Թագաւորութեան Սրահներու շինարարութիւն՝ սրբազան ծառայութեան կարեւոր մէկ երեսակը
1. Թագաւորութեան Սրահներու շինարարութեան առնչութեամբ ի՞նչ իրագործուած է, բայց տակաւին ի՞նչ կարիք կայ։
1 Միացեալ Նահանգներու մասնաճիւղի թաղամասին մէջ, վերջին հինգ տարիներու ընթացքին, 633 Թագաւորութեան Սրահներ կառուցուած են, 1,193 սրահներ վերաշինուած են, եւ 1,785 սրահներ նորոգուած են։ Շրջանային Շինարարական Յանձնախումբերու եւ անոնց աջակցող բոլոր անհատներուն ծանր աշխատանքը խորապէս կը գնահատենք։ Թէեւ հսկայ աշխատանք տարուած է, սակայն տակաւին բազմաթիւ Թագաւորութեան Սրահներ կառուցանելու կարիք կայ։ Ի՞նչպէս կրնանք Եհովայի մատուցած մեր սրբազան ծառայութեան այս կարեւոր երեսակին թիկունք կանգնիլ։—Յայտ. 7։15
2. Ի՞նչպէս կրնանք Թագաւորութեան Սրահներու շինարարութեան ուղղակի թիկունք կանգնիլ։
2 Յօժարակա՛մ եղիր. Եթէ մկրտուած հրատարակիչ մըն ես, քեզ կը հրաւիրենք որ դուն քեզ մատչելի դարձնես՝ Շրջանային Շինարարական Յանձնախումբի հետ աշխատելու, Թագաւորութեան Սրահի կամաւորներու հարցարան–ը լեցնելով։ (Սաղմ. 110։3) Բոլոր կամաւորները յօժարակամ աշխատողներ պէտք է ըլլան եւ համագործակցութեան հոգի ունենան։ (Սաղմ. 133։1) Նոյնիսկ եթէ շինարարական հմտութիւններ չունիս, կրնա՛ս շինարարական ծրագրի մը յաջողութեան նպաստել եւ որոշ մարզում ստանալով՝ ապագային աւելի պիտանի դառնալ։
3. Ուրիշ ի՞նչ կերպերով կրնանք այս կարգադրութեան թիկունք կանգնիլ։
3 Եթէ կամաւոր մը ըլլալու կարող չես, կրնաս այս կարգադրութեան մասնակցելու կարելիութիւն ունեցողները քաջալերել ու ճամբորդողներուն ժողովքային նշանակումներուն հոգ տանելու նպաստել։ Երէցները կանխաւ ծրագրելով վստահ կ’ըլլան թէ ժողովքին լաւ հոգ պիտի տարուի, երբ ոմանք Թագաւորութեան Սրահի մը շինարարութեամբ պիտի զբաղին։ Անկասկած Եհովա կը հաճի երբ միասնաբար կ’աշխատինք՝ Թագաւորութեան շահերը յառաջ տանելու համար։—Եբր. 13։16
4. Թագաւորութեան Սրահներու շինարարութեան մասնակցողներուն հանդէպ ի՞նչպէս կրնանք դրական կեցուածք ցուցաբերել։
4 Դրակա՛ն եղիր. Պաշտամունքի վայրեր կառուցանելը շատ ժամանակ ու ծանր աշխատանք կը պարփակէ։ Ուստի հասկնալի է որ շինարարական ծրագրի մը աջակցելու հրաւիրուած անհատները, երբեմն իրենց ժողովքէն հեռու պիտի ըլլան։ Թող շինարարութեան մասնակցող կամաւորները գովելու եւ քաջալերելու մէջ արագ ըլլանք, որոնք այս անհրաժեշտ «գործին» հոգ տանելու համար զոհողութիւններ կ’ընեն։—Գործք 6։3. Հռովմ. 14։19
5. Կամաւորները ի՞նչպէս կրնան հաւասարակշռութիւն ցոյց տալ։
5 Հաւասարակշռուա՛ծ եղիր. Աստուծոյ Թագաւորութեան մասին քարոզելը մեր աստուածպետական գլխաւոր գործունէութիւնն է։ (Մար. 13։10) Ասիկա ի մտի ունենալով, Շրջանային Շինարարական Յանձնախումբը կը ջանայ կառուցման ծրագիրները այնպէս մը յայտագրել, որ կամաւորները անհարկիօրէն իրենց ժողովքներէն հեռու չըլլան։ Իսկ կամաւորներն ալ կը ջանան հաւասարակշռուած կերպով իրենց պատասխանատուութիւններուն հոգ տանիլ։ Անոնք նախաքայլը կ’առնեն վստահ ըլլալու թէ իրենց ժողովքային նշանակումներուն հոգ պիտի տարուի, երբ բացակային։
6. Երբ ժողովքի բոլոր անդամները իրարու հետ համագործակցին՝ ճշմարիտ պաշտամունքը յառաջ տանելու համար, ի՞նչ բան կ’իրագործուի։
6 Պօղոս առաքեալ ժողովքին անդամները նկարագրելով ըսաւ թէ անոնք միութեամբ կ’աշխատին, որպէսզի ‘մարմինը աճի սիրոյ մէջ՝ իր շինութեան համար’։ (Եփ. 4։16) Եհովայի ու ճշմարիտ պաշտամունքին հանդէպ սէրը մեզ կը մղէ որ իրարու հետ համագործակցինք, բարի լուրը քարոզելու եւ Թագաւորութեան Սրահներու շինարարութեան թիկունք կանգնելու համար։