Աստուծոյ Խօսքին Ուսուցանողներ Եղէք—Գրքոյկներ Գործածելով
1 Եհովայի ամէն նուիրուած ծառայ պատասխանատուութիւն մը ունի որ բաժին բերէ Աստուծոյ Խօսքը ուրիշներու սորվեցնելու գործին մէջ։ Այս պատասխանատուութեան լրջութիւնը յստակ կը դառնայ երբ կը գնահատենք թէ երկնքի ու երկրի մէջ ամէն իշխանութիւն ունեցողն է որ մեզի տուած է սա յանձնարարութիւնը. «Բոլոր ազգերը աշակերտեցէք, . . . սորվեցուցէք անոնց»։ (Մատթ. 28։18–20) Ուրեմն, բարի լուրի քարոզչութեան մէջ բաժին բերելը կը պահանջէ որ մենք ուսուցանողներ ըլլանք։—Բ. Տիմ. 2։2
2 Օգոստոս ամսուան ընթացքին կրնանք ուսուցանելու մեր հմտութիւնները գործածել երբ գրքոյկներ կը ներկայացնենք։ Կրնանք անոնց մէջէն սուրբ գրային կարգ մը հետաքրքրական միտքեր ընտրել եւ մի քանի մեկնաբանութիւններ պատրաստել որոնք պիտի օգնեն մեզի որ խօսակցութիւն մը սկսինք։
3 Երբ կը ներկայացնես «Աստուած Իրապէս կը Հոգա՞յ Մեզի» գրքոյկը, կրնաս ըսել.
◼ «Դրացիներէդ շատերուն այցելեցինք եւ տեսանք որ մտահոգ են ոճիրին, ահաբեկչութեան եւ բռնութեան խիստ յաւելումին նկատմամբ։ Ըստ կարծիքիդ, ասիկա ինչո՞ւ խնդիր մը եղած է։ [Թոյլ տուր որ պատասխանէ։] Մեզ մասնաւորաբար կը հետաքրքրէ որ Աստուածաշունչը նախագուշակեց ասոր տեղի ունենալը։ [Կարդա Բ. Տիմոթէոս 3։1–3։] Նկատէ որ ասիկա պիտի պատահէր ‘վերջին օրերուն’։ Ասիկա կը նշանակէ որ բան մը իր վախճանին հասնելու վրայ է։ Արդեօք ի՞նչ է ատիկա»։ Թոյլ տուր որ պատասխանէ։ Բաց 22–րդ էջը, ցոյց տուր պատկերը եւ նկատի առ այդ էջին մէջ մէջբերուած մէկ կամ երկու համարներ։ Կարգադրութիւններ ըրէ հետագային վերադառնալու եւ բացատրէ թէ ինչո՛ւ կը հաւատանք որ այս օրհնութիւնները մօտալուտ են։
4 Թերեւս կը փափաքիս այս մօտեցումը գործածել երբ կը ներկայացնես «Ի՞նչ Է Կեանքին Նպատակը» գրքոյկը.
◼ «Շատ մարդիկ դժուարութիւն կ’ունենան կեանքին նկատմամբ իրական նպատակ մը գտնելու։ Մինչ քիչեր սահմանափակ ուրախութիւն մը կը վայելեն, մեծամասնութիւնը յուսախաբութիւններով եւ տառապանքով լեցուած կեանքեր կ’ապրին։ Կը կարծե՞ս որ Աստուած մտադրեց որ ա՛յս կերպով ապրինք։ [Թոյլ տուր որ պատասխանէ։] Աստուածաշունչը ցոյց կու տայ որ Աստուած կ’ուզէ որ մենք այս տեսակ աշխարհի մը մէջ ապրինք»։ Մատնանշէ 21–րդ էջի պատկերին, ապա բաց 25 եւ 26–րդ էջերը, 4–6–րդ պարբերութիւնները, եւ բացատրէ թէ Ան ինչ խոստացած է։ Հետեւեալ հարցումը յարուցանէ խօսակցութեան համար երբ կը վերադառնաս. «Ինչպէ՞ս կրնանք վստահ ըլլալ որ Աստուած պիտի կատարէ իր խոստումները»։
5 Կրնաս ներկայացնել «Երկրի Վրայ Կեանքը Յաւիտեան Վայելեցէ՛ք» գրքոյկը, ցոյց տալով ամբողջ կողքին պատկերը եւ հարցնելով.
◼ «Կը փափաքի՞ս ապրիլ ասոր նման աշխարհի մը մէջ որ ուրախ մարդոցմով լեցուն է։ [Թոյլ տուր որ պատասխանէ։] Աստուածաշունչը կ’ըսէ մեզի թէ Աստուած կը սիրէ մարդիկը եւ կ’ուզէ որ անոնք այս երկրի վրայ ուրախութեամբ յաւիտեան ապրին»։ Ցոյց տուր թիւ 49 պատկերը եւ կարդա մէջբերուած համարներէն մէկը։ Յետոյ, ցոյց տուր թիւ 50 պատկերը եւ բացատրէ թէ ի՛նչ պէտք է ընենք եթէ կ’ուզենք ապրիլ այս Դրախտին մէջ։ Առաջարկէ վերադառնալ եւ խօսակցիլ թէ ինչո՛ւ Յիսուս Քրիստոսի հաւատալը շատ կարեւոր է։
6 Եհովա կը հաճի երբ մեր ‘յառաջդիմութիւնը յայտնի կ’ընենք, ուշադիր ըլլալով մեր ուսուցումին’։ (Ա. Տիմ. 4։15, 16) Մեր գրքոյկները կրնան իսկական օգնութիւն մը ըլլալ մեզի մինչ կը ջանանք անոնց օժանդակել որոնք կը տենչան լսել ‘բարի լուր աւելի լաւ բանի մը մասին’։—Եսայ. 52։7, ՆԱ։