Որակելի Ու Զինուած՝ Ուրիշներուն Սորվեցնելու
1 Երբ Մովսէս նշանակուեցաւ որպէս Եհովայի ներկայացուցիչը, ան որակելի չզգաց Աստուծոյ խօսքը Փարաւոնին յայտարարելու։ (Ել. 4։10. 6։12) Երեմիա՝ որպէս Եհովայի մարգարէն ծառայելու մէջ ինքնավստահութեան պակաս ցուցաբերեց, երբ Աստուծոյ ըսաւ որ ինք խօսիլ չէր գիտեր։ (Երեմ. 1։6) Հակառակ սկիզբը ցուցաբերած ինքնավստահութեան պակասին, այս երկու մարգարէներն ալ փաստեցին Եհովայի անվախ վկաները ըլլալ։ Աստուած զանոնք բաւարար չափով որակելի դարձուց։
2 Ներկայիս, Եհովայի շնորհիւ, մեր ծառայութիւնը ինքնավստահութեամբ կատարելու համար պէտք եղածը ունինք։ (Բ. Կորն. 3։4, 5. Բ. Տիմ. 3։17) Ատակ մեքենագործի մը նման որ պէտք եղած գործիքները ունի, մենք ալ պատշաճօրէն զինուած ենք մեզի նշանակուած ծառայութիւնը հմտօրէն կատարելու։ Յունուար ամսուան ընթացքին պիտի ներկայացնենք 1984–էն առաջ հրատարակուած 192–էջնոց որեւէ գիրք զոր ժողովքը ունի։ Հակառակ որ այս հոգեւոր գործիքները նոր չեն, անոնց սուրբ գրային բնաբանները տակաւին այժմէական են եւ այս գրքերը մարդոց պիտի օգնեն ճշմարտութիւնը սորվելու։ Հետեւեալ թելադրուած ներկայացումները կրնան յարմարցուիլ ներկայացուելիք որեւէ գրքի։
3 Ուսման նիւթը կրնայ գործածուիլ Աստուծոյ Խօսքին հանդէպ հետաքրքրութիւն արթնցնելու համար։ Կրնաք խօսակցութիւն մը սկսիլ ըսելով.
◼ «Այսօր շատ շեշտ կը դրուի որակաւոր ուսում ձեռք ձգելու կարիքին վրայ։ Ձեր կարծիքով, անհատ մը ի՞նչ տեսակ ուսումի պէտք է հետեւի որպէսզի կեանքի մէջ մեծագոյն երջանկութիւնը ու յաջողութիւնը ապահովէ։ [Թոյլ տուէք որ պատասխանէ։] Աստուծոյ գիտութիւնը ստացողները յաւիտենական օգուտներ ձեռք կրնան ձգել։ [Կարդացէք Առակաց 9։10, 11։] Այս գիրքը [ձեր ներկայացուցած գրքին խորագիրը տուէք] Աստուածաշունչին վրայ հիմնուած է։ Անիկա կը մատնանշէ յաւիտենական կեանքի առաջնորդող գիտութեան միակ աղբիւրը»։ Գրքէն մասնայատուկ օրինակ մը ցոյց տուէք։ Եթէ անկեղծ հետաքրքրութիւն կայ, գիրքը տուէք ու վերայցելութեան կարգադրութիւն ըրէք։ Նշեցէք որ թէեւ գրականութիւնը ձրի է, բայց մեր երկրածաւալ գործին համար փոքր նուիրատուութիւն մը կ’ընդունինք։
4 Երբ կը վերադառնաք այն տանտիրոջ որու հետ Աստուածաշունչի վրայ հիմնուած ուսման կարեւորութիւնը նկատի առիք, կրնաք ըսել.
◼ «Անցեալ այցելութեանս, նկատի առինք որ Աստուածաշունչը մեր յաւիտենական ապագան ապահովող ուսման աղբիւրն է։ Անշուշտ, ջանք կը պահանջէ որպէսզի Աստուածաշունչէն մեզի պէտք եղածը սորվինք։ [Կարդացէք Առակաց 2։1–5։] Շատ մարդիկ Աստուածաշունչի կարգ մը մասերը հասկնալը դժուար կը գտնեն։ Կը փափաքիմ հակիրճօրէն ցոյց տալ մեթոտ մը որ շատ անգամ գործածած ենք մարդոց օգնելու որ Աստուածաշունչի հիմնական ուսուցումներուն մասին սորվին»։ Իրենց քով ձգուած գիրքը գործածելով, բացէք յարմար նիւթ մը ու հակիրճօրէն ցուցադրեցէք Աստուածաշունչի ուսումնասիրութիւն մը։ Եթէ տանտէրը փափաքի կանոնաւոր ուսումնասիրութիւն մը ունենալ, բացատրեցէք թէ պիտի վերադառնաք ձեր հետ բերելով ուսումնասիրութեան յատուկ մեր օժանդակ գիրքը՝ Գիտութիւնը որ Յաւիտենական Կեանքի կ’Առաջնորդէ։
5 Բազմաթիւ մարդիկ մտահոգ են աշխարհի մէջ տառապող միլիոնաւոր մանուկներու նկատմամբ։ Թերեւս կրնաք տանտիրոջ օգնել տեսնելու որ Աստուած ի՛նչպէս կը նկատէ այս դժուար կացութիւնը, ըսելով.
◼ «Անկասկած լուրերէն տեղեկացած էք աշխարհի շուրջ գտնուող մանուկներուն վիճակին մասին, որոնք անօթի, հիւանդ եւ անտեսուած են։ Այս հարցով հետաքրքրուած կազմակերպութիւններ ինչո՞ւ չեն կրցած կացութիւնը բարելաւել։ [Թոյլ տուէք որ պատասխանէ։] Աստուած մարդոց համար լաւագոյնը կը ցանկայ։ Նկատի առէք թէ ան ի՛նչ կը խոստանայ մանուկներուն եւ չափահասներուն, ինչպէս արձանագրուած է Աստուածաշունչին մէջ։ [Կարդացէք Յայտնութիւն 21։4–ը։] Այս գիրքը [յիշեցէք խորագիրը] կը հայթայթէ յաւելեալ մանրամասնութիւններ Աստուծոյ յառաջ բերելիք աշխարհին մասին, ուր տառապանքը պիտի դադրի»։ Եթէ կարելի է, բացէք էջ մը ուր Դրախտը կը նկարագրուի եւ զայն նկատի առէք։ Գիրքը ներկայացուցէք, եւ կարգադրեցէք դարձեալ վերայցելել։ Ուրախութեամբ ընդունեցէք որեւէ նուիրատուութիւն որ անհատը կը փափաքի ընել մեր գործին ի նպաստ։
6 Եթէ նախապէս խօսած էիք մանուկներու տառապանքին մասին, յաջորդ այցելութեան կրնաք խօսակցութիւնը շարունակել, ըսելով.
◼ «Վերջերս երբ ձեզի այցելեցի, ձեր մտահոգութիւնը արտայայտեցիք մանուկներու դժուար կացութեան մասին, որոնք կը տառապին քայքայուած ընտանիքներու, սովի, հիւանդութեան եւ բռնութեան պատճառաւ։ Աստուածաշունչին մէջ մխիթարական է կարդալ աշխարհի մը մասին ուր ո՛չ մանուկները, ո՛չ ալ չափահասները պիտի տառապին հիւանդութենէ, ցաւէ եւ մահէ։ Եսայեայ գրքին մէջ մարգարէութիւն մը կը նկարագրէ երկրի վրայ գալիք աւելի լաւ կեանք մը»։ Կարդացէք ու նկատի առէք Եսայեայ 65։20–25։ Ի վերջոյ խօսակցութիւնը առաջնորդեցէք Գիտութիւն գրքով Աստուածաշունչի ուսումնասիրութեան։
7 Քանի որ աղօթելու սովորութիւնը առհասարակ բան մըն է կրօնասէր մարդոց համար, կրնաք այս բնաբանին շուրջ խօսակցութիւն մը սկսիլ, ըսելով.
◼ «Մեր կեանքին մէջ որոշ ատեն մը խնդիրներէ տառապած ենք, որոնք մղած են մեզ Աստուծոյ աղօթել՝ օգնութեան համար։ Սակայն, շատեր կը զգան որ իրենց աղօթքները չեն պատասխանուիր։ Նոյնիսկ, այնպէս կը թուի թէ խաղաղութեան համար հանրապէս աղօթող կրօնական առաջնորդներ չեն լսուիր։ Ասիկա կ’ըսենք, քանի որ պատերազմը ու բռնութիւնը կը շարունակեն մարդկութեան տառապանք պատճառել։ Աստուած իրապէս մտիկ կ’ընէ՞ աղօթքներու։ Եթէ այո, ինչո՞ւ համար բազմաթիւ աղօթքներ անպատասխան կը մնան։ [Թոյլ տուէք որ պատասխանէ։] Սաղմոս 145։18 կը բացատրէ թէ ի՛նչ բան պահանջուած է եթէ կ’ուզենք որ մեր աղօթքները պատասխանուին։ [Կարդացէք համարը։] Մէկ բան յստակ պէտք է ըլլայ, որ Աստուծոյ ուղղուած աղօթքները պէտք է անկեղծ ու իր Խօսքին՝ Աստուածաշունչին՝ մէջ գտնուած ճշմարտութեան հետ ներդաշնակ ըլլան»։ Ցոյց տուէք ձեր ներկայացնելիք գիրքը, ու մատնանշեցէք աղօթքի արժէքին նկատմամբ անոր ըսածները։
8 Երբ անհատի մը կը վերայցելէք որու հետ նախապէս աղօթքի մասին խօսակցեցաք, կրնաք հետեւեալ մօտեցումը փորձել.
◼ «Աղօթքի նիւթին մասին մեր ունեցած խօսակցութիւնը հաճելի էր։ Անկասկած, ի՛նչ բանի համար աղօթելու Յիսուսի տուած միտքը օգտակար ուղղութիւն մը կրնաք նկատել»։ Կարդացէք Մատթէոս 6։9, 10, ցոյց տալով այս տիպար աղօթքին մէջ Յիսուսի ցցուն ըրած գաղափարները։ Ցոյց տուէք Գիտութիւն գրքին 16–րդ գլուխը՝ «Ի՛նչպէս Կրնաք Աստուծոյ Մօտենալ», ապա հարցուցէք թէ կրնա՞ք ցոյց տալ այս նիւթը ուսումնասիրելու կերպը։
9 Երբ հարցը գայ Աստուծոյ գիտութիւնը ուրիշներուն փոխանցելու, թերեւս հարց տանք. «Ո՞վ կարող [«բաւարար չափով որակելի», ՆԱ] է այս գործը կատարել»։ Աստուածաշունչը կը պատասխանէ որ մե՛նք որակելի ենք։—Բ. Կորն. 2։16, 17