«Յաւիտենական Կեանքի Տրամադիր» Եղողներուն Օգնեցէք
1. Եհովա մեր օրերուն որո՞նք կը հաւաքէ։
1 Իւրաքանչիւր անհատ իր այլաբանական սիրտին մէջ արմատացած հակում մը ունի։ (Մատթ. 12։35) Աստուածաշունչը կը խօսի անհատի մը մասին, որուն «սրտին մէջ պատերազմ կայ»։ (Սաղմ. 55։21) Ոմանք «ցասկոտ» են։ (Առ. 29։22) Բայց կան նաեւ անոնք որ «յաւիտենական կեանքի սահմանուած [«տրամադիր», ՆԱ]» են։ (Գործք 13։48) Եւ մեր օրերուն, Եհովա զանոնք կը հաւաքէ։ (Անգ. 2։7) Ի՞նչպէս կրնանք անոնց օգնել որ Եհովայի երկրպագուներ ըլլան։
2. Աշակերտելու մեր յանձնարարութիւնը կատարելու համար ի՞նչ բան անհրաժեշտ է։
2 Խղճմտօրէն Վերադարձէք. Աշակերտելու մեր յանձնարարութիւնը կատարելու համար, կենսական է վերայցելութիւններ ընելու նկատմամբ շիտակ տեսակէտը ունենալ։ (Մատթ. 28։19, 20) Մեր գտած հետաքրքրութիւնը շուտով կը հետապնդե՞նք։ Գրականութիւն ընդունող կամ բարի լուրին հանդէպ հետաքրքրութիւն յայտնող բոլոր անհատներուն կը վերայցելե՞նք։ Անոնց հոգեւոր աճման նպաստելու մեր ջանքերուն մէջ կը յարատեւե՞նք։ Որովհետեւ մարդոց կեանքը խնդրոյ առարկայ է, պէտք է ջանանք մեր գտած հետաքրքրութիւնը մշակել։
3. Ծառայութեան մէջ մէկու մը խօսելէ ետք, ի՞նչ պէտք է ընենք։
3 Հետաքրքրուած անհատի մը հետ ձեր ունեցած խօսակցութիւնը մինչ տակաւին ձեր միտքին մէջ թարմ է, անոր անունն ու հասցէն գրի առէք։ Նոթագրեցէք ձեր խօսակցութեան նիւթը, կարդացուած համարները եւ ներկայացուած գրականութիւնը։ Ապա վճռեցէք կարելի եղածին չափ շուտ վերադառնալ։
4. Ի՞նչպէս կրնանք ազդու վերայցելութիւններ ընել։
4 Վերայցելութիւն մը Ընել. Երբ վերայցելութիւն մը կ’ընէք, լաւ կ’ըլլայ որ ջերմ ու բարեկամական ըլլաք ու տանտիրոջ հանդէպ անկեղծ հետաքրքրութիւն ցուցաբերէք։ Խօսակցութիւնը պարզ եւ սուրբ գրային նիւթի մը շուրջ պահեցէք։ Աստուածաշունչէն նկատի առնուելիք գրաւիչ նիւթ մը պատրաստեցէք, իսկ այցելութեան աւարտին հարցում մը հարցուցէք, որուն կարելի է պատասխանել յաջորդ այցելութեան։ Խուսափեցէք տանտիրոջ յիշած սուրբ գրային չեղող տեսակէտներուն մասին անհարկիօրէն վիճելէ։ Ջանացէք հասարակաց եղող բաներուն վրայ կերտել։—Կող. 4։6
5. Ռահվիրայ մը ի՞նչ ջանք թափեց, եւ ի՞նչ արդիւնք ձեռք ձգեց։
5 Վերայցելութիւններ ընելը ջանք կը պահանջէ, բայց վարձատրութիւնները գոհացուցիչ են։ Ճափոնի մէջ ռահվիրայ մը ամէն ամիս յաւելեալ վերայցելութիւններ ընելու նպատակակէտ դրաւ։ Ան տունէ տուն ծառայութեան ընթացքին իր հանդիպած բոլոր անհատներուն մասին արձանագրութիւն մը պահեց, եւ եօթը օրուան մէջ անոնց դարձեալ այցելեց։ Ան իր ըսելիքը լաւ պատրաստեց եւ իր կրած պատգամին հանդէպ լման վստահութիւն ցուցաբերեց։ Իր այցելութիւններէն մէկուն ընթացքին, ան կրցաւ ուսումնասիրութիւն մը սկսիլ անհատի մը հետ որ ըսած էր. «Ես մի՛շտ մերժած էի ձեզ ընդունիլ։ Ասիկա առաջին անգամն է որ ձեզի մտիկ կ’ընեմ»։ Ռահվիրային սիրալիր յարատեւութիւնը լաւ արդիւնք տուաւ։ Ամսուան վերջաւորութեան ան Աստուածաշունչի տասը ուսումնասիրութիւններ տեղեկագրեց։
6. Վերայցելութիւններ ընելու մէջ ինչո՞ւ պէտք է յարատեւենք։
6 Մարդոց պարագաները յարափոփոխ են։ (Ա. Կորն. 7։31) Յաճախ քանի մը անգամ պէտք է փորձենք, որպէսզի հետաքրքրուած անհատը դարձեալ տունը գտնենք։ Խղճմտօրէն վերայցելութիւններ ընելով, կրնանք յաւիտենական կեանքի տրամադիր եղողներուն օգնել որ դէպի կեանք տանող ճամբուն մէջ սկսին քալել։—Մատթ. 7։13, 14