Յիշատակատօնը ծանուցանող արշաւը կը սկսի մարտ 1–ին
1. Ե՞րբ պիտի սկսինք Յիշատակատօնը ծանուցանել։ Այս տարուան արշաւին օրերը ինչո՞ւ աւելի շատ են։
1 Ուրբաթ մարտ 1–ին, պիտի սկսինք մեր տարեկան արշաւը ուրիշները հրաւիրելու որ մեզի հետ Յիշատակատօնին ներկայ գտնուին։ Յիշատակատօնը տեղի պիտի ունենայ մարտ 26–ին, որ կը նշանակէ թէ արշաւը նախորդ տարիներէն քիչ մը աւելի երկար պիտի տեւէ։ Ասիկա առիթ պիտի տայ, որ շատ աւելի անհատներ հրաւիրագիր ստանան, մա՛նաւանդ եթէ կ’ապրին շրջանի մը մէջ, ուր ժողովքը շատ թաղամասեր ունի։
2. Հրաւիրագիրներ առնելու եւ թաղամասեր ծածկելու կարգադրութիւնները ի՞նչ են։
2 Կազմակերպուած ըլլալ։ Երէցները ուղղութիւն պիտի տան, թէ թաղամասերը ինչպէ՛ս պիտի ծածկուին, ինչպէս նաեւ՝ եթէ հրաւիրագիրներ պիտի ձգուին տունը չեղողներուն։ Եթէ թաղամասը ծածկուելէ ետք հրաւիրագիրներ աւելնան, զանոնք կարելի է բաշխել հանրային վկայութեան ընթացքին։ Ծառայութեան տեսուչը հոգ պիտի տանի, որ գրականութիւններու կամ պարբերաթերթերու սեղանին վրայ պիտակուած հրաւիրագիրներու տրցակ մը դրուի, որպէսզի հրատարակիչները հոնկէ առնեն. բայց հրաւիրագիրները ամբողջութեամբ սեղանին վրայ պիտի չդրուին։ Իւրաքանչիւր շաբաթ ո՛րքան որ պէտք պիտի ունենանք, ա՛յդքան պէտք է առնենք։
3. Ի՞նչ բան ի մտի պէտք է ունենանք, երբ հրաւիրագիրներ կ’առաջարկենք։
3 Ի՞նչ պիտի ըսենք։ Լաւագոյն բանը հակիրճ խօսիլն է։ Այս կերպը մեզի թոյլ պիտի տայ որ կարելի եղածին չափ շատ մարդիկ հրաւիրենք։ 4–րդ էջի վրայ կը գտնուի ներկայացումի նմոյշ մը, որ կրնանք մեր թաղամասին յարմարցնել։ Բայց անշուշտ, եթէ տանտէրը բարեկամական ըլլայ կամ հարցումներ ունենայ, աճապարանօք պիտի չմեկնինք։ Շաբաթավերջերը այս արշաւին մասնակցած ատեն, նաեւ պէտք է առաջարկենք պարբերաթերթերը՝ եթէ յարմար է։ Մարտ 2–ին, աւելի պիտի կեդրոնանանք հրաւիրագիրներ բաշխելուն վրայ, քան՝ Աստուածաշունչի ուսումնասիրութիւններ սկսելուն վրայ։
4. Ինչո՞ւ պէտք է նախանձախնդրութեամբ մասնակցինք այս արշաւին։
4 Յոյս ունինք որ շատեր ներկայ պիտի գտնուին Յիշատակատօնին։ Դասախօսութիւնը պիտի բացատրէ թէ Յիսուս ի՛րապէս ով է (Ա. Կոր. 11։26)։ Նաեւ պիտի ընդգծէ, թէ Յիսուսին մահը ինչպէ՛ս մեզի կ’օգնէ (Հռով. 6։23)։ Եւ ցցուն պիտի ընէ, թէ ինչո՛ւ կարեւոր է որ յիշենք զինք (Յովհ. 17։3)։ Թող որ նախանձախնդութեա՛մբ մասնակցինք այս արշաւին։