Ո՛վ Պատանիներ՝ Ձեր Ուսման Տարիներէն Օգտուեցէք

¹ Ամառուան արձակուրդէն ետք դպրոց վերադառնալու նկատմամբ ի՞նչպէս կը զգաք։ Դպրոցական նոր տարեշրջանէ մը օգտուելու անձկալի՞ց էք։ Ձեր դասընկերներուն եւ ուսուցիչներուն հետ ճշմարտութիւնը բաժնելու պատեհութիւնները պիտի օգտագործէ՞ք։ Վստահ ենք որ դպրոցին մէջ ձեր լաւագոյնը կ’ուզէք ընել։

² Ջանասէր Աշակերտ մը Եղէք. Եթէ ձեր դասընթացքներուն պատրաստուած ներկայ գտնուիք եւ ուշի ուշով հետեւիք, մնայուն օգուտներ պիտի քաղէք։ Ձեզի տրուած պարտականութիւնները ժրաջանօրէն կատարեցէք, սակայն թոյլ մի՛ տաք որ դպրոցական պարտականութիւնները ձեր աստուածպետական գործունէութիւններուն արգելք հանդիսանան։—Փիլ. 1։10

³ Վերամուտը սկսեցէք կարդալով Եհովայի Վկաները եւ Ուսումը գրքոյկը։ Ապա, դուք կամ ձեր ծնողները ձեր իւրաքանչիւր ուսուցիչին օրինակ մը տուէք։ Անոնց ըսէք թէ պատրաստ էք իրենց բոլոր հարցումներուն պատասխանելու։ Ասիկա պիտի օգնէ որ անոնք ձեր սկզբունքները եւ հաւատալիքները աւելի լաւ հասկնան եւ ձեր հետ համագործակցին մինչ ձեր սորվածները կը կիրարկէք։ Անիկա նաեւ ձեր ուսուցիչներուն պիտի հաւաստիացնէ թէ դուք եւ ձեր ծնողները կը փափաքիք իրենց հետ համագործակցիլ, մինչ ձեզի կ’օգնեն որ արժէքաւոր ուսում ձեռք ձգէք։

⁴ Ջանասէր Վկայ մը Եղէք. Ինչո՞ւ դպրոցը չնկատէք անպաշտօն կերպով վկայելու ձեր անհատական թաղամասը։ Եկող տարեշրջանին, վկայելու անզուգական պատեհութիւններ պիտի ունենաք։ Դուք ունիք հոգեւոր սքանչելի գիտութիւն, որ երբ ուրիշներու հետ բաժնէք, կրնայ ‘ձեզ ալ ապրեցնել ու զանոնք ալ, որոնք ձեզի մտիկ կ’ընեն’։ (Ա. Տիմ. 4։16) Քրիստոնէական օրինակելի վարք մը պահպանելով եւ յարմար եղած առիթներուն վկայելով, դուք եւ ուրիշներ պիտի օգտուիք։

⁵ Պատանի եղբայր մը դպրոցին մէջ իր դասընկերներուն անպաշտօն կերպով վկայեց։ Նպաստաւոր կերպով ընդառաջողներուն մէջ կային՝ Կաթողիկէ մը, Աստուծոյ հաւատացողները ծաղրելու սովորութիւն ունեցող անաստուած մը, եւ անընդհատ ծխող ու ալքոլամոլ երիտասարդ մը։ Ընդամէնը, այս պատանին իր դասընկերներէն 15 հոգիի օգնեց որ նուիրուին ու մկրտուին։

⁶ Արդ, ո՛վ պատանիներ, ջանադիր եղէք սորվելու եւ ձեր անզուգական թաղամասին վկայելու մէջ։ Այս կերպով, դպրոց յաճախելու մեծագոյն օգուտները պիտի վայելէք։