Թագաւորութեան Լուրեր–ուն Հանդէպ Ցուցաբերուած Հետաքրքրութիւնը Հետապնդեցէք

¹ Վերջին քանի մը շաբաթներէ ի վեր, Թագաւորութեան Լուրեր Թիւ 35 թերթիկը բաշխելու առանձնաշնորհումը կը վայելենք, որու խորագիրն է՝ «Պիտի Ըլլա՞յ Ժամանակ մը որ Բոլոր Մարդիկ Իրար Սիրեն»։ Ամէնուրեք հրատարակիչները կը ջանան արժանի եղողներուն հասցնել Թագաւորութեան Լուրեր–ու այս համարը։ (Մատթ. 10։11) Թէեւ արշաւը իր աւարտին պիտի հասնի Կիրակի՝ Նոյեմբեր 16–ին, բայց եթէ տակաւին չծածկուած թաղամասեր կան, երէցները կրնան խնդրել ձեզմէ որ շարունակէք Թագաւորութեան Լուրեր Թիւ 35 թերթիկի բաշխումը, մինչեւ որ ժողովքին ունեցած քանակը վերջանայ։

² Թագաւորութեան Լուրեր–ու այս համարը բազմաթիւ մարդոց հետաքրքրութիւնը շարժած է։ Անոնք կը տեսնեն թէ մարդիկ ընդհանուր առմամբ իրենց սովորական սէրը կորսնցուցած են, հետեւաբար, հարց կու տան թէ ապագան ի՛նչ վերապահած է։ (Բ. Տիմ. 3։3) Կը փափաքինք ցուցաբերուած հետաքրքրութիւնը հետապնդել։

³ Թագաւորութեան Լուրեր–ը Արդիւնաբեր Է. 1995–ի Թագաւորութեան Լուրեր–ու արշաւին, օրինակ մը ստացող կին մը Թագաւորութեան Սրահ գալով ժողովի մը ներկայ եղաւ եւ փափաքեցաւ Եհովայի Վկաներու հաւատալիքներուն մասին աւելի սորվիլ։ Այդ ժողովէն ետք, Աստուածաշունչի ուսումնասիրութիւն մը ընդունեց, իսկ անկէ յետոյ գրեթէ ժողովներէն չէր բացակայեր։ Շատ չանցած, իր նախկին եկեղեցիին նամակ մը գրելով՝ հրաժարեցաւ։

⁴ Ցարդ, թաղամասին մէջ հարիւրաւոր մարդիկ Թագաւորութեան Լուրեր Թիւ 35 թերթիկին պատգամը կարդացած են։ Սակայն անոնց հակազդեցութիւնը ի՞նչ էր։ Նոյնիսկ եթէ անոնք նպաստաւոր կերպով տպաւորուեցան իրենց կարդացածով, մեծամասնութիւնը քայլ մը պիտի չառնէ մինչեւ որ Եհովայի Վկայ մը դարձեալ իրենց այցելէ։ Վերադառնալու ծրագիրներ կ’ընէ՞ք։ Մեր ընկեր արարածին հանդէպ սիրալիր հետաքրքրութիւնը պէտք է մղէ մեզ որ ասիկա ընենք։ Թագաւորութեան Լուրեր–ուն հանդէպ բոլոր հետաքրքրութիւն ցուցաբերողներուն դարձեալ պէտք է վերայցելենք։

⁵ Ի՞նչ Պիտի Ըսէք Երբ Վերադառնաք. Կրնաք քանի մը մեկնաբանութիւններ ընել Թագաւորութեան Լուրեր–ու պատգամին այժմէական ըլլալուն մասին, ապա հարցնել միտք գրգռող հարցում մը։ Ուշադրութեամբ մտիկ ըրէք մինչ տանտէրը կ’արտայայտուի, որպէսզի ըմբռնէք անոր միտքը։ Ապա անոր ուշադրութիւնը հրաւիրեցէք Թագաւորութեան Լուրեր–ուն մէջ առաջարկուած՝ Ի՛նչ կը Պահանջէ գրքոյկէն առնուած յարմար կէտի մը։ Եթէ նպաստաւոր ընդառաջում գտնէք, անմիջապէս ուսումնասիրութիւն մը սկսեցէք։

⁶ Ահաւասիկ քանի մը թելադրուած ներկայացումներ, զորս կրնաք գործածել երբ կը վերադառնաք «Թագաւորութեան Լուրեր» Թիւ 35 թերթիկով հետաքրքրուած անհատներուն.

◼ «Թերեւս յիշէք վերջերս ձեզի տուած թերթիկս։ Անոր պատգամը ներկայիս մարդկութիւնը բաժնող կենսական նիւթ մը կը շօշափէ՝ ուրիշներու հանդէպ սիրոյ պակասը»։ Ուշադրութիւն հրաւիրեցէք Թագաւորութեան Լուրեր–ու էջ 2–ի վրայ՝ «Դրացիական Սէրը Պաղած Է» ենթագլուխին ներքեւ ներկայացուած ապացոյցին։ Ապա հարցուցէք. «Կը խորհի՞ք որ Աստուծոյ նպատակն էր որ մարդիկ այսպէս ապրէին»։ Թոյլ տուէք որ պատասխանէ։ Բացէք Ի՛նչ կը Պահանջէ գրքոյկին 5–րդ դասը եւ փորձեցէք ուսումնասիրութիւն մը սկսիլ։

◼ «Առաջին հանդիպումին, ձեր քով թերթիկ մը ձգեցի՝ ‘Պիտի Ըլլա՞յ Ժամանակ մը որ Բոլոր Մարդիկ Իրար Սիրեն’ խորագրով։ Կը խորհի՞ք որ այսպիսի աշխարհ մը կարելի է»։ Թոյլ տուէք որ պատասխանէ։ Բացէք Ի՛նչ կը Պահանջէ գրքոյկին 6–րդ դասը եւ կարդացէք 6–րդ պարբերութիւնը։ Ապա կարդացէք Միքիայ 4։3, 4–ին մէջ Աստուծոյ խոստումը։ Եթէ տանտէրը հետաքրքրուած թուի, գրքոյկը ներկայացուցէք եւ ուսումնասիրութիւն մը առաջարկեցէք։

◼ «Վերջին անգամ որ այցելեցի, ձեր քով ձգեցի ‘Պիտի Ըլլա՞յ Ժամանակ մը որ Բոլոր Մարդիկ Իրար Սիրեն’ խորագրով թերթիկը։ Անիկա ձրի՝ տան սուրբ գրային ուսումնասիրութեան առաջարկ մը կը պարունակէր։ Վերադարձայ ցոյց տալու համար ուսումնասիրութեան օժանդակող մեր գործածած գրականութիւնը։ [Ցոյց տուէք Գիտութիւն գիրքը։] Այս գիրքը յստակօրէն կը բացատրէ այն ժամանակին մասին, երբ բոլոր մարդիկ իրար պիտի սիրեն, ինչպէս նաեւ կը պատասխանէ ուրիշ հարցումներու, որոնց մասին թերեւս հարց տուած էք, զոր օրինակ՝ Ինչո՞ւ կը ծերանանք ու կը մեռնինք։ Աստուած ինչո՞ւ կը թոյլատրէ տառապանքը։ Ի՞նչ կը պատահի մեր սիրելի ննջեցեալներուն»։ Ապա հարցուցէք. «Կրնա՞մ ձեզի ցուցադրել ուսումնասիրութեան դասընթացքը»։ Եթէ տանտէրը մերժէ առաջարկը, հարցուցէք եթէ կը փափաքի գիրքը առանձին կարդալ։ Եթէ համաձայնի, օրինակ մը ձգեցէք իր քով եւ բացատրեցէք թէ Աստուածաշունչի երկրածաւալ դաստիարակչական մեր գործը յօժարակամ նուիրատուութեամբ կ’ընթանայ։ Ծրագրեցէք վերադառնալ։

⁷ Երբ թաղամասը լիովին ծածկուի Թագաւորութեան Լուրեր Թիւ 35 թերթիկով, կրնանք Գիտութիւն գիրքը ներկայացնել ամսուան մնացեալ օրերուն։ Այս գիրքը ներկայացնելու համար մօտեցումներ թելադրուած են Մեր Թագաւորութեան Ծառայութիւնը թերթիկին հետեւեալ համարներու վերջին էջերուն վրայ՝ Դեկտեմբեր 1995. Մարտ, Յունիս եւ Նոյեմբեր 1996. եւ Յունիս 1997։

⁸ Թագաւորութեան Լուրեր–ու այս մասնայատուկ բաշխումը մեզ պէտք է մղէ որ քարոզչութեան մէջ մեր ջանքերը աւելցնենք։ Կրնանք վստահ ըլլալ որ Եհովայի օգնութեամբ այս արշաւը իրապէս պիտի յաջողի, մարդոց օգնելով որ տեսնեն թէ Աստուծոյ նպատակն է որ բոլոր մարդիկ իրար սիրեն։ Թող Եհովան շարունակէ օրհնել մեր ժրաջան ջանքերը, մինչ Թագաւորութեան Լուրեր–ուն հանդէպ ցուցաբերուած հետաքրքրութիւնը կը հետապնդենք։