Այս Յիշատակատօնի շրջանը ուրախալի դարձուր
1. Այս Յիշատակատօնի շրջանին մեր ուրախութիւնը աւելցնելու մէկ կերպը ի՞նչ է։
1 Կ’ուզե՞ս մարտ, ապրիլ եւ մայիս ամիսներուն ընթացքին ուրախութիւնդ աւելցնել։ Ասիկա ընելու մէկ կերպն է՝ ծառայութիւնդ ընդարձակել, եւ եթէ կարելիութիւնը կայ, օժանդակ ռահվիրայ ըլլալ։ Այս մէկը ինչպէ՞ս ուրախութիւնդ պիտի աւելցնէ։
2. Երբ մեր ծառայութիւնը ընդարձակենք, մեր ուրախութիւնը ինչպէ՞ս պիտի աւելնայ։
2 Ուրախութիւնդ աւելցուր։ Եհովան մեզ այնպէս մը ստեղծեց, որ զինք պաշտելէն ուրախութիւն եւ գոհունակութիւն ձեռք ձգենք, մինչ մեր բնածին հոգեւոր կարիքը կը լեցնենք (Մատ. 5։3)։ Ան նաեւ մեզ այնպէս մը ստեղծեց, որ կարենանք ուրիշներուն տալով ուրախութիւն զգալ (Գործք 20։35)։ Ծառայութիւնը մեզի թոյլ կու տայ, որ այս երկուքը իրագործենք,– թէ՛ Աստուած պաշտել եւ թէ մարդոց օգնել։ Եւ տրամաբանական է, թէ որքա՛ն աւելի ծառայութեան մասնակցինք, այնքա՛ն աւելի ուրախութիւն ձեռք կը ձգենք։ Ասկէ զատ, որքա՛ն աւելի քարոզենք, այնքա՛ն աւելի ատակ քարոզիչներ կրնանք դառնալ։ Եւ մինչ կը հմտանանք, մեր ինքնավստահութիւնը կ’աւելնայ, իսկ մեր ջղագրգռութիւնը կը նուազի։ Ա՛լ աւելի պատեհութիւններ պիտի ունենանք վկայութիւն տալու եւ Աստուածաշունչի ուսումնասիրութիւններ սկսելու։ Այս բոլորը ծառայութիւնը ա՛լ աւելի հաճոյալի կը դարձնեն։
3. Ինչո՞ւ յատկապէս մարտ եւ ապրիլ ամիսները յարմար պիտի ըլլան օժանդակ ռահվիրայութիւն ընելու համար։
3 Յատկապէս մարտ եւ ապրիլ ամիսները յարմար պիտի ըլլան օժանդակ ռահվիրայութիւն ընելու, քանի որ այդ ամիսները կրնանք ընտրել ծառայել կա՛մ 30 եւ կամ 50 ժամ։ Ասկէ զատ, շաբաթ մարտ 22–էն սկսեալ՝ մինչեւ Յիշատակատօնին օրը երկուշաբթի ապրիլ 14, հաճոյալի արշաւի մը պիտի մասնակցինք ուրիշները հրաւիրելու, որ Յիշատակատօնին ներկայ գտնուին։ Ժողովքները պիտի խանդավառուին, երբ շատեր «մէկ սրտով» աշխատին յատկացուած ժամանակուան մէջ, կարելի եղածին չափ շա՛տ թաղամասեր ծածկելու համար (Սոփ. 3։9)։
4. Եթէ կ’ուզենք օժանդակ ռահվիրայ ըլլալ, ի՞նչ պէտք է ընենք։
4 Հիմակուընէ՛ նախապատրաստուէ։ Եթէ տակաւին չես նախապատրաստուած, ժամանակ տրամադրէ յայտագիրդ վերաքաղ ընելու եւ տես թէ ի՛նչ փոփոխութիւններ կրնաս ընել, որպէսզի մէկ կամ քանի մը ամիսներու ընթացքին ծառայութիւնդ ընդարձակես։ Զայն աղօթքի նիւթ դարձուր (Յակ. 1։5)։ Անոր մասին խօսակցէ ընտանիքիդ հետ, ինչպէս նաեւ՝ ժողովքիդ կարգ մը անդամներուն հետ (Առ. 15։22)։ Թերեւս նկատես, թէ հակառակ վատառողջութեան կամ լիաժամ աշխատանքիդ, դո՛ւն ալ կրնաս օժանդակ ռահվիրայութեան յառաջ բերած ուրախութիւնը վայելել։
5. Եթէ այս Յիշատակատօնի շրջանին մեր ծառայութիւնը ընդարձակենք, արդիւնքը ի՞նչ պիտի ըլլայ։
5 Եհովան կ’ուզէ որ իր ծառաները ուրախ ըլլան (Սաղ. 32։11)։ Այս Յիշատակատօնի շրջանին, եթէ մեր ծառայութիւնը ընդարձակելու ջանք թափենք, ոչ միայն մենք աւելի պիտի ուրախանանք, հապա նաեւ՝ մեր սիրելի երկնաւոր Հայրը (Առ. 23։24. 27։11)։