Յիշատակատօնին համար կը պատրաստուի՞ս

Ք.Ե. 33–ի նիսան 13–ին, Յիսուս գիտէր թէ նախքան մահապատիժի ենթարկուիլը միայն մէկ գիշեր ունէր, որ իր մտերիմ ընկերակիցներուն հետ անցընէր։ Ան անոնց հետ իր վերջին Պասեքը պիտի տօնէր եւ ապա պիտի հաստատէր նոր տօնակատարութիւն մը՝ Տէրունական ընթրիքը։ Վստահաբար այսպիսի կարեւոր առիթ մը պատրաստութիւն պահանջեց։ Անոր համար, ան Պետրոսն ու Յովհաննէսը ղրկեց որ պատրաստութիւններ տեսնեն (Ղուկ. 22։7-13)։ Անկէ ի վեր, ամէն տարի այն քրիստոնեաները որոնք կը փափաքին Յիշատակատօնը տօնակատարել՝ նախապատրաստուիլը անհրաժեշտ կը սեպեն (Ղուկ. 22։19)։ Ի՞նչ հիմնական բաներ պէտք է ընենք, ապրիլ 3–ի Յիշատակատօնին պատրաստուելու համար։

Երէցներու կողմէ պատրաստութիւն.

• Կարգադրութիւններ ըրէք գործածելու Թագաւորութեան սրահը կամ այլ յարմար վայր մը։ Անիկա պէտք է ունենայ բաւարար աթոռներ, լուսաւորութիւն եւ օդափոխութեան դրութիւն։ Կարգադրութիւններ ըրէք որ վայրը կանխաւ ամբողջովին մաքրուի։

• Ընտրեցէք ատակ դասախօս մը, ատենապետ մը եւ խորհրդանիշներուն համար աղօթք մատուցանող եղբայրներ։

• Եթէ մէկէ աւելի ժողովքներ նոյն վայրը պիտի գործածեն, կարգադրութիւններ ըրէք ժողովին ժամերը յարմարցնելու, ինչպէս նաեւ՝ շէնքն ու կառատունը մտնելու եւ ելլելու։

• Ընտրեցէք հիւրընկալներ եւ խորհրդանիշները հրամցնողներ, եւ անոնց օգնեցէք որ կազմակերպուած ըլլան։

• Պատրաստեցէք յարմար խորհրդանիշները, ինչպէս նաեւ՝ ամաններ, գինիի բաժակներ, յարմար սեղան ու սեղանի ծածկոց։

Հրատարակիչներուն կողմէ պատրաստութիւն.

• Կարգադրութիւններ ըրէք որ Յիշատակատօնի հրաւիրագիրները բաշխելու արշաւին լիովին մասնակցիք։

• Ցանկ մը պատրաստեցէք հրաւիրելու Աստուածաշունչի աշակերտներ, ազգականներ, դպրոցակիցներ, գործակիցներ եւ այլ ծանօթներ։

• Յիշատակատօնին վերաբերեալ Աստուածաշունչի ընթերցանութիւնը կարդացէք եւ անոր վրայ խոկացէք։

• Յիշատակատօնին կանուխ եկէք, որպէսզի հիւրերը դիմաւորէք։