2010–ի Միօրեայ մասնաւոր համաժողովի յայտագիր
1. ա) Վերջին տարիներուն, միօրեայ մասնաւոր համաժողովներուն ի՞նչ աստուածաշնչական բնաբաններ նկատի առնուած են։ բ) Նախկին միօրեայ մասնաւոր համաժողովներէն աչքառու կէտեր կը յիշե՞ս, որոնք ծառայութեան մէջ քեզի օգտակար եղած են։
1 «Աւելի կարեւոր բաները ընտրէ», «Հաստատուն կենանք որպէս մէկ հօտ», «Շարունակէ ճշմարտութեան համար վկայել» եւ «Մենք կաւ ենք. Եհովան մեր Բրուտն է» (Փլպ. 1։9, 10, 27. Յովհ. 18։37. Եսա. 64։8)։ Ասոնք միօրեայ մասնաւոր համաժողովներուն նկատի առնուած բազմաթիւ թեմաներէն քանի մը հատն են։ Անհամբեր կը սպասե՞ս, որ 2010–ի ծառայութեան տարուան միօրեայ մասնաւոր համաժողովին ներկայ գտնուիս։ Անիկա հետեւեալ բնաբանը պիտի զարգացնէ. «Մնացած ժամանակը կարճցած է», առնուած՝ Ա. Կորնթացիս 7։29–էն (ՆԱ)։
2. Այս համաժողովին հանդէպ ի՞նչպէս կրնաս խանդավառութիւն ստեղծել։
2 Անմիջապէս որ ժողովքին մէջ միօրեայ մասնաւոր համաժողովի թուականը ծանուցանուի, սկսէ անոր հանդէպ խանդավառութիւն կերտել։ Կարգ մը ծնողներ իրենց զաւակներուն կ’օգնեն, որ անձկութեամբ համաժողովին սպասեն, ընտանիքին օրացոյցին վրայ անոր թուականը նշելով եւ հարկ եղած իրերուն ցանկը դնելով, ապա կը սկսին օրերը համրել։ Ընտանեկան պաշտամունքի ընթացքին, թերեւս փափաքիս նախորդ Միօրեայ մասնաւոր համաժողովի գրառումներդ վերաքաղ ընել։ Կրնաս նաեւ այս առիթին համար սիրտդ պատրաստել, նկատի առնելով Աստուածպետական ծառայութեան դպրոցի կրթութենէն օգտուեցէք գրքին 13-16–րդ էջերը, որպէսզի ‘նայիք թէ ի՛նչպէս կը լսէք’ (Ղուկ. 8։18)։
3. Ի՞նչպէս կրնանք ներկայացուելիք տեղեկութիւններէն լիովին օգտուիլ։
3 Սորվածդ գործադրէ։ Համաժողովէն ետք սովորաբար հետեւեալ խօսքը կը լսենք. «Ի՜նչ սքանչելի յայտագիր մըն էր»։ Այս խօսքը միշտ շիտակ է, քանի որ անիկա Եհովայի ճոխ հայթայթումներէն մէկն է (Առ. 10։22)։ Որպէսզի տեղեկութիւն մը պտուղ տայ, պէտք է անոր վրայ խոկաս եւ զայն մտաբերես (Ղուկ. 8։15)։ Համաժողովէն ետք, վերադարձի ճամբուն վրայ, յայտագրին մասին խօսէ ընտանիքիդ կամ ճամբորդակիցներուն։ Քննարկեցէք ձեր նպատակակէտերը եւ այն կէտերը, որոնք ձեզի օգտակար պիտի ըլլան ծառայութեան մէջ։ Ասիկա ընելը պիտի նպաստէ որ տեղեկութիւններէն օգտուիք, նոյնիսկ համաժողովէն երկար ատեն ետք (Յակ. 1։25)։
4. Այս համաժողովը մեզի համար ինչո՞ւ մասնայատուկ պիտի ըլլայ։
4 Միշտ կ’ուրախանանք, երբ ստանանք գործնական նուէր մը, որուն կարիք ունէինք։ Անձկութեամբ չե՞նք սպասեր, թէ Եհովա մեզի համար ի՛նչ վերապահած է յաջորդ միօրեայ մասնաւոր համաժողովին։ Կրնանք վստահ ըլլալ, թէ անիկա ամէն ձեւով օգտակար պիտի ըլլայ։ Կ’ակնկալենք մեր երկնաւոր Հօրմէն՝ Եհովայէ ստանալ ճիշդ նուէրը, ինչպէս՝ քաջալերութիւն եւ մարզում մեզի նշանակած գործը կատարելու (Բ. Տիմ. 4։2. Յակ. 1։17)։