Հրեշտակները ինչպէ՞ս կրնան քեզի օգնել

Սուրբ Գիրքը կը ցուցնէ թէ ատեններ հրեշտակները որոշ չափով պաշտպանած են Աստուծոյ ճշմարիտ ծառաները, որպէսզի Աստուծոյ կամքը կատարուի (Սաղմոս 34։7)։ Օրինակ՝

• Երբ Եհովան չար Սոդոմն ու Գոմոր քաղաքները կործանեց, հրեշտակները օգնեցին հաւատարիմ Ղովտին եւ անոր ընտանիքին որ փախչին (Ծննդոց 19։1, 15-26)։

• Բաբելոնին մէջ, երբ երեք եբրայեցի երիտասարդներ նետուեցան կրակի հնոցը, Աստուած «իր հրեշտակը ղրկեց ու իր ծառաները ազատեց» մահէն (Դանիէլ 3։19-28)։

• Երբ հաւատարիմ Դանիէլը անօթի առիւծներու գուբին մէջ նետուեցաւ եւ լման գիշերը հոն անցուց, իրեն բան մը չեղաւ՝ քանի որ ‘Աստուած իր հրեշտակը ղրկեց ու առիւծներուն բերանը գոցեց’ (Դանիէլ 6։16, 22)։

ՀՐԵՇՏԱԿՆԵՐԸ ՕԳՆԵՑԻՆ ԱՌԱՋԻՆ ԴԱՐՈՒ ՔՐԻՍՏՈՆԷԱԿԱՆ ԺՈՂՈՎՔԻՆ

Ատեններ, Աստուծոյ հրեշտակները կը միջամտէին առաջին դարու քրիստոնէական ժողովքին հետ կապ ունեցող հարցերուն, որպէսզի Աստուծոյ նպատակը իրագործուի։ Օրինակ՝

• Հրեշտակ մը բանտին դռները բացաւ եւ բանտարկուած առաքեալներուն ըսաւ որ շարունակեն տաճարին մէջ քարոզել (Գործք 5։17-21)։

• Հրեշտակ մը Փիլիպպոս աւետարանիչին ըսաւ որ երթայ այն ամայի ճամբան, որ Երուսաղէմէն Գազա կը տանի, եւ քարոզէ եթովպիացիի մը որ Երուսաղէմ գացած էր Աստուած պաշտելու (Գործք 8։26-33)։

• Երբ ժամանակը եկաւ որ հրեայ չեղողներն ալ կարենան քրիստոնեայ ըլլալ, հրեշտակ մը տեսիլքով երեւցաւ հռոմայեցի հարիւրապետ Կոռնելիոսին, եւ անոր ըսաւ որ Պետրոս առաքեալը կանչէ իր տունը (Գործք 10։3-5)։

• Երբ Պետրոս առաքեալ բանտարկուած էր, հրեշտակ մը երեւցաւ եւ զինք բանտէն դուրս հանեց (Գործք 12։1-11)։

ՀՐԵՇՏԱԿՆԵՐԸ ԻՆՉՊԷ՞Ս ԿՐՆԱՆ ՔԵԶԻ ՕԳՆԵԼ

Փաստ մը չունինք որ կը ցուցնէ թէ ներկայիս Աստուած հրեշտակները կը գործածէ, որպէսզի հրաշքներով օգնէ մարդոց, ինչպէս որ Սուրբ գիրքին մէջ նկարագրուած է։ Բայց Յիսուս մեր օրերուն համար ըսաւ. «Արքայութեան այս աւետարանը բովանդակ աշխարհի մէջ պիտի քարոզուի՝ բոլոր ազգերուն վկայութիւն ըլլալու։ Անկէ յետոյ վերջը պիտի գայ» (Մատթէոս 24։14)։ Գիտէի՞ր որ ներկայիս Քրիստոսին աշակերտները այս գործը կ’ընեն հրեշտակներուն օգնութեամբ։

Յայտնութիւն գիրքը կը ցուցնէ թէ հրեշտակները աշխարհի չորս կողմը աշխատասիրութեամբ պիտի օգնէին մարդոց, որ սորվին Եհովա Աստուծոյ մասին եւ մարդկութեան նկատմամբ իր նպատակին մասին։ Յովհաննէս առաքեալ գրեց. «Ուրիշ հրեշտակ մը տեսայ, որ կը թռչէր երկնքի մէջ եւ ունէր յաւիտենական աւետիսը՝ քարոզելու բոլոր ազգերուն ու ցեղերուն եւ լեզուներուն ու ժողովուրդներուն, որոնք երկրի վրայ կը բնակին։ Ան մեծ ձայնով կ’ըսէր. ‘Աստուծմէ վախցէ՛ք ու փա՛ռք տուէք անոր, վասն զի անոր դատաստանին ժամը եկաւ ու երկրպագութիւն ըրէ՛ք անոր՝ որ ստեղծեց երկինքը ու երկիրը եւ ծովը ու ջուրերուն աղբիւրները’» (Յայտնութիւն 14։6, 7)։ Մեր օրերուն, բազմաթիւ փորձառութիւններ կը փաստեն, թէ հրեշտակները կ’օգնեն որ Թագաւորութեան մասին քարոզուի ամբողջ աշխարհին մէջ։ Իսկապէս, երբ նոյնիսկ մէկ մեղաւոր զղջայ եւ Եհովային մօտենայ, «ուրախութիւն կ’ըլլայ Աստուծոյ հրեշտակներուն առջեւ» (Ղուկաս 15։10)։

Ի՞նչ պիտի պատահի երբ քարոզչութեան գործը լմննայ։ Այդ ժամանակ, «երկնքի մէջ եղող [հրեշտակներու] զօրքերը» պիտի օգնեն Յիսուս Քրիստոսին՝ թագաւորներու Թագաւորին, որ մղէ Արմագեդոն պատերազմը՝ «Ամենակալ Աստուծոյ այն մեծ օրուանը պատերազմ»ը (Յայտնութիւն 16։14-16. 19։14-16)։ Զօրաւոր հրեշտակները Աստուծոյ դատաստանը պիտի գործադրեն, մինչ Յիսուս ‘վրէժ կ’առնէ անոնցմէ՝ որ. . . մեր Տէր Յիսուս Քրիստոսին աւետարանին չեն հնազանդիր’ (Բ. Թեսաղոնիկեցիս 1։7, 8)։

Ուրեմն, վստահ եղիր որ հրեշտակները անձամբ հետաքրքրուած են քեզմով։ Անոնք իրապէս կ’ուզեն որ Աստուծոյ ծառայել փափաքողները լաւ եւ ուրախ ըլլան, եւ Եհովան շատ անգամներ զանոնք գործածած է որ երկրի վրայ իր հաւատարիմ ծառաները զօրացնէ ու պաշտպանէ (Եբրայեցիս 1։14)։

Հետեւաբար, մեր ամէն մէկուն առջեւ շատ կարեւոր ընտրութիւն մը կայ։ Աշխարհի չորս կողմը քարոզուող բարի լուրը մտիկ պիտի ընե՞նք եւ ատոր պիտի հնազանդի՞նք։ Եթէ կ’ուզես Աստուծոյ զօրաւոր հրեշտակներուն սիրալիր օգնութիւնը զգալ կեանքիդ մէջ, Եհովայի վկաները ամենայն ուրախութեամբ կրնան քեզի օգնել։