Աստուածպետական Ծառայութեան Դպրոցէն Լաւագոյնս Օգտուինք
1 Աստուածպետական Ծառայութեան Դպրոցը միջոց մը եղած է մեզ մարզելու ‘սորվեցնելու արուեստ’ին մէջ, որպէսզի կարենանք Աստուածաշունչի ճշմարտութիւնները ազդեցիկ կերպով բացատրել ուրիշներու։ (Բ. Տիմ. 4։2, ՆԱ) Իւրաքանչիւր շաբաթ արժէքաւոր հասկացողութիւն կը ստանանք Աստուածաշունչի զանազան նիւթերու մասին։ Ինչպէ՞ս կրնանք վստահ ըլլալ թէ լաւագոյնս կ’օգտուինք այս դպրոցին հայթայթած կենսական խրատներէն։
2 Ուշադրութիւն ընծայեցէք դպրոցի տեսուչին բացման խօսքերուն մինչ ցցուն կ’ընէ կարգ մը հետաքրքրական կէտեր զորս կրնաք սորվիլ ժողովին ընթացքին։ Մտածեցէք անոր յարուցանած որեւէ հարցումի մասին եւ թէ ինչպէ՛ս կրնաք պատասխանները կիրարկել ձեր ծառայութեան մէջ։
3 Հրահանգիչ ուղերձը հրատարակուած նիւթին պարզապէս վերաքաղ մը չէ։ Անիկա կը կեդրոնանայ տեղեկութիւններուն գործնական արժէքին վրայ եւ ցոյց կու տայ ինչպէ՛ս ձեզի անձնապէս կ’օգտեն։ Առաջուընէ պատրաստուիլը ձեզի պիտի օգնէ որ գլխաւոր կէտերուն վրայ աւելի լաւ կերպով կեդրոնանաք եւ յաջորդող բերանացի վերաքաղին մասնակցիք։
4 Աստուածաշունչի շաբաթական ընթերցումին հետ քայլ պահելը կրնայ ձեր գնահատանքը խորացնել Աստուծոյ Խօսքին հանդէպ։ Յաւելեալ հետազօտութիւնը կրնայ երեւան հանել նոր ու հետաքրքրական մանրամասնութիւններ որոնք ճշմարտութեան ձեր հասկացողութիւնը պիտի յառաջացնեն։ Աստուածաշունչի աչքառու կէտերը ներկայացնելը պարզապէս կրկնում մը չէ Աստուածաշունչի արձանագրութեան։ Հակիրճ ընդհանուր վերաքաղէ մը ետք, դասախօսը ցցուն պիտի ընէ ուշագրաւ կէտեր նշանակուած բաժինին մէջ եւ ցոյց պիտի տայ ինչպէս առնչութիւն ունին մեր կեանքին ու պաշտամունքին հետ։ Ուշադիր եղէք որպէսզի կարենաք սորվիլ ինչպէս Աստուածաշունչի խրատները աւելի լաւ կերպով կիրարկէք։—Սաղմ. 119։105
5 Եթէ ձեզի աշակերտական դասախօսութիւն մը նշանակուած է, նկատի առէք ձեր աշխատելիք խրատի կէտը։ Կարդացէք Դպրոցի Դասագիրքին մէջ տրուած թելադրութիւնները խնդրոյ առարկայ յատկութեան մասին եւ ջանացէք կիրարկել զանոնք։ Երբ տեղեկութիւններ կ’ընտրէք ձեր դասախօսութեան համար, փորձեցէք շեշտել այն կէտերը որոնք գործնական պիտի ըլլան դաշտին մէջ։—Դպրոցի Դասագիրք էջ 96-9։
6 Եթէ քոյր մըն էք որու նշանակուած է Թիւ 3 Դասախօսութիւն կամ Թիւ 4 Դասախօսութիւն, փորձեցէք նիւթը ներկայացնել իրապաշտական ցուցադրութեամբ։ Տանտիրուհին ձեր ամէն ըսածին կրնայ համամիտ ըլլալ կամ չըլլալ. ջանացէք ցոյց տալ թէ ինչպէս անհատին պիտի օգնէք որ մտածէ նշուած Աստուածաշունչի սկզբունքներուն մասին։ (Դպրոցի Դասագիրք էջ 153-8) Ասիկա ունկնդիրներուն պիտի օգնէ որ գիտնան ինչպէս ձեռք առնեն դաշտի ծառայութեան մէջ դիմագրաւուած նոյնանման առարկութիւններ։ Շատ առաջ պատրաստեցէք եւ կարգադրեցէք կանուխ փորձ մը ձեր տանտիրուհիին հետ։ Պէտք չէ հարկ ըլլայ փորձ ընելու ժողովը սկսելէ ետք։
7 Դասախօսութիւն տուող աշակերտներուն քաջալերութիւն կը տրուի որ նստին սրահին առջեւի շարքերը։ Ասիկա ժամանակ կը խնայէ եւ կարելի կը դարձնէ որ դպրոցի տեսուչը աւելի անձնական կերպով իր խրատը տայ։ Բոլորն ալ կրնան օգտուիլ անոր տուած ազնիւ, մասնայատուկ թելադրութիւններէն որոնք հիմնուած են Դպրոցի Դասագիրքին վրայ։ Պայման չէ որ ան հետեւի Դասախօսական Խրատի թղթիկի կէտերուն դասաւորման. ան պիտի ընտրէ խրատի կէտ մը ըստ ձեր ընթացիկ կարիքին, որպէսզի լաւագոյն յառաջդիմութիւնը արձանագրէք։
8 Ասոնք մեզի համար լաւ պատճառներ են որպէսզի ամէն շաբաթ պատրաստենք ու ներկայ գտնուինք Աստուածպետական Ծառայութեան Դպրոցի ժողովին։ Մեր ստացած խրատը կրնայ մեզի օգնել որ իմաստուն ու հմուտ ըլլանք մեր ծառայութեան մէջ։—Առ. 1։5