Ձեր Կեանքը Եհովայի Ծառայութեան Շուրջ Կերտեցէք

¹ Յիսուս իրեն լսողները նմանցուց երկու տեսակ շինարարներու։ Մէկը իր ապրելակերպը կերտեց Քրիստոսի հանդէպ հնազանդութեան վէմին վրայ եւ կրցաւ հակառակութեան ու նեղութեան փոթորիկներուն դէմ դնել։ Իսկ միւսը՝ անձնասէր անհնազանդութեան աւազին վրայ շինեց եւ երբ ճնշումներ եկան, չկրցաւ կանգուն մնալ։ (Մատթ. 7։24-27) Իրերու դրութեան վախճանի ժամանակին մէջ ապրելով, հակառակութեան բազմաթիւ փոթորիկներ կը դիմագրաւենք։ Հորիզոնին վրայ մեծ նեղութեան սեւ ամպերը արագօրէն կը կուտակուին։ Մինչեւ վերջ պիտի համբերե՞նք, մեր հաւատքը անեղծ պահելով։ (Մատթ. 24։3, 13, 21) Շատ բան կախեալ է ներկայիս մեր կեանքը ի՛նչպէս կերտելէն։ Հետեւաբար, ստիպողական է որ մենք մեզի հարց տանք, ‘Որպէս Քրիստոնեայ իմ կեանքս հաստատ կերպով կը կերտե՞մ հնազանդօրէն Աստուծոյ ծառայութիւն մատուցանելու վրայ’։

² Ի՞նչ կը նշանակէ մեր կեանքը Եհովայի ծառայութեան շուրջ կերտել։ Անիկա կը նշանակէ Եհովան մեր կեանքին կորիզը դարձնել, եւ կը պարփակէ Թագաւորութեան վրայ կեդրոնանալ, որպէս մեր գլխաւոր հետաքրքրութիւնը։ Անիկա կը նշանակէ Աստուծոյ հնազանդիլ մեր առօրեայ կեանքի բոլոր գործունէութիւններուն մէջ, եւ կը պահանջէ Աստուածաշունչի անձնական, ընտանեկան եւ ժողովքային մեր ուսումնասիրութեան ու դաշտի ծառայութեան մէջ մեր սիրտը դնել, զանոնք մեր նախապատուութիւնը դարձնելով։ (Ժող. 12։13. Մատթ. 6։33) Այսպիսի հնազանդ ընթացքի մը արդիւնքը կ’ըլլայ, վէմի նման հաստատ հաւատք մը, որ պիտի չխախտի հակառակութեան որեւէ հարուածող փոթորիկի դիմաց։

³ Հաճոյք է տեսնել միլիոնաւոր մարդիկ, որոնք իրենց կեանքը եւ ապագայի նկատմամբ իրենց յոյսերը, Յիսուսի նման անվարան կը կերտեն Աստուծոյ ծառայութեան շուրջ։ (Յովհ. 4։34) Անոնք աստուածպետական գործունէութեան հաստատ յայտագրի մը կը կառչին եւ այս պատճառաւ ալ ճոխ օրհնութիւններ կը վայելեն։ Մայր մը կը բացատրէ թէ ի՛նչպէս ինք ու իր ամուսինը յաջողութեամբ կրցան իրենց երկու տղաքը որպէս Եհովայի ծառայ մեծցնել. «Մեր կեանքը ճշմարտութեամբ լեցուցինք—բոլոր համաժողովներուն երթալով, ժողովներու համար պատրաստուելով ու ներկայ գտնուելով, իսկ դաշտի ծառայութիւնը մեր կեանքին կանոնաւոր մէկ մասը դարձնելով»։ Անոր ամուսինը աւելցուց. «Ճշմարտութիւնը մեր կեանքին մէկ մասը չէ, անիկա մեր կեանքն է։ Ուրիշ ամէն բան անոր շուրջ կը դառնայ»։ Դուք ալ նոյն կերպով Եհովայի ծառայութիւնը առաջնակարգ տեղը դրա՞ծ էք ձեր ընտանիքին մէջ։

⁴ Շաբաթական Գործնական Յայտագիր մը Ծրագրեցէք. Եհովայի կազմակերպութիւնը կ’օգնէ մեզի որ հոգեւոր լաւ սովորութեան մը հետեւինք, շաբաթական հինգ ժողովներ ծրագրելով։ Եհովայի պաշտամունքին շուրջ իրենց կեանքը կերտող Քրիստոնեաներ, իրենց աշխարհիկ ու ընտանեկան գործունէութիւնները այնպիսի կերպով մը կը կարգադրեն, որ այս բոլոր կենսական ժողովներուն ներկայ կարենան ըլլալ։ Անոնք թոյլ չեն տար որ նուազ կարեւոր բաներ, կանոնաւորաբար ժողովներու յաճախելու արգելք հանդիսանան։—Փիլ. 1։10. Եբր. 10։25

⁵ Հասուն Քրիստոնեաներ կը գիտակցին, թէ ինչպէս որ ամէն օր որոշ ժամերուն կանոնաւորաբար ճաշ ուտելը կարեւոր է, նոյնպէս ալ կենսական է հաստատ յայտագիր մը պատրաստել անձնական ու ընտանեկան ուսումնասիրութեան համար, ժողովներու պատրաստութիւնն ալ ներառեալ։ (Մատթ. 4։4) Կրնա՞ք ամէն օր առնուազն 15–էն 20 վայրկեան տրամադրել անձնական ուսումնասիրութիւն ընելու համար։ Ասոր մէջ յաջողելու համար, թոյլ պէտք չէ տաք որ ուրիշ բաներ ուսումնասիրութեան համար տրամադրուած ժամանակը խլեն։ Զայն օգտակար սովորութիւն մը դարձուցէք։ Ասիկա կրնայ պահանջել որ ամէն առտու սովորականէն կանուխ արթննաք։ Պէթէլի համաշխարհային ընտանիքին 17,000 անդամները առտու կանուխ կ’արթննան օրուան համարը նկատի առնելու համար։ Անշուշտ, կանուխ արթննալը կը պահանջէ որ գիշերը անկողին երթալու համար տրամաբանական ժամ մը որոշենք, որպէսզի յաջորդ օրը թարմացած ու հանգստացած վիճակով սկսինք։

⁶ Եթէ ընտանիքի մը գլուխն էք, ձեր ընտանիքին աստուածպետական գործունէութեան յայտագիրը կազմակերպելու եւ ծրագրելու նախաձեռնութիւնը առէք։ Կարգ մը ընտանիքներ միասնաբար Աստուածաշունչը, Տարեգիրք–ը կամ ուրիշ գրականութիւն մը կը կարդան, մինչ երեկոյեան ընթրիքէն ետք կը հանգստանան։ Ծնողներէն շատեր, որոնք իրենց զաւակներուն մեծնալը ու հոգեւորապէս զօրաւոր Քրիստոնեաներ ըլլալը տեսած են, կ’ըսեն թէ, միասնաբար կերտիչ հոգեւոր ժամանակ մը վայելելու համար ամէն շաբաթ երեկոյ մը տրամադրելու ընտանեկան սովորութիւնը, իրենց յաջողութեան նպաստող ազդակներէն մէկը եղած է։ Այսպիսի հայր մը ըսաւ. «Կը խորհիմ թէ մեր զաւակներուն հոգեւոր աճումը մեծաւ մասամբ կը պարտինք Չորեքշաբթի գիշերները մեր ունեցած ընտանեկան կանոնաւոր ուսումնասիրութեան, որ սկսաւ շուրջ 30 տարիներ առաջ»։ Իր երեք զաւակներն ալ կանուխ տարիքէն մկրտուեցան, եւ հետագային երեքն ալ լիաժամ ծառայութեան մէջ մխրճուեցան։ Ընտանեկան ուսումնասիրութեան կողքին, կարելի է ժողովի յայտագրէն մասեր կամ դաշտի ծառայութեան ներկայացումներ փորձ ընել, ինչպէս նաեւ միասնաբար ուրիշ օգտակար գործունէութիւններ վայելել։

⁷ Ձեր շաբաթական յայտագրին մէջ, Թագաւորութեան քարոզչութեան համար ‘ժամանակ ծախու’ առա՞ծ էք։ (Կող. 4։5) Մեծամասնութիւնս զբաղած կեանքեր կը վարենք, ընտանեկան ու ժողովքային պատասխանատուութիւններու հոգատարութիւնը ունենալով։ Եթէ ամէն շաբաթ քարոզելու եւ սորվեցնելու գործունէութեան մէջ մասնակցութիւն բերելու հաստատ կարգադրութիւններ չընենք, դիւրին պիտի ըլլայ որ ուրիշ բաներ այս կենսական յայտագրին տեղ չտան։ Արջառներու հսկայ ագարակի տէր մը ըսաւ. «Շուրջ 1944–ին, անդրադարձայ որ ծառայութեան մասնակցելու միակ կերպը, անոր համար օր մը յատկացնելն է։ Մինչեւ օրս տակաւին շաբաթը մէկ օր արձակուրդ կ’առնեմ, որպէսզի ծառայութեան մասնակցիմ»։ Քրիստոնեայ երէց մը նկատած է թէ քարոզչութեան համար հաստատ յայտագիր մը ունենալը զինք կարող կը դարձնէ որ ամիսը միջին հաշուով 15 ժամ տրամադրէ քարոզելու գործունէութեան։ Եթէ Շաբաթ օրերը աշխարհային որեւէ գործ ունենայ, զայն առաւօտեան դաշտի ծառայութենէն ետք կը յայտագրէ։ Կրնա՞ք դուք եւ ձեր ընտանիքը դաշտի ծառայութեան համար շաբաթը առնուազն մէկ օր յայտագրել, եւ զայն ձեր հոգեւոր կեանքին մէկ մասը դարձնել։—Փիլ. 3։16

⁸ Ձեր Կեանքի Սովորութիւնները Սերտօրէն Քննեցէք. Կան բաներ որոնք արգելք կը հանդիսանան որ մեր կեանքը Եհովայի ծառայութեան շուրջ կերտենք։ Աննախատեսելի պարագաներ կրնան խանգարել ուսումնասիրութեան, ժողովներու, ու ծառայութեան համար ուշադրութեամբ ծրագրուած մեր յայտագիրը։ Իսկ մեր Թշնամին՝ Սատանան, իր ձեռքէն եկածը պիտի ընէ մեզ ‘արգիլելու’ եւ մեր ծրագիրները ձախողեցնելու համար։ (Ա. Թես. 2։18. Եփ. 6։12, 13) Թոյլ մի՛ տաք որ այս արգելքները հեղգանալու աստիճան ձեզ յուսահատեցնեն։ Հարկ եղած վերաճշդումները ըրէք, որպէսզի կարենաք ձեր յայտագրած աստուածպետական գործունէութիւնը շարունակել։ Վճռակամութիւնը եւ յարատեւութիւնը անհրաժեշտ են իրապէ՛ս արժէքաւոր բան մը իրագործելու համար։

⁹ Թոյլ պէտք չէ տանք որ աշխարհիկ ազդեցութիւններ ու մեր անկատար մարմնին բացասական հակումները, հոգեւոր չեղող գործունէութիւններ հրամցնեն, որոնք կրնան հետզհետէ աւելի մեր ժամանակը եւ ուշադրութիւնը խլել։ Անհրաժեշտ է որ մեր անձերը քննենք, հարցնելով հետեւեալին նման հարցումներ. ‘Ապրելակերպս աստիճանաբար անհաւասարակշիռ դարձա՞ծ է, կամ իր ուղղութենէն շեղա՞ծ է։ Սկսա՞ծ եմ կեանքս կերտել այս աշխարհին մէջ անցողակի եղող բաներուն շուրջ։ (Ա. Յովհ. 2։15-17) Հոգեւոր գործունէութիւններու համար տրամադրուած ժամանակին հետ բաղդատած, որքա՞ն ժամանակ կը տրամադրեմ անձնական հետապնդումներու, զբօսաշրջիկութեան, մարզական գործունէութիւններու, կամ ուրիշ ժամանցներու, մէջը ըլլալով հեռատեսիլ դիտելու կամ Ինթըրնէթ–ը գործածելու համար’։

¹⁰ Եթէ զգաք որ ձեր կեանքը կենսական չեղող գործունէութիւններով հետզհետէ աւելի կը խճողուի, ի՞նչ պէտք է ընէք։ Ճիշդ ինչպէս որ Պօղոս աղօթեց որ իր եղբայրները «վերաճշդուին», կամ «պատշաճ դասաւորման մէջ գան», ինչո՞ւ Եհովայի օգնութիւնը չխնդրէք որպէսզի դարձեալ ձեր ուշադրութիւնը իր ծառայութեան դարձնէք։ (Բ. Կորն. 13։9, 11, ՆԱ, ստորանիշ) Ապա վճռեցէք ձեր որոշումին համաձայն ապրիլ եւ հարկ եղած վերաճշդումները ընել։ (Ա. Կորն. 9։26, 27) Եհովա պիտի օգնէ ձեզի որ հնազանդօրէն իրեն ծառայելէն աջ կամ ձախ չդառնաք։—Բաղդատել՝ Եսայեայ 30։20, 21։

¹¹ Աստուծոյ Ուրախ Ծառայութեան Մէջ Զբաղած Մնացէք. Միլիոնաւորներ յուսահատօրէն ուրախութիւն կը հետապնդեն, բայց կը նկատեն թէ մինչ կեանքը իր աւարտին կը հասնի, նիւթական բաները զորս հեւ ի հեւ կը հետապնդէին, տեւական ուրախութիւն չեն տուած։ Անիկա «հոգիի տանջանք» եղած է։ (Ժող. 2։11) Միւս կողմէ, երբ Եհովան մեր կեանքին կորիզը կը դարձնենք, ‘ամէն ատեն զինք մեր առջեւը դնելով’, խոր գոհունակութիւն պիտի վայելենք։ (Սաղմ. 16։8, 11) Այս պէտք է ըլլայ պարագան, քանի որ մեր գոյութիւնը ուղղակի Եհովայի կը պարտինք։ (Յայտ. 4։10) Առանց այս Մեծ Նպատակադրողին, կեանքը իմաստ չունի։ Եհովայի ծառայելը մեր կեանքը կը լեցնէ թանկագին, իմաստալից գործունէութեամբ, որ մեզի եւ ուրիշներուն մնայուն՝ այո՛, յաւիտենական, օգուտներ կը բերէ։

¹² Կարեւոր է որ ինքնագոհ չըլլանք ու Սատանայի աշխարհին արագօրէն մօտեցող վախճանին նկատմամբ ստիպողականութեան մեր զգացումը չկորսնցնենք։ Մեր ամէնօրեայ կենցաղը կ’ազդուի ապագայի նկատմամբ մեր հայեցակէտէն։ Նոյի օրուան մարդիկը, որոնք չհաւատացին որ երկրածաւալ ջրհեղեղ պիտի ըլլայ, «չգիտցան». իրենց առօրեայ կեանքը անհատական հետապնդումներու վրայ կեդրոնացուցին՝ ուտել, խմել եւ ամուսնանալ, մինչեւ ջրհեղեղը եկաւ ու «ամէնքը վերցուց»։ (Մատթ. 24։37-39) Ներկայիս, իրենց կեանքը այս աշխարհին վրայ կեդրոնացնողները, պիտի տեսնեն թէ ապագայի նկատմամբ իրենց հեռանկարները իրենց աչքերուն առջեւ կը չքանան, մարդոց գլխուն գալիք մեծագոյն կործանման՝ «Տէրոջ օր»ուան ընթացքին։—Բ. Պետ. 3։10-12

¹³ Հետեւաբար, շարունակեցէք ձեր կեանքը կերտել կենդանի Աստուծոյ՝ Եհովայի՝ եւ իր կամքը կատարելու շուրջ։ Եհովայի նման վստահելի Ապաւէն մը ունենալով, այս կեանքին մէջ ասկէ աւելի լաւ ներդրում մը չենք կրնար ընել։ Ան չի կրնար սուտ խօսիլ—ան իր խոստումները պիտի յարգէ։ (Տիտ. 1։2) Ան չի կրնար մեռնիլ—Եհովայի համար եղած որեւէ բան չի կորսուիր։ (Ամբ. 1։12. Բ. Տիմ. 1։12) Ներկայիս մեր կերտած հնազանդ ու հաւատքով լեցուն կեանքը, միմիայն սկիզբն է այն կեանքին որ յաւիտեան պիտի տեւէ, մեր ուրախ Աստուծոյն ուրախ ծառայութեան մէջ։—Ա. Տիմ. 1։11. 6։19

[Մէջբերում՝ էջ 3]

«Ճշմարտութիւնը մեր կեանքին մէկ մասը չէ, անիկա մեր կեանքն է։ Ուրիշ ամէն բան անոր շուրջ կը դառնայ»։