Անմիջապէս գործի անցէք

Մեր վերածրագրուած կայքը մատչելի դառնալէն ի վեր, առցանց ուսումնասիրութեան խնդրանքներու թիւը ապշեցուցիչ կերպով բարձրացած է։ Ասկէ զատ, խնդրագիրներ ղրկուած են հանրային վկայութեան նոր մեթոտներուն շնորհիւ։ Ասոնք ստանալէ ետք, մասնաճիւղը կարելի եղածին չափ արագօրէն քայլեր կ’առնէ։ Օրինակ, եթէ հետաքրքրուած անհատ մը առցանց ուսումնասիրութիւն խնդրէ, անոր թաղամասի երէցները միայն երկու օրուան մէջ մասնաճիւղէն նշմար մը կը ստանան։ Բայց դաշտի տեղեկագիրները ցոյց կու տան, թէ շաբաթներ ոչ ոք կապ պահած է այս հետաքրքրուած անհատներէն ոմանց հետ։ Ինչպէ՞ս կրնանք վստահ ըլլալ որ հարկ եղած օգնութիւնը կը տրուի, առաջ որ անհատին հետաքրքրութիւնը պաղի (Մար. 4։14, 15)։

Եթէ թաղամասիդ մէջ չապրող անհատ մը հետաքրքրութիւն ցուցաբերէ, անմիջապէս լեցուր Հաճեցէք այցելել (S-43) պատճէնը եւ զայն տուր քարտուղարին՝ յաջորդ ժողովին կամ անկէ առաջ։ Ապա, քարտուղարը պէտք է մէկ կամ երկու օրուան մէջ տեղեկութիւնը յարմար ժողովքին փոխանցէ կամ մասնաճիւղին ուղարկէ, գործածելով՝ jw.org կայքին Ժողովք բաժինը։ Երէցները պէտք է կանոնաւո՛րաբար կայքը ստուգեն։ Եթէ անոնք անհատի մը այցելելու նշմար մը ստանան, պէտք է շուտով քայլեր առնեն։ Այն հրատարակիչը, որմէ կը խնդրուի այդ անհատին այցելել, պէտք է այդ մէկը նախապատուութիւն սեպէ։ Իսկ եթէ հետաքրքրուած անհատը տունը չգտնես, կրնաս նոթ մը ձգել՝ նշելով հաղորդակցութեան միջոցներդ։