Դաշտի ծառայութեան խումբէդ ինչպէ՛ս կրնաս օգտուիլ
1. Ժողովքի գիրքի ուսումնասիրութեան ո՞ր օգուտները տակաւին մատչելի են՝ մեր դաշտի ծառայութեան խումբին միջոցով։
1 Ժողովքի գիրքի ուսումնասիրութեան կարգ մը ազդակները կը փնտռե՞ս։ Խումբերը պզտիկ էին, միջավայրն ալ աւելի հանգիստ էր։ Ասիկա պատճառ կ’ըլլար որ դիւրութեամբ մշակէինք բարեկամութիւններ, որոնք մեզի կ’օգնէին մեր հաւատքը ամուր պահելու (Առ. 18։24)։ Գիրքի ուսումնասիրութիւնը վարողը մեր իւրայատուկ պարագաներէն տեղեակ ըլլալով, կրնար մեզ անձնապէս քաջալերել (Առ. 27։23. Ա. Պետ. 5։2, 3)։ Այս օգուտները տակաւին մատչելի են՝ մեր դաշտի ծառայութեան խումբին միջոցով։
2. Մեր դաշտի ծառայութեան խումբին մէջ, ինչպէ՞ս կրնանք նախաքայլը առնել մշակելու բարեկամութիւններ, որոնք կրնան մեր հաւատքը ամուր պահել։
2 Նախաքայլը առ։ Ընդհանուր առմամբ, դաշտի ծառայութեան խումբերը նախկին գիրքի ուսումնասիրութեան խումբերուն չափ են։ Ծառայութեան մէջ, «կողք կողքի» ուրիշներուն հետ աշխատիլը մտերիմ բարեկամութիւններ կը կերտէ (Փլպ. 1։27, ՆԱ)։ Քու խումբէդ քանի՞ հոգիի հետ աշխատած ես։ Կրնա՞ս այս առնչութեամբ ‘սիրտդ լայն բանալ’ (Բ. Կոր. 6։13)։ Ասկէ զատ, կրնանք ատեն–ատեն մեր խումբէն մէկը հրաւիրել որ մասնակցի մեր Ընտանեկան պաշտամունքին կամ մեզի հետ ճաշէ։ Կարգ մը ժողովքներու մէջ, դաշտի ծառայութեան խումբերը կարգով հիւրասիրութեան կարգադրութիւն կ’ընեն այցելու դասախօսին համար։ Իրենց նշանակուած շաբթուան մէջ, խումբը մէկտեղ կը հաւաքուի ճաշի եւ փոխադարձ քաջալերութեան համար, նո՛յնիսկ եթէ դասախօսը չի կրնար ներկայ ըլլալ։
3. Հովուութիւն ստանալու ի՞նչ կարգ մը պատեհութիւններ կան մեր դաշտի ծառայութեան խումբին մէջ։
3 Թէեւ այժմ ժողովքը շաբաթը միայն երկու անգամ կը հաւաքուի, ասիկա չի նշանակեր թէ հրատարակիչները աւելի պակաս հովուութիւն պիտի ստանան։ Խումբի տեսուչներէն իւրաքանչիւրը խումբի մը համար կը նշանակուի, որպէսզի ծառայութեան համար իւրաքանչիւր հրատարակիչի անձնական քաջալերութիւն եւ մարզում տայ։ Եթէ խումբիդ տեսուչը տակաւին քեզի հետ չէ ժամադրուած ծառայութեան ելլելու, ինչո՞ւ դուն իրմէ այս բանը չխնդրես։ Ասկէ զատ, ծառայութեան տեսուչը, ամէն ամիս մէկ շաբաթավերջ կը տրամադրէ տարբեր խումբի մը հետ ծառայելու համար։ Իսկ պզտիկ ժողովքներու մէջ, ուր միայն քանի մը դաշտի ծառայութեան խումբեր կան, ան կրնայ կարգադրութիւն ընել իւրաքանչիւր խումբ տարին երկու անգամ այցելելու։ Կրնա՞ս յայտագիրդ կարգի դնել, որպէսզի ծառայութեան մասնակցիս այն շաբաթը երբ ան քու խումբիդ հետ կ’աշխատի։
4. ա) Դաշտի ծառայութեան ժողովները ինչպէ՞ս կը կազմակերպուին։ բ) Ինչո՞ւ մեր տունը հաւաքավայրերուն համար տրամադրելը նկատի պէտք է առնենք։
4 Յաճախ, օգտաշատ է որ իւրաքանչիւր խումբ առանձին հաւաքուի շաբաթավերջը՝ դաշտի ծառայութեան համար։ Գրեթէ միեւնոյն ատեն զանազան հաւաքավայրեր ունենալը կրնայ պատճառ դառնալ, որ հրատարակիչները աւելի դիւրութեամբ երթան իրենց խումբերը կամ թերեւս թաղամասերը։ Այսպէս՝ հրատարակիչները կրնան աւելի արագ կերպով կազմակերպուիլ եւ անմիջապէս ուղղուիլ դէպի թաղամաս։ Խումբի տեսուչին համար ալ դիւրին կ’ըլլայ, որ իր հոգատարութեան ներքեւ եղողներով մօտէն հետաքրքրուի։ Սակայն, պարագաներու բերումով, թերեւս աւելի յարմար ըլլայ որ երկու կամ աւելի խումբեր իրարու միանան։ Եթէ ամբողջ ժողովքը ծառայութեան համար մէկտեղ կը հաւաքուի ամսուան առաջին շաբաթ օրը կամ Դիտարան–ի ուսումնասիրութենէն ետք, յաճախ աւելի օգտակար է, որ իւրաքանչիւր խումբ միատեղ նստի եւ խումբի տեսուչներուն քանի մը վայրկեան տրամադրուի, որ իրենց խումբերը կազմակերպեն, առաջ որ դաշտի ծառայութեան ժողովը եզրափակուի աղօթքով (տե՛ս շրջանակը՝ «Կրնա՞ս տունդ տրամադրել»)։
5. Ժողովքի գիրքի ուսումնասիրութեան կարգադրութիւնը դադրած ըլլալով հանդերձ, ի՞նչ բանէ կրնանք վստահ ըլլալ։
5 Ժողովքի գիրքի ուսումնասիրութեան կարգադրութիւնը դադրած ըլլալով հանդերձ, Եհովան կը շարունակէ մատակարարել ամէն բան, որուն կարիքը ունինք իր կամքը կատարելու համար (Եբ. 13։20, 21)։ Եհովայի հոգատարութեան ներքեւ ըլլալով, բանի մը կարօտութիւնը չունինք (Սաղ. 23։1)։ Մեր դաշտի ծառայութեան խումբին միջոցով՝ բազմաթիւ օրհնութիւններ կը վայելենք։ Եթէ նախաքայլը առնենք եւ ‘առատութեամբ սերմանենք’՝ ‘առատութեամբ պիտի հնձենք’ (Բ. Կոր. 9։6)։
[Շրջանակ՝ էջ 6]
Կրնա՞ս տունդ տրամադրել
Կարգ մը ժողովքներ շաբաթավերջերը ծառայութեան խումբերը իրարու կը միացնեն, քանի որ քիչ տուներ կ’ըլլան հանդիպումի համար։ Դաշտի ծառայութեան ժողովները ժողովքային կարգադրութեան մէկ մասն են, ուստի զանոնք մեր տան մէջ ունենալը ի՛րապէս առանձնաշնորհում է։ Կրնա՞ս տունդ տրամադրել։ Եթէ համեստ տուն մը ունիս, մի՛ տատամսիր առաջարկելու, որովհետեւ երէցները նկատի պիտի առնեն տանդ վայրը եւ ուրի՛շ ազդակներ, զորոնք նկատի կ’առնէին գիրքի ուսումնասիրութեան վայրեր ընտրելու ատեն։ Եթէ կը փափաքիս տունդ տրամադրել, խումբի տեսուչդ տեղեկացուր։