Զանոնք Քաջալերենք Որ Իր Հետեւորդները Ըլլան
1 Ա. Կորնթացիս 3։6–ին մէջ, Պօղոս գրեց. «Ես տնկեցի, Ապօղոս ջուր տուաւ, բայց Աստուած աճեցուց»։ Պօղոս այս գաղափարը գործածեց իր եղբայրներուն օգնելու որ կարիքը տեսնեն միութեամբ գործելու Քրիստոսին գլխաւորութեան ներքեւ։ Այս կերպով ան նաեւ անոնց օգնեց որ գնահատեն իրենց ունեցած կենսական դերը տնկելու ու ջրելու կարեւոր գործին մէջ։
2 Այդ կենսապահ գործը իր վերջը պիտի գտնէ մեր օրերուն մէջ։ Որպէս նուիրուած Քրիստոնեաներ, լուրջ պատասխանատուութիւն կը վերցնենք ուրիշներու օգնելու որ Յիսուսի հետեւորդներ ըլլան։ (Գործք 13։48) Ինչպէ՞ս հոգ պիտի տանիք այն հետաքրքրութեան զոր շարժեցիք առաջին հանդիպումին։
3 Եթէ կը վերադառնաք անհատի մը այցելելու, որու խոստացաք «Մեծագոյն Մարդը որ Ապրած Է» գիրքը բերել, կրնաք ըսել.
◼ «Երբ վերջին անգամ խօսակցեցանք, նկատի առինք թէ Յիսուս Քրիստոս ի՛նչպիսի մարդ մըն էր։ Ուրախ եմ որ իմ հետս բերած եմ Մեծագոյն Մարդը որ Ապրած Է գիրքը։ Ի՞նչ բան մեծապէս ձեզ տպաւորած է Յիսուսի ուսուցումին ու իր անձնաւորութեան նկատմամբ»։ Թոյլ տուէք որ պատասխանէ։ Բացէք 113–րդ գլուխը եւ նկատի առէք Յիսուսի խոնարհութեան ընտիր օրինակը։ Կարդացէք Փիլիպպեցիս 2։8, ցոյց տալու համար թէ Պօղոս առաքեալ ինչպէ՛ս նկատեց Յիսուսի խոնարհ կեցուածքը։ Յետոյ կրնաք բացատրել թէ շատ աւելին կարելի է սորվիլ Աստուածաշունչի կանոնաւոր ուսումնասիրութեան մը միջոցաւ։
4 Թերեւս կը նախընտրէք այս բացումը.
◼ «Խօսեցանք այն բաներուն մասին զորս Յիսուս ըրաւ մինչ երկրին վրայ էր, որոնք ցոյց կու տան թէ ինք իրապէս մեզի կը հոգայ։ Ի՞նչ կը խորհիք որ ան վերջապէս պիտի ընէ շատ տառապողները հանգստացնելու համար»։ Թոյլ տուէք որ պատասխանէ։ Բացէք 133–րդ գլուխը եւ հինգերորդ պարբերութեան մեկնաբանութիւնները վերաքաղ ըրէք։ Նկատի առէք յաջորդ էջին պատկերը, եւ բացատրեցէք թէ ի՛նչ վիճակ պիտի ըլլայ երբ Աստուծոյ կամքը կատարուի երկրի վրայ ինչպէս որ երկնքի մէջ կը կատարուի։ Ցոյց տուէք այն օգուտները որոնք ձեռք կը ձգուին աւելին սորվելով։
5 Եթէ առաջին հանդիպումին բաւարար հետաքրքրութիւն չկար, թերեւս կրնաք ձեր խօսակցութիւնը սկսիլ այս կերպով.
◼ «Կը խորհիմ որ երկուքս ալ կը համաձայնինք թէ շատ մը մարդիկ այսօր իրենց կեանքը կը վարեն ըստ անհատի մը օրինակին, զոր կը նկատեն որպէս իրենց տիպարը։ Յիսուս Քրիստոս մեծագոյն տիպարն է զոր ոեւէ անհատ կրնայ ունենալ։ Կը փափաքիմ ձեր հետ բաժնել շատ կարեւոր դաս մը որ սորվեցայ ուսումնասիրելով Յիսուսի հանդիսացած օրինակը։ [Բացէք Մեծագոյն Մարդը գրքին 40–րդ գլուխը եւ ուշադրութեան յանձնեցէք Յիսուսի հաճելի դասը ողորմութեան մասին։] Ասիկա ուժգնօրէն ինծի վերյիշեցուց որ որքա՜ն կարիքը ունիմ այս յատկութիւնը ցուցաբերելու ուրիշներու հանդէպ»։ Կարդացէք Մատթէոս 5։7։ Եթէ թուի որ հիմա աւելի մեծ հետաքրքրութիւն կայ, մատուցանեցէք գիրքը կամ Աստուած Իրապէս կը Հոգա՞յ Մեզի գրքոյկը։
6 Կամ թերեւս կ’ուզէք փորձել այս ուղղակի մօտեցումը.
◼ «Վերջին անգամ որ հոս էի, նկատի առինք Յիսուսի մասին գիտութիւն ստանալու կարեւորութիւնը։ Յովհաննու 17։3–ը կ’ըսէ որ այսպիսի գիտութիւն մը առնելը ‘յաւիտենական կեանք կը նշանակէ’։ Ինչպէ՞ս կրնանք ասիկա ընել»։ Թոյլ տուէք որ պատասխանէ։ Շարունակեցէք բացատրելով մեր Աստուածաշունչի ուսումնասիրութեան կարգադրութիւնը եւ ինչպէ՛ս օգտագործել զայն։
7 Պօղոս կ’ըսէ որ մշակը «իր վարձքը պիտի առնէ իր աշխատութեան չափովը»։ (Ա. Կորն. 3։8) Եթէ ամէն ջանք թափենք ուրիշներու օգնելու որ Յիսուսի հետեւորդներ ըլլան, մեր վարձքը վստահաբար մեծ պիտի ըլլայ։