Յիշատակատօնի Շրջանը՝ Յաւելեալ Գործունէութեան Ժամանակ Է

1. «Տօները» ի՞նչ ազդեցութիւն ունէին աստուածավախ Իսրայելացիներուն վրայ։

¹ Տարուան որոշ ժամանակներուն, վաղեմի Իսրայելացիները «Տէրոջը տօները» կը տօնակատարէին։ (Ղեւտ. 23։2) Իրենց Աստուծոյն բարութեան մասին խոկալու համար ժամանակ տրամադրելը, զիրենք մեծապէս կ’ուրախացնէր եւ կը մղէր մաքուր պաշտամունքին համար նախանձախնդիր ըլլալու։—Բ. Մնաց. 30։21–31։2

2, 3. Ինչո՞ւ տեղին է որ Յիշատակատօնի շրջանին մեր հոգեւոր գործունէութիւնը աւելցնենք, իսկ Յիշատակատօնը ե՞րբ պիտի տօնակատարենք։

² Արդի ժամանակներուն, մեր բերկրալի աստուածպետական գործունէութիւնը կ’աւելնայ Յիշատակատօնի շրջանին։ Ասիկա ժամանակ մըն է, երբ լրջօրէն կը խոկանք Եհովայի տուած անգին պարգեւին մասին,– իր միածին Որդին։ (Յովհ. 3։16. Ա. Պետ. 1։18, 19) Մինչ Աստուծոյ ու իր Որդիին ցուցաբերած սիրոյն մասին կը խորհրդածենք, կը մղուինք Եհովան փառաբանելու եւ իր կամքը կատարելու մէջ մեր լաւագոյնը ընելու։—Բ. Կորն. 5։14, 15

³ Այս տարի Տէրունական Ընթրիքը պիտի տօնակատարուի Հինգշաբթի՝ Մարտ 24–ին, արեւնամուտէն ետք։ Ի՞նչպէս կրնանք Մարտ, Ապրիլ եւ Մայիս ամիսներու ընթացքին ծառայութեան մէջ մեր մասնակցութիւնը աւելցնել։

4, 5. (ա) Ի՞նչ բան ոմանց օգնած է որ բարի լուրը աւելի մեծ թիւով անհատներու հասցնեն։ (բ) Ի՞նչ բան թաղամասիդ մէջ գործնական գտած ես։

⁴ Բազմաթիւ Մարդոց Քարոզել. Երբ դաշտի ծառայութեան մէջ ես, կարելի եղածին չափ շատ մարդոց հասնելու կերպեր փնտռէ։ Կրնա՞ս դռնէ դուռի գործունէութեան մասնակցիլ, երբ մարդիկ տունն են, օրինակ՝ ուշ յետմիջօրէին կամ երեկոյեան։ Եթէ գիրքի ուսումնասիրութեան խումբէդ ոմանք կը փափաքին ժողովէն առաջ ծառայութեան մասնակցիլ, թերեւս գիրքի ուսումնասիրութեան տեսուչը կարգադրէ ծառայութեան կարճ ժողով մը, որպէսզի մօտակայ թաղամասի մը մէջ ծառայէք։

⁵ Հանրային վայրերու մէջ վկայելը, աւելի մեծ թիւով մարդոց հասնելու այլ կերպ մըն է։ Ճափոնի մէջ լիաժամ գործ ունեցող քոյր մը ուզեց օժանդակ ռահվիրայութիւն ընել։ Երէց մը թելադրեց որ ամէն օր գործի չգացած, շոգեկառքի կայարանի մը մօտ փողոցի վկայութիւն ընէ։ Իր երկչոտութիւնը եւ անցորդներուն հեգնանքը յաղթահարելէ ետք, ան սկսաւ շուրջ 40 անհատներու կանոնաւորաբար պարբերաթերթ տալ, ի ներառեալ գործի գացող–եկողներ, կայարանը աշխատողներ եւ խանութպաններ։ Ան ամիսը միջին հաշուով 235 պարբերաթերթ տեղաւորեց։ Ամէն օր քանի մը վայրկեան մարդոց հետ աստուածաշնչական կէտերու շուրջ խօսելով, ան կրցաւ Աստուածաշունչի վեց ուսումնասիրութիւններ հաստատել։

6. Դեռատիները ի՞նչպէս կրնան իրենց հոգեւոր գործունէութիւնը աւելցնել։

⁶ Վկայելու Պատեհութիւններ. Դպրոց յաճախող հրատարակիչները տարուան ընթացքին արձակուրդներ կ’ունենան։ Ասոնք օժանդակ ռահվիրայութեան համար նպաստաւոր ժամանակներ կրնան ըլլալ։ Ասկէ զատ, Քրիստոնեայ պատանիները կրնան իրենց գործունէութիւնը աւելցնել, դպրոցին մէջ վկայելով։ Դասընկերներդ կրնան շա՜տ հետաքրքիր ըլլալ հաւատալիքներուդ նկատմամբ։ Ինչո՞ւ չօգտագործես աշակերտական զրոյցները, տեղեկագրութիւնները կամ շարադրութիւնները, վկայութիւն մը տալու համար։ Շատեր ասիկա ըրած են՝ մեր տեսաերիզները գործածելով։ Ոմանք դասընկերներու հետ Աստուածաշունչի ուսումնասիրութիւններ սկսած են եւ անոնց օգնած են որ յառաջդիմեն մինչեւ նուիրում ու մկրտութիւն։ Ասոնք ‘Տէրոջը անունը օրհնելու’ հոյակապ կերպեր են։—Սաղմ. 148։12, 13

7. (ա) Եղբայր մը ի՞նչպէս ուրիշներու վկայելու պատեհութիւնները օգտագործած է։ (բ) Նման փորձառութիւն մը ունեցա՞ծ ես։

⁷ Առօրեայ գործունէութիւններուդ ընթացքին, մեր սքանչելի Աստուծոյն ու իր հոյակապ խոստումներուն մասին մարդոց խօսելու կերպեր փնտռէ։ Եղբայր մը որ ամէն օր նոյն շոգեկառքերը կը գործածէ, ճամբորդներուն կը վկայէ երբ յարմար է։ Օրինակ, մինչ կայարանի մը մէջ իր յաջորդ շոգեկառքին կը սպասէր, ան երիտասարդի մը կը վկայէր, ամէն օր շուրջ հինգ վայրկեան։ Որպէս արդիւնք, երիտասարդը եւ իր գործակիցը ընդունեցին Աստուածաշունչը ուսումնասիրել։ Աստուածաշունչի ուսումնասիրութիւնը կը վարուէր շոգեկառքին մէջ, ճամբորդութեան ընթացքին։ Ժամանակ մը ետք, պառաւ մը որ անոնց խօսակցութեան ականջ կու տար, եղբօր մօտեցաւ ու խնդրեց Աստուածաշունչի ուսումնասիրութիւն մը։ Ան ալ իր ուսումնասիրութիւնը կը վայելէ այդ օրերուն որ շոգեկառքը կը գործածէ։ Այս կերպով, եղբայրը շոգեկառքին մէջ տասը հոգիներու հետ ուսումնասիրած է։

8. Ծառայութեան ո՞ր երեսակը կրնայ յառաջացած տարիք կամ առողջապահական խնդիրներ ունեցողներուն օգնել որ ծառայութեան մէջ իրենց մասնակցութիւնը աւելցնեն։

⁸ Ի՞նչ կրնաս ընել եթէ յառաջացած տարիքի կամ առողջապահական խնդիրներու պատճառով սահմանափակ կարողութիւն ունիս։ Թերեւս տակաւին կան կերպեր, որոնցմով կրնաս ա՛լ աւելի Եհովան փառաբանել։ Հեռախօսով վկայելը փորձա՞ծ ես։ Եթէ այս մարզին մէջ անփորձ ես, կրնաս գիրքի ուսումնասիրութեան տեսուչին օգնութիւնը խնդրել։ Ան թերեւս կարգադրէ որ այս մեթոտը գործածող հրատարակիչներ քեզի հետ համագործակցին։ Միասնաբար աշխատելով կրնաք իրարմէ սորվիլ ու իրարու օգնել որ ազդու վկայութիւն մը տաք։ Հեռախօսով վկայելու մասին օգտակար թելադրութիւններ կրնաս գտնել՝ Փետրուար 2001–ի Մեր Թագաւորութեան Ծառայութիւնը թերթիկին մէջ, էջ 5-6։

9. Ի՞նչպէս կրնանք Աստուածաշունչի աշակերտներուն օգնել որ ժողովքին հետ հանրային ծառայութեան մասնակցելու որակեալ ըլլան։

⁹ Յիշատակատօնին ներկայ գտնուիլը կրնայ նորեկները խթանել որ ուզեն Եհովան աւելի փառաբանել։ Կրնաս անոնց օգնել պաշտօնական ծառայութեան մասնակցելու նկատմամբ որեւէ վախ յաղթահարելու, դաշտի ծառայութեան դրական փորձառութիւններ պատմելով եւ զիրենք աստիճանաբար մարզելով որ կարենան Աստուածաշունչի ուսուցումները բացատրել ու իրենց հաւատքը պաշտպանել։ (Ա. Պետ. 3։15) Եթէ Աստուածաշունչի աշակերտդ կ’ուզէ հրատարակիչ ըլլալ, վերակացու տեսուչին հետ խօսիր։ Ան աշակերտին հետ հանդիպում մը պիտի կարգադրէ, որոշելու համար թէ ան ժողովքին հետ հանրային ծառայութեան մասնակցելու որակեա՛լ է կամ ոչ։ Վստահաբար Եհովայի սիրտը կ’ուրախանայ, տեսնելով որ նորեկներ տիեզերական հարցին մէջ իր կողմը դիրք կը բռնեն։—Առ. 27։11

10. (ա) Լաւ յայտագիր ունենալը ի՞նչպէս կ’օգնէ մեզի օժանդակ ռահվիրայութիւն ընելու։ (բ) Անցեալ տարի Յիշատակատօնի շրջանին կրցա՞ր օժանդակ ռահվիրայ ըլլալ։ Ի՞նչպէս։

¹⁰ Կրնա՞ս Օժանդակ Ռահվիրայ Ըլլալ. Օժանդակ ռահվիրայութեան 50 ժամի պահանջը լուրջի պէտք է առնուի։ (Մատթ. 5։37) Ասիկա կը նշանակէ թէ ամէն շաբաթ միջին հաշուով 12 ժամ պէտք է յատկացնես դաշտի ծառայութեան։ Էջ 5–ի վրայ գտնուող օժանդակ ռահվիրայութեան յայտագրի նմոյշներէն մէկը պարագաներուդ կը յարմարի՞։ Եթէ ոչ, կրնա՞ս յայտագիր մը պատրաստել, որ քեզ կարող կը դարձնէ Մարտ, Ապրիլ կամ Մայիս ամիսներուն օժանդակ ռահվիրայութիւն ընելու։ Եհովայէ խնդրէ որ ծառայութիւնդ աւելցնելու համար տարած ջանքերդ օրհնէ։—Առ. 16։3

11. Երէցներն ու օգնական ծառաները ի՞նչպէս կրնան թիկունք կանգնիլ անոնց որ պիտի ծառայեն իբրեւ օժանդակ ռահվիրայ։

¹¹ Երէցներն ու օգնական ծառաները լիովին պիտի աջակցին քեզի, որպէսզի այս Յիշատակատօնի շրջանին մասնայատուկ կերպով Եհովան փառաբանես։ Շատ հաւանաբար, անոնցմէ շատեր օժանդակ ռահվիրայութեան պիտի ձեռնարկեն։ Երէցները ծառայութեան յաւելեալ ժողովներ պիտի կարգադրեն, ինչպէս՝ ուշ յետմիջօրէին, շաբաթամէջի երեկոներուն եւ շաբաթավերջերուն, ի պահանջել հարկին։ Որպէսզի կարենան որոշել թէ այս ժողովները ո՛ւր եւ ե՛րբ պիտի ըլլան եւ որո՛նք առաջնորդութիւնը պիտի առնեն, երէցները պիտի խօսին անոնց հետ որ ռահվիրայութիւն ընելու հաստատ ծրագիրներ ըրած են կամ ընելու վրայ են։ Երէցները պիտի ջանան կարգադրութիւնները այնպէս մը ընել, որ ծառայութեան համար տրամադրած օրերուդ եւ ժամերուդ, ուրիշ հրատարակիչներ ալ մատչելի ըլլան։ Այս կերպով, ծրագիրները կրնան հաստատուիլ եւ շատ օգուտներ կրնան քաղուիլ։—Առ. 20։18

12. Ի՞նչ բան մեզ կը մղէ որ ամէն ժամանակ Եհովան փառաբանենք։

¹² Լաւագոյնդ Ըրէ. Եթէ պարագաներդ թոյլ չեն տար քեզի որ օժանդակ ռահվիրայութիւն ընես, մի՛ մոռնար որ Եհովա կ’ընդունի մեր ըրած ջանքերն ու զոհողութիւնները՝ ‘մեր ունեցածին չափովը ու ոչ թէ չունեցածին չափովը’։ (Բ. Կորն. 8։12) Եհովայի շնորհակալութիւն յայտնելու շա՜տ պատճառներ ունինք։ Տեղին ըլլալով Դաւիթ գրեց. «Ամէն ժամանակ Տէրը պիտի գովեմ։ Անոր գովութիւնը միշտ իմ բերանս պիտի ըլլայ»։ (Սաղմ. 34։1) Թող մեր վճռակամութիւնն ալ ասիկա ըլլայ՝ այս Յիշատակատօնի շրջանին։

[Շրջանակ՝ էջ 3]

Գործունէութիւնդ Ի՞նչպէս Պիտի Աւելցնես

◼ Քարոզէ երբ մարդիկ տունն են

◼ Հանրային վայրերու մէջ վկայէ

◼ Գործատեղին կամ դպրոցին մէջ վկայէ

◼ Հեռախօսով վկայէ

◼ Օժանդակ ռահվիրայութեան մասնակցիր