2015–ի Աստուածպետական ծառայութեան դպրոցը մեզի կ’օգնէ մեր ուսուցումը բարելաւելու

¹ Սաղմոսերգու Դաւիթ գրեց. «Բերնիս խօսքերը ու սրտիս խորհուրդը քու առջեւդ ընդունելի ըլլան, ո՛վ Տէր, իմ վէ՛մս ու փրկի՛չս» (Սաղ. 19։14)։ Մենք ալ կ’ուզենք որ մեր խօսքերը Եհովայի ընդունելի ըլլան, քանի որ կ’արժեւորենք ճշմարտութեան մասին խօսելու մեր առանձնաշնորհումը, թէ՛ ժողովքին մէջ եւ թէ ծառայութեան մէջ։ Աստուածպետական ծառայութեան դպրոցը կերպերէն մէկն է, որուն միջոցաւ Եհովան մեզ կը մարզէ ծառայութեան համար։ Աշխարհի տարածքին, այս մարզումը տեղի կ’ունենայ ամէն շաբաթ աւելի քան 111,000 ժողովքներու մէջ։ Անիկա օգնած է համայն աշխարհի եղբայրներուն եւ քոյրերուն,– որոնք տարբեր ենթահողերէ կու գան,– որ բարի լուրին ատակ եւ որակեալ քարոզիչներ ըլլան եւ կարենան համոզումով, փափկանկատութեամբ եւ համարձակութեամբ ուսուցանել (Գործք 19։8. Կող. 4։6)։

² 2015–ի դպրոցի յայտագիրը կը պարփակէ նիւթեր Դիտարան–էն, Անոնց հաւատքը ընդօրինակենք գիրքէն, Աստուծոյ Խօսքը ի՛նչ կ’ըսէ գրքոյկէն, Խորաթափանց ակնարկ Սուրբ Գրութիւններուն վրայ գիրքի Ա. հատորէն եւ Ուշադրութիւն ընծայեցէ՛ք Դանիէլի մարգարէութեան գիրքէն։ Ասկէ զատ, «Աչքառու կէտեր»ուն եւ թիւ 1 նշանակումին ժամանակին նկատմամբ ճշդումներ եղած են։ Այս փոփոխութիւնները եւ դպրոցի բաժիններուն ներկայացման կերպին նկատմամբ տրուած ցուցմունքները նկատի պիտի առնենք յաջորդ պարբերութիւններուն մէջ։

³ Աչքառու կէտեր։ Այս մասին մէջ բաժին բերող եղբայրները երկու վայրկեան ունին Աստուածաշունչի շաբաթական ընթերցանութենէն մէկ հետաքրքրական եւ գործնական կէտ նկատի առնելու։ Եթէ անոնք լաւ պատրաստուին, պիտի կարենան այդ երկու վայրկեանուան մէջ արժէքաւոր կէտ մը բաժնել ժողովքին հետ։ Անկէ ետք, ժողովքը վեց վայրկեան ունի համառօտ (30 երկվայրկեան կամ նուազ) հետաքրքրաշարժ մեկնաբանութիւններ ներկայացնելու Աստուածաշունչի շաբաթական ընթերցանութենէն։ 30 երկվայրկեանի մէջ իմաստալից մեկնաբանութիւններ ընելը պատրաստութիւն եւ ինքնակրթութիւն կը պահանջէ, բայց ասիկա մեզի համար լաւ մարզում է։ Անիկա նաեւ կ’օգնէ որ ուրիշներ ալ ժամանակ ունենան մեկնաբանելու այն կէտերուն մասին, որոնք սորված են անձնական փնտռտուքներու առ ի արդիւնք։

⁴ Թիւ 1 նշանակում։ Այս բաժինին յատկացուած ժամանակը նուազած է եւ եղած է՝ երեք վայրկեան կամ նուազ։ Եղբայրը աւելի քիչ համարներ պիտի ծածկէ։ Անոնք որոնք այս նշանակումը կը ստանան, պէտք է քանի մը անգամ զայն բարձրաձայն կարդան եւ կարեւորութիւն տան պատշաճ առոգանութեան եւ սահունութեան, որպէսզի գաղափարները հասկնալով կարդան։ Եհովայի ամբողջ ժողովուրդը պէտք է ջանայ լաւ կարդալ, քանի որ ընթերցանութիւնը մեր պաշտամունքին մէջ կարեւոր դեր մը կը խաղայ։ Որքա՜ն կ’ուրախանանք որ մեր զաւակներէն շատեր լաւ կը կարդան։ Որքա՜ն գովելի են այն ծնողները, որոնք սիրով ջանք կը թափեն՝ օգնելու համար իրենց զաւակներուն, որ լաւ ընթերցողներ դառնան։

⁵ Թիւ 2 նշանակում։ Ասիկա 5 վայրկեաննոց ներկայացում մըն է, որ քրոջ մը պիտի նշանակուի։ Նշանակուած բնաբանը պէտք է գործածուի։ Երբ նշանակումը հիմնուած է Աստուածաշունչի անձնաւորութեան մը վրայ, աշակերտուհին պէտք է նշանակուած բնաբանը զարգացնէ, յարմար համարներ ընտրէ եւ ցոյց տայ թէ ի՛նչ կարելի է սորվիլ Աստուածաշունչի անձնաւորութեան օրինակէն։ Իսկ երբ նշանակումը հիմնուած չէ Աստուածաշունչի անձնաւորութեան մը վրայ, աշակերտուհին պէտք է կիրարկէ իրեն նշանակուած բնաբանը դաշտի ծառայութեան որոշ մէկ երեսակին, որ իրապաշտ ու գործնական է եւ կը յարմարի ժողովքի թաղամասի կարիքներուն։ Նիւթին հետ կապ ունեցող յաւելեալ համարներ ալ կրնան պարփակուիլ։ Դպրոցի տեսուչը մէկ օգնական պիտի նշանակէ։

⁶ Թիւ 3 նշանակում։ Ասիկա 5 վայրկեաննոց ներկայացում մըն է, որ կրնայ եղբօր մը կամ քրոջ մը նշանակուիլ։ Երբ քրոջ մը նշանակուի, նիւթը պէտք է ներկայացուի թիւ 2 նշանակումին մեթոտով։ Երբ եղբօր մը նշանակուի նիւթ մը, որ հիմնուած է Աստուածաշունչի անձնաւորութեան մը վրայ, անիկա պէտք է տրուի որպէս ունկնդիրներուն ուղղուած դասախօսութիւն։ Աշակերտը պէտք է նշանակուած բնաբանը զարգացնէ, յարմար համարներ ընտրէ եւ ցոյց տայ, թէ ի՛նչ կարելի է սորվիլ Աստուածաշունչի անձնաւորութեան օրինակէն։

⁷ Թիւ 3 նշանակումին մէջ նոր երեսակ մը եղբայրներուն համար։ Երբ եղբօր մը նշանակուի նիւթ մը, որ հիմնուած չէ Աստուածաշունչի անձնաւորութեան մը վրայ, անիկա պէտք է ներկայացուի որպէս ընտանեկան ուսումնասիրութիւն կամ դաշտի ծառայութեան ցուցադրութիւն։ Յաճախ դպրոցի տեսուչը կը նշանակէ օգնականն ու մատուցման կերպը։ Օգնականը պէտք է ըլլայ աշակերտին ընտանիքին մէկ անդամը կամ եղբայր մը՝ ժողովքին մէջ։ Կրնան պարփակուիլ Աստուածաշունչի սկզբունքները շեշտող յաւելեալ համարներ, որոնք նիւթին հետ կապ ունին։ Ատեն–ատեն երէցի մը կրնայ տրուիլ այս բաժինը։ Երէցները կրնան իրե՛նք ընտրել իրենց օգնականն ու մատուցման կերպը։ Անկասկած ժողովքը պիտի քաջալերուի՝ տեսնելով թէ երէցները իրենց սորվեցնելու արուեստը կը ցուցադրեն ընտանիքի անդամի մը կամ այլ եղբօր մը հետ։

⁸ Խրատներ։ Թիւ 1, թիւ 2 եւ թիւ 3 նշանակումներէն ետք, դպրոցի տեսուչը պէտք է երկու վայրկեան տրամադրէ գովելու, ինչպէս նաեւ շինիչ խրատ տալու Աստուածպետական ծառայութեան դպրոցի կրթութենէն օգտուեցէք գիրքէն։ Երբ դպրոցի տեսուչը աշակերտին նիւթը կը յայտարարէ, ան պիտի չնշէ անոր աշխատելիք խօսակցութեան յատկութիւնը։ Աշակերտին ներկայացումէն ետք դպրոցի տեսուչը պէտք է անկեղծօրէն գովէ աշակերտը, յայտարարէ անոր աշխատելիք խօսակցութեան յատկութիւնը եւ նշէ, թէ ինչո՛ւ ատիկա ազդու էր կամ ազնուօրէն բացատրէ թէ ինչո՛ւ աշակերտին համար օգտակար պիտի ըլլայ, որ այդ մասնայատուկ կէտին աւելի՛ ուշադրութիւն ընծայէ։

⁹ Աշակերտին խրատի թղթիկը կը գտնուի Ծառայութեան դպրոց գրքին մէջ՝ էջ 79-81։ Աշակերտը բաժին տալէ ետք, դպրոցի տեսուչը յարմար նշմարներ պիտի ընէ անոր գիրքին մէջ եւ առանձնաբար աշակերտէն ստուգէ, թէ նշանակուած խրատին առնչուող վարժութիւնը կատարեց կամ ոչ։ Ան կրնայ աշակերտը գովել եւ անոր յաւելեալ շինիչ խրատ տալ ժողովէն ետք կամ ուրիշ ատեն։ Աշակերտին հանդէպ ցուցաբերուած անձնական հետաքրքրութիւնը պէտք է նկատուի պատեհութիւն մը՝ իրեն օգնելու որ հոգեւորապէս յառաջդիմէ (Ա. Տիմ. 4։15)։

¹⁰ Եթէ աշակերտին բաժինը յատկացուած ժամանակէն աւելի առնէ, դպրոցի տեսուչը կամ իր օգնականը պէտք է զգոյշ ըլլայ որ խոհեմ կերպով նշան մը տայ թէ ժամանակը վերջացած է։ Աշակերտը պէտք է նշանը նկատէ եւ իր նախադասութիւնը ամբողջացնելով ամպիոնէն վար իջնէ (տե՛ս Ծառայութեան դպրոց գիրքը էջ 282, պարբ. 4)։

¹¹ Բոլոր անոնք, որոնք պահանջներուն գոհացում կու տան կը քաջալերուին որ Աստուածպետական ծառայութեան դպրոցին մէջ արձանագրուին (տե՛ս Ծառայութեան դպրոց գիրքը էջ 282, պարբ. 6)։ Այս դպրոցին հայթայթած կրթութիւնը Եհովայի ժողովուրդը կարող դարձուցած է, որ Թագաւորութեան բարի լուրը քարոզէ եւ սորվեցնէ համոզումով, յարգանքով եւ սիրով։ Անկասկած Եհովան կը հաճի գովաբանութիւն ստանալով բոլոր անոնցմէ՝ որոնք աստուածպետական կրթութենէն շա՜տ կ’օգտուին (Սաղ. 148։12, 13. Եսա. 50։4)։

[Մէջբերում՝ էջ 5]

Յառաջդիմէ՛ խրատը ընդունելով եւ կիրարկելով