Աստուածաշունչը՝ Բոլոր Մարդոց Համար Աստուծոյ Հայթայթած Ուղեցոյցը
1 Կ’ենթադրուի որ մօտ չորս միլիառ Աստուածաշունչեր տպուած են, աւելի քան 2,100 լեզուներով ու բարբառներով, Աստուծոյ Խօսքը մատչելի դարձնելով երկրի բնակչութեան աւելի քան 90 առ հարիւրին։ Սակայն, աշխարհի մէջ տակաւին «Տէրոջը խօսքերը լսելու» սով կայ։ (Ամովս. 8։11) Աստուածաշունչ ունեցողներէն շատեր կա՛մ չեն կարդար զայն, կամ ալ անոր բովանդակութիւնը չեն հասկնար։ Ի՞նչպէս կրնանք անոնց մղել որ Աստուածաշունչը իրենց կեանքերուն մէջ որպէս ուղեցոյց գործածեն։
2 Դեկտեմբերին պիտի ներկայացնենք Աստուածաշունչը—Աստուծո՞յ Խօսքն Է, թէ՝ Մարդոց գիրքը։ Ուր որ հետաքրքրութիւն ցուցաբերուի, նաեւ կրնանք Աստուածաշունչը ներկայացնել։ Եհովայի այս պարգեւին հանդէպ մեր խոր գնահատութիւնը ցոյց պիտի տանք, խանդավառութեամբ ուրիշներուն օգնելով որ Աստուածաշունչը ընդունին որպէս մարդոց համար Աստուծոյ հայթայթած ուղեցոյցը։
3 Կրնաք ներկայացում մը ընել, գործածելով «Ի՛նչու Կրնաք Աստուածաշունչին Վստահիլ» թերթիկը։ Կրնաք ըսել.
◼ «Թէեւ Աստուածաշունչը մատչելի է աշխարհի բնակչութեան 90 առ հարիւրին, միայն քիչեր զայն կանոնաւորաբար կը կարդան։ Արդեօք պատճառը ի՞նչ է»։ Կարդացէք թերթիկին առաջին երկու պարբերութիւնները, ի ներառեալ Բ. Տիմոթէոս 3։16։ Ներկայացուցէք Աստուծոյ Խօսքը գիրքը։ Եթէ զայն ընդունի, նուիրատուութեան կարգադրութիւնը յիշեցէք։ Եթէ զայն մերժէ, տանտիրոջմէն խնդրեցէք որ թերթիկին մնացեալ մասը կարդայ։ Աչքառու դարձուցէք վերջին ենթագլուխը՝ «Աստուածաշունչը Ապագան կը Նախագուշակէ»։
4 Երբ վերադառնաք անոնց որոնք «Ի՛նչու Կրնաք Աստուածաշունչին Վստահիլ» թերթիկը առին, թերեւս հետեւեալը փորձէք.
◼ Ձեր անձը դարձեալ ներկայացնելէ ետք, թերթիկին վերջին երկու պարբերութիւնները կարդացէք։ Տանտիրոջ հարցուցէք թէ երկրի վրայ յաւիտեան ապրելու կարելիութեան մասին բնաւ խորհա՛ծ է։ Իր պատասխանէն ետք, ըսէք. «Եհովայի Վկաները վստահ են թէ Աստուածաշունչին մէջ գտնուած բոլոր մարգարէութիւնները պիտի կատարուին, ի ներառեալ անոնք որոնք կը գուշակեն թէ Աստուծոյ պահանջներուն գոհացում տուող մարդոց հոյակապ ապագայ մը կը սպասէ»։ Ցոյց տուէք Ի՛նչ կը Պահանջէ գրքոյկին էջ 13–ի պատկերը, բացէք 5–րդ դասը ու առաջարկեցէք նկատի առնել յիշուած հարցումներուն պատասխանները, այսպէս սկսելով ուսումնասիրութիւն մը։
5 Թաղամասի մը մէջ ուր կրօնասէր մարդիկ կ’ապրին, կրնաք հետեւեալ մօտեցումը գործածել.
◼ «Մեր նպատակն է մարդոց քաջալերել որ Աստուածաշունչին հանդէպ աւելի յարգանք ունենան։ Շատ մը ընտանիքներ Աստուածաշունչ ունին, բայց քիչ անգամ անոր կը դիմեն երբ լուրջ խնդիրներու առջեւ գտնուին։ Ասիկա նկատա՞ծ էք։ [Թոյլ տուէք որ պատասխանէ։] Թերեւս կը խորհին որ Աստուածաշունչը ժամանակավրէպ է։ Այս գիրքը՝ Աստուածաշունչը—Աստուծո՞յ Խօսքն Է, թէ՝ Մարդոց համոզիչ փաստեր կը ներկայացնէ, թէ Աստուածաշունչը գիտականօրէն ճշգրիտ է եւ թէ անիկա ներկայ ճնշիչ խնդիրներուն գործնական լուծումներ կը հայթայթէ»։ Գրքին 8–րդ կամ 12–րդ գլուխներէն քանի մը կէտեր աչքառու դարձուցէք, ապա զայն ներկայացուցէք։
6 Երբ կը վերադառնաք հո՛ն ուր «Աստուծոյ Խօսքը» գիրքը տեղաւորած էիք, կրնաք ըսել.
◼ «Վերջին անգամ երբ ձեզի այցելեցի, խօսակցեցանք թէ Աստուածաշունչը ի՛նչպէս կ’օգնէ ներկայ խրթին հարցերը լուծելու։ Զայն որպէս Աստուծոյ Խօսքը ընդունողները կրցած են աւելի ուրախ ու գոհունակ կեանք մը վարել։ Կը փափաքիմ ձեզի ցոյց տալ Աստուածաշունչի գործնական սկզբունքներէն մէկը, որ բացատրուած է ձեր քով ձգած գրքիս մէջ»։ Նկատի առէք 12–րդ գլուխին, 3-6 պարբերութիւններուն մէջ գտնուած սուրբ գրային սկզբունքներէն մէկը, ապա եզրափակեցէք կարդալով 7–րդ պարբերութիւնը։ Եթէ հետաքրքրութիւն ցուցաբերուի, ուսումնասիրութիւն մը առաջարկեցէք կա՛մ Գիտութիւն գրքով, կամ ալ Ի՛նչ կը Պահանջէ գրքոյկով։
7 Հետեւեալ մօտեցումը կրնայ հետաքրքրել տարեց անհատները.
◼ «Ժամանակ մը կար երբ Աստուածաշունչը գրեթէ ամէն տունի մէջ կը կարդացուէր, իսկ ընտանիքներ անոր սկզբունքներուն համաձայն կ’ապրէին։ Արդեօք դո՞ւք ալ այսպիսի ընտանիքի մը մէջ մեծցած էք։ [Թոյլ տուէք որ պատասխանէ։] Ներկայիս կը թուի թէ շատեր ա՛յնքան զբաղած են որ Աստուածաշունչի ընթերցանութեան տրամադրելիք ժամանակ չունին, կամ ալ կը խորհին թէ անոր բարոյական սկզբունքները ժամանակավրէպ են։ Այս գրքին՝ Աստուածաշունչը—Աստուծո՞յ Խօսքն Է, թէ՝ Մարդոց, 13–րդ գլուխը կը ներկայացնէ երեք անձերու իրական փորձառութիւնները, որոնց կեանքը բարելաւուեցաւ Աստուածաշունչը ուսումնասիրելէ ետք։ Եթէ կը փափաքիք կարդալ թէ Աստուծոյ Խօսքին զօրութիւնը ի՛նչպէս օգնեց անոնց, ուրախ պիտի ըլլամ այս գիրքը ձեր քով ձգելով»։
8 Վերայցելութեան ատեն կրնաք ըսել.
◼ «Վերջին անգամ երբ խօսեցանք, համաձայնեցանք որ Աստուածաշունչի բարոյական սկզբունքները կ’անտեսուին ներկայ ընկերութեան մէջ։ Այս անտարբերութիւնը մեզ պէ՞տք է մտահոգէ։ [Թոյլ տուէք որ պատասխանէ։] Յիսուս Քրիստոս Աստուածաշունչի գիտութիւն ստանալը շատ արժէքաւոր նկատեց»։ Կարդացէք Յովհաննու 17։3։ Ապա Գիտութիւն գրքին առաջին գլուխին 5–րդ պարբերութիւնը նկատի առէք։ Աստուածաշունչի ձրի ուսումնասիրութեան մեր յայտագիրը բացատրեցէք եւ առաջարկեցէք զայն ցուցադրել։
9 Աղօթեցէք որ Եհովա օրհնէ ձեր թափած բոլոր ջանքերը, որպէսզի մարդոց ուշադրութիւնը դարձնէք Աստուածաշունչին՝ բոլոր մարդոց համար Աստուծոյ հայթայթած ուղեցոյցին։