Յիշատակատօնին՝ Անոնց Բարի Գալուստ Մաղթենք
1 Անցեալ մի քանի տարիներուն, Յիշատակատօնին ներկայ եղող ամէն երեք անհատներէն միայն մէկը բարի լուրին հրատարակիչ մըն էր։ Հաւանաբար այս տարի ալ պարագան նոյնը պիտի ըլլայ։ Ոմանք թերեւս ներկայ գտնուին ուրիշ քաղաքի մը մէջ բնակող ազգականի մը կամ ծանօթի մը քաջալերանքին շնորհիւ, մինչ ուրիշներ կրնան հրաւիրուած ըլլալ տեղական հրատարակիչներու կողմէ։ Տակաւին ուրիշներ որոնք ներկայ կը գտնուին, թէեւ մկրտուած են, բայց այլեւս ծառայութեան մէջ գործունեայ չեն։ Անկեղծօրէն բարի գալուստ կը մաղթենք բոլոր անոնց որոնք կը յարգեն Յիսուսի պատուէրը. «Ասիկա ըրէք զիս յիշելու համար»։—Ա. Կորն. 11։24. Հռովմ. 15։7
2 Նշանակուած հիւրընկալները պէտք է արթուն ըլլան ամէն անհատի բարի գալուստ մաղթելու, մանաւանդ նորեկի մը, երբ Թագաւորութեան Սրահը կը մտնէ։ Սակայն, բոլորս ալ կրնանք հիւրասիրութեան ետեւէ ըլլալ Յիշատակատօնին։ (Հռովմ. 12։13) Ինչպէ՞ս։
3 Այդ իրիկուն, հրատարակիչներէն ոմանք շատ զբաղած պիտի ըլլան հետաքրքրուող անհատներուն փոխադրութեան միջոց հայթայթելով։ Ուրիշներ կրնան կանուխ գալ եւ ներկայ ըլլալ այցելուները բարեւելու։ Երբ օտար մը սրահը մտնէ, ջերմօրէն բարեւեցէք ու խօսակցութիւն մը սկսեցէք։ Հարցուցէք թէ տեղական ժողովքէն ոեւէ անհատ կը ճանչնա՞յ։ Եթէ այո, անոր հոգ տարէք մինչեւ որ այդ անհատը հասնի։ (Բաղդատել Ղուկաս 10։35։) Եթէ ան անձամբ ոեւէ անհատ չի ճանչնար, ինչո՞ւ զինք չհրաւիրէք ձեր հետ նստելու ժողովին ընթացքին։ Բացատրեցէք թէ ինչպէս գինին եւ հացը պիտի գործածուին յայտագրին ընթացքին։ Ան թերեւս ձեր օգնութեան կարիքը ունենայ դասախօսին մէջբերած համարները բանալու։
4 Յիշատակատօնին տօնակատարութեան վերջաւորութեան, ցոյց տուէք որ ուրախ էք իր գալով։ Ան թերեւս հարցումներ ունի մեր գործին մասին որոնց կրնաք պատասխանել։ Ձեր անձնական հետաքրքրութիւնը կրնայ խօսակցութեան մը առաջնորդել սուրբ գրային որոշ նիւթի մը մասին, ըլլայ Թագաւորութեան Սրահին մէջ կամ ուրիշ տեղ։ Արթուն եղբայրներ որոնք այս գովելի նախաքայլը առած են, կարգ մը ընտիր ուսումնասիրութիւններ սկսած են։ Օտարը Թագաւորութեան Սրահը չձգած, զինք ուրիշներու ծանօթացուցէք եւ ջերմօրէն հրաւիրեցէք որ վերադառնայ։
5 Ի՜նչ ուրախութիւն է ողջունել մեր սիրելի եղբայրներն ու քոյրերը որոնք որոշ ժամանակ մը կանոնաւորաբար չէին յաճախեր ժողովներուն կամ ծառայութեան մէջ անգործունեայ էին։ Փոխանակ հարցնէք թէ ինչո՛ւ հեռու մնացած էին, ձեր ուրախութիւնը յայտնեցէք որ իրենք ներկայ են։ Թերեւս Յիշատակատօնին դասախօսութեան ընթացքին բան մը լսեն որ զիրենք մղէ ետ քննելու իրենց նուիրուած յարաբերութիւնը Եհովայի հետ։ Ձեր ջերմ ընդունելութիւնը եւ յայտնաբերած անկեղծ հետաքրքրութիւնը կրնան անոնց սրտին ազդել։ Թող գիտնան որ հաճոյքով պիտի սպասէք զիրենք կրկին տեսնելը։—Հռովմ. 1։11, 12
6 Ապրիլ 10–ին, «Ճշմարիտ Կրօնքը Մարդկային Ընկերութեան Կարիքներուն Գոհացում կու Տայ» խորագրով հանրային մասնաւոր դասախօսութիւն մը պիտի ներկայացուի ժողովքներուն մեծամասնութեան մէջ։ Վստահ եղէք որ Յիշատակատօնին տօնակատարութեան բոլոր ներկայ եղողները հրաւիրուած են եւ օգնութիւն կը ստանան ներկայ գտնուելու համար։ Կը յուսանք որ այս մասնաւոր ժողովներուն ներկայ եղողները սիրով ընդունուած պիտի զգան եւ Եհովայի ժողովուրդին ընկերական ջերմ հոգին պիտի վայելեն։—Սաղմ. 133։1