Եհովան Փառաբանեցէք Անպաշտօն Կերպով Վկայելով
1 Եհովայի հաւատարիմ ծառաները զինք ամէն օր փառաբանելու համար պատեհութիւններ կը փնտռեն։ (Սաղմ. 96։2, 3. Եբր. 13։15) Ասիկա ընելու կերպերէն մէկն է՝ անպաշտօն կերպով վկայելը։ Ներկայիս Եհովայի երկրպագուներէն շատեր շնորհապարտ են, որ անհատ մը անպաշտօն վկայութեան միջոցաւ Թագաւորութեան պատգամը իրենց ծանօթացուց։
2 Մէկու մը անպաշտօն կերպով վկայելը յաճախ ճամբան կը հարթէ որ ուրիշներ ալ Թագաւորութեան պատգամը լսեն։ Օրինակ, Յակոբի ջրհորին մօտ Սամարացի կնոջ մը հետ Յիսուսի խօսակցութիւնը, առիթ տուաւ որ շատեր բարի լուրով հետաքրքրուին։ (Յովհ. 4։6-30, 39-42) Մինչ Պօղոս եւ Շիղա Փիլիպպէի մէջ բանտարկուած էին, անոնք բանտապահին վկայեցին, եւ անոր ամբողջ ընտանիքը ճշմարտութիւնը ընդունեց։—Գործք 16։25-34
3 Պատեհութիւններ. Անպաշտօն կերպով վկայելու ի՞նչ պատեհութիւններ ունիք։ Ոմանք ասիկա կ’ընեն գնումի, հանրային փոխադրամիջոցը գործածելու կամ բժշկական ժամադրութեան սպասելու ատեն։ Ուրիշներ գործին կամ դպրոցին մէջ կրնան վկայել դադարներու ընթացքին։ Աստուածաշունչի վրայ հիմնուած մեր գրականութիւններէն մէկը աչքի զարնող տեղ մը դնելը կրնայ ուրիշները մղել որ մեր հաւատալիքներուն մասին հարցումներ հարցնեն։—Ա. Պետ. 3։15
4 Ի՛նչպէս Սկսիլ. Եօթը տարեկան ամչկոտ աղջնակ մը ժողովի մը մէջ լսեց թէ որքա՛ն կարեւոր է որ բոլորն ալ քարոզեն։ Ուստի երբ իր մօր հետ գնումի կ’երթար, ան իր պայուսակին մէջ երկու գրքոյկ դրաւ։ Մինչ մայրը վճարումը կ’ընէր, աղջնակը գրքոյկ մը ներկայացուց տիկինի մը, որ ազնուաբար ընդունեց զայն։ Երբ իրեն հարցուեցաւ թէ ի՛նչպէս քաջութիւն հաւաքեց տիկնոջ մօտենալու, այս ամչկոտ աղջնակը պատասխանեց. «Ես ինծի ըսի՝ Հանգիստ, Պատրաստ, Օ՛ն յառաջ։ Եւ գացի»։
5 Անպաշտօն կերպով վկայելու համար բոլորս այս աղջնակին հոգիին նման հոգի մը պէտք է ցուցաբերենք։ Ի՞նչ բան կրնայ մեզի օգնել։ Աղօթեցէք որ խօսելու քաջութիւնը ունենաք։ (Ա. Թես. 2։2) Ձեր մտքին մէջ ունեցէք հետաքրքրական նիւթի մը մասին հարցում մը կամ խօսք մը, որ կրնաք գործածել խօսակցութիւն մը սկսելու համար։ Ապա վստահեցէք թէ Եհովա ձեր ջանքերը պիտի օրհնէ։—Ղուկ. 12։11, 12
6 Ամէն օր մեր հանդիպած մարդոց անպաշտօն կերպով վկայելը, Եհովան կը փառաբանէ եւ մեզի ուրախութիւն կու տայ։ Անիկա կրնայ անհատի մը օգնել որ յաւիտենական կեանքի ճամբուն մէջ քալելու սկսի։