Ապրիլ Ամսուան Ընթացքին «Բարի Գործերու Նախանձախնդիր» Ըլլանք

¹ Անցեալ գարնան աննախընթաց վկայութիւն մը տրուեցաւ, երբ Թագաւորութեան Լուրեր Թիւ 34 թերթիկէն միլիոնաւոր օրինակներ ցրուեցան համայն աշխարհի մէջ։ Ժողովքի հրատարակիչները եւ ռահվիրաները նախանձախնդրօրէն մասնակցեցան այս ոգեւորիչ գործունէութեան։ Դուք ալ անոնցմէ մէկն էի՞ք։ Եթէ այո, անկասկած ամբողջովին վայելեցիք այդ յատկանշական արշաւին մասնակցելով։ Հիմա թերեւս հարց կու տաք. Այս տարի ի՞նչ ‘բարի գործ’ կը սպասէ մեզի։—Տիտ. 2։14

² Ապրիլ ամսուան ընթացքին եւ Մայիս ամսուան սկիզբները, Զարթի՛ր պարբերաթերթին 22 Ապրիլ 1996 մասնաւոր համարը ցրուելու ուրախութիւնը պիտի ունենանք, որ աչքառու կ’ընէ «Երբ Պատերազմներ Այլեւս Պիտի Չըլլան» յօդուածը։ Քանի որ այս նիւթը բազմաթիւ տանտէրներու կոչ պիտի ընէ, պիտի ջանանք կարելի եղածին չափ շատ օրինակներ ցրուել։ Իր պարունակած տեղեկութիւններուն կարեւորութեան ի տես, Զարթի՛րի այս համարը պէտք է ներկայացուի Ապրիլի ընթացքին եւ Մայիսի սկիզբը մինչեւ որ ամբողջ քանակը սպառի։

³ Մեր Նպատակակէտը—Մասնակցութիւն՝ Բոլոր Հրատարակիչներուն Կողմէ. Իրապէս քաջալերական պիտի ըլլայ եթէ այս երկրին մէջ ամէն մէկ հրատարակիչ Ապրիլ ամսուան ընթացքին կարենայ իր մասնակցութիւնը բերել քարոզչութեան գործին մէջ։ Քրիստոսի մահուան Յիշատակատօնը մեր մտքերուն մէջ թարմ ըլլալով, անկասկած պիտի փափաքինք Աստուծոյ բարութեան հանդէպ մեր գնահատութիւնը ցոյց տալ, դաշտի ծառայութեան մէջ «օրհնութեան» ուղղակի «պատարագ» մը մատուցանելով։—Եբր. 13։15

⁴ Ժրաջան ջանք պէտք է թափուի ժողովքի իւրաքանչիւր անդամին կարիքները զատորոշելու, այնպէս որ բոլորն ալ կարենան Ապրիլ ամսուան ընթացքին ծառայութեան մէջ նախանձախնդիր մասնակցութիւն մը ունենալ։ (Հռովմ. 15։1) Գրքի ուսումնասիրութեան վարիչները իրենց խումբերուն մէջ եղող անհատներուն պարագաներէն պէտք է լիովին տեղեակ ըլլան ու գործնական օգնութիւն մատուցանեն երբ անհրաժեշտ է։ Արդեօք անհատ մը փոխադրութեան միջոցի կարիքը ունի՞։ Ո՞վ կրնայ զայն հայթայթել։ Ոմանք երկչոտ կամ վարանո՞տ են։ Աւելի փորձառու հրատարակիչները կրնա՞ն անոնց հետ աշխատիլ։ Իսկ ի՞նչ կրնանք ըսել անկողին ինկողներուն մասին։ Անոնք հեռաձայնով վկայելու, նամակ գրելու կամ ուրիշ արդիւնաբեր գործունէութեան մը միջամուխ կրնա՞ն ըլլալ։

⁵ Անգործունեայ դարձած անհատներէն ոմանք կանոնաւորաբար հոգեւոր քաջալերութիւն ստացած են ու թերեւս մղուած են քարոզչութեան գործին դարձեալ միջամուխ ըլլալու։ Զարթի՛րի մասնաւոր համարը ներկայացնելու արշաւը անոնց հոյակապ պատեհութիւն մը պիտի հայթայթէ որ դարձեալ գործունեայ դառնան։

⁶ Երախաները Մարզենք որ Մասնակցին. Եհովայի Վկաներու զաւակներէն շատեր տարիներէ ի վեր իրենց ծնողներուն ընկերակցած են տունէ–տուն երթալով, թէեւ անոնք տակաւին որպէս չմկրտուած հրատարակիչներ չեն ծառայեր։ Արդեօք հիմա՞ է ժամանակը որ անոնք սկսին։ Անոնք սրտէն մղուած են ու պատրա՞ստ են իմաստալից մասնակցութիւն մը բերելու տունէ–տուն ծառայութեան մէջ։ Աստուածաշունչի ընտանեկան ուսումնասիրութեան ընթացքին, ընտանիքի գլուխները ժամանակ պէտք է տրամադրեն իրենց որակելի զաւակներուն օգնելու որ իրենց տարիքին ու կարողութեան համաձայն ներկայացում մը պատրաստեն։ Երիտասարդները կրնան միտք գրգռող հարցում մը ընտրել տանտիրոջ հետաքրքրութիւնը արթնցնելու համար, ապա մատնանշել պարբերաթերթին մէջ գտնուած պատասխանին։ Երախաները կրնան մի քանի բառերով ազդեցիկ վկայութիւն մը տալ։ Օրինակի համար, անոնք կրնան տանտէրը քաջալերել որ «մասնաւոր պարբերաթերթ մը կարդայ, որ այս ամիս համայն աշխարհի մէջ կը ներկայացուի»։ Ձեր ընտանեկան պատրաստութեան մէջ, սովորական առարկութիւնները յաղթահարելու համար թելադրութիւններ պարփակեցէք։ Պատճառաբանել գրքին մէջ շատ մը ընտիր գաղափարներ պիտի գտնէք։ Ճաշի ժամանակ եւ ուրիշ յարմար առիթներով, ընտանիքի անդամները քաջալերեցէք որ դաշտի ծառայութեան մէջ իրենց ունեցած փորձառութիւնները պատմեն։

⁷ Աստուածաշունչի Որակելի Աշակերտներ Յիսուսի Կատարած Գործը կը Ստանձնեն. Յիսուսի ուսուցումը վարդապետական հարցերու շուրջ հրահանգներ տալով սահմանափակուած չէր։ Ան իր աշակերտներուն ընկերակցեցաւ ծառայութեան մէջ ու անոնց սորվեցուց քարոզելու կերպը։ (Ղուկ. 8։1. 10։1–11) Ներկայիս պարագան ի՞նչ է։ Միացեալ Նահանգներու մէջ աւելի քան կէս միլիոն Աստուածաշունչի ուսումնասիրութիւններ կը վարուին։ Անկասկած, պատշաճ քաջալերութեամբ այս աշակերտներէն շատեր կրնան իրենց մարզումին յաջորդ քայլը առնել ու որակելի ըլլալ որպէս չմկրտուած հրատարակիչներ Ապրիլ ամսուան ընթացքին ծառայելու։

⁸ Եթէ Աստուածաշունչի ուսումնասիրութիւն մը կը վարես, հետեւեալ հարցումները նկատի առ. Աշակերտը իր տարիքին ու կարողութեան համաձայն կը յառաջդիմէ՞։ Ան իր հաւատքը անպաշտօն կերպով սկսա՞ծ է ուրիշներու հետ բաժնել։ Ան «նոր անձնաւորութիւնը» կը հագուի՞։ (Կող. 3։10, ՆԱ) Ան չմկրտուած հրատարակիչ մը ըլլալու որակումներուն գոհացում կու տա՞յ, որոնք ուրուագծուած են Մեր Ծառայութիւնը գրքին մէջ, էջ 97–99։ Եթէ կը խորհիս որ ան որակելի է, ինչո՞ւ հարցը իրեն հետ նկատի չառնես։ Աշակերտներէն ոմանք գործունէութեան մասնակցելու համար միմիայն ուղղակի հրաւէրի մը կարիքը ունին։ Անշուշտ, եթէ աշակերտը յօժար է, նախ անհրաժեշտ պիտի ըլլայ որ վերակացու տեսուչը ըստ սովորութեան կարգադրէ որ երկու երէցներ անոր հետ խօսակցին։ Միւս կողմէն, թերեւս բան մը կայ որ աշակերտը ետ կը պահէ։ Հաւանաբար երէցներէն մէկը կրնայ հետդ Աստուածաշունչի ուսումնասիրութեան ներկայ ըլլալ ու աշակերտը մղել որ ճշմարտութեան հանդէպ իր ներքին զգացումները արտայայտէ։ Աշակերտին ըսելիքներուն մտիկ ընելէ ետք, երէցը կրնայ գործնական թելադրութիւններ եւ Աստուածաշունչին վրայ հիմնուած օգնութիւն հայթայթել։

⁹ Օժանդակ Ռահվիրաներ Ըլլալու Համար ‘Ժամանակը Ծախու Առնենք’. Ամէն տարի Յիշատակատօնին առիթով, փրկանքին հանդէպ գնահատանքը հազարաւոր անհատներ կը մղէ որ ժամանակը ‘ծախու առնեն’, որպէսզի օժանդակ ռահվիրաներ ըլլան։ (Եփ. 5։15–17) Թէեւ զոհողութիւն ընելու կարիքը կայ, սակայն վարձատրութիւնները հոյակապ են։ Պատանիներու գովելի թիւ մը դպրոցի արձակուրդը կ’օգտագործեն, որպէսզի օժանդակ ռահվիրայութեան մասնակցին։ Լիաժամ աշխատող չափահասներ երեկոները եւ շաբաթավերջերը լիովին կ’օգտագործեն միեւնոյն գործունէութեան համար։ Այսպիսով, լման ընտանիքներ միասնաբար օժանդակ ռահվիրայութեան մասնակցած են։ Կարգ մը ժողովքներուն մէջ երէցներուն եւ օգնական ծառաներուն ու անոնց կիներուն մեծամասնութիւնը ծառայած են որպէս օժանդակ ռահվիրաներ։ Անոնց նախանձախնդիր օրինակէն ներշնչուելով, ուրիշներ ալ զիրենք ընդօրինակած են, այնպէս որ ժողովքին մեծամասնութիւնը Ապրիլ ամսուան ընթացքին օժանդակ ռահվիրայութեան մասնակցած է։

¹⁰ Օժանդակ ռահվիրայութեան մասնակցելու կարող ըլլա՛ք կամ ոչ, Ապրիլի ընթացքին դաշտին մէջ ձեր ծառայութիւնը աւելցնելու կերպեր փնտռեցէք։ Ձեր անձերուն համար անհատական նպատակակէտ մը դրէք, որ քիչ մը ջանք թափելով հասանելի է։ Եհովայի ծառայութեան մէջ ‘ծախք ընելու ու ծախք ըլլալու’ ձեր փափաքը, ձեր անհատական պարագաներուն համաձայն, ձեզ իր օրհնութեան պիտի արժանացնէ։—Բ. Կորն. 12։15

¹¹ Դաշտի Ծառայութեան Ժողովներ. Զարթի՛րի արշաւին ընթացքին ամէն օր դաշտի ծառայութեան ժողովներ պէտք է յայտագրուին, այնպիսի ժամանակ մը որ թոյլ կու տայ ծառայութեան կանուխ սկսելու։ Նաեւ երեկոյեան վկայելու համար կարգադրութիւն պէտք է ըլլայ։ Քանի որ հրատարակիչներուն մեծամասնութիւնը շաբաթավերջերուն դաշտի ծառայութեան պիտի մասնակցի, ժողովքները դաշտի ծառայութեան ժողովներ պէտք է յայտագրեն Շաբաթ օրերը, թէ՛ առաւօտուն եւ թէ կէսօրէ ետք, Զարթի՛րի մասնաւոր համարը ցրուելու արշաւին ընթացքին։

¹² Դաշտի ծառայութեան ժողովներ վարողները վստահ պէտք է ըլլան որ բաւարար թաղամաս մատչելի է։ Վերջերս չաշխատցուած թաղամասերը առաջ պէտք է ծածկուին։ Սակայն, Ընկերութեան վերատեսչութեան ներքեւ եղած չնշանակուած թաղամասերը առանց Ընկերութեան արտօնութեան պէտք չէ աշխատցուին։ Մէկ կամ աւելի թաղամասեր առա՞ծ ես, զորոնք տակաւին չես ծածկած։ Եթէ արշաւի ընթացքին զանոնք աշխատցնելու համար օգնութեան կարիքը պիտի ունենաս, ծառայութեան տեսուչին կամ թաղամասերուն հոգ տանող եղբօր խօսիր եւ անոնք ուրախ պիտի ըլլան որ քեզի համար որոշ օգնութիւն կարգադրեն։

¹³ Քանի՞ Պարբերաթերթ Պիտի Տեղաւորես. Իւրաքանչիւրս այս հարցումին պիտի պատասխանենք։ Որպէսզի որոշես քանի պարբերաթերթ կրնաս տեղաւորել արշաւի ընթացքին, նկատի առ ծառայելիք թաղամասիդ տեսակը, տարիքդ, առողջութիւնդ, գործունէութեան տրամադրած ժամանակդ եւ ուրիշ ազդակներ։ Սակայն, նկատի առ Դիտարան 1 Փետրուար 1994 համարին մէջ տրուած վերյիշեցումը. «Որպէս թելադրութիւն, հրատարակիչները կրնան, թերեւս իրենց պարագաներուն համաձայն, ամիսը 10 պարբերաթերթերու նպատակակէտ մը դնել, իսկ ռահվիրաները կրնան ջանալ 90–ի հասնիլ»։ Նոյնանման նպատակակէտ մը իրապաշտակա՞ն է քեզի համար։

¹⁴ Ո՛վ Երէցներ, Ուշադրութեամբ Ծրագրեցէք. Վստահ եղէք որ, եթէ կարելի է, Զարթի՛րի մասնաւոր համարով ժողովքին բոլոր թաղամասերը պիտի աշխատցուին։ Յատուկ ուշադրութիւն ընծայեցէք ժողովքին նշանակուած առեւտրական թաղամասերը աշխատցնելու համար։ Այս թաղամասերը աշխատցնողները պէտք է լաւ պատրաստուած ու կոկիկ հագուած ըլլան։ Բարդ ներկայացում մը անհրաժեշտ չէ։ Երբ առեւտրականի մը կը մօտենաք, կրնաք ըսել որ առեւտրականներուն յաճախ տունը չէք գտներ, ուստի իր աշխատանքի վայրը կ’այցելէք յօդուած մը ներկայացնելու համար, որ վստահաբար զինք պիտի հետաքրքրէ։ Ապա կրնաք պարբերաթերթէն մասնայատուկ կէտ մը հակիրճօրէն անոր հետ բաժնել։ Ժողովքին թաղամասէն ներս պարբերաթերթերով փողոցը վկայելը նաեւ պատշաճօրէն պէտք է կազմակերպուի։ Փողոցը վկայելու գործունէութեան մասնակցելու ամենէն ազդու կերպն է՝ նախաձեռնութիւնը առնել ու անցորդներու մօտենալ, փոխանակ սպասելու որ անոնք ձեզի մօտենան։ Քանի որ մարդիկ ձեզի պիտի դիտեն, լուրջ երեւոյթ մը պէտք է ունենաք։ Ձեր թաղամասին մէջ թերեւս ուրիշ վայրեր ալ կան, որոնք արշաւի ընթացքին կրնան աշխատցուիլ, ինչպէս՝ օդակայանները, հիւանդանոցները, ինքնաշարժներ կեցնելու տեղերը, հանրային պարտէզները եւ իջեւանները։ Երէցներու մարմինը պէտք է որոշէ թէ ի՛նչ յարմար կարգադրութիւններ կարելի է ընել վկայելու համար ժողովքի թաղամասին այդ շրջաններուն մէջ։

¹⁵ Եհովա անխոնջ աշխատող մըն է։ (Յովհ. 5։17) Ան երկինքն ու երկիրը ինչպէս նաեւ բոյսերը ու անասունները ստեղծեց. սակայն ան շարունակեց աշխատիլ մինչեւ որ երկրի վրայ իր իրագործումներուն գլուխ գործոցը՝ մարդը՝ ստեղծեց։ Աստուծոյ աշխատելու պատրաստակամութեան ուղղակի մէկ արդիւնքն է որ կեանք ունինք։ ‘Աստուծոյ նմանողներ’ ըլլալով, իր հանդէպ մեր ունեցած սէրը պէտք է մղէ մեզ որ «բարի գործերու նախանձախնդիր» ըլլանք։ (Եփ. 5։1. Տիտ. 2։14) Քանի որ Եհովա արժանի է որ մեր լաւագոյն ջանքը թափենք եւ քանի որ արդիւնքներ ձեռք ձգելու փափաքը նախանձախնդիր անհատի մը յատկանիշն է, պէտք է հետաքրքրուինք ծառայութեան մէջ որակաւոր աշխատանք կատարելով։ Անշուշտ, Եհովա կը գնահատէ որեւէ զոհողութիւն զոր կ’ընենք իրեն համար ու մեր աշխատանքը բնաւ պարապ չէ։ (Ա. Կորն. 15։58) Արդ, երախտապարտ սրտերով, Ապրիլ ամսուան ընթացքին նախանձախնդիր գործունէութեան միջամուխ ըլլանք, վստահ ըլլալով որ Եհովայի հաճութիւնն ու օրհնութիւնը պիտի վայելենք ինչպէս նաեւ մեծ յաջողութիւն ձեռք պիտի ձգենք։