Աստուածաշունչի անձնական եւ ընտանեկան ուսումնասիրութիւնը կենսական են
1. Կառավարիչ մարմինը յատկապէս ի՞նչ բանով հետաքրքրուած է եւ ինչո՞ւ։
1 Ինչպէս առաջին դարուն՝ նոյնպէս ներկայիս, Կառավարիչ մարմինը Եհովայի ժողովուրդին բարօրութեամբ խորապէս հետաքրքրուած է (Գործք 15։6, 28)։ Մինչ մեծ նեղութեան սեւ ամպերը կը մօտենան, կենսական է որ Թագաւորութեան իւրաքանչիւր հրատարակիչ Եհովայի հետ զօրաւոր յարաբերութիւն ունենայ։ Ժողովքի գիրքի ուսումնասիրութեան նախապէս յատկացուած ժամանակը ի՞նչպէս պիտի գործածես։ Բոլորիս քաջալերութիւն տրուած է որ այս ժամանակը ընտանեկան պաշտամունքի համար գործածենք։ Այս ժամանակը իմաստութեամբ գործածելը թոյլ պիտի տայ որ Աստուծոյ ներշնչեալ Խօսքին խորը թափանցենք եւ անոր կենսատու ջուրերէն խմենք (Սաղ. 1։1-3. Հռով. 11։33, 34)։
2. Ընտանեկան պաշտամունքի երեկոն ի՞նչպէս կարելի է կարգադրել։
2 Ընտանեկան պաշտամունքի երեկոյ։ Ընտանիքի գլուխին քաջալերութիւն կը տրուի որ Եհովայի առջեւ իր պատասխանատուութիւնը կրէ, վստահ ըլլալով թէ Աստուածաշունչի ընտանեկան ուսումնասիրութեան իմաստալից ու կանոնաւոր ծրագիր մը հաստատուած է (Բ. Օր. 6։6, 7)։ Ընտանեկան պատասխանատուութիւններ չունեցող ամուրի եղբայրներն ու քոյրերը պիտի կարենան այս ժամանակը օգտագործել Աստուածաշունչի անձնական ուսումնասիրութեան ու պրպտում ընելու համար։ Էական է որ բոլորս ալ ‘ժամանակը ծախու առնենք’՝ սերտելու եւ խոկալու համար, որպէսզի ‘չար օրերը’ դիմագրաւելու հարկ եղած հոգեւոր զօրութիւնը ունենանք (Եփ. 5։15, 16)։
3, 4. Ի՞նչ նիւթեր կրնանք գործածել եւ ի՞նչ նպատակով։
3 Ի՛նչ ուսումնասիրել։ Դիտարանի հրատարակութիւններու նիւթերու ցանկ–ը կամ Դիտարանի գրադարան խորագրով խտասկաւառակը կրնայ քեզի օգնել տեղեկութիւններ գտնելու, որոնք Աստուածաշունչի ուսումնասիրութեան պահերը հաճելի պիտի դարձնեն։ Ընտանիքներ Դիտարան–ի յօդուածներ կրնան նկատի առնել, ինչպէս՝ «Ընտանեկան երջանկութեան բանալիներ», «Զաւակներուդ սորվեցուր» եւ «Մեր դեռատիներուն համար»։ Նաեւ, Զարթի՛ր–ը կը բովանդակէ «Պատանիները կը հարցնեն» յօդուածաշարքը եւ ստեղծագործութեան սքանչելիքներուն մասին գրաւիչ յօդուածներ։
4 Աստուածաշունչը առանց աճապարելու ընթերցելը կրնայ ընտանիքի բոլոր անդամներուն մտքին ու սրտին մէջ աստուածային սկզբունքներ ու դասեր դրոշմել (Եբ. 4։12)։ Այլ առիթներով, կրնաք կազմակերպութեան արտադրած պատկերիզներէն մէկը դիտել ու քննարկել։ Ի՛նչ եւ ի՛նչպէս սերտելու նկատմամբ հնարամտութիւն գործածելու բազմաթիւ պատեհութիւններ ունինք։ Ինչո՞ւ ընտանիքիդ անդամներուն չհարցնես թէ ի՛նչ կը սիրեն ուսումնասիրել։
5. Այժմ ինչո՞ւ Աստուածաշունչի անձնական եւ ընտանեկան ուսումնասիրութիւնը շատ կարեւոր են։
5 Ինչու հի՛մա կարեւոր է։ Մեր հոգեւորութիւնը զօրացնելը մեզ պիտի պատրաստէ որ հաստատուն կայնինք ու ‘Տէրոջ փրկութիւնը տեսնենք’ (Ել. 14։13)։ Ծնողներ աստուածային առաջնորդութեան կարիք ունին, որ իրենց զաւակները մեծցնեն «կամակոր ու խոտորեալ ազգին մէջ» (Փլպ. 2։15)։ Երախաներ դպրոցներէ ներս բարոյական անկումին հետ գլուխ ելլելու համար օգնութեան պէտք ունին (Առ. 22։3, 6)։ Ամոլներ Եհովայի հետ իրենց «երեքպատիկ դերձանը» պէտք է ամրացնեն (Ժող. 4։12)։ Հետեւաբար մնացեալ ժամանակը խոհեմութեամբ գործածենք, մենք մեզ «ամենասուրբ հաւատքին վրայ» շինելու (Յուդա 20)։