Դուն օժանդակ ռահվիրայութիւն պիտի ընե՞ս
1. Յիշատակատօնի շրջանը ինչո՞ւ յարմար ժամանակ է մեր ծառայութիւնը ընդարձակելու։
1 Յիշատակատօնի շրջանը յարմար ժամանակ է մեր ծառայութիւնը ընդարձակելու։ Այդ ժամանակ, մենք կը խոկանք Եհովայի մեծ սիրոյն վրայ, թէ ան ինչպէ՛ս իր Որդին տուաւ որպէս փրկանք (Յովհ. 3։16)։ Ասիկա մեր սիրտը երախտապարտութեամբ կը լեցնէ, եւ մեր փափաքը կ’աւելցնէ ուրիշներուն պատմելու Եհովայի մասին, թէ ան ի՛նչ կ’ընէ մարդկութեան համար (Եսա. 12։4, 5. Ղուկ. 6։45)։ Այս ժամանակաշրջանին, նաեւ կ’ունենանք մասնաւոր արշաւ մը՝ ծանօթներ ու թաղամասի մարդիկը հրաւիրելու, որ մեզի հետ Յիշատակատօնին ներկայ գտնուին։ Անկէ ետք, կը ջանանք ներկայ գտնուողներուն հետաքրքրութիւնը աւելցնել։ Ուստի պիտի ընդարձակե՞ս ծառայութիւնդ՝ օժանդակ ռահվիրայութիւն ընելով մարտ, ապրիլ կամ մայիս ամիսը։
2. Ի՞նչը յատկապէս մարտ ամիսը յարմար ամիս մը կը դարձնէ օժանդակ ռահվիրայութիւն ընելու համար։
2 Մարտ ամիսը մասնայատուկ դարձուր։ Յատկապէս մարտ ամիսը յարմար ատեն պիտի ըլլայ օժանդակ ռահվիրայութիւն ընելու։ Դիմումնագիր ներկայացնողները կրնան ընտրել կա՛մ 30 եւ կամ 50 ժամ։ Եթէ շրջանային տեսուչին այցելութիւնը մարտ ամսուան զուգադիպի, օժանդակ ռահվիրաները կրնան կանոնաւոր եւ մասնաւոր ռահվիրաներու ժողովին ներկայ ըլլալ՝ լման ժամանակով։ Յիշատակատօնը տեղի պիտի ունենայ երեքշաբթի 26 մարտ 2013–ին, իսկ հրաւիրագիրներու արշաւը պիտի սկսի մարտ 1–ին. ուստի արշաւին օրերը նախորդ տարիներէն աւելի են։ Ասկէ զատ, մարտ ամիսը հինգ լման շաբաթավերջեր ունի։ Ուստի ինչո՞ւ լրջօրէն չմտածես, որ այս ամիսը տարուան ամէնէն մասնայատուկ ամիսը դարձնես, եթէ կարելիութիւնը ունիս։
3. Ինչպէ՞ս կրնանք ծրագիրներ ընել մեր ծառայութիւնը աւելցնելու։
3 Հիմա ծրագրէ։ Հիմա է ժամանակը որ յայտագիրդ աչքէ անցընես եւ հարկ եղած ճշդումները ընես, որ կարենաս ռահվիրայութիւն ընել։ Ընտանեկան համագործակցութիւնը կարեւոր է. ուստի Ընտանեկան պաշտամունքի ատեն ժամանակ տրամադրէ ընտանիքիդ նպատակակէտերը քննարկելու եւ յայտագիր մը պատրաստելու (Առ. 15։22)։ Եթէ կարող չես օժանդակ ռահվիրայութիւն ընելու, մի՛ վհատիր։ Կրնա՞ս յայտագիրդ ճշդել, որպէսզի աւելի երկար ծառայես այն օրերը որ արդէն դաշտի ծառայութեան կ’ելլես։ Կրնա՞ս շաբթուան ընթացքին յաւելեալ օր մը եւս ծառայութեան մասնակցիլ։
4. Մարտ, ապրիլ եւ մայիս ամիսներուն ընթացքին, մեր գործունէութիւնը աւելցնելը ի՞նչ օգուտներ պիտի բերէ։
4 Մինչ մեր գործունէութիւնը կ’աւելցնենք մարտ, ապրիլ եւ մայիս ամիսներուն ընթացքին, նաեւ աւելցուցած կ’ըլլանք մեր ուրախութիւնն ու գոհունակութիւնը, որոնք յառաջ կու գան՝ Եհովայի ծառայելէն եւ ուրիշներու տալէն (Յովհ. 4։34. Գործք 20։35)։ Աւելի կարեւորը, մեր անձնազոհ ջանքերը Եհովան պիտի ուրախացնեն (Առ. 27։11)։