Համայն աշխարհի մէջ Յիշատակատօնի հրաւիրագիրներ պիտի բաշխուին
1. Յիշատակատօնէն առաջ, ի՞նչ մասնայատուկ համաշխարհային արշաւ մը ծրագրուած է։
1 «Ասիկա ըրէք զիս յիշելու համար» (Ղուկ. 22։19)։ Յիսուսի այս պատուէրին առ ի հնազանդութիւն, Եհովայի երկրպագուները եւ հետաքրքրուած անհատներ պիտի համախմբուին 30 մարտ 2010–ին, Յիսուսի մահը յիշատակելու համար։ Համայն աշխարհի մէջ, 13 մարտէն մինչեւ 30 մարտ, Յիշատակատօնի յատուկ հրաւիրագիրներ պիտի բաշխուին։
2. Ինչպէ՞ս կրնանք հրաւիրագիրը ներկայացնել։
2 Ինչպէ՛ս հրաւիրել։ Կրնաս հրաւիրագիրը տանտիրոջ տալ, այնպէս որ կողքի պատկերը տեսնէ, ապա ըսէ՛. «Մարտ 30–ի երեկոյեան, աշխարհի տարածքին միլիոնաւորներ պիտի ժողվուին Յիսուսի մահը յիշատակելու։ Եկած եմ այս հրաւիրագիրը քեզի եւ ընտանիքիդ տալու, որպէսզի ներկայ գտնուիք։ Ձեր բարեկամներն ալ բարի եկած են։ Հաճիս նկատէ այս տօնակատարութեան ժամն ու վայրը»։ Եթէ պարագաները ներեն, կրնաս Աստուածաշունչէն կարդալ Ղուկաս 22։19–ն, ցոյց տալու համար աստուածաշնչական պատուէրը։ Սակայն, ի մտի ունենալով որ մեր թաղամասը ծածկելու համար սահմանափակ ժամանակ ունինք, համառօտ ըլլանք։
3. Զորո՞նք կրնանք հրաւիրել։
3 Եթէ ժողովքիդ թաղամասը մեծ է, երէցները թերեւս թելադրեն որ առաջին հանդիպումին, եթէ տանտէրը տունը չէ, հրաւիրագիր մը դրան առջեւ դնես։ Եթէ յարմար է, հրաւիրագրին հետ մէկտեղ պարբերաթերթերն ալ ներկայացուր։ Մի՛ մոռնար հրաւիրելու՝ վերայցելութիւններդ, Աստուածաշունչի աշակերտներդ, գործակիցներդ, դպրոցակիցներդ, ազգականներդ, դրացիներդ եւ այլ ծանօթներ։
4. Փրկանքը հայթայթելով Եհովայի դրսեւորած սէրը գնահատելը պիտի մղէ մեզ ի՞նչ ընելու։
4 Պատրաստուէ՛ լիովին մասնակցելու։ Յիշատակատօնի շրջանը՝ մեր գործունէութիւնը աւելցնելու սքանչելի ժամանակ մըն է։ Կրնա՞ս յայտագիրդ կարգի դնել օժանդակ ռահվիրայութիւն ընելու համար։ Հոգեւորապէս յառաջդիմող զաւակներ կամ Աստուածաշունչի աշակերտներ ունի՞ս։ Եթէ այո՛, երէցներուն հետ խօսէ, տեսնելու համար թէ նորեկները որակեա՞լ են որպէս չմկրտուած հրատարակիչներ այս մասնայատուկ արշաւին մասնակցելու։ Փրկանքը հայթայթելով Եհովայի դրսեւորած սէրը գնահատելը պիտի մղէ մեզ ո՛չ միայն Յիշատակատօնին ներկայ գտնուելու, այլ նաեւ՝ կարելի եղածին չափ շատ անհատներ հրաւիրելու, որ մեզի հետ ներկայ գտնուին (Յովհ. 3։16)։