Ընտանեկան յայտագիր՝ ընտանեկան դաշտի ծառայութիւն
1 Եհովա կ’ուրախանայ երբ դեռատիները իր անունը փառաբանեն։ (Սաղմ. 148։12, 13) Յիսուսի օրերուն նոյնիսկ ‘երախաներ ու ծծկերներ Աստուած գովաբանեցին’։ (Մատթ. 21։15, 16, ԱՎ) Նոյնը տեղի կ’ունենայ այսօր։ Ծնողնե՛ր, ի՞նչպէս կրնաք ձեր զաւակներուն օգնել որ քրիստոնէական ծառայութեան մէջ նախանձախնդրաբար Եհովան փառաբանեն։ Դարձեալ, ինչպէս վերի յօդուածը շեշտեց, օրինակդ գլխաւոր ազդակ մըն է։ Հայր մը բոլոր ծնողներուն բերնով խօսելով՝ ըսաւ. «Երախաները ձեր ըսածին պէս չեն ըներ. անոնք ձեր ըրածին պէս կ’ընեն»։
2 Աստուածավախ ծնողներու հոգատարութեան ներքեւ մեծցած քոյր մը մտաբերեց. «Բնաւ չէ պատահած որ Շաբաթ առաւօտ մը արթննայինք ու հարցնէինք թէ արդեօք ծառայութեան պիտի երթայի՛նք կամ ոչ։ Գիտէինք որ պիտի երթայինք»։ Դուն ալ կրնաս զաւակներուդ մէջ քարոզչութեան գործին կարեւորութիւնը դրոշմել, ընտանեօք դաշտի ծառայութեան մասնակցելու շաբաթական սովորութիւն հաստատելով։ Ասիկա ո՛չ միայն զաւակներուդ թոյլ կու տայ որ քեզ դիտելով սորվին, այլեւ՝ քեզ կարող կը դարձնէ որ անոնց տեսակէտը, նիստուկացը եւ մշակած հմտութիւնները նկատես։
3 Աստիճանական մարզում. Որպէսզի երախաները ծառայութենէն հաճոյք առնեն, պատրաստուած պէտք է ըլլան ազդուօրէն անոր մասնակցելու։ Վերոյիշեալ քոյրը նաեւ ըսաւ. «Մենք պարզապէս ակամայ ընկերակցողներ չէինք մեր ծնողներուն՝ իրենց գործին մէջ։ Գիտէինք որ բաժին ունէինք, նոյնիսկ եթէ անիկա ըլլար զանգը զարնել կամ թերթիկ մը տալ։ Ամէն շաբաթավերջի գործունէութիւններու համար բծախնդրօրէն նախապատրաստուելով, գիտէինք թէ ի՛նչ պիտի ըսէինք»։ Կրնաս նոյնպէս զաւակներդ մարզել, ամէն շաբաթ քանի մը վայրկեան տրամադրելով՝ զանոնք ծառայութեան պատրաստելու համար, կա՛մ ընտանեկան ուսումնասիրութեան ընթացքին եւ կամ ուրիշ ատեն։
4 Ընտանեօք քարոզելը քեզի յաւելեալ պատեհութիւն կու տայ որ ճշմարտութիւնը զաւակներուդ մէջ քանդակես։ Քրիստոնեայ հայր մը իր աղջնակը իրեն հետ կը տանէր, երբ մօտակայ ձորին մէջ գտնուող գիւղացիներուն թերթիկներ բաշխելու համար, երթուդարձ 20 քմ. ճամբայ կը կտրէր։ Աղջիկը կաթոգին մտաբերեց. «Քալելու այդ պահերուն էր որ հայրս ճշմարտութիւնը քանդակեց սիրտիս մէջ»։ (Բ. Օր. 6։7) Կը մաղթենք որ նմանապէս օրհնուիս, դաշտի ծառայութիւնը ընտանիքիդ շաբաթական յայտագրին մէկ մասը ընելով։