Մեր նահանգային համաժողովները ազդուօրէն կը վկայեն ճշմարտութեան

1. Եղանակային տօները իսրայէլացիներուն պատեհութիւն տուին որ ի՞նչ կարեւոր հոգեւոր ճշմարտութիւններու մասին խոկան եւ քննարկեն։

¹ Վաղեմի իսրայէլացիները տարին երեք անգամ եղանակային տօներու համար կը հաւաքուէին։ Թէեւ միայն արուներէն պահանջուած էր ներկայ գտնուիլ, սակայն յաճախ լման ընտանիքներ կը ճամբորդէին Երուսաղէմ, այս ուրախ համախմբութիւնները վայելելու համար (Բ. Օր. 16։15, 16)։ Այսպիսի առիթներ կարեւոր հոգեւոր ճշմարտութիւններու վրայ խոկալու եւ քննարկելու պատեհութիւն տուին։ Այս ճշմարտութիւններէն ոմանք ի՞նչ են։ Մէկը՝ թէ Եհովան առատաձեռն, սիրառատ Հայթայթիչ է (Բ. Օր. 15։4, 5)։ Իսկ ուրիշ մը՝ թէ կարելի է իրեն վստահիլ առաջնորդութեան եւ պաշտպանութեան համար (Բ. Օր. 32։9, 10)։ Իսրայէլացիները կրնային նաեւ խոկալ այն իրողութեան վրայ, թէ որպէս Եհովայի անունը կրող ժողովուրդ, պէտք է պատշաճ կերպով անոր արդարութիւնը արտացոլեն (Բ. Օր. 7։6, 11)։ Ներկայիս, մեր տարեկան նահանգային համաժողովները նոյն կերպով մեզի կ’օգտեն։

2. Նահանգային համաժողովին յայտագիրը ինչպէ՞ս ճշմարտութեան վրայ լոյս պիտի սփռէ։

² Յայտագիրը ճշմարտութեան վրայ լոյս կը սփռէ։ Նահանգային համաժողովներուն մէջ, կը վայելենք դասախօսութիւններ, թատերախաղեր, ցուցադրութիւններ եւ տեսակցութիւններ, որոնք աստուածաշնչական կենսական ճշմարտութիւններու վրայ լոյս կը սփռեն (Յովհ. 17։17)։ Արդէն, գալիք համաժողովին համար շատ աշխատանք տարուած է։ Եհովայի կազմակերպութիւնը կը պատրաստէ յայտագիր մը, որ յատկապէս ծրագրուած է նկատի առնելով համաշխարհային դաշտին ընթացիկ կարիքները (Մատ. 24։45-47)։ Կը տենչա՞ս տեսնել եւ լսել թէ ի՛նչ պիտի ներկայացուի։

3. Յայտագրէն օգտուելու համար, ի՞նչ պէտք է ընենք։

³ Անշուշտ, լաւագոյնս պիտի օգտուինք եթէ երեք օրերուն ալ ներկայ գտնուինք եւ լաւ ուշադրութիւն ընծայենք։ Եթէ տակաւին գործատիրոջդ հետ չես խօսած գործէն արձակուրդ առնելու մասին, հիմա՛ ժամանակն է։ Վստահ եղիր որ ամէն գիշեր բաւարար կերպով հանգիստ ընես, որպէսզի կարենաս յայտագրին ընթացքին արթուն մնալ։ Շատեր նկատած են, թէ երբ իրենց աչքերը դասախօսին վրայ սեւեռած պահեն եւ հակիրճ նոթեր առնեն, ուշադիր կը մնան։ Թոյլ մի՛ տար որ հեռախօսիկը կամ փէյճըր–ը քեզ կամ ուրիշները խանգարէ։ Յայտագրին ընթացքին, խուսափէ խօսելէ, կարճ նամակներ ուղարկելէ, ուտելէ կամ խմելէ։

4. Ծնողները ինչպէ՞ս կրնան օգնել իրենց զաւակներուն, որպէսզի նահանգային համաժողովին ընթացքին օգտուին։

⁴ Շաբաթական տարիներուն, երբ իսրայէլացի ընտանիքները կը համախմբուէին, Տաղաւարահարաց տօնին ընթացքին կարդացուած Օրէնքը լսելու համար, իրենց «տղաքներ»ը իրենց հետ կ’ըլլային, ‘որպէսզի լսեն եւ սորվին’ (Բ. Օր. 31։12)։ Որքա՜ն քաջալերական է տեսնել ընտանիքները միասնաբար նստած են համաժողովի ընթացքին, իսկ պատանիները արթուն կը մնան ու լաւ ուշադրութիւն կ’ընծայեն։ Իւրաքանչիւր երեկոյ ինչո՞ւ աչքէ չանցընէք ձեր նոթերը եւ միասնաբար քննարկէք յայտագրին ա՛յն կէտերը, որոնք մասնաւորաբար սիրեցիք։ «Մանուկին սրտին մէջ յիմարութիւնը կապուած է», ուստի լաւ կ’ըլլայ որ կէսօրուան դադարին եւ մինչ պանդոկն են, ծնողները իրենց զաւակներուն վրայ վերահսկեն, ներառեալ՝ պատանիներուն վրայ, փոխանակ թոյլ տալու որ իրենց ‘կամքին ձգուին’ (Առ. 22։15. 29։15)։

5. Պանդոկին մէջ մեր լաւ վարքը ինչպէ՞ս ճշմարտութիւնը պիտի զարդարէ։

⁵ Մեր լաւ վարքը կը զարդարէ ճշմարտութիւնը։ Նահանգային համաժողովի քաղաքին մէջ, մեր լաւ վարքը կը զարդարէ ճշմարտութիւնը (Տիտ. 2։10)։ Պանդոկի անձնակազմը կը նշմարէ, երբ խումբ մը պանդոկին կանոններուն կը հետեւի եւ պաշտօնեաներուն հանդէպ համբերատարութիւն կը ցուցաբերէ ու շնորհքով կը խօսի (Կող. 4։6)։ Անցեալ տարի, երբ մասնաճիւղի ներկայացուցիչներ պանդոկի մը հետ կը բանակցէին, վաճառքի տնօրինուհին ըսաւ անոնց. «Կը սիրենք ձերինները մեր պանդոկը գան, քանի որ շատ լաւ մարդիկ են. շատ քաղաքավար ու ազնիւ են, եւ միշտ պանդոկի ապրանքներուն ու անձնակազմին հետ յարգանքով կը վարուին»։

6. Մինչ համաժողովի քաղաքն ենք, ինչպէ՞ս կրնանք ճշմարտութիւնը զարդարել մեր հագուելակերպով։

⁶ Երբ համաժողովի լանջանշանը կրենք մեր վրայ, ատիկա ոչ միայն կը ծառայէ որպէս համաժողովի ծանուցում եւ կարելի կը դարձնէ որ այլ պատուիրակներ մեզ ճանչնան, այլ նաեւ՝ դիտորդներուն վկայութիւն կու տայ։ Համաժողովի քաղաքի մարդիկը պիտի նկատեն, թէ անոնք՝ որոնք համաժողովի լանջանշանները կրած են, կոկիկ եւ պարկեշտ կերպով հագուած են, եւ ոչ թէ թափթփած կերպով ու գրգռիչ նորոյթներուն համաձայն, որոնք աշխարհի մէջ սովորական դարձած են (Ա. Տիմ. 2։9, 10)։ Ուստի, պէտք է մեր հագուստին ու յարդարանքին ուշադրութիւն ընծայենք մինչ համաժողովի քաղաքն ենք, ներառեալ՝ երբ պանդոկ կը ժամանենք։ Կարճ տաբատով կամ T-shirt–ով գալը արժանապատուութիւն չի յայտներ։ Նոյնիսկ եթէ համաժողովը բացօթեայ մարզադաշտի մէջ է, մեր հագուստը վայելուչ պէտք է ըլլայ։ Եթէ ընտրենք յայտագրէն ետք մեր հագուստները փոխել ճաշարան երթալու համար, պէտք է յիշենք որ մենք տակաւին համաժողովի պատուիրակներ ենք, եւ չափազանց պարզ հագուստներ պէտք չէ հագուինք։

7. Նահանգային համաժողովի ընթացքին, քրիստոնէական միութիւնը վայելելու մէկ կերպը ի՞նչ է։

⁷ Եղանակային տօներուն, իսրայէլացիները վայելեցին շինիչ ընկերակցութիւն հայրենիքին ու աշխարհի ուրիշ մասերէն եկող հաւատակիցներու հետ, եւ ասիկա միութիւն յառաջ մղեց (Գործք 2։1, 5)։ Նահանգային համաժողովներու ընթացքին մեր իւրայատուկ քրիստոնէական եղբայրութիւնը ի յայտ կու գայ։ Մեր հոգեւոր դրախտին այս հաճելի երեսակը յաճախ դիտորդները կը տպաւորէ (Սաղ. 133։1)։ Փոխանակ համաժողովի վայրը ձգելու ուտելիք գնելու համար, որքա՜ն լաւ պիտի ըլլայ մեզի հետ թեթեւ ճաշ մը բերենք եւ պատեհութիւնները օգտագործենք, որպէսզի մօտ նստող եղբայրներուն եւ քոյրերուն ծանօթանանք եւ խօսակցինք։

8. Եթէ մեր պարագաները կը ներեն, կամաւորաբար աշխատելու ի՞նչ պատճառներ կան։

⁸ Դիտորդները յաճախ կը տպաւորուին մեր լաւ կազմակերպուած եւ կարգապահ համաժողովներով, մանաւանդ երբ գիտնան թէ ամբողջ աշխատանքը կամաւորներու կողմէ կը կատարուի։ Կրնա՞ս «յօժարակամ» աշխատիլ նահանգային համաժողովի ընթացքին (Սաղ. 110։3)։ Լման ընտանիքներ յաճախ որպէս կամաւոր կ’աշխատին, որպէսզի իրենց զաւակները մարզեն՝ ուրիշներուն օգնելու համար։ Եթէ ամչկոտ ես, համաժողովին ընթացքին աշխատիլը, ուրիշ պատուիրակներու ծանօթանալու լաւ կերպ մըն է։ Քոյր մը նշեց. «Համաժողովին մէջ ինծի ծանօթ եղողները, միայն ընտանիքս ու քանի մը բարեկամներ էին։ Բայց երբ մաքրութեան մասնակցեցայ, բազմաթիւ եղբայրներու եւ քոյրերու ծանօթացայ։ Շա՜տ հաճելի էր»։ Նահանգային համաժողովի աջակցելով նոր բարեկամներու ծանօթանալը մեծ ուրախութիւն պիտի տայ մեզի (Բ. Կոր. 6։12, 13)։ Եթէ բնաւ չես ծառայած որպէս կամաւոր, երէցներուն հարցուր թէ ինչպէ՛ս կրնաս աջակցելու որակեալ ըլլալ։

9. Ուրիշները ինչպէ՞ս պիտի հրաւիրենք որպէսզի նահանգային համաժողովին ներկայ գտնուին։

⁹ Ուրիշները հրաւիրէ որպէսզի ճշմարտութիւնը լսեն։ Ինչպէս նախորդ տարիներուն, նահանգային համաժողովը սկսելէն երեք շաբաթ առաջ, ուրիշները հրաւիրելու արշաւին պիտի մասնակցինք։ Ժողովքները պիտի ուզեն կարելի եղածին չափ ծածկել իրենց թաղամասերը հրաւիրագիրով (տե՛ս «Հրաւիրագիրը ինչպէ՞ս պիտի ներկայացնենք» շրջանակը)։ Աւելցած հրաւիրագիրները պիտի բերուին նահանգային համաժողովին։ Համաժողովի քաղաքին մէջ, պատուիրակները զանոնք պիտի գործածեն, որպէսզի անպաշտօն կերպով վկայեն։

10. Պատմէ՛ փորձառութիւններ փաստելու համար, թէ հրաւիրագիր բաժնելու մեր տարեկան արշաւը արդիւնաբեր է։

¹⁰ Արդեօք մարդիկ այս տարեկան արշաւին կ’ընդառաջե՞ն։ Նահանգային մէկ համաժողովին մէջ, հիւրընկալը օգնեց զոյգի մը, որպէսզի պարապ նստարան գտնեն։ Անոնք իրեն ըսին թէ հրաւիրագիրը ստացան եւ խորհեցան թէ «հետաքրքրական կը թուէր». ինքնաշարժով 320 քմ կտրեցին ներկայ գտնուելու համար։ Ուրիշ պարագայ մը. տունէ տուն ծառայելու ընթացքին, քոյր մը հրաւիրագիր տուաւ մարդու մը՝ որ նահանգային համաժողովով հետաքրքրուած էր։ Ուստի, քոյրը ժամանակ տրամադրեց՝ անոր հետ հրաւիրագրին պատգամը քննարկելու համար։ Քանի մը օր ետք, մինչ նահանգային համաժողովին ներկայ էր, քոյրը տեսաւ այդ մարդը իր բարեկամներէն մէկուն հետ միասին, եւ անոնք նոր հրատարակութիւններէն մէկը բռնած էին։

11. Մեր տարեկան նահանգային համաժողովներուն ներկայ գտնուիլը ինչո՞ւ կարեւոր է։

¹¹ Եղանակային տօները Եհովայի կողմէ սիրալիր կարգադրութիւն էին, իսրայէլացիներուն օգնելու որ իրեն «հաւատարմութեամբ ու ճշմարտութեամբ ծառայութիւն [ընեն]» (Յես. 24։14)։ Նմանապէս, տարեկան նահանգային համաժողովներուն ներկայ գտնուիլը, մեր պաշտամունքին կենսական մէկ մասն է եւ մեզի կ’օգնէ որ ‘ճշմարտութեամբ քալենք’ (Գ. Յովհ. 3)։ Թող Եհովան օրհնէ բոլոր անոնց ջանքերը՝ որոնք ճշմարտութիւնը կը սիրեն, որպէսզի ներկայ գտնուին եւ լիուլի օգտուին։

[Մէջբերում՝ էջ 4]

Նահանգային համաժողովի քաղաքին մէջ, մեր լաւ վարքը կը զարդարէ ճշմարտութիւնը

[Մէջբերում՝ էջ 5]

Նահանգային համաժողովը սկսելէն երեք շաբաթ առաջ, ուրիշները հրաւիրելու արշաւին պիտի մասնակցինք

[Շրջանակ՝ էջ 3-6‏]

2012–ի նահանգային համաժողովի յիշեցումներ

◼ Յայտագրին ժամերը։ Յայտագիրը երեք օրերուն ալ պիտի սկսի առաւօտեան ժամը 9։20–ին։ Դռները պիտի բացուին առաւօտեան ժամը 8։00–ին։ Երբ բացման երաժշտութիւնը ծանուցանուի, բոլորս մեր տեղերը պէտք է նստինք, որպէսզի յայտագիրը յարգալից կերպով սկսի։ Ուրբաթ ու շաբաթ օրերը յայտագիրը պիտի աւարտի կէսօրէ ետք ժամը 4։55–ին, իսկ կիրակի օրը՝ 3։40–ին։

◼ Կայանատեղեր։ Այն համաժողովը, ուր կառավայրի վրայ վերահսկելը մեզի վստահուած է, մատչելի տեղերը ինքնաշարժ շարելը անվճար պիտի ըլլայ։ Միայն ան, որ իր ինքնաշարժին վրայ օրինաւոր արտօնագիր կը կրէ թէ ֆիզիքապէս անկարող է, պիտի կարենայ զայն շարել հո՛ն՝ ուր անկարողներուն վերապահուած է։ Որովհետեւ սովորաբար կայանատեղերը սահմանափակ են, ինքնաշարժները կարելի եղածին չափ լեցուն պէտք է ըլլան։

◼ Նստարաններ ապահովել։ Կարելի է աթոռներ ապահովել միմիայն ձեզի հետ ինքնաշարժով ճամբորդողներուն կամ ձեզի հետ նոյն տան մէջ ապրողներուն, ինչպէս նաեւ անոնց՝ որոնց հետ ներկայիս Աստուածաշունչի ուսումնասիրութիւն մը կը վարէք (Ա. Կոր. 13։5)։

◼ Ճաշ։ Հաճեցէք ճաշը ձեզի հետ բերել, փոխանակ կէսօրուան դադարին համաժողովի վայրը ձգելով այլուր ճաշելու։ Կրնաք պզտիկ պաղարան մը գործածել, որ կրնայ աթոռին տակ զետեղուիլ։ Մեծ պաղարաններ եւ ապակեայ պահեստամաններ համաժողովի շէնքերէն ներս արտօնուած չեն։

◼ Նուիրատուութիւն։ Համաժողովի կարգադրութիւններուն հանդէպ կրնանք մեր գնահատութիւնը ցոյց տալ՝ համաշխարհային գործին ի նպաստ ինքնայօժար նուիրատուութիւններ ընելով համաժողովին մէջ։ Վճարագրով եղած նուիրատուութիւնները, «Եհովայի վկաներու քրիստոնէական ժողովք»ին անունով պէտք է ըլլան։ Այս տարիէն սկսեալ, բոլոր համաժողովներուն մէջ պիտի ընդունուին պատրաստ դրամէն եւ վճարագիրէն զատ, վարկաքարտերով եղած նուիրատուութիւնները։

◼ Արկածներ եւ շտապ օգնութիւն։ Եթէ համաժողովի վայրին մէջ շտապ օգնութեան պարագայ մը ծագի, հաճեցէք ամենամօտ հիւրընկալին հետ խօսիլ, որ իր կարգին անմիջապէս Նախնական դարմանումի բաժանմունքին պիտի իմացնէ, որպէսզի որակեալ անձնակազմը պարագային լրջութիւնը կարենայ արժեւորել ու հարկ եղած օգնութիւնը մատակարարել։ Եթէ անհրաժեշտ է, անոնք 911 թիւին պիտի հեռաձայնեն։ Այսպէս, շտապ օգնութեան կեդրոնները հեռախօսիկով բազմաթիւ հեռաձայններ պիտի չստանան։

◼ Դեղեր։ Եթէ դեղագիրի մը համաձայն որոշ դեղերու պէտք ունիք, վստահ եղէք որ ձեզի հետ բաւարար չափով բերէք զանոնք, քանի որ համաժողովին մէջ ոչինչ մատչելի պիտի ըլլայ։ Համաժողովին եւ պանդոկներուն մէջ, շաքարախտի գործածուած ներարկիչները եւ ասեղները պատշաճ կերպով պէտք է թափուին վտանգաւոր նիւթերու համար յատկացուած աղբակալին մէջ, եւ ոչ թէ սովորական աղբակալին մէջ։

◼ Կօշիկ։ Ամէն տարի կօշիկի առնչուած վնասուածքներ կը պատահին։ Լաւագոյն բանն է ընտրել համեստ ու հանգստաւէտ կօշիկներ, որոնք անհատին թոյլ պիտի տան, որ աստիճաններուն եւ այլ բաներու վրայ ապահովութեամբ քալէ։

◼ Լսողութեան տկարութիւն։ Լսարանին մէջ յայտագիրը պիտի ձայնասփռուի FM–ի մէկ ալիքին վրայ։ Այս կարգադրութենէն օգտուելու համար, ձեզի հետ պէտք է բերէք մարտկոցներով–աշխատող պզտիկ FM ձայնասփիւռ մը եւ ընկալուչներ։

◼ Մանկասայլակներ ու ծալաթոռներ։ Համաժողովի վայրերուն մէջ մանուկներու կառքեր ու ծալելիք աթոռներ պէտք չէ բերուին։ Սակայն ընդունելի են մանուկներու յատուկ այն աթոռները, որոնք կրնան ծնողքին քովի աթոռին վրայ ամրացուիլ։

◼ Օծանելիքներ։ Համաժողովներուն մեծամասնութիւնը տեղի կ’ունենայ գոց վայրերու մէջ, ուր մեքենական օդափոխութիւն կը գործածուի։ Հետեւաբար բարութիւն դրսեւորած կ’ըլլանք, եթէ սահմանափակենք զօրաւոր օծանելիքներու գործածութիւնը, որոնք կրնան ազդեցութիւն ունենալ շնչառական կամ յարակից խնդիրներէ տառապող անհատներու վրայ (Ա. Կոր. 10։24)։

◼ Հետաքրքրութիւնը հետապնդելու պատճէնները։ Հաճեցէք հետապնդել (S-43) պատճէն մը պէտք է գործածուի տեղեկութիւն հայթայթելու ոեւէ անհատի մասին, որ համաժողովի օրերուն հետաքրքրութիւն կը ցուցաբերէ՝ անպաշտօն վկայութեան շնորհիւ։ Հրատարակիչները իրենց հետ մէկ կամ երկու պատճէն պէտք է բերեն։ Պատճէնները լեցնելէ ետք, կրնաք զանոնք յանձնել Հրատարակութիւններու բաժանմունքին կամ ժողովքի քարտուղարին երբ վերադառնաք (տե՛ս մայիս 2011–ի Մեր Թագաւորութեան ծառայութիւնը թերթիկը, էջ 3)։

◼ Ճաշարաններ։ Ճաշարաններուն մէջ ձեր ընտիր վարքով Եհովայի անունը պատուեցէք։ Եթէ սովորութիւն է՝ ձեռաձիր մը ձգեցէք։

◼ Պանդոկներ։

1) Հարկ եղածէն աւելի սենեակներ մի՛ վերապահէք, եւ ձեր սենեակին մէջ արտօնուած թիւէն աւելի անհատներ մի՛ ունենաք։

2) Միայն ստիպողական պարագայի մը համար ձեր վերապահումը ջնջեցէք, եւ անմիջապէս պանդոկին տեղեկացուցէք (Մատ. 5։37)։

3) Հաճեցէք ի մտի ունենալ, որ եթէ պանդոկին մէջ գրանցուելու ատեն ձեր վրայ պարտք արձանագրուի կամ վարկաքարտ գործածէք, սովորութիւն է որ ձեր հաշիւէն բաւականաչափ գումար սառեցնեն, որպէսզի ձեր սենեակի ընդհանուր սակը ե՛ւ ձեր կեցութեան ընթացքին պատահելիք վնասներու կամ արկածներու ծախսերը գոցեն։ Այդ գումարը պիտի չկարենաք գործածել, մինչեւ որ ձեր հաշիւը փակուի՝ ձեր մեկնելէն քանի մը օր ետք։

4) Ճամբարկղ տեղափոխելու սայլակը առէք միայն երբ պատրաստ էք զայն գործածելու, եւ անմիջապէս վերադարձուցէք, որպէսզի ուրիշներ ալ զայն գործածեն։

5) Պանդոկի գործաւորներուն ձեռաձիր տուէք երբ ձեր պայուսակները կը կրեն, եւ սենեակին հոգ տանողին ամէն օր ձեռաձիր ձգեցէք։

6) Մի՛ եփէք այն սենեակներուն մէջ, ուր եփելը արգիլուած է։

7) Մի՛ շահագործէք անվճար նախաճաշը, սուրճը եւ սառը, որոնք իջեւանողներուն համար են, մինչ պանդոկին մէջ են։

8) Պանդոկի անձնակազմին հանդէպ ամէն ատեն հոգիին պտուղը ցուցաբերեցէք։ Անոնք բազմաթիւ հիւրերու հոգ կը տանին եւ կը գնահատեն մեր ազնուութիւնը, համբերութիւնն ու խոհեմութիւնը։

9) Ծնողները ամէն ատեն պէտք է իրենց զաւակներուն հսկեն պանդոկին մէջ, ներառեալ՝ լողաւազանին, նախասրահին եւ մարմնամարզանքի սրահին մէջ եւ այլուր։

10) Յանձնարարուած իջեւանի ցանկ–ին վրայ նշուած սենեակին սակը՝ մէկ օրուան լման գինն է, բացի տուրքէն։ Եթէ ձեզմէ յաւելեալ գումար պահանջուի, մերժեցէք վճարել եւ անմիջապէս համաժողովի Իջեւանի բաժանմունքին տեղեկացուցէք։

11) Եթէ ձեր պանդոկի սենեակին վերաբերեալ խնդիր մը ծագի, Իջեւանի բաժանմունքին տեղեկացուցէք մինչ համաժողովի վայրն էք, որպէսզի կարենան ձեզի օգնել։

◼ Կամաւոր սպասարկութիւն։ Ոեւէ անհատ, որ կը փափաքի ասիկա ընել, համաժողովին մէջ պէտք է տեղեկացնէ Կամաւոր սպասարկութեան բաժանմունքին։ Այն երեխաները, որոնք 16 տարեկանէն վար են, կրնան բաժին բերել, գործելով ծնողի մը կամ խնամակալի մը կամ անոնցմէ մէկուն հաւանութիւնը ունեցող չափահասի մը ուղղութեան ներքեւ։

[Շրջանակ՝ էջ 6]

Հրաւիրագիրը ինչպէ՞ս պիտի ներկայացնենք

Թաղամասը ծածկելու համար, թերեւս հարկ ըլլայ որ հակիրճ կերպով խօսինք։ Կրնանք հետեւեալին նման բան մը ըսել. «Բարեւ. այս հրաւիրագիրը համայն աշխարհի մէջ կը բաշխենք։ Ահաւասիկ ձեր հրաւիրագիրը։ Անոր մէջ յաւելեալ մանրամասնութիւններ պիտի գտնէք»։ Խանդավառ եղիր։ Շաբաթավերջերուն, այս բաշխումին մասնակցելու ատեն, եթէ յարմար է, պէտք է նաեւ պարբերաթերթերը առաջարկես։