Հարցումի Տուփ
◼ Ի՞նչ պէտք է ընել, երբ նշանակուած հանրային դասախօս մը ճիշդ ժամանակին ժողովին չհասնի։
Երբեմն անխուսափելի պարագաներ կրնան արգելք հանդիսանալ որ եղբայր մը ճիշդ ժամանակին չհասնի, իր յայտագրուած դասախօսութիւնը ներկայացնելու։ Եթէ պատճառ կայ խորհելու որ ան շուտով պիտի ժամանէ, երէցները կրնան որոշել որ նախ Դիտարանի Ուսումնասիրութիւնը սկսին. անկէ ետք, կրնան Հանրային Ժողովը ընել։ Իսկ եթէ բացայայտ ըլլայ որ դասախօսը պիտի չգայ, թերեւս տեղական դասախօս մը կրնայ իր պատրաստած դասախօսութիւններէն մէկը ներկայացնել։
Առաջուընէ ուշադրութեամբ ծրագրելը սովորաբար թոյլ չի տար որ այս խնդիրը ծագի։ Այն եղբայրը որ հանրային դասախօսութիւնները կը համակարգէ, պէտք է իւրաքանչիւր դասախօսին հետ կապ պահէ առնուազն մէկ շաբաթ առաջ, որպէսզի անոր յիշեցնէ իր նշանակումը։ Վերյիշեցումը պէտք է պարփակէ ժողովին ժամը, Թագաւորութեան Սրահին հասցէն ու հեռաձայնի թիւը, եւ յստակ բացատրութիւն թէ ի՛նչ ճամբով սրահին հասնիլ։ Դասախօսը այս մանրամասնութիւնները ուշադրութեամբ պէտք է նոթագրէ։ Ան նշանակումը լուրջի պէտք է առնէ, իր անձնական յայտագրին մէջ հարկ եղած որեւէ բարեճշդում ընելով, այնպէս որ կարենայ այս պատասխանատուութիւնը կատարել։ Եթէ անխուսափելի բան մը յառաջ գայ, որ արգելք պիտի հանդիսանայ իր պատասխանատուութեան, ան անմիջապէս պէտք է կապ պահէ այն եղբօր հետ որ հանրային դասախօսութիւնները կը համակարգէ, այնպէս որ կարելի ըլլայ փոխանորդ մը կարգադրել։ Ամէն ջանք պէտք է թափուի նշանակումը վերջին վայրկեանին ջնջելէ խուսափելու համար։ Եթէ դասախօսը մի քանի վայրկեան պիտի ուշանայ, ան կրնայ եղբայրներուն հեռաձայնել, որպէսզի գիտնան ի՛նչ ընեն։
Հանրային դասախօսութեան նշանակումը գնահատելը, առաջուընէ լաւ ծրագրելը ու վերյիշեցումները, եւ ուշադիր վերատեսչութիւնը կրնան վստահեցնել թէ ժողովքը ամէն շաբաթ օգտակար հանրային դասախօսութիւն մը պիտի վայելէ։