Երեկոյեան Վկայութիւնը Փորձա՞ծ Էք

¹ Բոլորիս համար հաճոյք է գործին մէջ արդիւնաբեր ըլլալը։ Միւս կողմէն, երբ դրական արդիւնքներ ձեռք չենք ձգեր, գործը ձանձրացուցիչ ու անգոհացուցիչ կը դառնայ։ Իմաստալից աշխատանքը անհատապէս վարձահատոյց է, ինչպէս նաեւ օրհնութիւն մըն է։ (Բաղդատել Ժողովողի 3։10–13։) Այս սկզբունքը կրնանք մեր քարոզչութեան գործին կիրարկել։ Փորձառաբար գիտենք որ երբ դռնէ դուռ կ’երթանք ու մարդոց հետ Աստուածաշունչի մասին կը խօսինք, հոգեւորապէս թարմացած տուն կը վերադառնանք։ Կը զգանք որ իրապէս բան մը իրագործած ենք։

² Կարգ մը շրջաններու մէջ շատ դժուար դարձած է որ օրուան մէջ որոշ ժամերուն մարդիկ իրենց տունը գտնուին։ Տեղեկագրութիւններ ցոյց կու տան որ բազմաթիւ տեղեր մարդոց 50 առ հարիւրը իրենց տուները չեն գտնուիր, երբ առաւօտեան ժամերուն կ’այցելենք։ Շատ մը ժողովքներ այս խնդրին հետ գլուխ ելած են, երեկոյեան վկայութեան կարգադրութիւններ ընելով։ Հրատարակիչները կը տեղեկագրեն որ երբ երեկոյեան ժամերուն կ’այցելեն, շատ աւելի մարդիկ տունը կ’ըլլան, եւ ընդհանուր առմամբ, անոնք աւելի հանգիստ ու աւելի հակամէտ են Թագաւորութեան պատգամին ականջ տալու։ Ձեր թաղամասին մէջ երեկոյեան վկայութիւնը փորձա՞ծ էք։—Բաղդատել Մարկոս 1։32–34։

³ Ո՛վ Երէցներ, Երեկոյեան Վկայութիւնը Կազմակերպեցէք. Կարգ մը շրջաններու մէջ հրատարակիչներ լաւ թիկունք կը կանգնին այն դաշտի ծառայութեան ժողովներուն որոնք կէսօրէ ետք կամ երեկոյեան ժամերուն տեղի կ’ունենան։ Նկատի առէք պատանի հրատարակիչները որոնք կէսօրէ ետք դպրոցէն կ’ելլեն, ինչպէս նաեւ չափահասները որոնք իրենց աշխարհային գործերը վերջացուցած կ’ըլլան։ Հրատարակիչներէն ոմանք որոնք շաբաթավերջերուն չեն կրնար դաշտի ծառայութեան մասնակցիլ, շաբթուան ընթացքին երեկոյեան վկայութիւնը գործնական կերպ մը կը գտնեն, որպէսզի քարոզչութեան գործին մէջ կանոնաւոր բաժին բերեն։

⁴ Երեկոյեան վկայութեան ընթացքին զանազան գործունէութիւններու կրնաք միջամուխ ըլլալ։ Կրնաք տունէ տուն վկայել, գործածելով պարբերաթերթեր կամ ամսուան ներկայացուելիք գրականութիւնը։ Երեկոյեան ժամերը յարմար ատեն մըն են այն անհատները այցելելու որոնք տունը չէին, երբ հրատարակիչներ ցորեկով կամ շաբաթավերջին այցելեցին։ Փողոցի վկայութիւնն ալ կրնայ արդիւնաբեր թաղամաս մը ըլլալ, ձեզի թոյլ տալով որ գործէն տուն վերադարձող մարդոց հետ խօսակցիք։ Շատեր կը գտնեն որ երեկոները հետաքրքրուողները վերայցելելու լաւագոյն ժամանակն են։

⁵ Զգոյշ ու Խոհեմ Եղէք. Մթննալէն ետք դուրս ելլելը կրնայ վտանգաւոր ըլլալ կարգ մը շրջաններու մէջ։ Իմաստութիւն է զոյգ–զոյգ կամ խումբերով երթալ լաւ լուսաւորուած փողոցներ ու այցելել տուներ կամ յարկաբաժիններ միայն երբ որոշ երաշխիք կայ որ ապահով պիտի ըլլաք։ Երբ դուռ մը կը զարնէք, կեցէք հոն ուր կրնաք տեսնուիլ, ու յստակ կերպով դուք ձեզ բնորոշեցէք։ Խորատես եղէք։ Երբ նկատէք որ անյարմար ժամանակ այցելած էք, ինչպէս՝ երբ ընտանիքը կ’ընթրէ, առաջարկեցէք ուրիշ ատեն վերադառնալ։ Սովորաբար լաւագոյն բանն է ձեր վկայութիւնը սահմանել երեկոյեան կանուխ ժամերուն, փոխանակ ուշ ատեն այցելելու, երբ տանտէրները քնանալու կը պատրաստուին։

⁶ Ամառուան երկար երեկոները յատկապէս յարմար են երեկոյեան վկայութեան։ Մինչ Աստուծոյ ‘կը ծառայենք ցորեկ ու գիշեր’, Եհովա վստահաբար մեր ջանքերը պիտի օրհնէ։—Յայտ. 7։15