպութեան կողմէ հայթայթուած դասագրքէ մը Աստուածաշունչի խորունկ ուսումնասիրութիւն մը վայելելու համար։ Պատասխաններ տալով, կրնանք սորվիլ եւ զիրար քաջալերել։ Նաեւ, գրքի ուսումնասիրութեան տեսուչը մեր անհատական կարիքին համաձայն խրատներ կու տայ եւ ուշադրութիւն կ’ընծայէ մեզի։ Հանրային Ժողովին եւ Դիտարան–ի Ուսումնասիրութեան, առատ հոգեւոր սնունդ կը ստանանք։
18 Մեր Աստուածպետական Ծառայութեան Դպրոցը ծրագրուած է, սորվեցնելու կերպին շուրջ մեզի հրահանգներ տալու համար։ Աշակերտական ելոյթներ պատրաստելով, այլազան նիւթեր սորվեցնելու համար Աստուծոյ Խօսքը գործածելու կերպը կը սորվինք։ (Ա. Պետրոս 3։15) Պատահա՞ծ է որ բաւական ծանօթ նիւթի մը մասին դասախօսութիւն մը նշանակուած է ձեզի, բայց տեսած էք որ դուք անձամբ անկէ նոր բան մը սորված էք։ Ասիկա սովորական փորձառութիւն մըն է։ Նիւթի մը շուրջ մեր գիտութիւնը աւելի սրելու լաւագոյն կերպը՝ զայն ուրիշներուն սորվեցնելն է։ Եթէ նոյնիսկ անձամբ ելոյթ չունենանք, տակաւին կը սորվինք աւելի լաւ ուսուցանող մը ըլլալ։ Իւրաքանչիւր աշակերտի մէջ լաւ յատկութիւններ կը նկատենք, եւ կը խորհինք թէ ի՛նչպէս կրնանք զանոնք ընդօրինակել։
19 Ծառայութեան Ժողովին ալ նպատակն է մեզ պատրաստել, որպէս Աստուծոյ Խօսքը ուսուցանողներ։ Ամէն շաբաթ մեր ծառայութեան շուրջ դարձող կենսալից դասախօսութիւններ, զրոյցներ եւ ցուցադրութիւններ կը վայելենք։ Ի՞նչ ներկայացում պիտի գործածենք։ Մեր թաղամասին մէջ դժուար կացութիւն մը ի՞նչպէս ձեռք պիտի առնենք։ Քարոզչութեան ի՞նչ միջոցներ բաց են մեր դիմաց, զորս պէտք է տակաւին հետազօտենք։ Ի՞նչ բան մեզ աւելի ատակ ուսուցիչներ պիտի դարձնէ, երբ վերայցելութիւններ կ’ընենք ու Աստուածաշունչի ուսումնասիրութիւններ կը վարենք։ (Ա. Կորնթացիս 9։19-22) Այսպիսի հարցումներ եւ ուրիշներ մանրամասնօրէն նկատի կ’առնուին Ծառայութեան Ժողովի ընթացքին։ Ժողովի բաժիններէն շատեր հիմնուած են այն նիւթերուն վրայ, որոնք կը գտնուին Մեր Թագաւորութեան Ծառայութիւնը թերթիկին մէջ, որ մեր կենսական գործին ի տես մեզ պատրաստելու համար հայթայթուած ուրիշ գործիք մըն է։
20. Ի՞նչպէս կրնանք լիովին օգտուիլ ժողովներէն ու համաժողովներէն։
20 Ժողովներու համար պատրաստուելով եւ ներկայ գտնուելով, ապա մեր սորված բաները ուսուցանելու մեր գործին մէջ կիրարկելով, շատ մեծ մարզում կը ստանանք։ Բայց այսքանով չի վերջանար։ Ունինք նաեւ աւելի մեծ հաւաքոյթներ՝ համաժողովներ, որոնք ծրագրուած են մեզ պատրաստելու, որպէս Աստուծոյ Խօսքը ուսուցանողներ։ Իսկ որքա՜ն անհամբեր ենք ուշադիր կերպով լսելու եւ այսպիսի խրատներ գործադրելու։—Ղուկաս 8։18
21. Ո՞ր ապացոյցը կը նշէ թէ մեր մարզումը ազդեցիկ եղած է, եւ վարկը որո՞ւ կ’երթայ։
21 Եհովայի հայթայթած մարզումը ազդեցիկ եղա՞ծ է։ Ձգենք որ իրողութիւնները իրենք խօսին։ Ամէն տարի հարիւր հազարաւոր անհատներու օգնութիւն կը տրուի որ Աստուածաշունչի հիմնական վարդապետութիւնները սորվին եւ Աստուծոյ իրենցմէ պահանջածներուն համաձայն ապրին։ Մեր համրանքը վերելքի մէջ է, բայց ասոր վարկը ոեւէ մէկը չի կրնար իր վրայ առնել։ Հարցերը իրապաշտօրէն պէտք է դիտենք՝ Յիսուսի նման։ Ան ըսաւ. «Մէկը չի կրնար ինծի գալ, եթէ զիս ղրկող Հայրը զանիկա չքաշէ»։ Վաղեմի առաքեալներուն նման, մեծաւ մասամբ անգրագէտ եւ սովորական մարդիկ ենք։ (Յովհաննու 6։44. Գործք 4։13) Մեր յաջողութիւնը Եհովայէ կախեալ է, որ պարկեշտ սիրտ ունեցող անհատները ճշմարտութեան կը քաշէ։ Պօղոս առաքեալ լաւ կերպով բացատրեց. «Ես տնկեցի, Ապօղոս ջուր տուաւ, բայց Աստուած աճեցուց»։—Ա. Կորնթացիս 3։6
22. Ինչո՞ւ քրիստոնէական ծառայութեան լիովին մասնակցելու նկատմամբ երբեք պէտք չէ չափազանց վհատինք։
22 Այո, Եհովա Աստուած գործօն մասնակցութիւն ունի, որպէս իր Խօսքը ուսուցանողներ մեր գործին մէջ։ Թերեւս միշտ մենք մեզ որակելի չենք զգար որպէս ուսուցանողներ։ Բայց մի՛ մոռնաք որ Եհովան է որ մարդիկը իրեն եւ իր Որդւոյն կը քաշէ։ Եհովան է որ մեզ որակելի կը դարձնէ այդ նորեկներուն ծառայելու, իր Խօսքին, իր սուրբ հոգիին եւ իր երկրային կազմակերպութեան միջոցաւ։ Թող որ Եհովայի տուած մարզումին ընդառաջենք, կիրարկելով այն բոլոր լաւ բաները, զորս հիմա մեզի կը հայթայթէ, որպէսզի ամբողջովին պատրաստուած ըլլանք որպէս Աստուծոյ Խօսքը ուսուցանողներ։
Ի՞նչպէս պիտի պատասխանէիք
• Աստուածաշունչը ի՞նչպէս կը պատրաստէ մեզ քարոզչութեան գործին համար։
• Սուրբ հոգին ի՞նչ դեր կը խաղայ որպէս քարոզիչներ մեզ որակելի դարձնելու մէջ։
• Եհովայի կազմակերպութիւնը ի՞նչ կերպերով ձեզի օգնած է որակելի դառնալու որպէս բարի լուրի քարոզիչ։
• Երբ ծառայութեան մասնակցինք, ինչո՞ւ կրնանք վստահ ըլլալ։
[Նկար՝ էջ 17]
Որպէս Աստուծոյ Խօսքին ուսուցիչը, Յիսուս մարդոց հանդէպ սէր ցուցաբերեց