Անխախտ Պահենք Մեր Յոյսին Դաւանութիւնը

¹ Դիտարանի Ուսումնասիրութիւնը գլխաւոր միջոցն է որով «ատենին» հոգեւոր սնունդ կը հայթայթուի Աստուծոյ ժողովուրդին այսօր։ (Մատթ. 24։45) Այս կարեւոր ժողովին ներկայ կ’ըլլանք երկու գլխաւոր նպատակակէտերով՝ հոգեւորապէս կերտուելու եւ մեր յոյսը ուրիշներու յայտարարելու։—Եբր. 10։23-25

² Մենք Մեզի Օգտենք. Նախահաշիւ եղած է թէ ժողովքներուն մեծամասնութեան մէջ ունկնդիրներէն միայն մէկ երրորդը առաջուընէ ուսումնասիրութիւնը կը պատրաստէ։ Շուրջ մէկ երրորդն ալ պատասխաններ տալու կը մասնակցի։ Դիտարանի Ուսումնասիրութեան մէջ ներկայացուած հաստատուն հոգեւոր սնունդը կարելի չէ կատարելապէս իւրացնել միայն ժողովին ընթացքին։ Հարկ կայ որ ժամանակ յատկացնէք առաջուընէ նիւթը սերտելու։

³ Երբ ուսումնասիրութեան կը նախապատրաստուիք, օգտակար է որ նախ կարդաք ու մտածէք յօդուածին վերջաւորութեան գտնուած շրջագիծին հարցումներուն մասին։ Անոնք կրնան ձեր ուշադրութիւնը կեդրոնացնել ուսումնասիրութեան մէջ նկատի առնուած գլխաւոր կէտերուն վրայ։

⁴ Ուսումնասիրութեան ընթացքին ուշադրութեամբ մտիկ ըրէք ըսուածին։ Ուշադրութիւն ընծայեցէք վարիչին բացման խօսքերուն. այս մեկնաբանութիւնները ճամբան կը պատրաստեն ուսումնասիրութեան։ Ան կրնայ երեք կամ չորս հարցումներ յարուցանել որոնք պիտի պատասխանուին, կամ վերջին շաբթուան ուսումնասիրութենէն աչքառու մի քանի կէտեր կրնայ վերաքաղ ընել եթէ այս շաբթուան ուսումնասիրութիւնը նոյն նիւթին շարունակութիւնն է։ Ան մեր ուշադրութեան պիտի յանձնէ եթէ վերաճշդում կայ մեր հասկացողութեան Աստուածաշունչի մարգարէութեան մը կամ սուրբ գրային սկզբունքի մը։ Անշուշտ, վարիչին մեկնաբանութիւնները պէտք է հակիրճ ըլլան, քանի որ ուսումնասիրութեան նպատակներէն մէկն է ժողովքին պատեհութիւնը տալ որ իրենց յոյսը արտայայտեն։ Ուշադրութեամբ մտիկ ըրէք մինչ ուրիշներ կը մեկնաբանեն իրենց սորվածին մասին. ասիկա կրնայ ձեր հաւատքը զօրացնել։

⁵ Ձեր Յոյսը Յայտարարեցէք. Ուսումնասիրութեան ընթացքին կանոնաւորաբար կը մեկնաբանէ՞ք։ Հակիրճ, ուղղակի պատասխանները նախընտրելի են։ (Բաղդատել Ղուկաս 21։1-4։) Պարզ մեկնաբանութիւն մը որ սրտանց կը ներկայացուի, բոլորին կողմէ կը գնահատուի։ Հարցումի մը առաջին պատասխանը սովորաբար պէտք է հակիրճ եւ ուղղակի ըլլայ։ Ասիկա ուրիշներու թոյլ կու տայ որ համար մը մէջբերեն կամ ուշադրութեան յանձնեն պարբերութեան մէջ յիշուած մանրամասնութիւն մը։ Այս կերպով շատեր կրնան իրենց յոյսը յայտարարել։ Մեկնաբանութիւնները պէտք է միշտ դրական եւ կերտիչ ըլլան։

⁶ Եթէ նոր սկսած էք ուսումնասիրութեան յաճախել կամ երկչոտ էք պատասխան տալու նկատմամբ, կրնաք վարիչին օժանդակութիւնը խնդրել։ Խնդրեցէք որ ձեր բարձրացած ձեռքը նկատէ երբ որոշ պարբերութիւն մը նկատի կ’առնուի։ Թերեւս փափաքիք մէջբերուած համար մը կարդալ եւ հակիրճօրէն կիրարկել անոր իմաստը։ Կրնաք մի քանի նոթագրութիւններ ընել լուսանցքին մէջ որպէսզի յիշէք ինչ որ կ’ուզէք ըսել երբ կը մեկնաբանէք։ Եթէ պատանի մըն էք, յիշեցէք թէ ձեր մեկնաբանութիւնները սիրով կ’ընդունուին ու կը գնահատուին։—Մատթ. 21։16

⁷ Կենսական է որ մեր հաւատքը արտայայտենք. եւ Դիտարանի Ուսումնասիրութիւնը լաւ պատեհութիւն մը կը հայթայթէ ասիկա ընելու։ Եթէ կը վարանիք պատասխան տալու, ջանացէք խնդիրը յաղթահարել եւ առնուազն մէկ պատասխան տուէք։ Ժողովին մասնակցած պիտի ըլլաք եւ աւելի հանգիստ պիտի զգաք անոր հանդէպ։ Հետեւաբար, ինչո՞ւ չծրագրէք որ յաջորդ Դիտարանի Ուսումնասիրութեան առնուազն մէկ պատասխան տաք։—Առ. 15։23