Խմբովին Վկայելը Ուրախութիւն կը Պատճառէ
1 Երբ 70 աշակերտներ քարոզելու ղրկեց, Յիսուս անոնց ուղղութիւն տուաւ թէ ի՛նչ ըսեն, զանոնք երկու–երկու բաժնեց եւ անոնց աշխատելիք թաղամասը սահմանեց։ Ասիկա իրենց ուրախութեան նպաստեց։ (Ղուկ. 10։1-17) Նոյնպէս այսօր, խմբովին վկայելը կ’օգնէ որ Աստուծոյ ժողովուրդը քարոզչութեան համար զինուի, կազմակերպուի եւ քաջալերուի։
2 Երէցները Առաջնորդութիւնը կ’Առնեն. Երէցները կենսական դեր մը կը խաղան բոլորին օգնելու մէջ որ քարոզչութեան կանոնաւոր մասնակցին։ Ծառայութեան տեսուչը շաբթուան ընթացքին ծառայելու կարգադրութիւնները ընելու մէջ առաջնորդութիւնը կ’առնէ։ Իւրաքանչիւր գրքի ուսումնասիրութեան տեսուչ պատասխանատու է իր խումբին գործունէութիւնը կազմակերպելու, յատկապէս շաբաթավերջերուն։ Երբ ամբողջ ժողովքը դաշտի ծառայութեան համար կը հաւաքուի, ինչպէս Դիտարան–ի Ուսումնասիրութենէն ետք, իւրաքանչիւր գրքի ուսումնասիրութեան տեսուչ իր խումբին կարիքներուն պէտք է հոգ տանի։
3 «Վայելչութեամբ եւ Կարգաւ». Դաշտի ծառայութեան ժողովը վարողը պէտք է ժամանակին սկսի, եւ ժողովը միայն 10 կամ 15 վայրկեան պէտք է տեւէ։ Լաւ կ’ըլլայ որ ան վկայութեան խմբակները կարգադրէ եւ թաղամասը նշանակէ (բացի եթէ գրքի ուսումնասիրութեան տեսուչները հոգ պիտի տանին ասոր, ինչպէս նախապէս նշուեցաւ), ժողովը աղօթքով փակելէ առաջ։ Ասիկա թաղամասին մէջ հրատարակիչներուն համախմբուելուն կարիքը կը նուազեցնէ, որ կրնայ մեր գործունէութեան արժէքը նսեմացնել։ Ասիկա նաեւ ներդաշնակ է Պօղոսի խրատին հետ. «Ամէն բան վայելչութեամբ եւ կարգաւ թող ըլլայ»։ (Ա. Կորն. 14։40) Այս ժողովներուն ներկայ գտնուող բոլոր անհատները այս կարգադրութեան յաջողութեան պէտք է նպաստեն, ճիշդ ժամանակին գալով, առաջնորդութիւնը առնողին հետ լիովին համագործակցելով, եւ ժողովէն ետք անմիջապէս թաղամաս ուղղուելով։
4 Իրարու Մօտենալ. Խմբովին վկայելու կարգադրութիւնները հոյակապ պատեհութիւն մը կը հայթայթեն մեզի, որ ժողովքին այլ անդամներուն ծանօթանանք։ Թէեւ արգելք չկայ որ կանխաւ մէկու մը հետ ծառայութեան կարգադրութիւն ընենք, սակայն կրնանք նաեւ օգուտներ քաղել, երբ դաշտի ծառայութեան ժողովներուն ներկայ գտնուիք առանց առաջուընէ կարգադրութիւններ ընելու։ Թերեւս նշանակուինք անհատի մը հետ աշխատելու, զոր լաւ չենք ճանչնար, եւ այսպիսով կրնանք ‘մեր սրտերը լայն բանալ’։—Բ. Կորն. 6։11-13
5 Խմբովին վկայելը մեզ կը քաջալերէ եւ որպէս ‘ճշմարտութեան գործակիցներ’ մեզ իրարու կը մօտեցնէ։ (Գ. Յովհ. 8) Թող որ անոր լիովին մասնակցինք։