Աստուածաշունչի ուսումնասիրութիւններ առաջարկելու մասնայատուկ օր
1 Յունուարէն սկսեալ, իւրաքանչիւր ժողովք ամէն ամիս շաբաթավերջ մը պիտի որոշէ, թերեւս ամսուան առաջին շաբաթավերջը, Աստուածաշունչի ուսումնասիրութիւններ առաջարկելու վրայ կեդրոնանալու։ Ասիկա պիտի ըլլայ շաբաթ կամ կիրակի, ինչպէս որ տեղականօրէն լաւագոյնն է։ Եթէ այդ օրը տանտէրները մերժեն այս առաջարկը, հրատարակիչները կրնան Աստուածաշունչը կը սորվեցնէ գիրքը կամ ընթացիկ պարբերաթերթերը ներկայացնել։ Բոլոր երէցներն ու օգնական ծառաները այս գործունէութեան մէջ լման մասնակցութիւն պէտք է բերեն եւ հրատարակիչներուն օգնեն Աստուածաշունչի ուսումնասիրութիւններ սկսելու։
2 Ժողովքի ծառայութեան յանձնախումբը պիտի որոշէ, թէ ամսուան ո՛ր շաբաթ կամ կիրակի օրը պիտի նշանակուի Աստուածաշունչի ուսումնասիրութիւններ առաջարկելու։ Պարբերաբար յիշեցումներ պէտք է տրուին, որպէսզի հրատարակիչներ կարենան պատրաստուիլ եւ յատուկ ջանք թափել Աստուածաշունչի ուսումնասիրութիւններ սկսելու՝ տունէ տուն քարոզելու եւ նախապէս հետաքրքրութիւն ցուցաբերած անհատներու այցելութիւն տալու ատեն։
3 Ի՛նչպէս պատրաստուիլ։ Աստուածաշունչի ուսումնասիրութիւններ սկսելու նկատմամբ, կրնանք թելադրութիւններ գտնել յունուար 2006–ի Մեր Թագաւորութեան ծառայութիւնը թերթիկին յաւելուածին եւ Պատճառաբանել գրքին 12–րդ էջին մէջ։ Ոմանք կրնան թերթիկ մը գործածել, ինչպէս՝ Կը փափաքի՞ս ճշմարտութիւնը գիտնալ։ Օգոստոս 2007–ի Մեր Թագաւորութեան ծառայութիւնը թերթիկին 3–րդ էջը նոյնպէս կը ներկայացնէ Աստուածաշունչի ուսումնասիրութիւններ սկսելու նկատմամբ թելադրութիւններ, երբ պարբերաթերթերը ընդունող անհատներու կ’այցելենք։ Երէցներն ու օգնական ծառաները 10-15 վայրկեան տեւող դաշտի ծառայութեան ժողով մը պիտի վարեն, որուն ընթացքին Աստուածաշունչի ուսումնասիրութիւններ սկսելու համար մէկ կամ երկու գործնական թելադրութիւններ նկատի պիտի առնեն կամ ցուցադրեն։
4 Անշուշտ, ամէն ոք Աստուածաշունչի ուսումնասիրութիւն մը պիտի չընդունի, ո՛չ ալ պիտի փափաքի իր ուսումնասիրութիւնը երկար ժամանակ շարունակել։ Ասիկա պատճառ պիտի չըլլայ որ ուսումնասիրութիւն մը առաջարկելէ ետ կենանք, քանի որ Եհովան է որ ոչխարանման անհատները իր կազմակերպութեան կը քաշէ (Յովհ. 6։44)։ Մեր պատասխանատուութիւնը միմիայն ճշմարտութեան սերմերը ցանել չէ, այլ նաեւ՝ արմատ կապած սերմերը մշակել ու ջրել, եւ ասիկա կը պարփակէ պարկեշտամիտ անհատներու հետ Աստուածաշունչը ուսումնասիրել։ Այսպէս Աստուծոյ գործակիցները ըլլալու առանձնաշնորհումը կը վայելենք (Ա. Կոր. 3։9)։