Թագաւորութեան Լուրեր Թիւ 36–ով Խթանուած Հետաքրքրութիւնը Մշակենք

¹ Թագաւորութեան Լուրեր Թիւ 36–ի ձեզի ինկած բաժինին բաշխումը վերջացուցի՞ք։ Անիկա ժամանակայարմար հարցում մը կը հարցնէ, որ բոլորին մտածել կու տայ՝ «Նոր Հազարամեակը—Ապագան Ի՞նչ կը Վերապահէ Ձեզի Համար»։ Մինչ 2000 թուականը կը մօտենար, նոր հազարամեակի մասին բազմազան ակնկալութիւններ կային։ Թագաւորութեան Լուրեր Թիւ 36–ը այդ ակնկալութիւններէն քանի մը հատը նկատի կ’առնէ եւ մեզի կը յիշեցնէ որ աշխարհի վիճակը լաւատեսութեան հիմ մը չի տար մեզի։ Միակ հազարամեակը որ շատերուն փնտռած խաղաղութիւնը եւ ապահովութիւնը պիտի բերէ՝ Քրիստոս Յիսուսի Հազարամեայ Իշխանութիւնն է։ Իր Թագաւորութիւնը իրականութիւն մը ըլլալուն վրայ մեր ունեցած վստահութիւնը մեզ մղեց որ որքան կարելի է ամենուն տանք Թագաւորութեան Լուրեր Թիւ 36–ը։

² Թագաւորութեան Լուրեր Թղթիկին Ընդառաջումները. Թագաւորութեան Լուրեր–ու նախկին բաշխումները մեր գործին մէջ լաւ խթանում մը եղած են։ Թագաւորութեան Լուրեր Թիւ 35–ի մասին Գանատայի մասնաճիւղը գրեց. «Այս մասնաւոր արշաւին եռանդուն կերպով թիկունք կանգնեցան հրատարակիչներն ու ռահվիրաները, եւ շատ քաջալերական փորձառութիւններ վայելեցին»։ Անկասկած դուք ալ նման խանդավառութիւն մը ցոյց տուիք Թագաւորութեան Լուրեր Թիւ 36–ին համար։

³ Թագաւորութեան Լուրեր–ու ընթացիկ արշաւը ըստ յայտագրին վերջ պիտի գտնէր 2000–ի Նոյեմբեր 17–ին։ Ձեր ժողովքին նշանակուած ամբողջ թաղամասը ծածկուեցա՞ւ։ Եթէ ո՛չ, երէցները կրնան ձեզմէ խնդրել որ արշաւը շարունակէք մինչեւ Նոյեմբերի վերջը։

⁴ Ձեր շրջանին մէջ ցարդ մարդոց հակազդեցութիւնը ի՞նչ եղած է Թագաւորութեան Լուրեր Թիւ 36-ին հանդէպ։ Քիչեր կտրօնը պիտի լեցնեն եւ Ի՛նչ կը Պահանջէ գրքոյկը եւ/կամ տան սուրբ գրային ուսումնասիրութիւն մը պիտի խնդրեն։ Սակայն հազարամեակի նիւթով նախնական հետաքրքրութիւն ցոյց տուողներէն շատեր, հաւանաբար քայլ պիտի առնեն երբ Եհովայի Վկաներէն մէկը իրենց վերայցելէ։ Հետաքրքրութիւն ցոյց տուող բոլոր անհատներուն այցելութիւն պէտք է տրուի։ Ասիկա ընելու լաւագոյն ժամանակը ե՞րբ պիտի ըլլայ։ Կարելի եղածին չափ շուտ պէտք է վերայցելել։

⁵ Նկատի առէք Թագաւորութեան Լուրեր Թիւ 35–ի տեղաւորումներէն ետք կատարուած վերայցելութենէն ձեռք ձգուած հետեւեալ փորձառութիւնները։ Իրլանտայի մէջ, ռահվիրայ մը ճաշարանի մը տիրոջ Թագաւորութեան Լուրեր թղթիկը ձգեց։ Կինը շատ տպաւորուեցաւ անոր պատգամով եւ խնդրեց որ քոյրը զինք վերայցելէ։ Քոյրը երկու օր ետք վերադարձաւ եւ Աստուածաշունչի ուսումնասիրութիւն մը սկսուեցաւ։ Տանըմարքայի մէջ, Թագաւորութեան Լուրեր թղթիկը ձգուեցաւ տուն մը, ուր մարդ չկար։ Հոն բնակող կինը, նոյն օրը կտրօնը ղրկեց մասնաճիւղ, որ իր կարգին տեղական ժողովքին ուղղարկեց զայն։ Շաբաթը վերջանալէն առաջ երկու քոյրեր իրեն այցելեցին, ուսումնասիրութեան կարգադրութիւն ըրին եւ այս կինը Թագաւորութեան Սրահին մէջ իր առաջին ժողովին ներկայ գտնուեցաւ։

⁶ Ի՛նչ Ըսել Երբ կը Վերայցելէք. Թագաւորութեան Լուրեր թղթիկ տեղաւորելէ ետք վերայցելութիւն ընելը յարաբերաբար հեշտ է եւ մեր ծառայութեան հաճելի մէկ մասն է։ Ասիկա ընելու ժամանակ, յանձնարարելի է որ ձեր հետ անկէ օրինակ մը ունենաք, կրնայ ըլլալ որ տանտէրը իր օրինակը չունենայ։ Կրնաք հետեւեալ թելադրութիւնները փորձել.

⁷ Տանտիրոջ վերյիշեցնելէ ետք ձեր ո՛վ ըլլալը, կրնաք ըսել.

◼ «Ես թերթիկ մը ձգեցի ձեզի որու խորագիրն էր՝ ‘Նոր Հազարամեակը—Ապագան Ի՞նչ կը Վերապահէ Ձեզի Համար’։ Զայն կարդալով քաջալերուեցա՞ք որ շուտով Քրիստոս Յիսուսի Հազարամեայ Իշխանութիւնը պիտի սկսի, երկրի վրայ դրախտային վիճակներ բերելով։ [Թագաւորութեան Լուրեր Թիւ 36–էն Դրախտին պատկերը ցոյց տուէք։] Վերջին էջին վրայ, ձեզի հրաւէր տրուած է որ Աստուած Ի՛նչ կը Պահանջէ Մեզմէ գրքոյկէն օրինակ մը խնդրէք»։ Ցոյց տուէք գրքոյկը, բացէք 5–րդ դասը՝ եւ կարդացէք 1 եւ 2–րդ պարբերութիւնները եւ խնդրեցէք որ տանտէրը բացատրութիւն տայ։ Մէկ կամ երկու համար կարդացէք եւ բացատրեցէք։ Եթէ կարելի է ուրիշ հարցում մը եւ պարբերութիւն մը նկատի առէք, ապա վերայցելելու եւ խօսակցութիւնը շարունակելու կարգադրութիւն ըրէք։

⁸ Քանի որ Նոյեմբերին մարդոց պիտի ներկայացնենք «Ի՛նչ կը Պահանջէ» գրքոյկը, կամ «Գիտութիւն» գիրքը, կրնաք ըսել.

◼ «Վերջերս երբ ձեզի այցելեցի, ձեզի ձգեցի՝ ‘Նոր Հազարամեակը—Ապագան Ի՞նչ կը Վերապահէ Ձեզի Համար’ թղթիկը։ Անոր մէջ ձեզի կը հրամցուէր ձրի տան սուրբ գրային ուսումնասիրութիւն մը։ Եկայ որ ձեզի ցոյց տամ թէ ի՛նչ կերպով կ’ուսումնասիրենք։ [Ցոյց տուէք՝ Ի՛նչ կը Պահանջէ գրքոյկը եւ դարձուցէք կողքին ետեւի էջը։ Կամ՝ ցոյց տուէք Գիտութիւն գիրքը եւ բացէք էջ 188-189։] Այն Հազարամեան որու մասին կը խօսի Աստուածաշունչը, այս պատկերին մէջ ձեր տեսած պայմանները պիտի բերէ։ Դրախտին մէջ ապրելու արժանի ըլլալու համար, պէտք է Աստուծոյ տուած ճշգրիտ գիտութիւնը ստանաք։ Թոյլ տուէք որ հակիրճ կերպով ձեզի ցոյց տամ թէ ի՛նչպէս կ’ուսումնասիրենք Աստուածաշունչը»։

⁹ Թագաւորութեան Լուրեր Թիւ 36–ը մեզ խթանեց որպէսզի ծառայութեան մէջ մեր մասնակցութիւնը աւելցնենք, մեծ վկայութիւն մը տալով։ Հաւանաբար ասիկա թաղամասին մէջ շատերուն հետաքրքրութիւնը շարժեց։ Այս հետաքրքրութիւնը մշակելու համար, Եհովայի օգնութեամբ մեր միասնական ջանքերը պատճառ պիտի ըլլան որ ուրիշ ոչխարանման մարդիկ գտնելու ուրախութիւնը ունենանք։—Մատթ. 10։11. Գործք 13։48, 49, 52