Յիշատակատօնը ծանուցանելու արշաւը՝ մարտ 17–ին կը սկսի
1. Մարտ 17–ին ի՞նչ արշաւ պիտի սկսի։
1 Ամէն տարի, Յիշատակատօնը Յիսուսի մահը ծանուցանելու կը ծառայէ (Ա. Կոր. 11։26)։ Հետեւաբար, կ’ուզենք որ ուրիշներ մեզի հետ ներկայ գտնուին եւ Եհովայի փրկանքի պարգեւին մասին լսեն (Յովհ. 3։16)։ Այս տարի, մարդիկ Յիշատակատօնին հրաւիրելու մեր արշաւը պիտի սկսի շաբաթ՝ մարտ 17–ին։ Անձկագին կը սպասե՞ս որ լիովին բաժին բերես։
2. Հրաւիրագիրը ներկայացնելու համար ի՞նչ կրնանք ըսել։
2 Ինչ որ կրնանք ըսել։ Հակիրճ ներկայացում ընելը լաւագոյնն է։ Կրնանք ըսել. «Բարեւ. մենք եկած ենք ձեզի եւ ձեր ընտանիքին այս հրաւիրագիրը տալու տարեկան կարեւոր տօնակատարութեան մը համար, որ ապրիլ 5–ին աշխարհի տարածքին տեղի պիտի ունենայ։ Ձրիաբար աստուածաշնչական դասախօսութիւն մը պիտի տրուի, որ կը բացատրէ թէ Յիսուսի մահը ի՛նչ իրագործեց եւ թէ ան այժմ ի՛նչ կ’ընէ։ Այս հրաւիրագիրը մեր շրջանին մէջ կայանալիք ժողովին վայրն ու ժամը կը նշէ»։ Երբ շաբաթավերջերուն բաշխումին կը մասնակցինք, պէտք է նաեւ պարբերաթերթերը առաջարկենք՝ երբ որ յարմար ըլլայ։
3. Ինչպէ՞ս կրնանք կարելի եղածին չափ շատ մարդիկ հրաւիրել։
3 Կարելի եղածին չափ շատ մարդիկ հրաւիրէ։ Մեր նպատակն է՝ կարելի եղածին չափ շատ մարդիկ հրաւիրել։ Ուստի վստահ եղիր որ հրաւիրես Աստուածաշունչի աշակերտներդ, վերայցելութիւններդ, ազգականներդ, գործակիցներդ, դպրոցակիցներդ, դրացիներդ եւ այլ ծանօթներ։ Երէցները թաղամասդ ինչպէ՛ս ծածկելու համար ցուցմունքներ պիտի տան։ Մարդիկ Յիշատակատօնին հրաւիրելու մեր տարեկան արշաւը արդիւնաւոր է։ Անցեալ տարի երբ կին մը ժողովասրահ մտաւ, հիւրընկալ մը առաջարկեց՝ զինք հրաւիրող հրատարակիչը փնտռել։ Սակայն, կինը ըսաւ թէ ներկաներէն ո՛չ մէկը կը ճանչնար, եւ թէ նախապէս այդ օրը տունէ տուն ծառայող անհատէ մը հրաւիրագիր ստացած էր։
4. Արշաւին մէջ նախանձախնդիր մասնակցութիւն բերելու ի՞նչ պատճառներ կան։
4 Թերեւս Յիշատակատօնին մէկը ներկայ գտնուի, քանի որ իրեն հրաւիրագիր մը տուած ես։ Եթէ տանտէրը ընդառաջէ կամ ոչ, ժրաջան ջանքերդ տակաւին վկայութիւն պիտի տան։ Բաժնած հրաւիրագիրներդ պիտի ծանուցանեն, թէ Յիսուս այժմ զօրաւոր Թագաւոր է։ Նախանձախնդիր մասնակցութիւնդ ցոյց պիտի տայ բոլոր դիտորդներուն,– թաղամասի մարդիկը, հրատարակիչները եւ ամէնէն կարեւորը՝ Եհովան,– թէ փրկանքի պարգեւը խորապէս կը գնահատես (Կող. 3։15)։