Դիտարանն Ու Զարթի՛րը—Պարբերաթերթեր՝ Մեր Ստիպողական Ժամանակներուն Համար

¹ Աստուածաշունչի մարգարէութեան առ ի կատարում, աշխարհը ցնցող դէպքեր տեղի կ’ունենան։ Մինչ ուշադրութեամբ կը նկատենք ինչ որ մեր շուրջը կը պատահի աշխարհի մէջ եւ աստուածպետական կազմակերպութեան մէջ, կրնանք գնահատել թէ որքա՜ն ստիպողական է որ Թագաւորութեան ‘բարի լուրը’ քարոզենք։ (Մար. 13։10) Ասիկա մեզի պատճառ կու տայ որ նախանձախնդրաբար շարունակենք մեր ծառայութիւնը Ապրիլ ամսուան ընթացքին։

² Մեր պատգամին կարեւորութիւնը պիտի շեշտուի այն մասնաւոր աշխատանքով զոր այս ամիս պիտի ձեռնարկենք։ Ջերմ ակնկալութեամբ կը սպասենք Թագաւորութեան Լուրերուն լոյս տեսնելը, զոր պիտի բաշխենք Ապրիլ ու Մայիս ամիսներուն ընթացքին։ Այս գործին հանդէպ մեր խանդավառութիւնը կերտելու համար, ինչպէս նաեւ մեր թաղամասին մէջ հետաքրքրութիւն մշակելու համար, Դիտարանն ու Զարթի՛րը պիտի ներկայացնեն այժմէական յօդուածներ որոնք կը շեշտեն աշխարհի խռովիչ դէպքերուն մարգարէական նշանակութիւնը։ Ինչպէ՞ս կրնանք ներկայացում մը պատրաստել որ պարբերաթերթերուն հանդէպ հետաքրքրութիւն պիտի շարժէ։

³ Հաւանաբար պիտի կարենաս ազդեցիկ ներկայացում մը զարգացնել, այս հիմնական քայլերուն հետեւելով. (1) Պարբերաթերթերէն մէկուն մէջէն ընտրէ յօդուած մը որ կը զգաս թէ կոչ պիտի ընէ համայնքիդ մարդոց։ (2) Այս յօդուածին մէջէն զատէ խօսք մը կամ մէջբերուած համար մը որ կը խորհիս թէ տանտիրոջ հետաքրքրութիւնը պիտի շարժէ։ (3) Պատրաստէ հակիրճ ներկայացում մը որ կը պարփակէ բարեկամական բարեւ մը, հարցում մը կամ խօսք մը որ աչքառու կ’ընէ Սուրբ Գրային հետաքրքրական գաղափար մը, եւ անկեղծ հրաւէր մը պարբերաթերթերը ընդունելու։ Ինչպէս որ կը նկատես, ասիկա բոլորովին պարզ ու դիւրին է։ Թերեւս կրնաս հանդիպում մը ունենալ այն հրատարակիչին հետ՝ որու հետ ծառայութեան կը մասնակցիս՝ եւ ներկայացում մը պատրաստել։

⁴ Քանի որ Ապրիլ 22–ի «Զարթի՛ր»ը կը յարուցանէ հետեւեալ հարցումը. «Ասոնք Վերջին Օրե՞րն Են», կրնաս վերաքաղ ընել «Պատճառաբանել» գրքին 13–րդ էջին մէջ «Վերջին Օրեր» խորագիրին տակ եղած տեղեկութիւնները։ Հետեւեալ կերպով կրնաս սկսիլ.

◼ «Կ’այցելենք որ խօսակցինք մեր շուրջը տեղի ունեցող խռովայոյզ դէպքերուն իմաստին մասին։ Նկատէ թէ այս յօդուածը ի՛նչ կ’ըսէ . . .»։

⁵ Ապրիլ 1–ի «Դիտարան»ը (Անգլ.) կը յարուցանէ սա հարցումը. «Կրօնքը—Արգիլուա՞ծ Նիւթ մը»։ Երբ պարբերաթերթը կը ներկայացնես, կրնաս ըսել.

◼ «Յաճախ կ’ըսուի թէ կրօնքը նիւթ մըն է որու մասին պէտք չէ խօսակցիլ, որովհետեւ շատ վիճելի է։ Ասոր մասին ի՞նչ կը մտածես»։ Ապա յօդուածին մէկ արտայայտութեան ակնարկէ։

⁶ Թերեւս գործածես Ապրիլ 15–ի «Դիտարան»ը իր «Կրօնական Ճշմարտութիւնը Հասանելի՞ Է» յօդուածով։ Կրնաս լաւ ընդառաջում մը ձեռք ձգել հետեւեալ բացումով.

◼ «Քանի որ շատ կրօնքներ կան այսօր, կարգ մը մարդիկ հարց կու տան թէ արդեօք կրօնական ճշմարտութիւնը հասանելի՞ է։ Այս յօդուածը կը յայտնէ կերպ մը որով դուն եւ ես կրնանք այս հարցումին գոհացուցիչ պատասխան մը գտնել։ . . .»։

⁷ Քարոզչութեան գործին չգացած, ներկայացումդ ինչո՞ւ փորձ չընես ուրիշ հրատարակիչի մը հետ որպէսզի անոր հետ քաջածանօթ ըլլաս։ Հաւանաբար պիտի կարենաք օգտակար թելադրութիւններ բաժնել, որոնք ձեր ազդեցիկ ըլլալը պիտի աւելցնեն եւ ձեզի աւելի մեծ վստահութիւն պիտի տան։

⁸ Մինչ այս դրութեան վախճանը աւելի կը մօտենայ, թող որ աւելցնենք մեր ջանքերը պարկեշտ սրտով անհատներուն օգնելու որ Մեծն Բաբելոնէն փախչին։ (Յայտ. 18։4) Դիտարանն ու Զարթի՛րը կենսական դեր մը կը խաղան այս երբեք չկրկնուելիք գործին մէջ։ Մենք շնորհակալ ենք որ Եհովա այս ընտիր գործիքները հայթայթած է մեր գործածութեան համար։